Markus 7
7
Yesu mokambaroa toParisi lawi mampeulai peahe adanda toiorunda
(Mat. 15:1-20)
1Hambela tempo, arahe toParisi hai guru agama Yahudi au hangko i Yerusale laohe mampohidupaa Yesu. 2Tauna iti moitahe bahangkia topeguruna Yesu au maande agaiana barahe hampai memando moula adanda to Yahudi. 3Lawi toParisi, nodo worihe to Yahudi ntanina bara manihe maande ane bara manihe memando moula ada, anti pokingkinda adanda toiorunda. 4Ane mesulehe hangko i pobalu-balua, moula adanda hangangaa mendoihe hampai hangko damanihe maande. Hai ngkaia mani ada au radoko hangko i toiorunda au rapeulai ntepuu, pandirina: ada mpobahoi mangko, kori hai anu-anu ntanina au rababehi hangko i tambaga. 5Ido hai toParisi hai guru-guru agama iti mekunehe i Yesu, rauli, “Moapari hai topeguruMu barahe mampeulai adanda toiorunta? Maandehe, agaiana barahe hampai memando.”
6Nahanaihe Yesu, Nauli, “Ane ikamu, i raoana pea peulami i Pue Ala! Tou mpuu lolitana nabi Yesaya hangkoia kana irikamu au manguli node:
Nauli Pue Ala:
‘Tauna iti, i humenda pea mobilaNa,
agaiana lalunda karao hangko Iriko.
7Bara mobundu penombaanda Iriko,
lawi paturonda hangko i manusia pea,
bara paturo hangko Iriko.’#Yes. 29:13
8Mewali, mokingki manirikau ada manusia panekau mampeulai hawana Pue Ala.”
9Hangko inditi, nauliangaa mbulihe Yesu, “Mapande mpuukau mopakarao hawana Pue Ala hangko i katuwomi bona adami pea haduduami au nipeulai. 10Pandirina, i lalu Aturana Musa teuki node: ‘Bila umamu hai inamu.’ Hai ‘Hema au motunda-tunda umana ba inana hangangaa rapapate.’ 11-12Agaiana ikamu mepaturokau node: Ane hawehe tosaemi merapi tulungi, peisahe niuliangaa node: ‘Apa au ina kuweikau, kupopenombami i Pue Ala.’ Ane nodo paturomi mohombokimokau motulungi tosaenda. 13Mewali hai paturomi haduduami au nidoko hangko i toiorumi hai nipaturoahe tauna, mogewomokau Ngkorana Pue Ala, hai ngkaia mani babehiami au kadake.”
14Roo indo, Yesu mokakio mbulihe tauna bosa, Nauliangaahe, “Nipehadingi maroa bona niisa: 15kehapiri mampopengaa taande, bara iti au mopakedaike i peitana Pue Ala. Babehia au mesupa hangko i lalunta, itiri au mopakedaike i peitana Pue Ala. 16Mewali, hemakau au motalinga, nipehadingi maroa!”
17Roo indo, Yesu mopalehi tauna bosa, hai mesua i lalu sou. Mekunehe topeguruNa Iria apa tunggaiana ngkora pandiri inona. 18Nauliangaahe, “Bara wori pae niisa lempona? Paande au mesua i lalu nganganta, bara iti au mopakedaike i peitana Pue Ala. 19Paande au mesua iti bara mopakedai pekirinta. Lawi paande iti mesua pea i lalu tainta, hai hangko inditi liliu tatende.” Hai lolita iti, Napakanotomi Yesu kadana ara paande au rapalia.#1Tim. 4:3 20Nauliangaa mbulihe, “Agaiana babehianta, itiri au peisa mopakedaike i peitana Pue Ala, lawi babehianta mesupa hangko i lalunta. 21Lawi hangko i lalunta, mesupa hinangka pekiri au kadake, alana arahe au mobabehi sala i towawine ba tobalilo, arahe au manangka, mepapate, 22mebualosi, mampokaelu anu-anuna rangana, hai au mobabehi mampopengaa au kadake. Ara worihe au mepakanawo, nakuasai peundeana laluna au kadake, mahina, mepakadake, mampemahile, hai bara mau modoko paturo. 23Ope-ope babehia au kadake iti mesupa hangko i lalunta. Itimi au mopakedai tauna i peitana Pue Ala.”
Hadua towawine au bara to Yahudi merapi tulungi i Yesu
(Mat. 15:21-28)
24Roo indo, meangkami Yesu hangko i tampo Galilea lao i tampo au hungku i wanua Tirus. KahaweNa indo, Ia liliu mesua i lalu sou lawi bara Naunde raisa tauna kahaweNa. Agaiana kahaweNa bara peisa rawuniangi. 25-26I boea iti, ara hadua towawine au anana, napesuangi tokadake. Kanahadina towawine iti kaarana Yesu i boea iti, maimi Iria molingkudu i lindoNa merapi tulungi, nauli, “Popelohoa wongkoia tokadake au mesawi i anangku!” Towawine iti, bara to Yahudi, ia hangko i tampo Fenisia au ara i propinsi Siria.
27Ido hai nauli Yesu iria, “Pogiangaahe hampai anangkoi maande hawe mabuhu. Bara maroa moala paande anangkoi, hai rawei dike.”#7:27 I lalu ngkora pandiri ide, to Yahudi rapandiri nodo anangkoi. Tauna au bara to Yahudi rapandiri nodo dike.
28Mehana towawine iti, nauli, “Tou Pue, agaiana dike au ara i woi meja paandea, moande worihe wuta hangko i paandena anangkoi.”
29Hangko indo, mololitami Yesu, nauli, “Ane nodo lolitamu, tongawa hangko inditi, kamarohona pepoinalaimu! Mesulemoko, lawi tokadake au mampesuangi anamu melohomi.” 30Mesulemi towawine iti. Hawe i sou, moita anana i koi, maroa-roami lawi tokadake au mampesuangi melohomi.
Yesu mopakaoha tauna au bongo, au bara peisa mololita
31Hangko indo, Yesu mopalehi Tirus hai mopaliliu polumaoNa melempo i wanua Sidon, hai mesule hule lao i rano Galilea, hawe i tampo Dekapolis. 32Inditi, arahe tauna au moanti hadua tobongo au bara wori peisa mololita. Merapihe i Yesu bona tauna iti natobo. 33Yesu moanti tauna iti megaaki hangko i olonda tauna bosa. Roo nodo, Napopesuami karaweNa i talingana tobongo iti pontimali, motinudu, hai motobo dilana tauna iti. 34Roo indo, mengoami Yesu i langi, hai modii inaona, Nauli, “Tebungkahimi!” (I lalu basanda to Yahudi, Nauli node, “Efata!”) 35Liliu mehadi mpuumi tauna iti, hai maluntumi dilana. Peisami mololita. 36Hangko indo, Yesu mokontohe tauna bosa bona inee rapopololita i hema pea apa au mewali iti. Kehapirihe Nakonto, bambari iti batena pea rapopololita. 37Tingkara mpuuhe tauna bosa, rauli, “Hinangka au Nababehi, maroa haha. Tauna au bongo Napakaoha! Tauna au bara peisa mololita, mololitamohe!”
Currently Selected:
Markus 7: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
