Luk 3
3
Ịdi ạJon oburogh mụum ạghaaph ạḅeni we
(Matiu 3.1-12; Mạk 1.1-8; Jọn 1.19-28)
1Mem dị ạTaibirios Siza mạrolom ạgada ọdaam ẹmha phọ aRom ẹman ḍioph rꞌoogh ạsia, ạPontios Pailet kụ ạda eelhe aJudia, ạHerod kụ ạda eelhe phọ aGalili, aFilip umor phọ ọdi kụ ạda eelhe Ituria rꞌaTrakonitis, aLisanias kụ ạda eelhe Abilini, 2kụ Ạnas rꞌạKayafas kụ ạbuo ạrumhu ariil ạrikia phọ; mem mọ ọpo kụ ẹdi ikpo ọnhu phọ Ẹnaan eru ẹpe ẹdala phọ ẹteeny Jọn ọony phọ ạZekaraya. 3Kụ ạJon arelhe yogh ni akitonom oomo eelhe dị etuman Ọphiiny ạJodan kụ ạghaaph ghan mọ, “Ikiton esi ịkaraph phọ anyina eru mị iwurogh mụum, ọbo Ẹnaan ẹsar ịwilenaan inyina.” 4#Azay 40.3-5Ịdipho Azaya oyil phọ ạge bọ sịphe ạḍinya phọ ọdi mọ,
“Oye atu ni rạlooghi ẹpe ẹdala phọ mọ,
‘Ọmoogh-we ratu. Iseleminaan eten phọ ọdi
esele yogh iloghi phọ anyina.
5Iḅologh oomo ariḍiiny phọ eḍueghi
eguphogh oomo ạraaḅaraph phọ rꞌaruugum mọ ẹeberemi,
esele yogh oomo ịkulakula areten phọ,
ẹḅile ẹegbenyon yogh rugbugh phọ.
6Kụ oomo awe kọmiin ni pẹleeny phọ Ẹnaan.’”
7 #
Mat 12.34; 23.33 Ịbadi awe ụḍua ni oru ọteeny Jọn mọ ọdi awur bụno mụum, kụ ọdi mọ, “Nyina ọmar ạsiḅom, ạnhian kụ iroma bọ inyina mọ nyina kekpetenaan ni ghẹlhe phọ ratu bọ. 8#Jọn 8.33Ịmoogh rọozo awe lọ mokiton esi ịkaraph phọ ạbidi. Kéḍuom ologhi Ebraham ọde phọ ayira. Boonaan Ebraham kạ́tol, mem dị nyina eḍighi ịkaraph. Mị rịḅeni ni inyina mọ Ẹnaan ketue ni ẹsighe sighiigh phọ ịphen eḍighi nmụny ẹngo Ebraham. 9#Mat 7.19Kꞌạnyiidipho ni bịn oseere ni akubu zin ạtorobo oreeny. Oreeny lọ úmuum igey iimuma koler ri oguom nịan.”
10Kụ aḍita awe phọ opuru nyọdi mọ, “Yoor oḍighi ika nụun?”
11Kụ ọdi mọ, “Oye lọ ạmoogh ịyal ạrusuoma ạsighe nyoniin ạngo nyọpo ụ́moogh aani bọ! Uwo ạmoogh eḍien adi aani ghan ạngo.”
12 #
Luk 7.29
Buniin ạbubonyiom iisogh phọ uru ni ọteeny nyọdi mọ ọdi awur bụno mụum kụ opuru mọ, “Ọtughemia, yoor oḍighi aani ika?”
13Kụ ọdi ạḅeni bịdi mọ, “Kẹ́boor ghan epeeliom ịpe ologh phọ ạḅem bọ.”
14Buniin ạbuo ẹgham opuru aani kẹn nyọdi mọ, “Yoor oḍighi aani ika?”
Kụ ọdi ạḅeni bịdi mọ, “Kẹ́kpaariom ghan oye ẹboor ikpoki, ḅịle kẹn képu ọkpe ẹgba ẹboorom oye ikpoki. Ịpe rịkpe bọ inyina ịgbaanyan inyina!”
15Kụ oḍuom ologhi awe rạpulughu, kụ oye ye ragbiom ghan ologhi mọ iini ạJon kụ aMesaya phọ. 16Esi ịduon phọ, ạJon ạḅeni oomo phọ ạbidi mọ, “Mị iwur inyina mụum, kụ ọpo ratu bọ upu ịmi. Mị ụ́manam ozuman ọokpo iḍigh arokoro phọ ọdi. Ọdi kạsighe Uwaloor Iigbia phọ rꞌạnian kụ iwurom inyina. 17Ọdi ạpam ni ọsalam ḍịghaagh ọdi ọlo okori ọsalam ịbiakpa phọ ookpomoghi igey phọ oseere, kụ ọsighe ịzeghe phọ oguom nịan dị kéḍim.”
18Ịdipho ọdi ạghaaph bọ ooḅi ọghaaph phọ ạḅeni we phọ, ọdi ạphurom ghan ni bịdi rụru reten kịrokiro. 19#Mat 14.3, 4; Mạk 6.17, 18Kụ ạJon ạḅaam ghan ni Hẹrod ọdaam eelhe phọ, ịdipho ọdi ạsighe bọ Hẹrodias ạnir ạHerod umor phọ ọdi kụ aphin, rꞌịnon ọdo kịrokiro ịkaraph dị ọdi aḍighi yogh. 20Kụ ọkar ịkaraph ạHerod dị ẹloghori ghụn, ọsighe ạJon ọlogh ikoli phọ.
Ịdi owur Jịzos mụum
(Matiu 3.13-17; Mạk 1.9-11)
21Mowur mụum oomo awe phọ ọmadan, kụ owur aani Jịzos. Ọdi odi rạaḅereghi ghan kụ okuaḍio phọ aghughuronu, 22#Emi 22.2; Ạsuo 2.7; Azay 42.1; Mat 3.17; Mạk 1.11; Luk 9.35kụ Uwaloor Iigbia phọ amite eye ịdipho ọkurughozo asoorom nyọdi. Kụ ẹḍogh ẹḍua kꞌạke kụ ẹḅem mọ, “Nạ kụ ogina Ọony phọ ạmi. Eḍighinom ịyaar phọ ạna kụ ịḅeeraan ịmi iboom.”
Eghunotu phọ ọmar bọ Jịzos
(Matiu 1.1-17)
23ẠJizos amiigh oḍighi phọ ọdi mem dị rạkiom ịraardi ạsia. Ọdi ọony ạJosef, ịdipho awe ogbiom bọ. ẠJosef phọ ọony aHilai, 24aHilai phọ ọony ạMatat. ẠMatat phọ ọony aLivai. ALivai phọ ọony aMelki. AMelki phọ ọony aJanai. AJanai phọ ọony ạJosef. 25ẠJosef phọ ọony ạMatatias. ẠMatatias phọ ọony Ẹmos. Ẹmos phọ ọony ạNehum. ẠNehum phọ ọony Esli. Esli phọ ọony aNagai. 26ANagai phọ ọony aMaat. AMaat phọ ọony ạMatatias. ẠMatatias ọony aSemein. ASemein phọ ọony aJosek. AJosek phọ ọony aJoda. 27AJoda phọ ọony aJoanan. AJoanan phọ ọony aResa. AResa phọ ọony ạZerubabel. ẠZerubabel phọ ọony ạSialtiel. ẠSialtiel phọ ọony aNeri. 28ANeri phọ ọony aMelki. AMelki phọ ọony Ạdi. Ạdi phọ ọony aKosam. AKosam phọ ọony Ẹlmadan. Ẹlmadan phọ ọony aEr. 29AEr phọ ọony aJosua. AJosua phọ ọony Eliezer. Eliezer phọ ọony aJorim. AJorim phọ ọony ạMatat. ẠMatat phọ ọony aLivai. 30ALivai phọ ọony ạSimion. ẠSimion phọ ọony aJuda. AJuda phọ ọony ạJosef. ẠJosef phọ ọony aJonam. AJonam mọ ọony Ẹliakim. 31Ẹliakim mọ ọony aMelia. AMelia phọ ọony aMena. AMena phọ ọony aMatata. AMatata phọ ọony aNetan. ANetan phọ ọony aDevid. 32ADevid phọ ọony ạJesi. ẠJesi phọ ọony Obed. Obed phọ ọony ạBoaz. ẠBoaz phọ ọony aSalmon. ASalmon phọ ọony aNason. 33ANason phọ ọony Ạminadab. Ạminadab phọ ọony Ạdmin. Ạdmin phọ ọony Ani. Ani phọ ọony ạHezron. ẠHezron phọ ọony ạPerez. ẠPerez phọ ọony aJuda. 34AJuda phọ ọony ạJekob. ẠJekob phọ ọony Ạizik. Ạizik phọ ọony Ebraham. Ebraham phọ ọony aTera. ATera phọ ọony aNahor. 35ANahor phọ ọony aSerug. ASerug phọ ọony aRiu. ARiu phọ ọony aPeleg. APeleg phọ ọony Eber. Eber phọ ọony aSela. 36ASela phọ ọony ạKenan. ẠKenan ọony Arfaksad. Arfaksad phọ ọony ạSem. ẠSem phọ ọony aNoa. ANoa phọ ọony ạLamek. 37ẠLamek phọ ọony ạMetusela. ẠMetusela phọ ọony Ẹnok. Ẹnok phọ ọony ạJared. ẠJared phọ ọony ạMahalalel. ẠMahalalel phọ ọony ạKenan. 38ẠKenan phọ ọony Enos. Enos phọ ọony ạSet. ẠSet phọ ọony Ạdam. Ạdam phọ ọony Ẹnaan.
Currently Selected:
Luk 3: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
