UMOZHIGO 47

1Go Josɛf teri atagwụ ubwa a ta baa sanɛ, bee mbiseni Faro, bɛɛ hiɛŋ bụ, Bishi mi na miaụŋ-mo-ono mi, medenji unyama wa agwụdụ aba, ti inɛ ya aba keeni iyi elele nɛ aa 'yajɛ na cɛnjɛ ti Kenan a zhajɛ, aa namba na cɛnjɛ tu Goshɛn. 2Nazhɛ bee mbiseni Faro atagwụ ubwa.

3Ga Faro heŋteni atagwụ ubwa, bɛɛ hiɛŋ aŋ, Imbe shɛ ugondu hiiŋ?

Ɛɛ jishijɛ Faro, ɛɛ hiɛ, Miaụŋ mu ga bụ mu ugondu mɛ shɛ abɛjɛ iyimabiga gana eshi aba. 4Ɛɛ hiɛŋ sasana Faro, Ti zhajɛ maa ta gɛga na cɛnjɛ tu ga. Iwɛnɛ po ambɛ tiya zasaba iwɛ agwụdụ miaụŋ-mu-ugondu ga bụ o, iwɛnɛ ti imunɛ-tiya hwulej na cɛnjɛ ti Kenan. Ta bu tabwa hwuwayɛ go maa iti leneni maa ta gɛga na cɛnjɛ tu Goshɛn.

5Nazhɛ ga Faro hiɛŋ Josɛf, Bishi bu na miaụŋ-mo-ono bu zhajɛ pụ bụ. 6Cɛnjɛ ti Ijipti ta ti bi tileneni. Gɛgɛcɛnga bishi bu na miaụŋ-mo-ono bu na cɛnjɛ tu na ti ngezeni hwɛɛ nu Goshɛn. Yaa shɛ kaa ebi mepi atwa na vwengenji na ashashɛ aba, tulono aŋ maa a shɛ angbaracɛ iyi mi mabiga.

7Nazhɛ go Josɛf zeriji bishi bwa ge Jekob bee tecinji bu, bee mbiseni Faro, ge Jekob peni Faro uwebiye. 8Ga Faro heŋteni Jekob bɛɛ hiɛŋ, Shiywa shɛ mba abu namɛ te e bi mecii?

9Ge Jekob jishijɛ Faro, bɛɛ hiɛŋ, Shiywa shɛ na Ngaa namwawaŋ shɛ namɛ dipi-yebi-nu-talacɛ gba (130), shɛ ta twa sụ ufwugwo, Ngaa na ya kaa uraiŋ ụwɛ. Shɛ ta kpayawụ sụ kaa na shiywa shɛ na eshi mi namɛ la nu unyizo ga o. 10Ge Jekob peni Faro uwebiye, nazhɛ baa banɛ na agba ubwa. 11Nazhɛ go Josɛf gɛgɛcɛnjɛ bishi bwa keeni miaụŋ-mo-ono bwa na cɛnjɛ tu na bee peni aŋ maa a 'yaga ni Ijipti. Ibɛ shɛ ofwo na cɛnjɛ ti ngezeni nụ ụzhɛ, to gwumwonu nụ ụshɛpwụ ata ɛɛ hiɛŋ Ramesis, nu gana na tu ga Faro peni bu unu. 12Go Josɛf ba pana bishi keeni miaụŋ-mo-ono bwa iyimɛyɛ, ta atwa ihwɛ bishi bwa, nu gana na tu ufwugwo wa amwamwa aba namɛ hwɛɛ.

Tuhaŋsa tu Josɛf iwɛ Imunɛ nɛ Namɛ na Cɛnjɛ ti Ijipti

13I zasa ofwo elele na iyimɛyɛ namɛ ya na cɛnjɛ ta ata kpaaŋ o, iwɛbɛ po imunɛ-tiya hwuleji. Ugiriri keri atwa cɛnjɛ ti Ijipti keeni cɛnjɛ ti Kenan, iwɛ imunɛ nɛ namɛ apata. 14Go Josɛf sotulonu ukwuribi na aa 'yajɛ na cɛnjɛ ti Ijipti keeni cɛnjɛ ti Kenan kpaaŋ, iwɛ iyimɛyɛ nɛ oo so. Bee suji ukwuribi ata nu umwono Faro. 15Aka na oo so iyimɛyɛ nu ukwuribi na namɛ na cɛnjɛ ti Ejipti keeni cɛnjɛ ti Kenan hwɛɛ, ibɛ po Ijipti kpaaŋ zhajɛ pu Josɛf, ɛɛ hiɛŋ bụ, Iti peni iyimɛyɛ. Iwembe po ɛbi zhɛ bu ma tu ngbaraka maa to 'woo? Iwɛnɛ po ukwuribi tu kaa hwuwowu hwɛɛ.

16Go Josɛf jishijɛ aŋ, bɛɛ hiɛŋ, Yaa shɛ ukwuribi hiŋ hwuwowu hwɛɛ, asha suje ma iyimabiga hiŋ maa ma hi pana iyimɛyɛ tụlụkpashɛ ti iyimabiga hiŋ. 17Ee suje ga iyimabiga ya aba no ofwo Josɛf, go Josɛf peni aŋ iyimɛyɛ tụlụkpashɛ ti idɛkwɛ ya aba, na agwụdụ aba, ni iyweywe ya aba, ni inɛ ya aba keeni nzhinyacɛ ma aba. Bi peni aŋ iyimɛyɛ tụlụkpashɛ ti iyimabiga ya aba kpaaŋ nu uywa ata. 18Aka na tu uywa ata kwunanjɛ, aa zhajɛ pu bwa nu uywa na 'wa una ata, ɛɛ hiɛŋ bụ, Iyɛri tu, ti zha shɛ ta bụ swakana o. Ukwuribi tu hwuwowu kpaaŋ ni iyi tusa, bu loshigwo la kaa iyimabiga tu kpaaŋ. I zasa kaa iyi elele ta tu vwanɛ maa ta bu pana ya o, asha semi tukwugwu tu tu keeni cɛnjɛ tu tu. 19Iwembe po ɛbi zhɛ bu ma tu ngbaraka maa to 'wo ne eshe bu, ta atuba, ta cɛnjɛ tu tuu? Utu so ta cɛnjɛ tu tu iwɛ iyimɛyɛ, ti zhɛ ta sha ajama Faro ta cɛnjɛ tu tu, maa iti peni izɛgwu maa ta bila ne shihilo shi tu, maa kede cɛnjɛ tɛ shɛ osombo.

20Ibɛ po go Josɛf senji Faro cɛnjɛ ti Ijipti kpaaŋ. Iwɛnɛ po Ejipti senji shihilo sha aba kpaaŋ iwɛ imunɛ nɛ ya kwụna aŋ. Ibɛ po cɛnjɛ tɛ shɛ ya ma tu Faro. 21Go Josɛf suji atwa ata baa njɛ aŋ ajama, te kwuni nu ukwunanga Ijipti zalụ uko i ci ukwunanga zalụ uyebi. 22Cɛnjɛ to onongbo kiri bee se shi. Iwɛnɛ po onongbo 'yajɛ urobwo wa aba na ga Faro peni aŋ, ibɛ po a ya iyi nu urobwo wa aba na ga Faro peni aŋ. Iwɛbɛ po ee senji shi cɛnjɛ ta aba.

23Nazhɛ go Josɛf hiɛŋ atwa ata, Hioko ma, N hi sowo ta cɛnjɛ ti hiŋ hwayɛ ga iwɛ Faro. Hwuwayɛ go izɛgwu nɛ iwɛ maa hiɛ bɛrɛ ne shihilo shi hiŋ. 24Aka na aka iyimɛyɛ tugwubo ci hwuŋ, hi zhɛ hia pana Faro iyi itana. Inɛ ɛtɛ vwɛ ya, i shɛ inee hiŋ, iwɛ izɛgwu ye ehilo hiŋ, ti iwɛ iyimɛyɛ ikɛnyi hiŋ, ti iwɛ nhwaŋ mi hiŋ hwɛɛ, ti iwɛ atwa hiŋ na ta gwumwatagwụ.

25Ɛɛ jishijɛ bụ, ɛɛ hiɛŋ, Iyɛri, tɛ njɛ ugwoje bu te ebi ti bicinji. Bɛ tɛ zhɛmanɛ, ti zhɛ ta sha ajama Faro.

26Gabata go Josɛf shiri undwa ata na cɛnjɛ ti Ijipti, maa ga Faro, ubwa shɛ bu na 'yaga iyi itana ye elele. Undwa ata te shikeni ba tutu ta hwayɛ, asha cɛnjɛ to onongbo kiri tɛ shɛ shɛ ma tu Faro.

Go Josɛf Shileni Jekob Unu

27Gabata E'isrɛl jɛjɛ ni Ijipti na amɛ cɛnjɛ tu Goshɛn, a shɛ azhɛgba na tuba. Aa mata miaụŋ, aa kaana ufwugwo tugombo duwa.

28Ge Jekob namɛ na cɛnjɛ ti Ijipti shiywa umpwa-na-shɛba-shi-cenje. Shiywa shi Jekob hwɛɛ shɛ namɛ dipi-yebi-na-buhanda-na-shɛba-shi-cenje te e meci bu (147).

29Aka na ta aka gwumwonu maa ge Isrɛl 'wi, baa suyanɛ yɛu ibwɛ go Josɛf, bɛɛ hiɛŋ bụ, Yaa shɛ ɛbi zhɛ bu ma n ndana uwebiye tebiye, asha shiyono u'ala bụ tuta ti i'unte mi hwuwayɛ go maa n shileni-unu u tɛkana. Ma bu tabwa, maa kede n ni, ni Ijipti ga o. 30Ama yaa shɛ Ngee 'wi gana eshi mi, m becinji ni Ijipti maa n ni no ofwo na ee ni aŋ la.

Go Josɛf jishijɛ bụ, bɛɛ hiɛŋ, N zhɛ ma nda gana na ɛbi hiɛŋ.#Umoz 49:29-32; 50:6

31Ge Jekob hiɛŋ bụ, N shileni-unu maa bi zhɛ ba nda gana ata, bee shileni bu ga unu. Nazhɛ ge Isrɛl to bizhiri ni ihiŋhiŋ ogodo ubwa.

Currently Selected:

UMOZHIGO 47: RBT

Highlight

Copy