ỤBANỤ 3

Go Moses Kwụbɛ Ulwa na wo Gorogo nu Ukokoto

1Gabata go Moses ba ngbaraka agwụdụ binua bwa gɛ Jɛtro, na shɛ bunongbo ba Amidian. Bee suji agwụdụ, baa sanɛ geri bu uwaŋna-banụ nụ ụshɛka, bee zhe bee ci Horɛb Ishɛmɛ ya Agwatana. 2Nazhɛ butumwa ba AGWANGWAMA ba azuba bananɛ bụ apata na bụratụ bu ulwa na wo gorogo nu ukokoto uko. Baa ngbaracɛ, baa kwụbɛ tu ulwa wo gorogo nu ukokoto ata, ukokoto kaa hwoŋni shi o.#Ugo 7:30 3Go Moses hiɛŋ, N zhɛ ma vwula maa Ma kwụba ebe ga a'wụtụ, iwembe po ukokoto ga hwoŋni shii? 4Aka na ta AGWANGWAMA kwụbɛ tu go Moses vwụrɛ maa kwụba, Agwatana suyanɛ bụ na ashashɛ amɛ ukokoto ata, Bɛɛ hiɛŋ bụ, O-Moses!

Go Moses leni, bɛɛ hiɛŋ bụ, Oo, Gamba na.

5Agwatana hiɛŋ bụ, To gwumwonu epe o, hwucoko abida bụ, iwɛnɛ to ofwo ata ebi shikeni a shɛ cɛnjɛ te tijilo. 6Bɛɛ hiɛŋ, Gamba N shɛ Agwatana eshi bu, Agwatana Abraham, na Agwatana Azik keeni Agwatana Jekob, go Moses intanɛ ụpɛshɛka ubwa, inyɛsɛ shɛ bụ, bi eri shi ba ngbaraka Agwatana o.#Mat 22:32; Mak 12:26; Luk 20:37; Ugo 3:13; 7:32

Agwatana Utegeni Moses Ugondu

7Nazhɛ AGWANGWAMA hiɛŋ, N kwụbɛ ụbaụta na atwa mi na namɛ ni Ijipti a nda tebiye, Ngaa hwụjɛ kaa n'ungwa ma aba iwɛ ehiu ugondu aba na 'wa aŋ, M mepi shɛmɛ shɛ tụhaŋtụ sha aba.

8N kezhe maa Ma lashɛga aŋ ni i'ɛlɛ ye Ejipti, maa ma bacɛnga aŋ na cɛnjɛ ta ata, maa Mo sugo aŋ na cɛnjɛ ti biye, tu na kaa ti gembeneni, ibɛ shɛ cɛnjɛ ta ata ti 'yajɛ ugwungwu, tuwebiye kaa ta fwunga, no ofwo na Ekenan, nɛ Ɛhit, na A'amo, nɛ Ɛpɛrɛz, na Ahiv, keeni Ɛjɛbus jɛjɛ. 9Hwuwayɛ go, hioko, n'ungwa mu miaụŋ mi Isrɛl mi n ce; Ngaa kwụbananɛ kaa umungwuta na Ejipti a nda aŋ. 10Hwure, maa Ma bụ tumwana no ofwo Faro, maa M bacɛnganɛ atwa mi a na shɛ miaụŋ mi Isrɛl ni Ijipti.#Ugo 7:30-34

11Ama go Moses hiɛŋ Agwatana, Gaaba Ngaa shɛ maa Ma zhagana Faro, mɛ bɛcinjɛ miaụŋ mi Isrɛl ni Ijiptii? 12Agwatana hiɛŋ bụ, N zhɛ ma nama na bụ tilɛɛ; iyi nɛ shɛ useyida bụ maa mepi maa Gamba m bụ tumwanɛ utumwa na. Aka na ɛbi bɛcinjɛ atwa ata ni Ijipti, hi zhɛ hi ma n zhɛba ni Ishɛmɛ gɛ.

13Go Moses hiɛŋ Agwatana, Hioko, yaa shɛ Ngee ci miaụŋ mi Isrɛl, Ngɛɛ hiɛŋ aŋ, Agwatana eshi hiŋ n tumwanɛ pi hiŋ. Yaa shɛ ee n heŋteni tuba maa, Gaaba ɛɛ hiɛŋ izeci ibwɛɛ? Gana na Ngɛɛ zhɛ mɛ hiɛŋ aaŋ? #Ụban 6:2,3

14Agwatana hiɛŋ Moses, GAMBA N SHƐ GA GAMBA NA.#3:14 GA GAMBA NA; Egini GA GAMBA NA i shɛ, Gamba N shɛ iyi nɛ Ngaa shɛ kwo kaa Gamba N zhɛ ma sha iyi nɛ Ngɛɛ zhɛ ma sha. Baa hiaaŋnanɛ bụ, Gana na ɛbi zhɛ bo mbiso miaụŋ mi Isrɛl na, maa ga GAMBA NA Ubwa n tumwanɛ pi hiŋ.

15Agwatana mbiseneni Moses, bɛɛ hiɛŋ, Gana ɛbi zhɛ bo mbiso atwa Isrɛl na, maa AGWANGWAMA,#3:15 AGWANGWAMA: AGWANGWAMA ga ee 'nyeci ni i'nyɛtɛ i'wɛtwɛ 'wɛtwɛ, i shɛ izeci ya Agwatana na shɛ shɛ butugwumwa. Ibɛ gɛtɛtɛ du atwa oko jɛshɛrɛjɛ nu uhwaŋna unya na 'wanjɛ, ɛɛ hiɛŋ, Jehova. Ama Ehibru ɛ hiɛŋ iŋ, Yahwe. Ofwo elele na Jehova ga ya nama, AGWANGWAMA tuba zhɛ a nama apata tutu nu ubayiburu ga. na shɛ Agwatana ogwunukwoshi hiŋ, Agwatana Abraham, na Agwatana Azik, keeni Agwatana Jekob, ubwa n tumwanɛ pi hiŋ. Izeci mi tɛ tutu unyizo-nom, inɛ ɛtɛ ibɛ ɛɛ zhɛ na ma suyana nu uwaŋnɛ wa aba we elele tutu.

16Zhaga sotulonu n-nyarɛ mu miaụŋ mi Isrɛl, maa mbishi aŋ maa, AGWANGWAMA na shɛ Agwatana ogwunukwoshi hiŋ, Agwatana Abraham, na Azik keeni Jekob, bu m bananɛ caakwụ, bɛɛ hiɛŋ, N zhajɛ uhikwonuo hiŋ, Ngaa kwụbɛ kaa iyi nɛ Ejipti ma hi nda. 17Ngee shiri kaa unu maa, N zhɛ mɛ hi bɛcinjɛ nu umungwuta ga Ejipti ma hi nda maa Mo hi sugo na cɛnjɛ te Ekenan, nɛ Ɛhit, na A'amo, nɛ Ɛpɛrɛz, na Ahiv, keeni Ɛjɛbus, cɛnjɛ tu na ti 'yajɛ ugwungwu, tu na tuwebiye ta fwunga na tuba.

18Ɛ zhɛ a hwuga-unu bu: nazhɛ gabụ, nu n-nyarɛ mu miaụŋ mi Isrɛl hi zhɛ hia zhagana agwuma Ijipti, maa hi mbishi bu maa, AGWANGWAMA na shɛ Agwatana Ehibru, bu twa no tu, okwu ta bu tabwa maa iti genji maa ta zha tahaŋnụ iwɛŋnɛ itɛtu nụ ụshɛka maa ta ta ụrụpɛ pa AGWANGWAMA na shɛ Agwatana tu. 19M mepi maa agwuma Ijipti zha shɛ ma hi ganga maa hi hwuri o. Bi zha shɛ kaa bo lono semi aka na ti yee dure na tɛnda bụ nu ukpahiŋ. 20N zhɛ kaa ma nda ugondu nu ukpahiŋ mu maa Ma pana Ejipti ulwapɛ ni iyi tudama ifwugwo, nazhɛ bɛɛ zhɛ ma hi ganga maa hi hwuri.

21N zhɛ mo lonono Ejipti maa a kwụbɛ inyɛmɛnyɛmɛ ya atwa mi. Aka na ɛhi zhɛ hio hwulo, to hwulo ma ni i'ɛlɛ yo ohondo. 22Biyikwo hiŋ be elele zhɛ ba lụpa binya bwa bi Ijipti keeni Bijipti na baa namɛ nu bwa nu umwono iyi nɛ aa njɛ na azụrụfa, keeni azhɛnarɛya, keeni tugwuno maa hi uregeni miaụŋ mi hiŋ me eyi keeni mu na mo o. Ni inɛ ɛtɛ ibɛ ɛhi zhɛ hia lashaga Ejipti i'wɛŋnɛ ya aba.#Ụban 12:35,36

Currently Selected:

ỤBANỤ 3: RBT

Highlight

Copy