मरकुस 10
10
सोडसिट्टिता बारेमते परिसिल्क पूसकींतुर
1पजा येसु अगटाल पेय्सि योर्दन बेरेड दाट्सि यहुदिया एरियाते होत्तोर. अगागुडा लोकुल्क मंदानां मंदां ओनगा जमा आयालय दल्गतुर. अस्के येसु ओना अलवट परकारम ओर्क कराहलय दल्गतोर. 2अगा इच्चुर परिसिल्कगुडा वातुर. वासि येसुना पट्टु हूळानाहाटीं ओन इल्हा पूसकीतुर. “नियम परकारम, वरोर मनकल ओना मुत्तोन होळसिय्या वच्चा?” इत्तुर. 3अस्के येसु ओर्कुन, “मूसाल मीक बद आदेस हीतोर?” इंचि पूसकीतोर. 4अय्ते, “वरोर मनकल सोडसिट्टि हीसि, मुत्तोन होळसियना इंचि मूसाना आदेस मंता,” इंचि ओर येसुन इत्तुर. 5अस्के येसु ओर्कुन इल्हा इत्तोर. “मीवा मनसु बंडालेसीं मत्ताहाटीं मूसाल ई आदेसतुन मीकु रासतोर. 6गानि बस्के अय्ते पेन ई दुनियातुन कीतानो, अस्केन ओर्कुन मांड्सा मुरतळ इल्हा इंचि कीता. 7अदुनहाटींगे मांडसा ओना यावन-बाबन होळसिसि, ओना मुत्तोनतोनि कलियसि मनंतोर. 8ओर इव्वुर उंदे मेंदुल आसि मनांतुर. ओर वेरे-वेरे आयुर गानि उंदे मेंदुल आयुर. 9इल्हा पेने ओर्कुन कल्पताहाटीं मनकल वेरे कियानायो,” इंचि वेहतोर.
10पजा, येसु लोन मत्तस्के इदुना बारेमते सिस्युल्कु मर्रा उंदि मल्का ओन पूसकीतुर. 11अस्के येसु ओर्कु इल्हा वेहतोर, “बोरन्ना ओना मुत्तोन बोगमतनम कारनम तप्पा वेरे कारनमते होळसिसि इंकुंदानतोनि मरमिं आयानय्ते, ओर मोदाटा मुत्तोना विरोदमते बोगमतनम कीताप आंतोर. 12अल्हेने ओक्कला मुत्तो दाना मुय्दोन होळसिसि इंकावरोनतोनि मरमिं आयानय्ते, अद बोगमतनम कीतद आंता.”
येसु सिन्ना पिलाल्कुंक आसिर्वाद हींतोर
13उंदि रोज लोकुल्क ओरा पिलाल्कुनपोर्रो येसु कय इर्सि आसिर्वाद हियना इंचि ओनगा पीसि वातुर, गानि सिस्युल्क ओर्कुन रांगतुर. 14गानि येसु ओर रांगानद हूळसि ओर्कुन इल्हा इत्तोर. “पिलाल्कुन नाहेके वायाहीम्ट, ओर्कुन आपमट. पेनदा राज्येम इसंटोरदे आंद, 15नना मीक निजम वेहंतन, बोरे आयिर पेनदा राज्येमतुन सिन्ना पिलाल्कुनालेसीं स्विकार किय्युर, ओर पेनदा राज्येमते बस्केने होळिया पर्रुर,” इंचि वेहतोर. 16पजा आ पिलाल्कुन एत्कुंचि, ओरा तल्लापोर्रो कय इर्सि आसिर्वाद हीतोर.
सिरमंत मनकल पेनदा राज्येमते होनमळ वेल्ले कस्टम
17येसु अगटाल पेय्सि हर्रि पीसि होननेंके, वरोर मनकल विच्चि वासि काल्कुनपोर्रो अर्सि, “गुरु, निमे बेसतोन आंदिन. बस्केळ्क पिस्सना पिस्वरता वारसदार आयानाहाटीं नना बतल कीते बेस?” इंचि पूसकीतोर. 18अस्के येसु ओन इल्हा इत्तोर, “नाकुन बारि बेसतोर इंतिन? बोरे बेसतोर आयोर, सिराप पेन उंदे बेसतद आंद. 19नीकु पेनदा आदेसकु अय्ते एरपाटे मंतां: बोने हव्कुमा, बोगमतनम कियमा, दोंगातनम कियमा, आबद्दम गवाइ हियमा, इंकावरोन पसांचमा, नीवा तल्लुर-बाबोना कदर कीम,” इत्तोर. 20अस्के, “गुरु, नना अय्ते इवन्नि सिन्नास्केटाल कीसेकेन वातन,” इंचि ओर येसुन इत्तोर. 21येसु ओनहेके हूळतोर. पावरम अनपिच्चि, ओन इल्हा इत्तोर. “निहगा उंदि पोल्ले तक्को मंता. होन, निहगा बतल अय्ते मंता अदुन पूरा अम्मिसि, गरिबोर्कुंक तूसि हीम. अस्के नीकु स्वर्गमते दनम दोर्कार, पजा नहगा वासि ना पज्जो ताका,” इत्तोर. 22ओनगा सोम्मु वेल्लेन मत्ताहाटीं, येसुना पोल्ले केंजसि ओना मोकम सिम्मरा आता. पजा दुक्कमते अगटाल पेय्सि होत्तोर.
23अस्के येसु नालुं-मूलां हूळसि सिस्युल्कुन इल्हा इत्तोर. “सिरमंतुल्क पेनदा राज्येमते होळियमळ इत्ते वेल्लेन कस्टम!” इत्तोर. 24-25ओना पोल्लें केंजसि सिस्युल्क इचंत्रम आतुर. गानि येसु मरुंदि मल्का सिस्युल्कुन इल्हा इत्तोर, “पिलाल्कुनिटा! वरोर सिरमंत मनकल पेनदा राज्येमते होळियमळकन्ना लोटापेटा सूदि बोंगाताल होनमळ अल्कगा मनंता,” इत्तोर. 26इद केंजसि सिस्युल्कुंक वेल्लेन इचंत्रम आता. अस्के ओर-ओरे, “अल्हा अय्ते मुक्ति बोर्क दोर्का पर्रंता?” इंचि वळकालय दल्गतुर. 27अस्के येसु ओराहेके हूळसि, “मनकालोरतोनि अय्ते इद आयापर्रो गानि पेनतोनि आंता. बारित्ते पेन अन्नि किया पर्रंता,” इंचि इत्तोर.
28अस्के पत्रु, “हूळा, मोमोट अय्ते मत्तद-हिलवद अन्नि होळसिसि नीवा पज्जो वातोम,” इंचि येसुन इत्तोर. 29-30येसु ओन, “नना निजम वेहांतन. बोरे आयिर नावाहाटीं, बेसता कबुरताहाटीं ओना लोन दारातुन, तम्मुह्क-दादालोर्कुन, अक्कल-हेलाह्कुन, तल्लुर-बाबोन, पिलाल्कुन, बूमि-जेगातुन होळसीतोर. ओन्क इंदकेने नूर अंताल्क एक्को लोन दारा, तम्मुह्क-दादालोर्क, अक्कल-हेलाह्क, तल्लुह्क, पिलाल्क, बूमि-जेगा दोर्कार. ओन्क कस्टाल्क वायानुं गानि वायाना कालमते ओन्क बस्केळ्क पिस्सना पिस्वर दोर्कका मन्नो. 31गानि मुन्ने मत्तोर वेल्लेटुर पज्जो आयानुर, पज्जोटोर मुन्ने आयानुर,” इंचि वेहतोर.
येसु ओना हामुरता बारेमते मर्रा उंदि मल्का वेहंतोर
32-34येसु आनि ओनतोनि मत्तोर येरुसलेमतेके होंचेके मत्तुर. येसु अंटोर्कन्ना मुन्ने मत्तोर. ओना सिस्युल्क इचंत्रमते मत्तुर, ओना पज्जो ताकानुर वेर्रेते मत्तुर. अस्के येसु ओना पन्नेंड सिस्युल्कुन बाजुंक ओसि, “हुळाट, मनम येरुसलेम होंचंतोम, अगा होत्ता पजा मनकना रूपमते पुटतोन नाकुन पेद्दा पेर्मालोर्कुना आनि दर्मसास्त्रम कराहना गुरुल्कुना कय्दे पीसि हियानुर. ओर नाकु हामुर सिक्साता आदेस हीसि, यहुदि आयवोरा कय्दे अप्पजेपनुर. अस्के ओर नाकुन सिडांचनुर, नापोर्रो उस्कानुर, पोट्टेते तन्नानुर, हव्कानुर. गानि मूड रोजकुंक नना मर्रा जीवाते तेदंतन,” इंचि मुन्ने जर्गना बारेमते सिस्युल्कुंक मर्रा वेहतोर.
याकोब, योहान येसुन विनंति कींतुर
35पजा जब्दिना मर्क याकोब आनि योहान येसुनगा वासि, “गुरु, मोमोट बतल अय्ते तल्कंतोम अदुन माहाटीं निमे कियमळ गावाले इंचि मा मनसु मंता,” इंचि इत्तुर. 36येसु ओर्कुन इल्हा इत्तोर. “मीहाटीं नना बतल कियाना इंचि मीवा मनसु मंता,” इंचि पूसकीतोर. 37अस्के ओर, “निमे नीवा महिमाते राज्येम कियनेंके नीवा तिना बाजुंक वरोन, डेमा बाजुंक वरोन उद्दाहीम,” इंचि येसुन इत्तुर.
38गानि येसु ओर्कुन, “मिमेट बतल पूसकीसंतिरो अद मीक तेळियसेक हिल्ले. नना बव कस्टाल्क अय्ते बोगांचना मंता, अवुन मिमेट बोगांचा परकिटा? हिलाकोंटे नना बद बापतिस्मा एतंतनो, अद मिमेट एता परकिटा?” इंचि पूसकीतोर. 39अस्के “हो, मोमोट तयार मंतोम,” इंचि ओर इत्तुर. अस्के येसु ओर्कुन इल्हा इत्तोर, “नना कस्टाल्क बोगांचताप मिमेट बोगांचा परकिट आनि नना एताना बापतिस्मा मिमेटगुडा एता परकिट. 40गानि नावा तिना बाजुंक आनि नावा डेमा बाजुंक उपिच्चना अदिकार नाक हिल्ले. अव जेगां बोराहाटीं अय्ते तयार कीसि मंतांगो, ओरे अगा उद्दंतुर,” इत्तोर.
41ओर इत्ता पोल्लें केंजसि, अगा मत्ता कळमता पदि मंदि सिस्युल्क, याकोब, योहानुना पोर्रो होंग आतुर. 42अस्के येसु सिस्युल्कुन ओना दग्गेरा केय्सि, “यहुदि आयवोरा राजालोर ओरा जीतागाह्कुन, ओरा कय्दा हिळु इर्रालय हूळंतुर, अल्हेने ई दुनियाता पेद्दा मनकालोरगुडा सिन्ना मनकालोरपोर्रो अदिकारम ताकसालय हूळंतुर, इद मीकु एर्के. 43गानि मिमेट मात्रम ओरालेसीं कियानायो. मी लोप्पोटाल बोर अय्ते पेद्दा आयालय हूळांतोरो, ओर मीवा सेवा कियानोर आयापींता. 44अल्हेने मी लोप्पोटाल बोर अय्ते लीडर आंतन इंतोरो, ओर मीवा दासुड आयापींता. 45बारित्ते मनकना रूपमते पुटतोन नना सेवा कियागोटकुनालय वाया हिल्लेन गानि वेरेतोरा सेवा कियालय आनि वेल्लेटोर्कुन पापमताल पेचाहलय ओराहाटीं नावा जीवा हियालय वातन,” इत्तोर.
गुड्डि बरतलमयना कळ्कुंक नदर वायमळ
46पजा येसु, ओना सिस्युल्कु यरिहो सहरते एव्तुर. अगटाल मर्रा पेय्सनेंके लोकुल्कुना पेद्दा मंदा ओरतोनि पेय्सता. तिमाउसना मर्रि बरतलमय इनानोर गुड्डि बिच्चागाड हर्दा पक्काते उद्दिसि मत्तोर. 47नासरेत सहरता येसु इगेटाल होंचेके मंतोर इंचि ओन्क तेळियतस्के ओर, “येसु, दाविद राजाना वंसमतोना! नापोर्रो दया कीम,” इंचि जोरसे वरगेयतोर. 48अस्के वेल्लेटुर लोकुल्क ओन, “चुपचाप मन” इंचि रांगतुर, गानि, “दाविद राजाना वंसमतोना, नापोर्रो दया कीम,” इंचि ओर जोरसे मोत्कुनालय दल्गतोर. 49अस्के येसु आगसि, “ओन केयट,” इंचि इत्तोर. अस्के ओर आ गुड्डिन केय्सि, “दैरनेम इर्रा, येसु नीकुन केयसंतोर तेदा,” इंचि इत्तुर. 50अस्के ओर मुच्कुंचि मत्ता कप्पिडतुन तेंडसि पोहचि बिराना तेदसि येसुनगा वातोर. 51अस्के येसु ओन, “नना नीहाटीं बतल कियना इंचि नी मनसु मंता?” इंचि पूसकीतोर. अस्के, “गुरु, नावा कळ्कुना नदर दिस्सानाल कीम,” इंचि येसुन इत्तोर. 52अय्ते येसु, “निमे होन, नीवा विस्वासमे नीकुन बेस कीता,” इंचि इत्तोर. अल्हा इत्ता इनुडे ओना कळ्कुंक नदर वासि ओरगुडा येसुना पज्जो होत्तोर.
Currently Selected:
मरकुस 10: ESG
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
