UMOZHIGO 45

Go Josɛf Meme Mbiseni Miaụŋ-mo-ono Bwa

1Na aka ata go Josɛf eri shi mama ima ya hwungbɛ ne eshe atwa na shikekeni nu bwa o. Baa uganɛ, bɛɛ hiɛŋ, Ga bụtụ be elele beni nu umwono ga. I zasa ga bụtụ okwo bu ko na namɛ nu bwa nu umwono ata, na aka na ti bee meme mbiseni miaụŋ-mo-ono bwa o.#Ugo 7:13 2Bee tileni nu u'wo gboo. Atwa Ijipti hwụjɛ ụŋ, ee mbishi kaa atwa ihwɛ Faro unabarɛ ibɛ. 3Go Josɛf hiɛŋ miaụŋ-mo-ono bwa, Gamba go Josɛf na. Bishi mi ta namba hŋ? Ama miaụŋ-mo-ono bwa eri shi mɛ jishijɛ bụ o, iwɛnɛ ti yee hwuri dama aŋ na agba ubwa. 4Nazhɛ go Josɛf hiɛŋ miaụŋ-mo-ono bwa, Ma hi tabwa, kaanɛ ma izhɛ pi mi. Ee keeni ga izhɛ. Bɛɛ hiɛŋ aŋ, Gamba yɛu-bino hiŋ go Josɛf ata ahiɛ sanjɛ la na cɛnjɛ ti Ijipti na. 5Kede shɛmɛ shi hiŋ shɛ hashɛganụ ya o, ta mama 'yaganụ ma kaa du isɛbwɛ ahiɛba hiɛba iwɛnɛ ahiɛ n sanjɛ la epe o. Agwatana bata n tumwanɛ maa me hwure umbe ne hiŋ iwɛ maa Me hi bicingo. 6Iwɛnɛ po shiywa shi yebi na ee te kwuni imunɛ-tiya na cɛnjɛ tu ga, yaa ta vwɛ shiywa shɛ ta ta a ta zha shɛ a hwaŋ itimɛ maa e jwe iyimɛyɛ. 7Agwatana kaa n tumwanɛ maa me hwure umbe ne hiŋ iwɛ maa Ma hi untangana maa hiɛ vwɛ na cɛnjɛ tu unyizo, maa Ma hi lashɛga tedure nu uhwaŋna ga ụrụhwajɛ. 8Shɛ ahiɛba hi n tumwanɛ epe o, ama Agwatana. Ubwa kaa n njɛ maa ma 'yaga ohwolu na hwuri a na elele no ofwo agwuma, maa Ma sha agwangwama ihwɛ ibwɛ hwɛɛ, keeni uhiu cɛnjɛ ti Ijipti kpaaŋ. 9Nda ma kakayɛ maa hi zhe pe bishi mi maa hi mbishi bu maa, Yɛu bụ go Josɛf hiɛŋ, Agwatana njɛ bụ uhiu cɛnjɛ ti Ijipti kpaaŋ. Zwe kakayɛ, tɛ njɛ ti'insu o. 10Gabụ bi zhɛ ba gɛga na cɛnjɛ tu Goshɛn, bi zhɛ mo bu dongonu, tu gabụ, ta miaụŋ mụ bụ, ta ajalụ bụ, ta agwụdụ bụ, ti iyweywe bu, ti inɛ bụ keeni iyi elele nɛ abɛ 'yajɛ hwɛɛ. 11Apata Ngɛɛ zhɛ ma bụ ima u'ala, iwɛnɛ ta shiywa shi imunɛ-tiya shɛ ta vwɛ shɛ ta, iwɛ maa kede tukofwo tụ bụ 'imɛ, ta atwa ihwɛ bụ keeni iyi elele nɛ abɛ 'yajɛ o. 12Hiɛ kwụbɛ kaa du hwuwayɛ go ni ikɛnyi hiŋ, to buhongwu mi gɛ Bɛnjamin maa nu unu mu Ama duma n-ndumwa ne hiŋ. 13Zhaga mbiso ma bishi mi ụjɛrụma na Ngaa 'yajɛ ni Ijipti kpaaŋ, keeni iyi elele nɛ ahiɛ kwụbɛ. Nda ma kakayɛ maa hi zɛrijɛ bishi mi epe.

14Nazhɛ bee leyiteni buhongwu bwa gɛ Bɛnjamin ni i'ilu, baa cwɛ-u'wo. Gɛ Bɛnjamin du kaa cwɛ-u'wo ni i'ilu ibwɛ ta a mama imanụ. 15Nazhɛ baa ruwanɛ atagwụ ubwa hwɛɛ, baa twanɛ aŋ u'wo. Nazhɛ miaụŋ-mo-ono bwa mu dumanjɛ n-ndumwa nu bwa.

16Aka na atwa ihwɛ Faro hwụjɛ urishi ata, maa bwonu miaụŋ-mo-ono Josɛf mi zhajɛ. Yee lemicinji Faro amɛ ta anjɛ-ugondu ubwa du hwɛɛ. 17Ibɛ po ga Faro hiɛŋ Josɛf, Hiɛŋ miaụŋ-mo-ono bu, ge petengeni iyimabiga ya aba i'wɛŋnɛ iyimɛyɛ maa e gwuri na cɛnjɛ ti Kenan. 18Ga a shapɛ bishi hiŋ, ta atwa ihwɛ hiŋ maa hi zhajɛ pi mi. N zhɛ ma hi pana kaa cɛnjɛ tu na tɛ zhɛmɛ ni Ijipti, ahiɛba hi zhɛ hia ya tuwebiye ta cɛnjɛ tu ga.

19Pana aŋ unu sasana maa ge suji ihɛŋtu cɛnjɛ ti Ijipti nɛ idɛkwɛ yo kokwulo iwɛ miaụŋ ma aba mi tidice dice keeni eyikwo aba, maa a shapɛ bishi ba aba epe. 20Kede a 'wa ya iwɛ iyi ya aba nɛ ɛɛ zhɛ ɛ gɛnjɛ o. Iwɛnɛ po iyi ibiye cɛnjɛ ti Ijipti kpaaŋ zhɛ ya sha inɛ ya aba.

21Ibɛ po miaụŋ mi Jekob mɛ njɛ gana ata. Go Josɛf peni aŋ ihɛŋtu cɛnjɛ gana na tu ga Faro peni bu unu, bee peni aŋ iyimɛyɛ maa a na ya nu uhwaŋna. 22Bee peni bụtụ bụtụ na amɛ aba utogwo u tuhwuŋtono, ama bi peni Bɛnjamin azụrụfa arinya kpakwụ-ni-dipi-yebi (300) keeni otogwo a ta. 23Baa tumwananɛ bishi bwa nzhinyacɛ umpwa, mu na mu 'waŋnɛ i'wɛŋnɛ nɛ i'wɛŋnɛ ibiye Ijipti zweni, tu nzhinyacɛ mo o umpwa mu na mu 'waŋnɛ iyimɛyɛ inyɛ keeni inɛɛ nɛ bishi bwa zhɛ nɛ yɛ hwuŋ nu uhwaŋna ti bee ci. 24Nazhɛ bee genji miaụŋ-mo-ono bwa ee hwuri. Gana na tɛ ɛ zhɛ, bɛɛ hiɛŋ aŋ, To 'wogo ma hwayɛ nu uhwaŋna o.

25Iwɛ ecilo ata ee beni ga ni Ijipti, ee munji ee ci cɛnjɛ ti Kenan no ofwo bishi ba aba ge Jekob. 26Ee mbishi bu maa go Josɛf ta namba, ubwa du kaa shɛ uhiu cɛnjɛ ti Ijipti kpaaŋ. Ohwulu po bu iyi bwuu bwuu bwuu, iwɛnɛ po bu tɛtanɛ shɛ n-ndumwa ma aba rishe o. 27Ama aka na ee mbishi bu n-ndumwa mu na go Josɛf mbishe aŋ kpaaŋ, baa kwụbɛ du kaa ihɛŋtu cɛnjɛ nɛ go Josɛf tumwanɛ maa a shapɛ bụ, nazhɛ ohwulu bishi ba aba ge Jekob kezhe. 28Ge Jekob hiɛŋ, Inɛ go gwumwa ya, yɛu mi go Josɛf ta namba. N zhɛ ma kwụba bụ nazhɛ mo 'wo.

Currently Selected:

UMOZHIGO 45: RBT

Highlight

Copy