Mạk 16
16
Oḅetenu esi aḍuugh phọ
(Matiu 28.1-8; Luk 24.1-12; Jọn 20.1-10)
1Aḍio ophooghian phọ reten bọ kụ aMeri ọpo ạMagdala phọ rꞌaSalomi, rꞌaMeri onhiin phọ aJems, ụghi ni ogho rolho eḍu kịrokiro, ịlo bịdi kọki ogbul ḍizu phọ ạJizos. 2Kụ ḍịroor ạḍiḅel aḍio awiki phọ, mem dị erumuḍio memite, bịdi ụghi ni ẹpe oḍi phọ. 3Kụ oniin apuru ghan nyoniin mọ, “Ạnhian kụ kuukiileminaan bọ iyira ḍighiigh phọ opukiom bọ ọnhu oḍi phọ?” 4Kụ bịdi okiton opogh, kụ ọmiin dị mookilemi ḍighiigh phọ ọsighe. Aḍighiigh phọ ịbugh ni iboom. 5Kụ bịdi oḍiku ologhi oḍi phọ kụ ọmiin dị onyugheel ọony dị ạkpologhian ọmur ạrol ude ḍịghaagh elhiom mọ, kụ aruugu asiph ni bịdi.
6Kụ ọdi mọ, “Aruugu inyina kísiph. Nyina rẹwa ghan Jịzos ọpo ạNazeret, ọpo ọkan bọ oghiigh. Ọdi maḅetenu, ọdi sịen ólho. Ịmiin esi phọ ọmuneen bọ nyọdi. 7#Mat 26.32; Mạk 14.28Ikeel ẹḅeni bụmatuan phọ ọdi rꞌaPita, mọ ọdi raḍiemi ghan ẹpe Galili kụ okori anyina. Ẹpe kụ ẹdi nyina kẹmiin nyọdi, ịdipho ọdi ịḅeni bọ ni inyina.”
8Kụ bịdi omiteghu pạ oḍi phọ kụ osumughu ọḍua, ịdi eḍighi bọ bịdi ụmoogh ni okpereghaan rꞌaruugu. Kụ bịdi ụ́kaaph ịyaar ụḅeni oye loor oghiilaan.
Ịdi ạbuo ageedi okureri eelegh phọ.
ẠJizos amite egaan aḍeenaan loor Meri ọpo ạMagdala phọ
(Matiu 28.9-10; Jọn 20.11-18)
[ 9Kụ eḅon ạḍiroor ạḍiḅel aḍio awiki phọ ạJizos aḅetenu bọ sịphe aḍuugh phọ, ọdi ạphur amite egaan aḍeenaan loor Meri ọpo ạMagdala phọ ọpo ọdi aphorogh bọ oḍual aruru phọ. 10Kụ ọdi ạghi ạghaaph ạḅeni bụphe rꞌạJizos ọrolan ghan bọ, dị odi ọto rꞌemoghi, 11kụ mem dị bịdi ọnaghan bọ mọ ọdi odi ni phọ, ḅịle mọ aMeri mạmiin ni nyọdi phọ, bịdi úmeeraam.
ẠJizos amite egaan aḍeenaan loor ịyal ạbumatuan
(Luk 24.13-35)
12Ịphen reten, kụ ạJizos anmia amitenaan ịyal ạbunon ạbidi dị ọḍua ẹmha phọ rokeel. 13Kụ bụen phọ oḅula kụ ọghaaph ọḅeni bụeri phọ, kụ bịdi úmeeraam.
ẠJizos amite egaan aḍeenaan loor ḍioph rꞌoniin phọ
(Matiu 28.16-20; Luk 24.36-49; Jọn 20.19-23; Iiḍighi 1.6-8)
14Kụ ịphen reten, kụ ạJizos amite egaan aḍeenaan loor ḍioph rꞌoniin ạbumatuan phọ, dị odi rolhe ghan eḍien, kụ ạḅaam bịdi loor emeera rꞌịikpara iloghi phọ ạbidi, ịdi eḍighi bọ bịdi úmeeraam bụphe ọmiin bọ nyịno, mem mọ ọno maḅetenu bọ. 15#Iiḍ 1.8Kụ ọdi ạḅeni bịdi mọ, “Ịki oomo aḅirini phọ ẹghaaph ooḅi ọghaaph phọ ẹḅeni yogh oomo awe. 16Kụ ọlo ameeraam kụ owur mụum, kạmoogh ni pẹleeny, kụ ọlo úmeeraam, kạmoogh ni apum. 17Kụ areḍeenaan phọ ịphen kemitenaan ni bụphe omeeraam bọ: koporogh yogh ni ruru esi aḍien phọ ạmi, kọḅa ghan ni ọnhu kịrokiro, 18kopoophe yogh ghan ni iḍigh-eḍum, kụ ọphughol ịyaar lọ ọloghom ọogho, kéḍighi mạar. Bịdi kọzuughi ghan ni bụo ạreezegh oḍume yogh.”
Ọsighe Jịzos okeelom kꞌạke
(Luk 24.50-53; Iiḍighi 1.9-11)
19 #
Iiḍ 1.9-11
Kụ ạJizos Ọmoogh-we phọ rọghaaph bọ rọḅeni bịdi, bịn ọsighe nyọdi ogheelom kꞌạke, kụ ạrol ude ḍịghaagh elhiom Ẹnaan. 20Kụ bịdi ọghi kụ ọghaaph ọghaaph oleenye oomo arikpisi, kụ Ọmoogh-we phọ ạrolonaan ni rꞌạbidi, kụ ạsighe yogh ghan reḍeenaan dị emiteghu ghan ạkparamiom ghan ọghaaph phọ.]
Currently Selected:
Mạk 16: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
