Yohane 9
9
Yesu mopakaoha tobilo
1Tangana Yesu molumao, moitami hadua tauna au bilo hangko i pesupaana peami. 2Mekunehe topeguruNa Iria, “Guru, moapari tauna iti hai bilori hangko i pesupaana? Anti kamadosana haduduana, ba anti dosanda tosaena?”
3Mehana Yesu, Nauli, “Bara anti dosana haduduana, hai bara wori anti dosanda tosaena. Ide mewali bona kuasana Pue Ala rapatongawa iria. 4Hangangaa tapopolumao bagona Pue Ala au motuduNa, liana mani mabaa. Tempo kaindi ina hawemi, hai ane kaindimi barapi ara tauna au peisa mobago. 5TangaNgku mani i dunia, Ikomi pewangka au mopamabaa lalu manusia i humalele dunia.”
6Karoona Yesu mololita nodo, motinudumi i tampo. TinuduNa Nagalo hai tampo bona mewali reta, pane Napoporirohi matana tobilo iti. 7Roo indo, Nauliangaa, “Laomoko mewawalindo i Wuhu Siloam.” (“Siloam” iti, lempona ‘ratudu’.) Lao mpuumi mewawalindo, hai i pesulena, meitami.
8Hangko inditi, hintonggina hai tauna au biasa moita ia merapi-rapi, mombekune-kunehe, rauli, “Hemari dolou? Bara pae ia tobilo au biasa mohuda merapi-rapi?”
9Ara au manguli, “Iami diti!”
Ara wori hanggaa au manguli, “Bara. Kahimbelanato pea lenggenda.”
Agaiana tobilo iti mololita, nauli, “Ikomi dide!”
10Mewali, rapekune, “Noumbari hai pane peisako meita?”
11Nauliangaahe, “Tauna au rahanga Yesu mobabehi reta, hai Narirohia matangku, pane Nauliangaana: ‘Laoko mewawalindo i Wuhu Siloam.’ Lao mpuumona mewawalindo, hangko inditi meitamona!”
12Rapekune, “Iumbami tauna iti?”
Nauliangaahe, “Barapi kuisa.”
Toparisi mampetampa karapakaohana tobilo
13-14Tempona Yesu mogalo walenguNa hai tampo, hai mopakaoha tobilo iti, ope-ope iti mewali i Alo Pengkarooangaa. Ido hai tobilo au meitami iti raanti lao i toParisi. 15Toparisi mekunehe iria, rauli, “Noumbari hai pane peisako meita?”
Nauliangaahe, “Ia morirohi matangku hai reta, mewawalindona, hai unga peana meita.”
16Bahangkiahe toParisi manguli, “Ane nodo, tauna iti bara hangko i Pue Ala, lawi bara mampeulai palianta i Alo Pengkarooangaa.”
Agaiana hanggaahe manguli, “Ane tomadosa, hangko iumbari kuasaNa mobabehi ngkaia tanda kuasa au nodo?” Ido hai mombehahanaimohe.
17Hangko inditi, mekune mbulimohe i tobilo iti, rauli, “Ane oio, apa au nuuli, lawi Napakaohami matamu.”
Nauli tobilo iti, “Manoto Ia hadua nabi.”
18Agaiana tadulakonda to Yahudi barahe mampoinalai kaiana mpuumi tauna au bilo hangkoia hai unga pea meita. Ido hai mokakiohe inana hai umana bona rapampekunei. 19Hai mekunemohe, rauli, “Ide mpuumi pae anami au niuli bilo hangko i pesupaana peami? Noumbari hai pane peisa meita?”
20Mehanahe tosaena, rauli, “Au kiisa, ide mpuumi anangki, hai ia bilo hangko i pesupanami. 21Agaiana noumba rarana pane peisa meita, bara wongkamia kiisa. Hai hema au mopakaoha, bara wori kiisa. Ia mangisaatomi. Nipekune rai iria. Ia peisa mohanai pekunemi.” 22(Inana hai umana manguli nodo, lawi langahe i tadulakonda to Yahudi. Lawi arami kabotuana hawanda tadulako iti au node: hema-hema au manguli Yesu iti Datu Topehompo, barapohe rapaliu mesua i sou penombaa. 23Idomi pongkana pane tosaena manguli, “Ia mangisaatomi. Nipekune rai iria.”)
24Roo indo, rakakio mbuli tauna au hangkoia bilo, hai rauliangaa, “Nuuli mpuu apa au tou i lindona Pue Ala! Kiisa Yesu iti iami tauna au madosa.”
25Nauliangaahe, “Iko, bara kuisa ba tomadosa ba bara. Au kuisa pea, bilona hangkoia, agaiana ide-ide meitamona.”
26Hangko inditi, rapekune mbuli, “Apa au Nababehiako? Noumba raraNa mopakaohako?”
27Nahanaihe, “Roomokau kutuntua inona, bara pae nihadi? Moapari hai nikune liliuna? Ba nipeinao wori mewali topeguruNa?”
28Hangko inditi, ratunda-tundami hai rauliangaa, “Oio topeguruNa tauna iti! Ikami topegurunangkai nabi Musa! 29Kiisa Pue Ala mopahawemi lolitaNa i Musa hangkoia. Agaiana tauna iti, bara kiisa ba hangko iumbaNa mai.”
30Mehana tauna au bilo hangkoia, nauli, “Mepawuli mpuukau! Niuli bara niisa kahangko iumbaNa tauna iti, moleri Ia mopakaohami matangku! 31Taisa Pue Ala bara mohanai perapinda tauna au madosa, agaiana Ia mampehadingi pamperapina tauna au mengkoru Iria hai au mampeulai hawaNa. 32Hangko i pewalina dunia, bara mani hambela tahadi tuntukana hadua tauna peisa mopakaoha tauna au bilo hangko i pesupaana peami mai. 33Ane tauna iti bara hangko i Pue Ala, manoto kebara peisa mobabehi apa-apa.”
34Rahanai tadulakonda to Yahudi iti, rauli, “Oio tauna au bukeko dosa hangko i pesupamu peami. Moapari pane baiko mopaturongkai?” Mepongka inditi, rawurami hai barapi rapaliu mesua i sou penombaa.
35Nahadi Yesu karawurana tauna iti hangko i sou penombaa. Ido hai laomi Napombelambia, Nauliangaa, “Ba mepoinalaiko i Ana Manusia?”
36Nauli tauna iti, “Tua, Nuuliangaana kahemana bona mepoinalaina Iria.”
37Nauli Yesu, “Nuitami! Iami au tangaNa mololita irio.”
38Nauli tauna iti, “KupoinalaiKo, Pue!” hai molingkudumi menomba Iria.
39Nauli Yesu, “KamaiNgku i dunia ide, maiNa mobotusi, bona tauna au bilo peisa meita, hai tauna au meita ina mewali bilo.”
40Arahe bahangkia toParisi inditi au mohadi lolitana Yesu, rauliangaa, “Ba Nuuli bilo woringkai?”
41Nauli Yesu, “Ane kebilokau, kebarakau madosa. Agaiana, lawi niuli meita mpuukau, batena madosakau.”
Currently Selected:
Yohane 9: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
