ỤBANỤ 11
11
Timbiso iwɛ Tishikpe to Tu'wo tu Miaụŋ mu Umbe
1Nazhɛ AGWANGWAMA hiɛŋ Moses, Tishikpe tu ko tu ta vwɛ maa Ma shapɛrɛganɛ Faro keeni cɛnjɛ ti Ijipti kpaaŋ; nazhɛ bɛɛ zhɛ bo lono maa hi beni epe. Aka na bɛɛ zhɛ bo lono maa hi hwuri, tu'unzo bɛɛ zhɛ mo hi unzo epe hwɛɛ hiŋ. 2Hwuwayɛ go, mbiso atwa iwɛ na shɛcɛbɛ maa ga bụtụ bụtụ na amɛ etwenyi keeni eyikwo lụpɛ anya aba iyi utakashɛ ya azụrụfa keeni azhɛnarɛya. 3Ibɛ AGWANGWAMA njɛ maa, gɛ inyɛmɛnyɛmɛ ya atwa Isrɛl i shɛ atwa Ijipti. Iwɛ-tɛkana, go Moses 'yajɛ ụjɛrụma ụ'wụtụ ne eshe anjɛ-ugondu Faro keeni eshe atwa cɛnjɛ ti Ijipti kpaaŋ.
4Go Moses hiɛŋ, Iyi nɛ AGWANGWAMA hiɛŋ na, maa, Geri bụ ụjita tudwonu hwayɛ, N zhɛ mo rungo Ijipti kpaaŋ, 5miaụŋ mu umbe mɛ cɛnjɛ ti Ijipti kpaaŋ kaa mi zhɛ mo 'wo, te kwune ni yɛu umbe Faro nɛ jɛjɛ ni idwɛtwɛ ibwɛ, tutu yɛu umbe bujama bo o na patanɛ ni izhɛrɛ, tu miaụŋ mu umbe mi iyimabiga kpaaŋ. 6N'ungwa mi zhɛ ma shɛnda no ofwo elele na cɛnjɛ ti Ijipti, mu naa na usara muba ta zasaba la kwukwuŋ, mu naa na kaa mu zha shɛ ma nama ya du gana ata kwukwuŋ. 7Ama inɛ miaụŋ mi Isrɛl, ta atwa, ti iyimabiga, okwo uwɛwɛ zha shɛ yo ngwuso aŋ o; iwɛ maa hi na mapa maa atwa Ijipti na atwa Isrɛl namanjɛ swoswoswo ne eshe AGWANGWAMA. 8Anjɛ-ugondu ga bụ kpaaŋ zhɛ a zhajɛ pi mi, ɛɛ zhɛ mo n kwuzono; ɛɛ zhɛ ɛ hiɛŋ, Sugo atwa elele na abụ 'yajɛ maa beni epe. Na aba inɛ ɛtɛ nazhɛ Ngɛɛ zhɛ mo hwulo. Go Moses banɛ no olugwo Faro ni isɛbwɛ i'wɛtwɛ.
9Nazhɛ AGWANGWAMA hiɛŋ Moses, Ga Faro zha shɛ ba hwuga iwɛ bụ o; iwɛ maa arụhwajɛ mi na kaana ufwugwo na cɛnjɛ ti Ijipti.
10Go Moses keeni Aron njɛ arụhwajɛ ga kpaaŋ ne eshe Faro. AGWANGWAMA kaa to amɛ Faro tɛshɛshɛpana, bi leni shi maa E'isrɛl beni na cɛnjɛ tu bwa o.
Currently Selected:
ỤBANỤ 11: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008
