Luk 5
5
ẠJizos ạmagh bụḅel ạbumatuan phọ
(Matiu 4.18-22; Mạk 1.16-20)
1 #
Mat 13.1, 2; Mạk 3.9, 10; 4.1 Eniin aḍio, ạJizos ạmeera ni sịphe oogbom Ọphiiny ạGenesaret kụ aḍita awe onyughian ịlo ọteeny ọdi ọnaghan ọghaaph phọ Ẹnaan. 2Kụ ọdi ạmiin ịyal arughuugh dị edi ọgbal ọphiiny phọ. Ạbuo ạkoni kụ ụwile rughuugh phọ osoroghu rootologh ghan ịzuguru ạbidi. 3Kụ ọdi ạghi aḍigh nyọpo aSaimon, kụ ạḅeni mọ ọdi amitiom ogbo ẹphurukpu. Romitiom bọ, kụ ọdi ạrol ude kụ ạtughemi ḍita awe phọ.
4Rọghaaph bọ rọman, kụ ạḅeni Saimon mọ, “Nyu oghuugh phọ amitiom ogbo ọphiiny, ọbo nyina ezuom ina!”
5 #
Jọn 21.3
Kụ aSaimon mọ, “Ọtughemia, oomo aḍughul phọ yoor ozuughi bọ, yoor ịyaar úkiigh. Kụ nạ mạḅem bọ, pọ mị kạḅile ni apu azuughi.” 6#Jọn 21.6Kụ ozuom iboom ina dị ịzuguru phọ ạbidi ẹwa ni ọphanyu. 7Kụ bịdi ọyapha bụphe ọphori phọ oghuugh phọ mọ oru ọloghonaan bụno ḍịghaagh. Kụ bịdi oru kụ ina phọ emuza ịyal phọ arughuugh phọ dị tụtu ẹwa ni oḅiighi. 8Kụ aSaimon Pita ạmiin bọ ịphen phọ, akpuḍian ni ruwol ạJizos kụ ạḅem mọ, “Ọmoogh-we, ụwile ịmi, ịdi eḍighi bọ mị oḍighinom ịkaraph.”
9Ina phọ bịdi ozuom bọ iḍighi ni ruugu esi aSaimon rꞌoomo ạbueri phọ ọrol aani bọ. 10Iḍighi aani kẹn ni ruugu esi aJems rꞌạJon ạnmuny phọ aZebidi, bụo ooḍikuan phọ aSaimon. Kụ ạJizos ạḅeni Saimon mọ, “Kákiilaan! Emiigh kꞌạnyiidipho nạ kạkoni ghan ạkoni awe.”
11Kụ bịdi rosul rughuugh phọ, bịn ụwile ni oomo ạraraar phọ ạbidi kụ ọdaph Jịzos.
ẠJizos aakonom oye ẹzegh ọku ufe
(Matiu 8.1-4; Mạk 1.40-45)
12Eniin amem ạJizos ạrol li eniin ẹmha. Oniin oye dị ẹzegh ọku ufe mẹphughan loor phọ ạmiin ni nyọdi, kụ aḅololo ghisigh ọdi ạaḅereghian mọ, “Oye phọ, seseeny, lọ nạ kameera ni, pọ uukonom aani ịmi.”
13Kụ ạJizos asele ḍịghaagh ạḅogh nyọdi kụ ạḅem mọ, “Mị ameera ni. Ḍum.” Kụ ẹzegh ọku ufe phọ ẹḍua loor ọdi. 14#Lịv 14.1-32Kụ ọdi ạto ạḅeni oye phọ mọ, “Nyeene agheel, ụ́kaaph ghan ụḅeni oye. Kịa aḍeenaan loor phọ ạna-oyil ạrikia phọ. Kịa aḍighi ịyaar aghuḍum ootolonu phọ ịdipho aMozis ạtooghi bọ, ịlo oḍeenaan awe mọ nạ mamoon.”
15Kụ ọdu phọ ạJizos alegheri ghụn bịn aaleghaan, kụ ịbadi awe oru ookpomoghan ọnaghanan ọdi, ọwaam ghan mọ ọdi aḍume bụphe úmoonogh bọ. 16Kụ ọdi amian ghan ạghi rạdala phọ kụ ạaḅereghi ghan Ẹnaan.
ẠJizos aakonom oye dị ạḍighaagh rꞌaḍuwol emugh
(Matiu 9.1-8; Mạk 2.1-12)
17Eniin aḍio ạJizos odi rạtughemi ghan we phọ, kụ buniin aFarisi phọ rꞌạbutughemia iilogh dị ọḍua Jeruselem rꞌoomo ạramha phọ aGalili rꞌaJudia kụ oru ụrol aani ni sịphe phọ. Kụ ịikpo Ọmoogh-we phọ ịrolonaan ni Jịzos oḍume yogh ạbuphe úmoonogh bọ. 18Kụ ụmuneen ni ẹmina oye dị ạḍighaagh rꞌaḍuwol emugh ọsighe oruom Jịzos. Bịdi ụwa ghan oḍighom ọdi oseere aghisigh ạJizos, 19kụ eepoogh ụ́miin loor esi aḍita awe phọ, kụ ọsiiny ạnyu otu phọ, ogborion eniin esi ọkpaaghi ẹmina phọ rꞌoye phọ ạmina bọ oseere ghisigh ạJizos sịphe ogbo awe phọ. 20Mem dị ọdi ạmiin bọ oḍuom ologhi phọ ạbidi ạḅeni ni mọ, “Ye phọ, mọsar ịkaraph ạna ọwilenaan nyịna.”
21Kụ ạbutughemia iilogh phọ rꞌaFarisi phọ omiigh ọotughian mọ, “Ọphon rạapu bọ Ẹnaan ịduon phọ ạnhian? Ạnhian kụ katue ạsar ịkaraph ạbilenaan, emuton Ẹnaan bịn.”
22Kụ ạJizos aloghoma bọ mọ bịdi rọotughian ghan ịduon phọ kụ apuru mọ, “Iḍighi bọ ika kụ ịitughian phọ ịphen edi bọ iloghi phọ anyina? 23Ịghen kụ idugh epu ịlo ọḅeni oye phọ mọ, ‘Mọsar ịkaraph ạna ọwilenaan nyịna,’ rꞌọḅeni mọ, ‘Ḅetenu arelhe.’ 24Ọbo nyina elegheri mọ Ọony phọ Oye ạmoogh ni ịikpo sịen aḅirini phọ ọsar ịkaraph ọwilenaan, kụ mị kạḅeni bọ oye phọ ạḍighaagh rꞌaḍuwol phọ emugh bọ mọ mị rạḅeni ghan nyịna mọ ḅetenu ạsighe ẹmina phọ ạna agheel kꞌạna.”
25Egina amem bịn ọdi aḅetenu sịphe ogbo phọ ạbidi, kụ ạsighe ẹmina phọ ọdi kụ ạrol li oboom ghan Ẹnaan tụtu asi ologhi otu. 26Kụ iḍighi ni iikia esi oomo phọ ạbidi, kụ oboom ghan Ẹnaan. Kụ aruugu asiph ni bịdi kụ ọḅem ghan mọ, “Yira mọmiin ịimaany rodon.”
ẠJizos ạmagh Livai
(Matiu 9.9-13; Mạk 2.13-17)
27Ịphen phọ eten bọ ạJizos ạḍua ni kụ ạmiin ọbonyiom iisogh dị oghol mọ aLivai, dị ạrol ude sịphe otu phọ rọbonyi ghan bọ iisogh phọ, kụ ạḅeni nyọdi mọ, “Ụdaph ịmi.” 28Kụ ọdi ạwile oomo ạraraar aḅetenu ạdaph Jịzos.
29Kụ aLivai aakolobian mugbogh amalhe kụ ạmagh Jịzos asiom otu, kụ ịminighan ạbuphe rọbonyi ghan bọ iisogh phọ rꞌạbunon awe oru aani rolian nyọdi. 30#Luk 15.1, 2Kụ buniin aFarisi phọ rꞌạbutughemia iilogh ạbuo aFarisi phọ ugum ni opuru bụmatuan phọ ạJizos mọ, “Uḍighi ika kụ nyina rꞌạbubonyiom iisogh rꞌabuḍighinom ịkaraph kụ relian bọ eḍien?”
31Kụ ạJizos mọ, “Bụphe úmoon bọ kụ ropir ghan oyil, kạ́buphe omoon bọ. 32Mị ụ́tuan ọḅeni abugey mọ okiton esi ịkaraph kụ aru bọ. Mị uru ghụn ni okirion abuḍighinom ịkaraph phọ.”
Aḍipuru ịlo ọtuan ịiḅereghi ọrol ọkoony
(Matiu 9.14-17; Mạk 2.18-22)
33Kụ buniin awe ọḅeni Jịzos mọ, “Sey, ạbumatuan phọ ạJon rọtuan ghan ni ịiḅereghi kọrol ọkoony, kụ ạbumatuan aFarisi phọ ọtuugh ni ịphen phọ roḍighi aani ghan, kụ ạbumatuan phọ ạna role ghan ni kọphughol.”
34Kụ ạJizos mọ, “Nyina regbi mọ kọtolomi ni ọkoony we dị odi kꞌọyogo dị olhom ọnyani phọ odi ni sịphe? 35Kụ amem retu ni dị kọboor bịdi olhom mọ, kụ bịdi ogbi nụun ọrol aani ọkoony.”
36Kụ ạJizos ạḅile adoghom ḍidogh phọ ạḍien ạḅeni bịdi mọ, “Oye ólho dị kạpaar ọpherepe omoom ukpe ạgbiom ogbaany ukpe. Ạgbiom, pọ mạphanyi omoom ukpe phọ kụ ạri ogbaany phọ rꞌomoom mọ ị́ḅophan. 37Oye ólho dị kạsighe igbaany ạsikarama kụ aakoom mumoom amiim ịya. Aḅulughi, pọ amiim mọ kaḅomoghi ni sịkarama phọ, bịn amiim mọ rꞌạsikarama phọ epeeghu. 38Amumoom amiim rꞌimoom ạsikarama kụ ịḅophan. 39Oye ólho dị mạphughol ghan mugbaany amiim kụ kạwa ọphughol amumoom, sịen dị ọdi rạḅem ghan mọ, ‘Amugbaany phọ kụ ạdugh.’”
Currently Selected:
Luk 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
