UMOZHIGO 17

Unu-tutwa iwɛ Teleyi Tijaja, Izeci Abram Sheyinji

1Aka na ti ga Abram zhɛrɛ shiywa dupu-na-buhanda-na-shɛba-shi-cinjishi (99) te e meci bu. Nazhɛ AGWANGWAMA bananɛ bụ caakwụ, bɛɛ hiɛŋ bụ, Gamba n shɛ Agwatana na Hwuri Kpaaŋ,#17:1 Agwatana na Hwuri Kpaaŋ: Ɛl-shadai. na hwuga-unu mu maa na nda iyi nɛ teni cɛŋ, nazhɛ abụ zha shɛ ba 'yaga unu-tusapa. 2N zhɛ ma twa-unu na bụ maa ma nda maa ajalalo bu gembi ofwugwo duwa. 3Nazhɛ ga Abram ubi ụpɛshɛka ubwa na cɛnjɛ, Agwatana hiɛŋ bụ, 4Hioko, unu mu tutwa namɛ na bụ, M bi shileni kaa unu maa gabụ bi zhɛ ba sha bishi bu unyama we edenji ofwugwo. 5A zha shɛ ɛ hiɛŋ ya izeci bu ga Abram,#17:5 Abram Egini ta Abram i shɛ, bishi bu ugombo. ama ɛ zhɛ mɛ bi hiɛŋ ya ga Abraham,#17:5 Abraham:Egini ta Abraham i shɛ, Bishi bu unyama. iwɛnɛ tu Ngaa bụ njɛ bishi be edenji ofwugwo. 6N zhɛ ma nda maa ajalalo bu gembi ufwugwo duwa. N zhɛ ma bụ nda edenji tuswoswoswo, shɛgwuma kaa shi zhɛ sha banɛ no olugwo bu. 7N zhɛ kaa mo shikicingo unu mu tutwa na ashashɛ mi na bụ keeni ajalalo bu a na zhɛ ma bụ 'wa tutu awaŋnɛ aba kpaaŋ. Iwɛnɛ po ụ shɛ unu-tutwa unyizo-nom, maa ma sha Agwatana bụ keeni Agwatana ajalalo bu a na zhɛ ma bụ 'wa. 8N zhɛ kaa ma bụ pana cɛnjɛ tu ga ahiɛ shɛ alashɛ na tuba, ta ajalalo bu; tuba tɛ shɛ cɛnjɛ ti Kenan kpaaŋ, maa hi 'yaga tụ unyizo-nom. Nazhɛ Ngɛɛ zhɛ ma sha Agwatana aba.

9Nazhɛ Agwatana hiɛŋ Abraham, Inɛɛ bụ shɛ, bɛ shɛ ba untangana unu mu tutwa, tu gabụ ta ajalalo bu a na zhɛ ma bu 'wa tutu awaŋnɛ aba kpaaŋ. 10Iyi nɛ shɛ unu mu tutwa na abɛ shɛ ba untangana na ashashɛ mi na bụ keeni ajalalo bu a na zhɛ ma bụ 'wa na, maa butubwenyi be elele na ashashɛ hiŋ shɛ ba jaja teleyi.#Ugo 7:8; Rom 4:11 11Hiɛ shɛ hia jaja ihwumbwe teleyi ti hiŋ, ibɛ kaa zhɛ ya sha useyida unu mu tutwa na namɛ na ashashɛ mi ne hiŋ. 12Te kwuni na aka ga i shɛ tilɛɛ maa e jeji teleyi ti yɛu-ye-eyi ye elele nɛ ijitɛ ibɛ ulwa itindɛtu te e meci iŋ nu uwaŋnɛ hiŋ elele kpaaŋ. Ti inɛɛ nɛ ee meci ni ihwɛ hiŋ, ti inɛɛ nɛ oo so nu ukwuribi bu, nɛ banɛ na cɛnjɛ ti nya. 13Ta bụtụ na ee meci ni ihwɛ bụ keeni bụtụ na oo so nu ukwuribi bu, bɛ shɛ baa jaja teleyi tilɛɛ, iwɛ maa unu mu tutwa nama na tu'waba ti hiŋ tutu unyizo-nom. 14Butubwenyi be elele na jeji shi buhwumbwo be teleyi tu bwa, a zha shɛ a rɛta bụ na ashashɛ atwa ubwa o, iwɛnɛ ti bee bweji unu mu tutwa. Agwatana Shileni Sarai Unu.

15Nazhɛ Agwatana hiɛŋ Abraham, Te kwuni na aka ga, bi zha shɛ bɛ hiɛŋ ya izeci biyikwo bu tu ga Sarai#17:15 Sarai: Egini ta Sarai i shɛ bino ba agwuma. kwukwuŋ, ama ta Sara#17:15 Sara: Egini ta Sara i shɛ, yɛu-yo-o i tugwama. ibɛ shɛ ya izeci ibwɛ. 16N zhɛ ma pana bụ uwebiye. Shɛ inɛ ɛtɛ kiri o, N zhɛ ma nda maa ma bụ matanga yɛu-ye-eyi. N zhɛ ma pana bụ uwebiye, bi zhɛ ba sha bino be edenji, shɛgwuma sha atwa shi zhɛ sha banɛ na ajalalo ubwa.

17Nazhɛ ga Abraham ubi ụpɛshɛka ubwa na cɛnjɛ baa hiɛnjɛ ilɛtu, bɛɛ mɛmɛ hiɛŋ, Ɛ tɛ zhɛ a matanga waa bụtụ na tɛzhɛla tu bwa tu namwawaŋ shiywa dipi-yebi (100) yɛu hŋ? Ga Sara, na tɛzhɛla tu bwa tu namwawaŋ shiywa dupu-na-buhanda (90), bi tɛ zhɛ ba mata waa yɛu hŋ? 18Ga Abraham hiɛŋ Agwatana, Oo ye ge cimi maa ge Ishmɛl yɛ uraiŋ maa ya ogwu mi!

19Ama Agwatana hiɛŋ bụ, Awo, ga Sara biyikwo bu, ubwa zhɛ ma bụ matanga yɛu-ye-eyi, ibɛ ɛbi zhɛ ba pa iŋ izeci ti ga Azik.#17:19 Azik: Egini ta Azik i shɛ, ilɛtu tuhunga. N zhɛ mo shikicingo unu mu unyizo-nom tutwa nu bwa keeni ajalalo ubwa a na zhɛ a 'wa bụ. 20Yaa shɛ inɛ Ishmɛl, N hwụjɛ iwɛ bụ, hioko, N zhɛ ma pana bụ uwebiye. N zhɛ ma nda maa mata miaụŋ te gembi ufwugwo duwa, bi zhɛ ba sha bishi ba miaụŋ mu tugwama umpwa-na-muba-mi-yebi. N zhɛ kaa ma nda bụ undenji ụ'wụtụ 'wụtụ. 21Na Azik na ga Sara zhɛ ma bu matanga, na aka gana ga unywanywa, ibɛ tuba Ngɛɛ zhɛ mo shikicingo unu mu tutwa. 22Aka na ta Agwatana hwuwi n-ndumwa tụdụmanga na Abraham, bee genji bu bee hwuri.

23Nụ ụjita ata gbaa ga Abraham jeji buhwumbwo be teleyi ti yɛu ibwɛ ge Ishmɛl keeni ajama na ee meci ni ihwɛ ibwɛ kpaaŋ, ta anaa na boo so nu ukwuribi ubwa, te butubwenyi be elele na ashashɛ etwenyi ihwɛ Abraham, bi jejeji ihwumbwe teleyi ta aba hwɛɛ jita ata, nu gana na ta Agwatana hiɛŋ bụ. 24Ga Abraham namɛ shiywa dupu-na-buhanda-na-shɛba-shi-cinjishi (99), te e meci bu, aka na ti bee jeji buhwumbwo be teleyi tu bwa. 25Ge Ishmɛl yɛu ibwɛ kaa namɛ shiywa umpwa-na-shɛba-shɛ-tatụ te e meci bu aka na ti bee jeji buhwumbwo be teleyi tu bwa. 26Nụ ụjita ata uko uko gbaa ga Abraham ni yɛu ibwɛ ge Ishmɛl jeji teleyi. 27Te etwenyi elele na ee meci ni ihwɛ ɛtɛ ibwɛ, keeni anaa na shɛ agaiŋ a na oo so nu ukwuribi ubwa, e jeji teleyi nu bwa.

Currently Selected:

UMOZHIGO 17: RBT

Highlight

Copy