UMOZHIGO 37

Awalabụ Josɛf, ni I'ime nɛ Atagwụ Ubwa To bu

1Ge Jekob jɛjɛ na cɛnjɛ ti Kenan tu na bishi bwa jɛjɛ la. 2Rụrụkwụkwụ ru umwamwa Jekob na.

Go Josɛf namɛ shiywa umpwa-na-shɛba-shi-cenje te e meci bu, nazhɛ baa ngabaraka agwụdụ keeni iyweywe na atagwụ ubwa, ubwa kaa ta shɛ yɛu na ashashɛ miaụŋ-me-eyi mi Bilha na mu na Zilpa, a na shɛ eyikwo bishi bwa. Go Josɛf shapɛrɛganɛ bishi ba aba unabarɛ wa aba ụwɛ.

3Ge Isrɛl kaa bo lubo Josɛf uhwuri yɛu ibwɛ ye elele, iwɛnɛ tu baa shɛ yɛu ibwɛ nɛ bee meci na ti'inga tu bwa. Bee tegeneni bu idikɛ i'ɛlɛ nɛ 'yajɛ ti'nyeci tu tuswoswoswo. 4Ama aka na atagwụ ubwa kwụbɛ maa bishi ba aba bo lubo bu uhwuri aŋ kpaaŋ aba, ibɛ po oo to bu ni i'ime. E eri shi a dumanga n-ndumwa nu bwa na amɛ-olom tebiye o.

5Go Josɛf wetegeni ụwalabụ uko, aka na ti bee mbishi atagwụ ubwa ụwalabụ ata, ee keeni bu i'ime tuta. 6Bɛɛ hiɛŋ aŋ, Hwuga ma ụwalabụ na Ngee wetegeni. 7Tu zweni ne ehilo oto umpo eshi ohiu, ibɛ ushi rihiu ri mi ishijɛ wee shikeni to, nazhɛ eshi ohiu hiŋ rungwutwonu uŋ, ee kwuzeni ushi rihiu ri mi.

8Ibɛ po atagwụ ubwa hiɛŋ bụ, Asha gabụ suu bi zhɛ ba sha agwuma tu kwo kaa gabụ suu bi zhɛ ba 'yaga ụhwada tu? Ibɛ po ee keeni bu ya ti'imo iwɛ ụwalabụ ata ubwa keeni iwɛ n-ndumwa ma ata baa dumanjɛ.

9Go Josɛf wetegeni ụwalabụ unya, bee mbishi atagwụ ubwa, bɛɛ hiɛŋ, N wetegeni ụwalabụ unya, ibɛ uwaŋna nu upiana keeni mkpasu umpwa-nu-boo-ko e n kwuzeni.

10Ama aka na ti bee mbishi bishi bwa keeni atagwụ ubwa. Bishi bwa tezhigeni bu, bɛɛ hiɛŋ bụ, Ụwalabụ imbe nɛ ebu wetegenii? Asha Gamba no nobu keeni atagwụ bụ suu ti zhɛ to bu kwuzono? 11Nazhɛ atagwụ ubwa kwuni isɛbwɛngwɛ tɛnda nu bwa, ama bishi bwa kaa untanganɛ iwɛ ɛtɛ na ahaŋsa ubwa.#Ugo 7:9

Atagwụ Josɛf Twagwụ bụ Unu maa ga a Kwụnɛ bụ

12Jitoo ko atagwụ Josɛf suji agwụdụ bishi ba aba ee zhe ne ehilo no ofwo tiyaga to gwumwonu ni Shɛkɛm. 13Ge Isrɛl hiɛŋ Josɛf, Atagwụ bụ suji agwụdụ no ofwo tiyaga ni Shɛkɛm, N zhɛ ma bụ tumwana no ofwo aba.

Go Josɛf leni, bɛɛ hiɛŋ bụ Gamba na. 14Bishi bwa hiɛŋ bụ, Zhaga hwuwayɛ go kwubɛ atagwụ bụ okwo a ta namba lapiya keeni agwụdụ, maa n gwuricingeni ajɛshɛgwa. Baa tumwanɛ bụ ga, bee beni nu ulomu Hibron, bee zhe ni Shɛkɛm.

15Ibɛ bụtụ bu ko kwụbɛ bụ tu bo rungo na ambɛ, nazhɛ bụtụ ata heŋteni bu, bɛɛ hiɛŋ, Imbe aba dwalakakaa?

16Go Josɛf hiɛŋ bụ, Ma dwalakaka atagwụ mi, ma bu tabwa, m mbishi ka geri na ee suji agwụdụ ee zhe tiyaga.

17Nazhɛ bụtụ ata hiɛŋ bụ, O hwulwo, N hwụjɛ tɛ ɛ hiɛŋ, Ti zhe ma Dotan. Ibɛ po go Josɛf 'wa atagwụ ubwa, boo to aŋ ugbe nu Dotan.

18Aka na aa kwụbɛ bụ taa dụlụ tobwolo bu to gwumwonu su na aba o, aa twagwụ bụ unu maa ga kwụnɛ bụ.

19Aa mama hiaŋnụ, Buwetegeni ga ba awalabụ ye be ci. 20Hwure tụ kwụnɛ bụ ma maa ti keri bu ma nu ushapa uko, maa ti hiɛŋ ma usunda ehilo uko ụ yɛ bụ, maa ta kwụba ya iyi nɛ awalabụ ata ubwa zhɛ a sha.

21Ama aka na ti gɛ Rubɛn hwụjɛ iŋ, baa lacɛ, bɛɛ hiɛŋ, Kede tu kwụnɛ bụ ma o. 22Gɛ Rubɛn hiɛŋ aŋ, Ta kwụna bụ ma o, kala bụ ma okwo nu ushapa ga namɛ epe nụ ụshɛka ga, kede i'ɛlɛ hiŋ timengeni bu o. Bɛ jɛmɛ iwɛ ɛtɛ maa lashɛga bụ ni i'ɛlɛ ya aba, maa gwuricingono bu bishi bwa.

23Aka na tu go Josɛf ci atagwụ ubwa, ee ushiji bu idikɛ ɛtɛ ibwɛ 'yajɛ ti'nyeci tu tuswoswoswo nɛ bee ge urigeni. 24Ee shepi bu ee keri nu ushapa uko uhwoo na zasa meni.

25Nazhɛ aa jɛjɛ maa a yɛ iyimɛyɛ, eshigiri, ee shepi eshe aa kwụbɛ ta atwa Ishmɛl a na banɛ ni Giliad zhɛ tɛkashɛka. Nruhondo ma aba mu 'waŋnɛ tuko keeni iyi nɛ aa nda manɛbɛ mu unibi keeni iturɛre muru, ɛɛ zhɛ Ijipti.

26Nazhɛ go Juda hiɛŋ miaụŋ-mo-bino bwa, Imbe kwuuŋ shɛ ule na ɛti zhɛ tu ma ya ti yaa shɛ atụ kwụnɛ buhongwu tu maa tu sweci ma mehieŋ mu bwaa? 27Hwure ma ti sengeni bu ma atwa Ishmɛl, maa kede i'ɛlɛ tu timengeni bu o, iwɛnɛ tu baa shɛ buhongwu tu, baa shɛ kaa tu'waba tu tu. Ibɛ po miaụŋ-mo-bino bwa mu hwụjɛ-unu ubwa.

28Aka na ahinya Midia zhɛ tɛkashɛka, ɛɛ vwɛ Josɛf nu ushapa ata, ee sengeni bu atwa Ishmɛl azụrụfa arinya woshi, ee shepi Josɛf ni Ijipti.#Ugo 7:9

29Aka na gɛ Rubɛn gwuri no ofwo ushapa ata, baa kwụbɛ maa go Josɛf zasaba nu ushapa o, bee dwetweji tugwuno tu bwa. 30Bee gwure no ofwo ohongwu ubwa, bɛɛ hiɛŋ aŋ, Buhongwu tu zaba ya o. Cee Ngɛɛ zhɛ mo tonoo?

31Aa kwụnɛ biywoywo, ee shepi idikɛ Josɛf ee shiyeni iŋ ne mehieŋ ma ata.

32Nazhɛ aa tumwanɛ idikɛ ɛtɛ i ti'nyeci tu tuswoswoswo, no ofwo bishi ba aba, ɛɛ hiɛŋ, Iyi etu gwushije na, kwụba de okwo idikɛ yɛu bụ nɛ.

33Ge Jekob kaa mepi iŋ, bɛɛ hiɛŋ, Idikɛ yɛu mi nɛ, usunda ehilo uko ụwɛ ubwa kwụnɛ bụ ụ yɛ, i zasa beye bana o onsotongwo Josɛf wuŋzu, wuŋzu. 34Nazhɛ ge Jekob dwetweji otogwo ubwa,#37:34 dwetweji otogwu ubwa: Otogwo kwo kaa i'wɛŋnɛ tudwatwaga, i shɛ timbisono ta amɛ-tụhaŋtụ ti iwɛ gwumanɛ Bihibru. boo urugono tugwuno tụ ụcɛnjɛ tɛnda,#37:34 tugwuno tụ ụcɛnjɛ tɛnda: Tugwuno tu ga tɛ shɛ tuna aa na tụ kwi ne tihiŋzhe ti iyweywe kwo kaa agwụdụ shakwa shakwa iwɛ maa o no urugono tu na aka na ti iwɛ gwumanɛ bụtụ kwo kaa aka na bụtụ ba ta-ụkwụla ta bụtụ 'weni bu. boo to-ụkwụla yɛu ibwɛ te ilegeji. 35Miaụŋ mu bwa me eyi keeni miaụŋ mu bwa mo o kpaaŋ mi ishijɛ maa mi ingatanjɛ bụ, ama bu lacɛ ti'ingatanga, bɛɛ hiɛŋ, N zhɛ ma ta-ụkwụla yɛu mi tutu tu'wo. Gana bishi bwa cwɛ-u'wo ubwa ta.

36Amidian ata sengeni bu Potifa na shɛ bɛnjɛ-bu-ugondu Faro, na kaa shɛ uhiu wa a'iywa ihwɛ ibwɛ ni Ijipti.

Currently Selected:

UMOZHIGO 37: RBT

Highlight

Copy