Luk 4
4
Ịdi ọdegh Jịzos ophogh
(Matiu 4.1-11; Mạk 1.12-13)
1Kụ ạJizos, rꞌịikpo Uwaloor Iigbia phọ dị emuza loor, ạḍua Jọdan ratigheel, kụ Uwaloor Iigbia phọ ạpham ni nyọdi ạghimom ẹpe ẹdala phọ, 2kụ Eru phọ ẹdeghogh nyọdi ephogh inyadi aḍughul-otu, kụ ọdi eḍien ólhe ghan. Ariiḍio phọ remunughan, kụ ọkoony asiph nyọdi.
3Kụ Eru phọ ẹḅeni nyọdi mọ, “Nạ kụ Ọony phọ Ẹnaan ni, pọ ḅẹni ḍighiigh phọ ạḍien mọ eten eeḅoghoḍi ạbred.”
4 #
Dut 8.3
Kụ ạJizos mọ, “Ọge ni sịphe ạḍinya iigbia phọ mọ, ‘Oye kạ́tolom eḍien bịn.’”
5Kụ Eru phọ ẹsighe nyọdi ẹsiinye ạnyu kụ únyam ụḅatan bịn eḍeenaan nyọdi oomo areelhe aḅirini phọ. 6Kụ Eru phọ ẹḅeni nyọdi mọ, “Mị kạngo ni nyịna ịikpo ọdaam oomo phọ ịphen ạḅaram igbogh phọ ạbidi. Oomo ịphen phọ mọḅogh ni ụngo ịmi, kụ mị kạngo ni oye lọ ụḅeeraan ịmi. 7Esi ịduon phọ, nạ ameera akpuḍian ụngo ịmi eghuan, oomo ạraraar phọ ịphen ketu ni ịlo ạna.”
8 #
Dut 6.13
Kụ ạJizos ạphagharanaan mọ, “Ọge ni sịphe ạḍinya iigbia phọ mọ, ‘Nạ kakpuḍian ghan ạngo eghuan Ọmoogh-we Ẹnaan phọ ạna, kụ aaseeny ghan nyọdi bịn.’”
9Kụ Eru phọ ẹsighe Jịzos esiemi ẹpe Jeruselem ẹsiinye eekuna ạnyu Otu Ịiḅereghi phọ, kụ ẹḅeni nyọdi mọ, “Mọ ạna kụ Ọony phọ Ẹnaan ni, pọ pel sịen phọ akuruph. Ọge ni sịphe ạḍinya iigbia phọ mọ, 10-11#Ạsuo 91.11, 12‘Ẹnaan kẹḅeni ni rụukpaany phọ ọdi mọ okori okoph nyịna, ọbo nạ kạnmighima ghan bọ owol loor aḍighiigh.’”
12 #
Dut 6.16
Kụ ạJizos ạphagharanaan nyọdi mọ, “Ọge ni sịphe ạḍinya iigbia phọ mọ, ‘Kạ́degh Ọmoogh-we Ẹmugh phọ ạna apogh.’”
13Kụ Eru phọ rẹdeghogh bọ Jịzos rephogh rẹman, bịn ẹwile nyọdi ẹḍua ekoriom ghan ẹnon eepoogh.
ẠJizos amiigh oḍighi phọ ọdi ẹpe Galili
(Matiu 4.12-17; Mạk 1.14-15)
14Kụ ạJizos ạḍua arigheel Galili kụ ịikpo Uwaloor Iigbia phọ ịrolan ni nyọdi. Bịn ọdu phọ ọdi aaleghaan oomo areelhe phọ etuman bọ. 15Kụ ọdi ạtughemi ghan rubughotu phọ ạbidi, kụ oomo awe oboom ghan nyọdi.
Okel Jịzos ẹpe Nạzeret
(Matiu 13.53-58; Mạk 6.1-6)
16Kụ ạJizos aru ni asi Nạzeret, ẹmha phọ ookonom bọ nyọdi. Kụ ḍio ophooghian phọ, esi eḍighinom ịyaar phọ ọdi, ạghi ni aḍigh obughotu phọ, kụ ạmeera ạal ạḍinya iigbia phọ. 17Kụ oye phọ adi ghan bọ rịnya phọ ạsighe elegh Azaya oyil phọ Ẹnaan ạngo nyọdi. Kụ ọdi ạatarion ḍịnya phọ, kụ ạmiin esi phọ ọge bọ mọ,
18 #
Azay 61.1, 2 “Uwaloor Ọmoogh-we phọ odianaan ni rꞌạmi,
ịdi eḍighi bọ ọdi mụma ịmi ọsighe ooḅi ọghaaph oruom arukulom mọ.
Ọdi murom ịmi ọghi ọghaaph ọḅeni ạbuo ikoli phọ mọ mosereghi bịdi,
rꞌọngo ọmiin eten bụo ikpom ariḍien phọ;
rꞌosereghi ạbuphe ọzerom bọ,
19rꞌogbeel mọ ḍịen kụ ạlha phọ Ọmoogh-we phọ kạngo bọ we ḍịseph phọ.”
20ẠJizos rạal rọman kụ akpooghi ḍịnya phọ aḅulemi ạngo nyọpo adi ghan bọ rịnya phọ kụ ạrol ude, kụ oomo ạbuphe ọrol aani bọ sịphe obughotu phọ osomoghi nyọdi ophogh okananaam. 21Kụ ọdi amiigh ọḅeni ạbidi mọ, “Arodon phọ kụ ẹdi ịphen ọge bọ sịphe ạḍinya iigbia phọ meru ịne rụru anyina.”
22Kụ oomo awe phọ ụghaaph ni ịlo ạJizos, ḅịle ịma ikpo ọnhu phọ ọdi eḍigh iikia esi ạbidi, kụ ọḅem ghan mọ, “Ọphon phọ kọ́ony phọ ạJosef ḍịen?”
23Ọdi ạḅeni bịdi mọ, “Mị alegheri ni mọ nyina kidoghonaan ni ịmi mọ, ‘Nạ oyil dị ạnighe ẹmha.’ Nyina kẹḅile kẹn ni ịḅeni ịmi mọ, ‘Ḍighi aani sịen ẹmha phọ ayira ịpe yoor rọnaghan ghan bọ mọ nạ raḍighi yogh ghan ẹpe Kạpaniom.’” 24#Jọn 4.44Kụ ạJizos ạḅile ạḅem ạloghom mọ, “Mị rịḅeni ghan inyina mọ oyil otu óghuan ghan.
25 #
1 Ạbud 17.1
“Ịnaghanan ịmi. Ọrugh phọ Ilaija, ọlophia ọ́lhoph esi ịraar ạsia rꞌegbem kụ iboom ịgbakuro isoor ri oomo eelhe phọ. Igey ni, ịbadi arukpukele ạnmariir ạbuo Ịzirel ụrol li mem mọ ọpo. 26#1 Ạbud 17.8-16Ghạlamo rꞌịduon phọ ni, bịn Ẹnaan ị́sighe Ilaija ịkiomaan rꞌoniin ọnyo ạbidi, ịḅile ghụn ni ẹsighe ẹghiomonaan nyoniin ekpukele ạnir ọlo ạZarefat eelhe aSaidon. 27#2 Ạbud 5.1-14Ḅịle kẹn, ịbadi awe ạbuo Ịzirel dị ẹzegh ọku ufe eḍighi yogh ụrol li ọrugh phọ Ilaisa oyil phọ Ẹnaan. Ịduon phọ kẹn ni, ọnyo ạbidi lọ ookonom ọ́rol. Ụḅile ghụn ni ookonom oniin phọ aNemon ọlo ạSiria phọ kụ oḍume.”
28Mem dị bịdi ọnaghan bọ ịphen phọ, ịghagh iloghi imuza ni loor oomo ạbuphe ọrol bọ sịphe obughotu phọ. 29Bịdi uḅerenu ni kụ oonyirogh Jịzos ọḍuanam pạ ẹmha phọ, ọghi ọsiinye ạnyu eegbolom mọ ẹmha phọ ạbidi ẹrol bọ, ịlo onyu ọdi osumeeny ẹpe ekpululu bọ oghiigh. 30Kụ ọdi arelhe ni bịn ạḅeeny sịphe ogbo awe phọ ạḍua.
Ịlo oye dị eru eghola
(Mạk 1.21-28)
31Kụ ạJizos ạghi ni asi Kạpaniom eniin ẹmha sịphe eelhe phọ aGalili, kụ aḍigh obughotu ạtughemi we phọ ḍio ophooghian. 32#Mat 7.28, 29Kụ ịtughemi phọ ọdi iḍighi ni iikia esi ạbidi, ịdi eḍighi bọ ọdi ạghaaphom rꞌịikpo. 33Kụ oye dị eru eghola aru aḍigh aani obughotu phọ kụ ạlooghi mọ, 34“Jịzos ọnyo ạNazeret, nạ rụwa ghan iyoor eeghe ịyaar? Nạ uru ophiemi ayoor ḍụghum? Mị alegheri ni oye dị nạ aru. Nạ kụ oye aghuḍuul phọ kꞌẸnaan.”
35Kụ ạJizos amooghaam nyọdi mọ, “Ḅoorian amite loor ọdi ạḍua!” Kụ eru phọ eler oye phọ sịphe ogbo phọ ạbidi kụ emite, wọor ẹḍua.
36Kụ oomo phọ ạbidi omaghagha yogh, kụ oniin apuru ghan nyoniin mọ, “Ịphen phọ, ịghen ọdo ikpo ọnhu? Rꞌiboom ịikpo kụ ạtooghi ghan rạraar rạngo ruru, bịn kụ aruru phọ remiteghu ghan kẹḍua.” 37Bịn ọdu phọ ọdi aaleghaan oomo areelhe phọ etuman bọ.
ẠJizos aakonom ịbadi ạbudi úmoonogh aḍume yogh
(Matiu 8.14-17; Mạk 1.29-34)
38Kụ ạJizos rọḍua sịphe obughotu phọ, kụ ạghi aḍigh kꞌaSaimon. Osipheeny ạrol li iboom loor onhiin ạnir aSaimon, kụ bịdi ọoḅereghian Jịzos mọ ạloghonaan ḍịghaagh. 39Kụ ọdi aru ạmeera ịigaany ạnir phọ, kụ ạḅeni osipheeny phọ mọ amite. Kụ osipheeny phọ amite, kụ egina amem bịn ạnir phọ aḅetenu ạko bịdi igoni.
40Dulhe mem dị ẹnam-aḍio remeel ighool, ụsighe ni oomo ạbudi omeelom rẹezegh kịrokiro oruom nyọdi. Kụ ọdi ạzuughiom rạghaagh ọdi rụmhu oomo phọ ạbidi, kụ aakonom bịdi. 41Kụ ọdi aphorogh yogh ịbadi aruru dị ẹlooghi ghan mọ, “Nạ kụ Ọony phọ Ẹnaan”, amiteghom loor ịbadi awe.
Kụ ạJizos ómeera mọ aruru phọ ẹtagharan ọnhu, ịdi eḍighi bọ bịdi ilegheri ni mọ ọdi kụ aKraist phọ.
ẠJizos ạkaaph ọghaaph ẹpe Judia
(Mạk 1.35-39)
42Ạḍiroor rekpoghoronu, kụ ạJizos ạḍua ẹmha phọ ẹpe ạghi ekpisi dị enamian. Kụ awe phọ ọwa nyọdi, kụ rọmiin, kụ ọoḅereghian mọ ọdi kụ́bile bụno. 43Kụ ọdi ạḅeni bịdi mọ, “Mị kạḅile ni ạkaaph aani ooḅi ọghaaph ịlo ọmar phọ kꞌẸnaan ạḅeni aani bụo ịpheri ạramha phọ. Ịduon kụ ịdi Ẹnaan irom bọ ịmi oḍighi phọ.” 44Kụ ọdi aḍiku ghan rubughotu phọ aJudia ạghaaph ooḅi ọghaaph phọ ạḅeni we.
Currently Selected:
Luk 4: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
