UMOZHIGO 35

Agwatana Twaananụ-unu Ufwo ne Jekob

1Agwatana hiɛŋ Jekob, Zhaga mungo ni Bɛtɛl, maa gɛga apata, maa m meni utukwu-ụrụpɛ apata. Gamba n shɛ Agwatana na bu bananɛ la caakwụ, aka na te ebi gezhigeni la batagwụ bụ ge Isụ.#Umoz 28:10-17

2Ge Jekob hiɛŋ atwa ihwɛ ibwɛ, ta atwa elele na namɛ nu bwa, 'Waŋ ma tuwa ta atwa cɛnjɛ ti nya tu na tu namɛ na ashashɛ hiŋ, maa hi mama njɛ shɛshɛshɛ, maa hi sheyinji i'wɛŋnɛ hiŋ tu'urugono. 3Ti ishɛjɛ ma epe, maa tu munji ma Bɛtɛl, iwɛ maa ma mana Agwatana utukwu-ụrụpɛ apata. Ubwa na m mbiyeni la na aka tiriri ti mi. Baa namɛ kaa ne mi no ofwo elele na Ngee zhe. 4Ibɛ po ee peni Jekob tuwa ta atwa cɛnjɛ ti nya tu na aa ga 'yajɛ, ta shɛtakwụ sha shɛcɛbɛ sha aba. Ge Jekob ni shu nu ucilo ukpekpeshi uko na gwumwonu ni Shɛkɛm.

5Gana na ti ge Jekob na miaụŋ mu bwa mu kwuni tubana apata. Ibɛ po inyɛsɛ i'wɛtwɛ banɛ no olugwo Agwatana yee ubi ashɛpwụ na rungwutwonu aŋ, ibɛ po ee urigeni shi aŋ ya nu usumwa. 6Ge Jekob zhe bee ci Luz (ibɛ shɛ Bɛtɛl), na namɛ na amɛ cɛnjɛ ti Kenan, medenji atwa elele na baa 'yajɛ. 7Boo mo apata utukwu-ụrụpɛ. Boo po ofwo ata izeci maa Agwatana Bɛtɛl, iwɛnɛ ti yaa shɛ apata Agwatana mama bacɛnganɛ bụ la, aka na ti bee gezhigeni batagwụ bwa ge Isụ.

8Ge Debora, na 'yagajɛ la Rebeka 'wi, ee ni bu nu ucilo ukpekpeshi ata namɛ tuta ti Bɛtɛl. Iwɛbɛ po boo po ofwo ata izeci maa, Ukpekpeshi u'wo-tutwa.

9Aka na ge Jekob banɛ nu Padan-aram, Agwatana bananɛ bụ sasana caakwụ, bee peni bu uwebiye. 10Nazhɛ Agwatana hiɛŋ bụ, Ɛ hiɛŋ la izeci bu ge Jekob, ama a zha shɛ mɛ bi hiɛŋ ya ge Jekob o, ama ɛ zhɛ mɛ bi hiɛŋ ya ge Isrɛl. Gabata ga Agwatana po bu izeci ti ge Isrɛl.#Umoz 32:28

11Ibɛ po Agwatana hiɛŋ bụ, Gamba n shɛ Agwatana na Hwuri Kpaaŋ, na mata miaụŋ maa hi na kaana ufwugwo tugombo. Edenji ofwugwo swoswoswo zhɛ a banɛ no olugwo bu, bi zhɛ kaa ba sha bishi ba shɛgwuma. 12Gabụ Ngɛɛ zhɛ ma pana cɛnjɛ ta ata Ngee peni la Abraham keeni Azik. N zhɛ kaa ma pana tụ ajalalo bu a na zhɛ ma bụ 'wa.#Umoz 17:4-8 13Nazhɛ Agwatana munji bee genji bu no olugwo ata baa jɛmɛ n-ndumwa nu bwa.

14Ibɛ po ge Jekob shikicinji utayɛ titeyinje nu uluji ata Agwatana dumanjɛ n-ndumwa nu bwa, bee dudugeni uŋ meni mu tụ'walụ ta afwafwa keeni manɛbɛ nu uhiuhiu ubwa. 15Ibɛ po ge Jekob po uluji ata na Agwatana dumanjɛ n-ndumwa nu bwa izeci, maa Bɛtɛl.#Umoz 28:18,19

Tumata ti Bɛnjamin, keeni Tu'wo ti Rechɛl

16Nazhɛ ge Jekob na atwa umwamwa ubwa shɛdɛnjɛ tahaŋnụ ta aba, te e beni ni Bɛtɛl, aka na ta ahanga ta vwɛ cwɛŋ ma e ci Efrat, ibɛ tulumongwu ta tumata tu kwuni Rechɛl tɛnda, ta a pana bụ ụbaụta. 17Aka na tu baa nda ụbaụta no tulumongwu ta ata, nazhɛ biyikwo na bo mbiyono biyikwo tumata hiɛŋ bụ, E-Rechɛl, ta nda inyɛsɛ o, bi zhɛ ba mata yɛu-ye-eyi inyɛ. 18Ama gana na tu boo gwumwonu ihwungwɛ tudwa, boo po iŋ izeci ti gɛ Bɛnoni,#35:18 Bɛnoni: Egini tɛ Bɛnomi i shɛ, yɛu mi ụngwụ-tuhwuga. ama bishi bwa po iŋ izeci ti gɛ Bɛnjamin.#35:18 Bɛnjamin: Egini tɛ Bɛnjamin i shɛ, yɛu mi u'ala ubiye.

19Aka na ti ge Rechɛl 'wi, ee ni bu nu uhwaŋna ata zhɛ Efrat (ibɛ shɛ Bɛtlɛhɛm.) 20Ge Jekob cimbeni utayɛ nu u'uye ubwa. U te cimbeni ba nu u'uye ata Rechɛl taa hwayɛ.

21Ge Isrɛl shɛdɛnjɛ tahaŋnụ tu bwa boo to udulo ubwa na aba ashɛkpa Ede.

Miaụŋ-me-eyi mi Jekob

(1 Shɛrụ 2:1,2)

22Aka na ti ge Isrɛl ta jɛjɛ na cɛnjɛ ta ata, ibɛ gɛ Rubɛn weci ne Bilha biyikwo bishi bwa bu magɛgashɛ, ge Isrɛl kaa hwụjɛ iŋ, yaa gwumanɛ bụ tebiye. Miaụŋ-me-eyi mi Jekob kaa mu namɛ umpwa-na-muba-mi-yebi.#Umoz 49:4

23Miaụŋ-me-eyi mi Lia na: gɛ Rubɛn na ge Jekob meci hiiŋ, ne Simion, ne Livai, na Juda, ne Isaka keeni Zɛbulon.

24Miaụŋ-me-eyi mi Rechɛl na: go Josɛf keeni Bɛnjamin.

25Miaụŋ-me-eyi mi Bilha bujama Rechɛl bo o na: ga Dan keeni Naftali.

26Miaụŋ-me-eyi mi Zilpa bujama Lia bo o na: ga Gad keeni Ashɛ. Mu na ata muba mɛ shɛ miaụŋ-me-eyi mi Jekob mu na ee metenji bu nu Padan-aram.

Tu'wo ta Azik

27Ge Jekob ci ihwɛ bishi bwa ga Azik ni Mamre kwo kaa ni Kiriat-aba (ibɛ shɛ Hɛbron) no ofwo na ga Abraham na Azik jɛjɛ la.#Umoz 13:18 28Shiywa sha Azik shɛ namɛ dipi-tɛtu-nu-talacɛ (180) te e meci bu. 29Ga Azik injɛ tebiye nazhɛ bee 'wi, nazhɛ miaụŋ mu bwa me eyi ge Isụ keeni Jekob mi ni bu.

Currently Selected:

UMOZHIGO 35: RBT

Highlight

Copy