Matíó 28

Nɛhɔŋɔa nɛ́ Yə́susu

(Mə́l 16.1-8; Lúk 24.1-11; Yɔh 20.1, 11-18)

1Əlimə yɛ hinó hɛ́ Sábatɛ, ɔ ɛsɔ́mbalɛ́ ɔyáyáka wɔ́ buɔsɛ́ bɔ́ indílí, Malɛ́á á milóní yɛ makatala, na yɛ́mɔtɛ́ Malɛ́á, bá ná hɔalɛ́na, bá ná ndásá ɔ munyə́ undəsiəlínə. 2Ɔ yɛ́táyɛ́ ikúílí, misí yɛ́ ná ndandɛ́málá mɔŋɛ́ŋa, áŋgɛlɛ yɛ Isə́lúkú a ná húlínə́ ɔ nɔɔ́mɛná, a ná ilimə́limə́ yɛ́ muɔkɔ buŋúlúə́kíə́, a ná tuə́nə ɔ muɔkɔ ɔmbáŋá. 3Yɛ́táyɛ́ áŋgɛlɛ, a siəkinənə ɛ́sɛ́á ɛmɔanyama, bɛ́áyɛ́á bɛlɛŋa bɛ́ nɔmaka ɛ́sɛ́á maláná. 4Bɔkɔ́lɔ́ma bɔ́ ná batáta itíə́, bá ná lúmə́ ɔ ɔndandɛma, bá ná híánáká ɛ́sɛ́á biwə́wə́. 5Mba, yɛ́ɛ́yɛ́ áŋgɛlɛ a ná bəəndú lɛ́na a sɛ́á: «Uwənú, nɔ lɛ kɔ́lɔ́má bɔ́ányɛ, mɛ ndɔ manya muɛsɛ ɔwá a Yə́susu nɔ ndɔ siə, wɛ́ɛ́yɛ́ ɔwá bá ná ɔ́mɔ́kɛ́na ɔ ɔmbásá. 6A lɛ báá háha, ɔ taká, a ná hɔŋɔ́á ɛ́sɛ́á a ná nɔ́yɛ́ laa. Nɔ́ sɔ́nɔ, nɔ́ siəlínə́ ɔ ɛbɔ́ka ɔyɛ́á bá ná wə́yíə́ umimə siəníníə́. 7Nɔ́ ákáná tɔfá, nɔ́ ká báyɛ́á bɔkɔ́nɛna lɛ́na nɔ sɛ́á: “A ná hɔŋɔ́á ɔ ətíə́ yɛ́ bəwə́nú, a ná buəkínə ɔ Kalɛ́lɛa, ɔ umə́ nɔ ŋɔ wɛɛ́ya siəkinə.” Ə́yə́ə́, Mɛaŋɔ́á mɛ ndɔ bənú nɔ́yɛ́ lɛ́na!» 8Bá ná hɔalɛ́ná tɔfá ɔ munyə́ mɛlɛ́má undúə́tɔ́ na bɔkɔ́lɔ́ma, na nibílə́nə́ nɛŋɛ́ŋa. Bá ná ákáná mɔlɛ́lá á bɔkɔ́nɛna busíə́ ɔ yɛ́táyɛ́ imbə́nú ɔkalɛ́na. 9Tɛ́tɛ́á yɛ ikúílí, bááyɛ́ bá ná Yə́susu yámá ɔsákɔna ɔ uwəbú nɛnyáná, a sɛ́á: «Mɛ ná ənú bíhólíə́.» Bá ná bɛ́nyálɛ́la ɔ ɔwayɛ́ ɛmɛ́ŋɛ́, bá ná wɛɛ́ya kɔɛ́na ɔ makɔlɔ́, bá wɛɛ́ya nyamáka. 10Nɔ́yɛ́, Yə́susu a sɛ́á: «Nɔ lɛ kɔlɔma, nɔ́ ákáná nɔ́ ká bámɛ́á bənínyə́ lɛ́na ɔwá, bá ákáná ɔ Kalɛ́lɛa; ɔ umə́ bá ŋɔ mɛaŋɔ́á siəkinə.» 11Ikúílí bááyɛ́ bəəndú bá ná báá ɔ wákaka, bɔ́mɔtɛ́ bɔkɔfɔnɛa ɔbá bá ná báá bá ndɔ munyə́ táta, bá ná tilə́ ɔ bətínə́ ɔ bisə́lúkú bɛ́ bətitiəmahánɛna ɔ bɛkɔa bikimə ɔ kəmənyə́síə́ ɔbɛ́á bɛ́ ná bɛ́kɛ́áka. 12Ɛnaka bisə́lúkú bɛ́ bətitiəmahánɛna na bɛnatákɛ bɛ́ Bɛyútɛnɛ bá kɔtákána, bá ná ɔ́kɔnɔ; bá ná bɔkɔfɔnɛa bɛcácɔ́ índíə́ biəŋí, bá sɛ́á: 13«Nɔ ŋɔ laa náana nɔ sɛ́á: “Báyɛ́á bɔkɔ́nɛna bá ná ndá wə́yíə́ umimə óbó nəbulúə́ bəsú ɔ hinó.” 14Ábá mɔmanɛna a ná bɔ́táyɛ́ bɔkɔa ɔ́kɔ́, bəsú tɔ ŋɔ manya nəníə́ tɔ wɛɛ́ya nífúnə́kínə́ mbá nɔ sɔ́ ŋɔ fínə ɔ məsə́kə.» 15Bɔkɔfɔnɛa bá ná bɛ́ɛ́yɛ́ bɛcácɔ́ ɛ́ta, bá ná kɛ́áká ɛ́sɛ́á bá ná bəə́bú lakɛ́na. Bɔ́táyɛ́ bɔkɔa bɔ́ ná yambána ɔ ətíə́ yɛ Bɛyútɛnɛ ɔ ndafámáká ɔ yɛ́ɛyɛ niɔfɛ́nɛ.

Yə́susu a nɔ́ bínə́niə ɔ ɔwayɛ́ bɔŋgəlimə

(Mə́l 16.14-18; Lúk 24.36-49; Yɔh 20.19-23; Bɛn 1.6-8)

16Nɔ́yɛ́, nɛ́ɛ́yɛ́ niómo nɛ́ bɔkɔ́nɛna na ɔmɔtɛ́ bá ná ákáná ɔ Kalɛ́lɛa ɔ ɔmáá ɔmbáŋá ɛbɔ́ka ɔyɛ́á Yə́susu a ná bəə́bu manɛ́na. 17Ɛnaka bá káfámá, bá ná wɛɛ́ya yámá, bá ná lúmə́ ɔ ɔwayɛ́ ɔnyama. Mba, bɔ́mɔtɛ́ ɔ uwəbú ətíə́ bá ɛ́nyáka. 18Yə́susu a ná bɛ́nyálɛ́la ɔ uwəbú ɛmɛ́ŋɛ́, a sɛ́á: «Huɛlɛ́ a ná mɛaŋɔ́á iŋgínə́ yɛ nɛmanɛna nikimə índíə́ ɔ misí na ɔ nɔɔ́mɛná. 19Nɔ́ ákáná nə́ə ɔ bɛndɔ bá mɔnɔŋɔ məkimə, bá bámɛ́nɛ́ná bámɛ́á bɔkɔ́nɛna; nɔ́ bəə́bú nɛsɔa índíə́kínə, ɔ niínyə nɛ́ Isə́, na nɛ́ Mɔná, na nɛ́ Umbúínyi Mɔnaŋanaŋa; 20nɔ́ bəə́bu bɛkɔa bikimə úkúnə́kíə́ na bɛɛ́ta ɔbɛ́kɛna ɔbɛ́á mɛ ná bənú mánɛ́na. Nɔ́ nɔ́yɛ́ manyá ɔwá, mɛ báka na bənú mɔɔsɛ́ məkimə ɔkafámáká ɔ nisúki nɛ́ misí.»

Currently Selected:

Matíó 28: tvu

Highlight

Copy