Luk 1
1
Emiighom mọ
1Ooḅi ạTiofilos:
Ịbadi awe mọlhogh ni ẹmhu ọge ịlo ạraraar phọ ịpe emite bọ sịen ogbo phọ ayira. 2Bịdi ụge ịlo ịpe bụphe ọmiin bọ rạraar phọ ịphen kꞌẹḅel egbiom mọ, ọḅile ghan bọ ọghaaph ọghaaph Ẹnaan oleenyemi, mọghaaph bọ ni ụḅeni iyoor. 3Esi ịduon phọ, loor esi dị mị mazuumaam bọ ni ạtuugha oomo phọ ạraraar phọ ịphen kꞌẹḅel egbiom mọ, mị ragbiom ni mọ ẹnighe ni ọge ẹkpigh etum ẹkpigh oruom ạna Tịofilos. 4Mị ụtu mọ legheri mọ oomo ạraraar phọ ịpe mọtughemi bọ nyịna ọkaraghi igey phọ ni.
Ọkaaph okol ịpe kọmar bọ Jọn oburogh mụum mọ
5 #
1 Krọ 24.10
Ọrugh phọ ọpo ạHerod aḍighi bọ ọdaam eelhe phọ aJudia, oniin oyil ạrikia ạrol li, dị oghol mọ ạZekaraya. Ọdi aḍighi ọnyo ạbaay ariil ạrikia phọ dị oghol mọ ạbaay kꞌAbaija. Ạnir ọdi, dị oghol mọ Elizabet, ọnyo ẹemara ẹemara Eeron. 6Ịyal phọ ạbidi ụmoogh ni eeḅi ẹzo ghisigh Ẹnaan ooko ghan iilogh Ọmoogh-we phọ ọman. 7Bịdi nmụny ụ́moogh, ịdi eḍighi bọ Elizabet ạrol ẹmar, kụ ịyal phọ ạbidi mọkpo ḍiboom ạḍikpo.
8Eniin aḍio, ạZekaraya ạrol li raḍighi oḍighi abiil phọ ọdi ghisigh Ẹnaan, ịdi eḍighi bọ mesi ẹkpigh ọdi oḍighi oḍighi Otu Ịiḅereghi phọ ḍio ḍio ḍio. 9-10Esi eḍighinom ịyaar phọ ariil ạrikia phọ rọtuan ghan bọ, bịdi ụsa ni ẹlhel, kụ ẹlhel phọ emeelom nyọdi ọsu aani ịnsens ẹpe ọgbanaghi ịyaar aghuḍum mọ. Rẹteeny mem ọsuughi ịnsens phọ, kụ ọdi ạghi aḍigh ẹpe Ạdol Iigbia Otu Ọmoogh-we phọ, kụ aḍita awe ọrol ẹpe erugh phọ rọoḅereghi ghan Ẹnaan.
11Kụ ọokpaany Ọmoogh-we phọ aru ạmeera ḍịghaagh elhiom enmeny ịyaar aghuḍum mọ. 12Mem mọ ạZekaraya ạmiin bọ nyọdi, ịiḅaghami ni nyọdi iboom dị aruugu asiph ni nyọdi. 13Kụ ọokpaany Ọmoogh-we phọ ạḅeni ạZekaraya mọ, “Aruugu nyịna kúsiph. Mọnaghan ni ịiḅereghi phọ ạna. Elizabet ạnir phọ ạna kạmaranaan ni nyịna olephiri, kụ nạ kakol mọony phọ mọ ạJon. 14Nạ kạmoogh ni iboh rꞌọḅaal ologhi, kụ ịbadi koboom ni ẹmaria phọ ẹphen. 15#Igb 6.3Ọdi kaḍighi ni ogbogh ghisigh Ọmoogh-we phọ. Ọdi kụ́pughol miim ịya rꞌạmuukpara amiim. Rọmar roseere, bịn Uwaloor Iigbia phọ kamuza ni loor ọdi. 16Ọdi kakiton ni iloghi ịbadi aweye Ịzirel olegheri Ọmoogh-we Ẹnaan phọ ạbidi. 17#Mal 4.5, 6Ọdi kụ kaḍiemi ghan akori Ọmoogh-we phọ, ạmoogh ịikpo aḍighi ogbogh ịdipho Ilaija oyil phọ Ẹnaan. Ọdi kạpomoghi yogh ni bụrude rꞌạnmuny. Ọdi kakiton ni iloghi aweye oḅom ẹmhu olegheri aani ịyaar ịdipho awe aruukuan phọ. Ọdi kaselemi ni iloghi aweye aseenaan Ọmoogh-we phọ.”
18Kụ ạZekaraya apuru ọokpaany phọ Ẹnaan mọ, “Koḍighi bọ ika kụ mị alegheri mọ ịduon phọ ni? Mị okumoor oye, ḅịle kẹn ạnir ạmi maḍighi okumoor ạnir.”
19 #
Dạn 8.16; 9.21 Kụ ọokpaany phọ mọ, “Mị aGebriel. Mị rạmeera ghan ghisigh Ẹnaan. Urom ịmi ọghaaph rꞌọḅeniom ạna ooḅi ọghaaph phọ ọphon. 20Ịduon nạ úmeeraam bọ dom mọ ạmi, ḍịphe kemite bọ ni ịpe mị rạkaaph bọ, pọ nạ kaḍighi ekpom ọka. Nạ kạ́ḅa mun tụtu ẹteeny ḍio phọ ịphen phọ kemite bọ.”
21Mem mọ ạmuen phọ, awe phọ ukori ghan ạZekaraya, ọḅile ookia ịpe eḍighi bọ kụ ọdi rabia bọ ịdipho, ẹpe Ạdol Iigbia Otu Ịiḅereghi phọ. 22Mem dị ọdi amite bọ aru, órue mun ọḅa, kụ bịdi ọsighenom mọ ọdi mạmiin uḍien ẹpe Ạdol Iigbia Otu Ịiḅereghi phọ. Ọdi ạmaaghiom rạghaagh, loor esi dị maḍighi ekpom ọka.
23Kụ ariiḍio ọphinyon ạrikia phọ ịpe ọdi remunughan, kụ ọdi agheel kꞌọdi. 24Onyebel roten, kụ Elizabet ạnir phọ ọdi asoph eghun kụ ómite aani ghan kꞌoye esi oogh ụnwanyu, 25kụ ạḅem ghan mọ, “Nyịidipho Ọmoogh-we phọ mụnma ịmi ighirigiir ạsighe eekpoogh umugholoor phọ ạmi ghisigh awe.”
Ọkaaph okol ịpe kọmar bọ Jịzos
26Mem dị eghun phọ ọdi mẹman odiiny ụnwanyu, Ẹnaan irom ni Gebriel ọokpaany phọ ọdi mọ ạghi ẹmha dị oghol mọ ạNazeret ẹpe eelhe aGalili. 27#Mat 1.18Ọdi ạpham ni dom ạghiomonaan esina ọnyani dị oghol mọ aMeri, dị ạJosef ọnyo ẹemara ẹemara aDevid ọdaam mọ atebeeny ḍịkala. 28Kụ ọokpaany phọ ạghi ạḅeni ọnyani phọ mọ, “Nyạni phọ, bọ ni. Ọmoogh-we phọ mạlhogh nyịna iboom ịiseeny.”
29Adom mọ ạḍien ịiḅaghami ni ologhi aMeri iboom kụ apuruan ghan mọ, “Ẹmhu ịduon phọ ika?” 30Ọokpaany phọ ạḅeni ọnyani phọ mọ, “Meri, kákiilaan. Ẹnaan mẹnma nyịna ighirigiir. 31#Mat 1.21Nạ kaamor ri ạmar olephiri kụ akol mọ ạJizos. 32#2 Sạm 7.12, 13, 16; Azay 9.7Ọdi kaḍighi ni ogbogh. Egbogh Ẹnaan phọ kekol nyọdi mọ Ọony ọno, kụ Ẹnaan Ọmoogh-we phọ kẹngo ni nyọdi ạgada ọdaam ẹmha, ịdipho aDevid ogbogh ọde phọ ọdi. 33Ọdi kụ kạda ẹemara ạJekob kꞌagee-pọ. Ẹdaam ẹmha phọ ọdi eekuna kẹ́tol.”
34Kụ aMeri apuru ọokpaany phọ mọ, “Ịphen phọ keḍighi ika kụ emite bọ? Mịna rꞌolephiri ọony esi kọ̋rolan ghan bọ.”
35Kụ ọokpaany phọ mọ, “Uwaloor Iigbia phọ kụ kasoorom nyịna, kụ ịikpo Egbogh Ẹnaan phọ keghoph ni nyịna. Loor ịduon phọ, Ẹnaan kekol mọony phọ nạ kạmar bọ mọ Oye Aghuḍuul, Ọony phọ ọno. 36Legheri mọ Elizabet ọnyo asiya phọ ạna, ghạlamo ịdipho mạkpo bọ ni tụtu agholaam ḍien ẹmar phọ, odi ni rꞌịyal amem aloor, dị mẹman odiiny ụnwanyu kụ kạmar olephiri. 37#Emi 18.14Ịyaar lọ ẹkparanaan Ẹnaan oḍighi ílho mun.”
38Kụ aMeri ạḅem mọ, “Mị otelhedom Ọmoogh-we phọ. Ịdipho nạ ạḅem bọ ẹtuugh ni imitenaan ịmi!” Kụ ọokpaany phọ agheel.
AMeri ạpiigha kꞌElizabet
39Ịphen phọ eten bọ íbia kụ aMeri aḅetenu aakolobian aagborion ạghi ẹpe aroogbolom mọ, asi eniin ẹmha pạ eelhe phọ aJudia. 40Kụ aḍigh otu ạZekaraya kụ ạmagh Elizabet. 41Ịduon Elizabet ạnaghan bọ ḍịmagh phọ aMeri, bịn ọony phọ odi bọ ọophi phọ Elizabet awul, kụ Uwaloor Iigbia phọ amuza loor Elizabet. 42Kụ Elizabet aphoophe ẹḍogh ọdi ạghiom ạnyu kụ ạḅem mọ, “Mọseph ni nyịna esi aḍita ạnmariir. Ạḍiseph edianaan ni mọony phọ ọpo nạ kạmar bọ. 43Uḍighi ika kụ iboom mọ ịphen rimitenaan bọ ịmi, dị tụtu nạ onhiin Ọmoogh-we phọ ạmi kụ maru ophogh ạmi? 44Ịduon mị ạnaghan bọ ḍịmagh phọ ạna bịn ọony phọ odi bọ ọkuruḅaka phọ ạmi awul li rꞌọḅaal ologhi. 45Ạḍiseph edianaan ni nyịna ịdipho nạ ameeraam bọ ni mọ adom Ọmoogh-we phọ eru bọ ẹteeny nyịna kẹtuugh ni emite.”
AMeri ạmoor ḍụor oboomiom Ẹnaan
46Kụ aMeri ạḅem mọ,
“Uwaloor ạmi rạbughe ni Ọmoogh-we phọ;
47ologhi ạmi ạmoogh ni iboh esi Ẹnaan Ọpelia phọ ạmi,
48 #
1 Sạm 1.11
ịdi eḍighi bọ ọdi mụlhoghomaam ịmi otelhedom mọ ọdi mạar ụ́man bọ.
Egbi nyịidipho ẹghiom ghisigh, oomo awe kughol ghan ịmi mọ ọnyani dị ọseph,
49loor esi ịma ạraraar phọ Egbogh Ẹnaan phọ meḍighi bọ ịngo ịmi.
Iigbia kụ aḍien phọ ọdi;
50ọdi rạnma ghan ni ighirigiir oomo ạbulo ọlogh nyọdi eegu,
oghiil atum oghiil.
51Ọdi mạgbuton ḍịghaagh iphelegbe phọ ọdi,
ạawalami bụphe robaga bọ sịphe iloghi phọ ạbidi.
52 #
Job 5.11; 12.19 Ọdi magborion bugbogh ạraalha phọ esi ạsidol phọ ạbidi
kụ apophe bụphe mạar ụ́man bọ.
53Ọdi mạpheremiom igey ạraraar bụphe ọkoony phọ rasiph bọ,
aporogh rạalha phọ okeel rꞌoopho ạraghaagh.
54Ọdi mạlhoghonaan ḍịghaagh weye phọ Ịzirel abutelhedom mọ ọdi,
ịdipho ọdi aguanaan bọ bụrude ạburude phọ ayira.
55 #
Emi 17.7
#
1 Sạm 2.1-10
Ọdi mạnma ighirigiir Ebraham
rꞌẹemara ẹemara phọ ọdi kꞌagee-pọ.”
56AMeri ạrol li iiruen phọ kꞌElizabet dị ẹghiom ni ịraar ụnwanyu kụ agbi nụun ogheel.
Ịpe ọmar bọ Jọn oburogh mụum mọ
57Kụ amem ẹmaria phọ Elizabet ẹteeny bọ, ọdi ạmar olephiri. 58Amatuman rꞌasiya ọdi ụnaghan ni iboom ighirigiir phọ Ọmoogh-we phọ mạnma bọ nyọdi, kụ oboomiom nyọdi.
59 #
Lịv 12.3
Rẹman ọphaanya aḍughul-otu, kụ oru oḍun ọony phọ. Bịdi ụwa oghol aani ọdi mọ ạZekaraya ịdipho ọde phọ. 60Onhiin phọ ọdi ómeera kụ ạḅem mọ, “Ḍien ọdi kokol mọ ạJon.”
61Kụ awe phọ úmeeraam kụ ọḅem mọ, “Ọlo kꞌanyina dị oghol ḍien phọ ạḍien ólho.” 62Kụ bịdi ọmaaghian opuruom ọde phọ mọ oghol nyọdi ika.
63Kụ ọdi ạmaaghian aḍeenaan bịdi mọ ọngo nyịno okpooghi, kụ rọngo kụ ọdi ạge sịphe mọ, “Aḍien ọdi ạJon.” Kụ iḍighi ni iikia esi oomo phọ ạbidi. 64Mem mem mọ ọpo bịn ọdi ạtagharan ọnhu amiigh ạḅa aboom Ẹnaan. 65Kụ aruugu asiph ni oomo ạbuo amatuman phọ ạbidi. Kụ oomo phọ ịphen phọ iileghaan ni oomo areelhe aroogbolom mọ aJudia. 66Kụ aḍita ạbudi ọnaghan bọ ọotughian ghan sịphe iloghi phọ ạbidi kụ opuruan ghan mọ, “Ọphon phọ kaḍighi eeghe ọdo ọony?” Loor esi dị bịdi olegheri ni mọ ịikpo Ọmoogh-we phọ edianaan ni rꞌọdi.
Ịmiin phọ ạZekaraya
67Uwaloor Iigbia phọ amuza ni loor ạZekaraya ọde phọ ọdi, kụ ọdi ạmiin ịmiin kụ ạḅem mọ,
68“Ạḍiseph ẹrolonaan Ọmoogh-we Ẹnaan phọ Ịzirel,
ịdi eḍighi bọ ọdi maru ạnma ighirigiir ạtagharan we phọ ọdi.
69Ọdi mumitiomonaan iyira ogbogh Ọpelia
dị aḍighi oniin ọnyo ẹemara ẹemara kꞌaDevid otelhedom mọ ọdi.
70Ịphen kụ ịmiin phọ ariil aruukuan phọ Ẹnaan ọmiin bọ gediidi phọ.
71Ọdi aguan ọtagharan ayira ḍịghaagh ạbuo ẹpomoghian phọ ayira
ḅịle rꞌesi ịikpo oomo ạbuphe ụlogh bọ iyira ḍien phọ,
72ọnma ghan ighirigiir bụrude ạburude phọ ayira,
ọḅile ghan ọpham ọphuo ịyo phọ ọdi.
73-74Esi ịyo phọ ọdi aghiran bọ ọde phọ ayira Ebraham, ọphel ayira ọsighe ḍịghaagh ẹpomoghian phọ ayira,
ạḅile bọ ameeraam mọ ooseeny ni nyịno dị rꞌeepuph kị́tol,
mọ ọrolom ruukuan rꞌigey ghisigh ọdi esi oomo aghuḍum mọ ayira,
75pọ ọdi maako iikunya ọghor phọ ọpo
ọdi aguanaan bọ ạngo Ebraham ogbogh ọde phọ ayira.
76 #
Mal 3.1
“Kụ nạ ọony phọ ạmi, koghol nyịna mọ oyil Egbogh Ẹnaan phọ.
Nạ kụ kaḍiemi ghan aselemi eten aseenaan Ọmoogh-we phọ,
77kụ ạḅeni we phọ ọdi mọ bụphe ọsar bọ ịkaraph phọ ạbidi ọwilenaan
kọpel li otene.
78Ẹnaan phọ ayira eḍighi ni ẹlo iboom igbiririph.
Ọphel otene phọ ọdi kuruom bọ iyira
kạkigh ịdipho ạḍiroor dị ekpoghoronu
kụ ạḍiḅaal phọ keporogh ni ufiri sịphe iloghi phọ ayira ẹkele.
79 #
Azay 9.2
Kạkigh kẹn ịdipho ogogo dị asoorom bụphe aḍuugh memoogh bọ
kụ ạma eten ẹepho uḍeenaan iyira.”
80Kụ ọony phọ aphoph eye rꞌuwaloor ạmanam kụ ạrol ẹpe ẹdala phọ tụtu ẹteeny mem dị ọdi kamite egaan ghisigh aweye phọ Ịzirel.
Currently Selected:
Luk 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
