मरकुस 13
13
गुळि नासडेम आयाना बारेमते येसु वेहमळ
1येसु गुळिताल पलाते पेय्सि वातस्के ओना सिस्युल्कुनाल वरोर सिस्युड येसुन, “गुरु, हूळा! बच्चोर पेद्दा बंडां, बच्चोर बेसता बंगलां,” इंचि इत्तोर. 2अस्के येसु ओन इल्हा इत्तोर. “बंडाने दोहतव पेद्दा-पेद्दा बंग्लां हूळसेक मंतिन गदा, अव बंडां उंदानपोर्रो उंदि मनाकोंटा कूल्हाना वेला वायनद मंता,” इत्तोर. 3येसु अगटाल पेय्सि गुळिकु मुन्ने मंदना जय्तुन मराकुना गुट्टापोर्रो होंचि उदतोर. ओर ओंटिगा मत्तद हूळसि, पत्रु, याकोब, योहान आनि अंदरियल ओनगा होत्तुर. 4होंचि, “इवन्नि गटनां बस्के जर्गनुं माक वेहा. इंका इव गटनां जर्गना मंता इन्नेंके माकु बतल चिन्ह दिस्सार?” इत्तुर. 5अस्के येसु ओर्कु इल्हा वेहालय दल्गतोर, “मीकुन बोर पसांचकोंटा मिमेट उसारते मंटु. 6नावा पोरोल एतसेके बचुटूरो लोकुल्क वांतुर. वासि, ‘ओन ननाने आंदुन’ इंचि वेल्लेटोर्कुन पसांचंनुर. 7मिमेट लडाईं आनि लडाईना पोल्लेना बारेमते केंजसि वेरियमट, अल्हा तप्पाकोंटा आयानुंगे. गानि दुनियाता आकिर वेला अस्केने वायो. 8देसेमपोर्रो देसेम, राज्येमपोर्रो राज्येम लडाईं आयनुं, वेरे-वेरे जेगाने बूकंपाल्क आयनुं, कर्वु अर्रार. गानि इल्हा आयमळ इत्ते एर पूरालय नोप्पिं सुरुव आताप आंद. 9गानि मिमेट उसारते मंटु. बारित्ते मीकुन पंचादितोरा कय्दे अप्पजेपनुर आनि दर्मसास्त्रम कराहना लोह्कुने ओसि तनानुर. पजा नावा बारेमते गवाइ वेहालय मीकुन राज्यपाल आनि राजालोरा मुन्ने निलाहनुर. 10गानि दीनकन्ना मुन्ने अन्नि देसेल्कुने तप्पाकोंटा पेनदा बेसता कबुर वेहमळ जर्गगोम. 11अद वेलाते मीकुन पीसि ओसि पूसकियानुर. अस्के अगा बतल वळ्कना, बतल वळ्कानायो इंचि मोदाले रंदि कियमट. वळ्कानोर मिमेट आयो गानि पवित्र आत्मा आंद. अदुनहाटीं मीवा मनसुने बतल वळ्कागोम इंचि अनपिचंतनो अदे वळ्कट. 12इंका बल्हा जर्गंता इत्ते, कासा तादल-तम्मुह्क पगां आसि हव्कालय अप्पजेपनुर. पिलाल्क ओरा तल्लुर-बाबोंक अड्डम तिरियसि ओर्कुन हव्का वेहांतुर. 13नावा पोरोलताहेंका अंटोर लोकुल्क मीकुन हय्सुर. गानि बोर अय्ते पेनदापोर्रोटा विस्वासमते आकिरदाका निल्सि मनंतोर, ओनके मुक्ति दोर्कार. 14गानि बस्के अय्ते, बोरे हय्सवसोंटा नासडेम कियाना वस्तु, गुळि लोप्पो बगा अय्ते मंदनायो अगा नित्तिसि मत्तद मिमेट हूळकिर, अस्के बोर अय्ते यहुदिया एरियाते मंतुरो, ओर गुट्टनहेके वित्तिर (हद्वानोर इदुन अर्तम कीकुंटु) 15बोर अय्ते लोतपोर्रो मंतोर, बवे वस्तुक पीसि वायालय लोप्पो होळियानायो. 16बोर अय्ते नेलिने कबळ कीसेक मंतोर, कपडिं पीसि वायालय मल्सि लोन होनानायो. 17अव रोजकुने पीटे मत्ता मुर्ताह्कुंक आनि सिन्ने मर्तल्लुह्कुंक वेल्लेन तकलिप वांता. 18अव तकलिपकु पीनि कालमते वायामन्नि इंचि पारतना कीम्टु. 19बारित्ते पेन कीता ई दुनिया पुट्तस्केटाल अय्ते इदवेरादाका बस्केन वायवसोंटा तकलिप अव रोजकुने वायाना मंता आनि मुन्नेगुडा असोंटा तकलिप बस्केने वायो. 20ओक्कला सामि अव रोजकुन तक्को कियाकोंटा मंचि मत्ते, बोरे पिसाकोन्नेर. गानि बोर्कुनय्ते पेन पेरता, ओराहाटीं अव रोजकुन तक्को कीता. 21-22अव रोजकुने आबद्दम किरिस्तुल्क, पेनदा आबद्दम कबुरतोर वायानुर. आनि कुदुरते पेन पेर्कुत्ता लोकुल्कुन पसांचलय चिन्हां, इचंत्रमता कबाह्क कीसि हुप्सानुर. अदुनहाटीं ओक्कला बोरन्ना मीकुन, ‘हुळाट, किरिस्तु इगे मंतोर, अगा मंतोर’ इनानय्ते मिमेट ओर्कुन नम्मुमट. 23गानि मिमेट उसारते मंटु; इव अन्नि पोल्लें नना मीक मुन्नेने वेहचीतन. 24गानि अव रोजकुने तकलिपकु मारतस्के पोळ्दुंक हीकट मुच्चका वायार, वेळसि वेल्गु हियाकोंटा आयार. 25मब्बुनाल सुक्कां हिळु अर्रानुं, मब्बुने मनना अन्नि सक्तिन कदलिच्मळ जर्गंता. 26अस्के मनकना रूपमते पुटतोन नना, पेद्दा बलम आनि महिमातोनि मब्बु तेर्पेनपोर्रो उद्दिसि वायानेंके लोकुल्क हूळानुर. 27अस्के नना नावा दूतन बूमिपोर्रो लोहांतन. आ दूतां बूमिपोर्रो नालुं मूलानाल, मब्बुना ई कोस्साताल अय्ते आ कोस्सादाका नना पेर्कुत्ता लोकुल्कुन जमा कींतां,” इत्तोर.
येसुना मल्सि वायाना बारेमते वेहमळ
28“अंजिर मराताल उंदि पोल्ले करियट. अंजिर मराता कोम्मांक इग्गुर बस्के अय्ते वांता, अस्के एद्दि कालम दग्गेरा एव्ता इंचि मिमेट एरपाट कींतिर. 29इल्हा इव अन्नि गटनां जर्गनद हूळसि ओर दग्गेरा मंतोर, गल्मातगेन मंतोर इंचि मिमेट एरपाट कींतिर. 30नना मीकु निजम वेहांतन, बदवेरदाका अय्ते इव अन्नि पोल्लें पुरागा आयोंगो, अदवेरदाका ई पीळि मुळगो. 31इद बूमि, मब्बु नासडेम आसि होंदार, गानि नावा पोल्लें बस्केने नासडेम आयों.
अद वेला बोनके तेळियो
32“अद रोजु आयि, अद गळिया आयि बोर्के तेळियो. स्वर्गमता दूतांक आयि, मनकना रूपमते पुटतोन नाकु आयि बोर्के तेळियो. गानि सिराप पेनबाबांके तेळियंता. 33अद वेला बस्के वांतानो मीक तेळियो. अदुनहाटीं मिमेट तेल्विते, उसारते मंटु. 34इद वरोर मनकनलेसीं मंता, बोर अय्ते पय्नेम होनाका मुन्ने, ओना जीतागाह्कुन केय्सि, बोना कबळ ओनकु अप्पजेपसि, लोतुन कावेल कियानोन ‘तेल्विते मन’ इंचि आदेस हींतोर. 35लोता मालक पोळ्द होंचि वांतोरो, नळ्जाम नर्का वांतोरो, गोगोड कूसानेंके वांतोरो, हक्केरे वांतोरो, बस्के वांतोरो मीक एरपाट हिल्ले. अदुनहाटीं मिमेट तेल्विते मंटु. 36ओर अचानक वासि, मीकुन निद्र होंचि मत्तद हूळा मनि इंचि मिमेट तेल्विते मंटु. 37इद नना मीक वेहतन, अल्हेने अंटोर्कगुडा अदे वेहासेक मंतन. तेल्विते मंटु,” इंचि येसु ओर्क वेहतोर.
Currently Selected:
मरकुस 13: ESG
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
