ỤBANỤ 1

A njɛ atwa Isrɛl a na Namɛ ni Ijipti Umungwuta

1Nzeci mu miaụŋ-me-eyi mi Jekob, ata (ɛɛ hiɛŋ ge Isrɛl) mu na mu 'wa bụ mi zhe Ijipti na, bụtụ bụtụ 'waŋnɛ atwa ihwɛ ibwɛ.#Umoz 46:8-27; Tɛrɛ 26:45 2Gɛ Rubɛn, ne Simion, ne Livai keeni Juda, 3Ge Isaka, nɛ Zɛbulon, keeni Bɛnjamin, 4Ga Dan, na Naftali, na Gad keeni Ashɛ. 5Kpakpakpaaŋ atwa na ge Jekob meci, a shɛ atwa dupu-nu-woshi (70), Yɛu ibwɛ go Josɛf namwawaŋ ni Ijipti na aka ata.

6Na aba inɛ gɛ, na aka fwalaa go Josɛf 'wi keeni miaụŋ-mo-ono mu bwa hwɛɛ keeni atwa uwaŋnɛ ata du. 7Miaụŋ mi Isrɛl mi 'yebi tumata, ibɛ po ee gembi ufwugwo duwa; aa kaana ufwugwo tugombo, ibɛ po ukpahiŋ wa aba ishijɛ tebiye; ee shini cɛnjɛ ta ata.#Ugo 7:17

8Nazhɛ agwuma ufwo Ijipti, na mepi shi iwɛ Josɛf, yɛ tugwama.#Ugo 7:18 9Bɛɛ hiɛŋ atwa ubwa, Hioko ma, miaụŋ mi Isrɛl mu tu hwuri nu ufwugwo, ee tu hwuleneni nu ukpahiŋ. 10Hwure ma tɛ njɛ aŋ ma ti'inta, iwɛ aka na ɛɛ zhɛ na kaana ufwugwo, aka oko ci hwuŋ, ɛ zhɛ o togwu na atwa i'ime tu maa a tu sukakanɛ nu ujasa, nazhɛ a bana na cɛnjɛ tu tu.#Ugo 7:19

11Ee jeri ga ehiu na zhɛ na mangangana aŋ ugondu ụbaụta iwɛ maa a njɛ aŋ umungwuta. Atwa Isrɛl meni Faro ashɛpwụ Paitom keeni Rameses ofwo na maa bu no tulono i'wɛŋnɛ uduciya ubwa. 12Ama gana na ta a nda aŋ umungwuta, gobwonu du kaa aa kaana ufwugwo tugombo, oo mburusonu na cɛnjɛ ta ata duwa. Nazhɛ ohwulu kwuni atwa Ijipti tuhoroko iwɛ miaụŋ mi Isrɛl. 13Nazhɛ Ejipti eni miaụŋ mi Isrɛl ugondu umungwuta tɛnda. 14Ugondu cɛnjɛ keeni etemberi na ee eni aŋ, heshigeni aŋ shɛmɛ, ee peneneni aŋ iyi elele nɛ namɛ nu ntuma ma aba tɛnda sasana. Ugondu we elele na ee eni aŋ tɛnda ụ shɛ ugondu umungwuta.

Unu na Ga Faro Peni Eyikwo na o Mbiyono Eyikwo Tumata

15Nazhɛ agwuma Ijipti mbishi eyikwo Ehibru a na o mbiyono eyikwo tumata. Ɛ hiɛŋ izeci bu na bu ko ge Sifra, ɛɛ hiɛŋ izeci bu na bi yebi go Pua, 16Bɛɛ hiɛŋ aŋ, Aka elele na ohio mbiyono eyikwo Ehibru tumata, ahiɛ kwụbɛ te e kwuzhi maa e meci, yaa shɛ yɛu ɛtɛ shɛ yɛu-ye-eyi kwụna iŋ ma, ama yaa shɛ yɛu-yo-o, ga i nama. 17Ama eyikwo ata o mbiyono eyikwo Ehibru na tumata a sụma Agwatana inyɛsɛ, a njɛ shɛ gana na ta agwuma Ijipti mbishi aŋ o, ama o bicingo ta miaụŋ-me-eyi. 18Nazhɛ agwuma Ijipti suyanɛ eyikwo ebe o mbiyono Ehibru tumata, bɛɛ hiɛŋ aŋ, Iwembe po kwuŋ ahia nda gana gaa? Ohio bicingo miaụŋ-me-eyii?

19Eyikwo ata o mbiyono eyikwo tumata hiɛŋ Faro, Iwɛnɛ te eyikwo Ehibru shɛ shɛ gana eyikwo Ejipti. A 'yajɛ ikɛnyi, maa waa eyikwo na o mbiyono eyikwo tumata ci, asha o motwo.

20Ibɛ po Agwatana peni eyikwo ata o mbiyono eyikwo tumata uwebiye. Atwa ata kaa a kaana ufwugwo tugombo keeni ukpahiŋ ti'yaga duwa. 21Na aba ibɛ Agwatana peni eyikwo ata o mbiyono eyikwo tumata amwamwa ɛkɛnyi aba, iwɛnɛ ta a sụmɛ Agwatana inyɛsɛ.

22Nazhɛ ga Faro peni atwa elele unu, bɛɛ hiɛŋ, Yɛu-ye-eyi-ye elele nɛ Ehibru meci, ge keri iŋ nu Urefu Nayɛl, ama gɛ yɛu-yo-o elele nama.#Ugo 7:19

Currently Selected:

ỤBANỤ 1: RBT

Highlight

Copy