Motíosi 17
17
Gobénúgie nnyɔ́dɔ gá Yésusu
(Mél 9.2-9; Lók 9.28-36)
1Naá nnyimé ya medúgú mátáanɔ na búmmue, Yésusu go gɔ́lɔ Píele, Sáakɛ na ondimóní Sáŋa, go yáŋɛmɛda nabɔ́ naá giyéŋéŋkée gá ogɔndɔ. 2Yésusu go dómba go bénúgie naá oŋgíso yábɔ́: busío bɛ́hɛ́ bó begime aŋa buisí, bɛla bɛ́hɛ́ púyúŋú puyuŋu aŋa gise#17.2 O bana, go eninye na 1 Píe 1.16-18.. 3Behúúní bá bádadɔ́ go nco teme Mɔ́sɛsɛ na Elíi bá báá go basa, bó oya ŋkanɔ́ na Yésusu. 4Píele go gɔ́lɔ dogálɔ, go oyana Yésusu a amɔ́: «Daadáa, bó lɛ́ bese goŋaá dɛ bɛ́ɛmba háalá. Aáŋa o maamana, tábɛga bincumu bɛ́dadɔ́ háalá: gáhɔ gímmue, gá Mɔ́sɛsɛ gímmue, gá Elíi gímmue.» 5Aŋa a mbaá ŋá a gá gálagala nɔ́ɔnɔ, gigenyigenyi gá nogálámbá gá gɛ́ go bó boɛgɛna. Kanɛ́ naá nogálámbá nɔ́ɔnɔ gadɛ́ɛ, ukelú yó oya yó amɔ́: «Mɔ́ɔnyɔ mɔ́ɔ a lɔ́mɔ́ Moɔnɔ́ bamɛ ba odɛ́má, bó lɔ́mɔ́ nnɔ́ɔlú goŋaá mmo iyide mɔ́ɔ. Mo bódólónyóomú nɔnɔ!» 6Aŋa behúúní bá mbɔɔ́ ɔ́bɔ́ nɔ́ɔnɔ, go dómba go obana mosío go cí, gɛantá gá bofoá gɛ́ báá bó gumbéné. 7Yésusu go báyɛkɛna, go bó bádáfɛna a amɔ́ gáábɔ́ a amɔ́: «Fadɛ́gɛ́na nɔnɔ, no do bɛáa bofoá!» 8Aŋa bá mbaá fedígényée mosío, go ɛ́na goana Yésusu, mɔ́ɔ mokáa. 9Aŋa bá mbaá ŋá bá ná lɛ́ go siisene ogɔndɔ, Yésusu go bó bébégidine a amɔ́: «No do oyáná mɔtɔ boóma bɔ́ɔbɔ bó báá ná nyó ɛ́nɛ́gɛ́ná, gó lama gó ɛ́da héme aŋa Moɔnɔ́ ba mɔtɔ a ná fúfugemú naá begúe.»
Yésusu o oya ŋkanɔ́ na behúúní bɛ́hɛ́ go busío bá Elíi
(Mél 9.11-13)
10Kanɛ́ behúúní go mo úhune bá amɔ́: «Goakɛ́ kanɛ́ muloodio má gicele mó oyamɔ́ mó amɔ́ Elíi a háanana go manɛ go úle o#17.10 O bana, go eninye na Melesíi 3.23.?» 11Yésusu go bó gundie a amɔ́: «Bó lɛ́ mammana, Elíi a háanana go úle, a díliminye buimée. 12Kanɛ́ yɔmɔ́ɔ ŋgaá nyó oyáná mammana caá, Elíi a báá go úle, na gá goŋaá batɔ bá mo lɛnca, bɔ́ɔ bá báá ŋaáa buimée bɔ́ɔbɔ ba mbaá lɛ́gálɛ́gáa go ŋa nɛhɛ́. Nɔ́ɔnɔ gɔ́ɔ bá nó óbigonyomú tɔ́nɔ Moɔnɔ́ ba mɔtɔ.» 13Gɔ́ɔ behúúní bá lɛncamɔ́ goŋaá a mbaá lɛ a bó gálagala go busío bá Sáŋa Begiyuminye.
Yésusu e é éŋúgíe moádɔmbɔ́ ba go nóma giti
(Mél 9.14-29; Lók 9.37-43)
14Aŋa bá mbaá ncó bola mekúígíi na gitúu, mɔtɔ ummue go mo báyɛkɛna, go nco gule enúu go cí, 15a amɔ́: «Daadáa, ɛ́ná moɔnɔ́ bamɛ ba onɔ́mɔtɔ́ mahana; goŋaá o obana aŋa a nóma giti, a gunde ɔ ɔ́bɛgɔnɔ degédegé. Gɛcamɛna giimée o obana naá íyuke ɛ́na naá miimpo. 16Mbúu úle nɛhɛ́ naá behúúní báhɔ, bó báa bó yágɛgɛna go mo éŋugie.» 17Yésusu go gɔ́lɔ dogálɔ a amɔ́: «Ogɛlɛ yá edúu bɛlɔ́kɔ́ gɔnɔ́ na monóŋgólí, nná bɛ́ɛmba nɛnyɔ́ gó ɛ́da héme nikíníi? Nná nyó bénúmitenye gó ɛ́da héme nikíníi? Ŋgúlénéemú nɔnɔ nɛhɛ́ háalá.» 18Kanɛ́ gɛ́hɛ́ go áncɛdɛna gɛgáda gá giliíli, gɛ́ báá húmé naá moádɔmbɔ́, moádɔmbɔ́ go éŋuge hɔ́ɔ na hɔ́ɔ. 19Kɔ́ɔ behúúní bá Yésusu bá mo báyɛkɛnamɔ́, go mo úhune bɔ́ɔ na bɔ́ɔ bá amɔ́: «Ɛkádɛ́ gɛ́ báá ná có legé bɛɛcɔ́ɔ go gɛ́ gúne o?» 20Gɛ́hɛ́ go bó oyana a amɔ́: «Bó lɔ́mɔ́ goŋaá gioliminyo gɛ́nyɔ́ gɛ́ lɛ́ fágɔfágɔ. Mammana ŋgaá nyó oyáná caá, no amɔ́ no bɛa gioliminyo gɛ́ búe aŋa camɔ́ ya motáladɛ#17.20 Gɛ́ búe aŋa camɔ́ ya motáladɛ Camɔ́ ya motáladɛ ɛ lɛ́ kɔ́kɔ́ɔ yɛɛ́gɛdɛgɛdɛ naá camɔ́ iŋkimée., no lɛ́ ba go oyana ogɔndɔ yɔ́ɔyɔ no amɔ́, bálɛ́ga háalá, go ɛ́da héení, yó gɛɛ́ ɛ́dá; boóma bá go nyó suge bó do ná bɛ́ɛmba. [21Kanɛ́, mbɔ́dɔ ya gɛgáda gá giliíli aŋa gɛ́ɛgɛ náana, bá gɛ́ gúnemú goana na mbósógólí na gobécelene manyáanya.»]
Yésusu a á dóógío nigúe nɛ́hɛ́ na púfuge yɛhɛ́ go oŋɛndɔ yá gáandɛ́ɛ
(Mél 9.30-32; Lók 9.43-45)
22Aŋa bá mbaá lɛ bábándɛ́gɛ́náalú naá Gelilée, Yésusu go bó oyana a amɔ́: «Bá ná dúe Moɔnɔ́ ba mɔtɔ go ɛmbɔ́gɔ ya batɔ; 23bá ná mo óna, manɛ́ naá buisí bá gádadɔ́ɔ a ná fúfugemú.» Behúúní bá báa lɛ gó bɛa makánya makɔ́nɔ́ naá odɛ́má yábɔ́.
Gosoa gá muinyí má tásɛ ya Nnyaŋá ya Asaŋa
24Aŋa bá mbɛɛ́ ɛ́dá bola naá Kapɛlɛnahɔ́mɛ, bogólí muinyí má tásɛ go báyɛkɛna Píele bá amɔ́: «Iloodio hɛ́nyɔ́ hɛ́ dɛ soanánáa muinyí má tásɛ, ábɔ#17.24 Go ɛ́na naá kálata ya Gihúmie 30.11-16.?» 25Gɛ́hɛ́ go gundie a amɔ́: «Akɛ́ɛ, a soanana.» Aŋa a mbaá gundé naá nnyaŋá, Yésusu go dóana go mo úhune a amɔ́: «Símono, naá gáhɔ go ɛ́na, mefuŋe má cí má gɔ́lɔnɔmɔ́ muinyí má tásɛ naá baánɛ́ɛ, naá batɔ bá gɛdɔŋɔ#17.25 Naá batɔ bá gɛdɔŋɔ: Gokikilidie gúncoó gó lɔ́mɔ́: Batɔ bá nigúli nábɔ́. lí, naá biinyí o?» 26Gɛ́hɛ́ go gundie a amɔ́: «Naá biinyí.» Yésusu go mo oyana a amɔ́: «Hɔ́ɔlɔ́, batɔ bá gɛdɔŋɔ bá lɛ́ filíi gɔ́gɔ́ɔ. 27Kanɛ́ goŋaá dɛ dɛ bó fáá gokánya naá odɛ́má, ɛ́dá go onɔ́bɔ naá máŋɛ́, hɛɔbɔ́ há busío hɛ́ɛhɛ o gaá ná gumbéné, hɛ́ á álónáamɔ́ nyuudé, o gaá gídé gɛkɔ́ŋɔ gá muinyí kɔ́ɔ. Gɔ́lɔ́ gɛkɔ́ŋɔ gá muinyí moánɛ, go ɛ́da bó fáa go go soa tásɛ yahɔ na yamɛ.»
Currently Selected:
Motíosi 17: YAS
Highlight
Share
Copy
Want to have your highlights saved across all your devices? Sign up or sign in
