Luk 8
8
Ạnmariir dị ọdaph aani Jịzos
1Ịphen phọ eten bọ íbia bịn ạJizos aḅetenu ni ạḍua ghan ẹmha ạgba ẹmha ạghaaph ghan ooḅi ọghaaph ọmar phọ kꞌẸnaan. Ḍioph rꞌịyal ạbumatuan phọ ụdaph aani ni nyọdi ọghi. 2#Mat 27.55, 56; Mạk 15.40, 41; Luk 23.49Buniin ạnmariir kẹn dị ạJizos aakonom yogh riiphina, ạḅile aphorogh yogh ịkaraph aruwaloor ụdaph aani ni nyọdi. Sịphe aḍita ạnmariir phọ, bụen kụ ụghi aani bọ: aMeri ọpo oghol bọ mọ ọlo ạMagdala phọ, ọpo ophorogh bọ oḍual ịkaraph aruwaloor loor phọ ọsighe, 3rꞌaJoana ạnir aKuza, dị aḍighi ogbogh oye ẹpe ogiga phọ ạHerod, rꞌạSuzana. Tọrobo ịyaar lọ ekuom Jịzos rꞌạbumatuan phọ ọdi, ạnmariir phọ ạbuen umitiom ghan ni ịlo bịdi ọmoogh ọngo.
Aḍidogh dị ọsighe oḅephom iizo kụ odoghom
(Matiu 13.1-9; Mạk 4.1-9)
4Kụ mem dị aḍita awe ạramha kịrokiro phọ oru bọ ookpomoghan, ạJizos adogh ni ḍidogh phọ ạḍien ạḅeni bịdi mọ:
5“Oḅephom iizo ạghi ni ooduḍi ịizupha phọ ọdi. Kụ sịphe ọdi raaduḍi bọ, iniin imeleghu ọḅuzo bịn ọozeghi, bịn ịnun phọ esoroghu eru eekpophi ẹminogh. 6Iniin imeleghu de asighiigh, íbia bịn ẹraarogh kụ ẹnuughi, ịdi eḍighi bọ ạmuum ọ́rol. 7Iniin imeleghu ogbo iitoor kụ iitoor phọ egimi kụ ịizupha phọ eghurughan yogh. 8Kụ ịpheri phọ imeleghu ḍiiḅi ade kụ esiighi kụ emuum rughuuny dị eḍighi ghan oniin okuron ikpo esi.”
Kụ ọdi akureriom mọ, “Ọlo ạmoogh rụru ọnaghanam ạnaghan!”
Ịpe ọtuan bọ kụ odoghogh sidogh phọ
(Matiu 13.10-17; Mạk 4.10-12)
9Kụ ạbumatuan phọ ạJizos upuru ni nyọdi ẹmhu aḍidogh phọ ạḍien phọ. 10#Azay 6.9Kụ ạJizos mọ, “Mịngo ni inyina olegheri ạraraar ịbooghian ọmar phọ kꞌẸnaan, kụ bụeri phọ kọtughemiom ghan sidogh, ọbo ophogh okananaam kọmiin ghan bọ, ọnaghan ọnaghan kọkpaph ghan bọ ọpam.”
ẠJizos ạgba ẹmhu aḍidogh phọ ọsighe bọ oḅephom iizo phọ kụ odoghom
(Matiu 13.18-23; Mạk 4.13-20)
11“Ẹmhu aḍidogh phọ ạḍien ịduon. Ịizupha phọ pọ ọghaaph phọ Ẹnaan. 12Bụphe ọghigh bọ ịizupha ịpa ọḅuzo phọ, pọ ạbudi ọnaghan ọghaaph phọ íbia bịn Eru phọ etu eziton ọghaaph phọ sịphe iloghi phọ ạbidi ẹsighe, ọbo bịdi komeeraam ghan bọ ọmoogh pẹleeny. 13Bụphe ọghigh bọ ịizupha ịpa ade asighiigh phọ, pọ ạbudi ọnaghanan ọghaaph phọ rꞌọḅaal ologhi kụ ụ́moogh sịni, kụ omeeraam mọony amem bịn, kụ mem ọdegh ophogh bịn ọkanyanu. 14Bụphe ọghigh bọ ịizupha ịpa ogbo iitoor phọ, pọ ạbudi ọnaghan ọghaaph phọ, kụ ọtol pạ kụ igbiriḅa rꞌẹelha rꞌẹedugha aḅirini phọ ẹḅophoghan bịn ọghaaph phọ akurughan bịn iimuma phọ íbila. 15Bụeri phọ ọghigh bọ ịizupha ịpa aḍiiḅi ade phọ, pọ ạbudi ọnaghan ọghaaph phọ kụ ọsighe ọlogh iphooph iloghi ạbidi ọpam okananaam kụ ọmoogh ọkparam tụtu omuum iimuma.”
Aḍidogh ịlo ọtozi
(Mạk 4.21-25)
16 #
Mat 5.15; Luk 11.33 “Oye ólho dị kạsu ọtozi kụ ạsighe ịyaar akpereghiom, ḅịle kẹn ạlogh ọdurukpata. Kạḅam ghan ghụn ạnyu ịidoony ịkasi, pịdi awe lọ oḍigh otu phọ ọmiin ghan eten. 17#Mat 10.26; Luk 12.2Ịyaar dị ookpereghi dị kéganana ílho; ịyaar dị ạaghian dị kọ́miin olegheri ílho.
18 #
Mat 25.29; Luk 19.26 “Imiigha loor ịlo nyina rẹnaghan, ịdi eḍighi bọ nyọpo ạmoogh bọ Ẹnaan kẹloghonaan ni ọḅar, kụ ọpo ụ́moogh bọ ghạlamo ịyal-ikpo phọ ịpe ọdi ragbi bọ mọ ịlo ọno phọ Ẹnaan kẹbonyi ni.”
Ịlo onhiin rꞌabumor phọ ạJizos
(Matiu 12.46-50; Mạk 3.31-35)
19Kụ onhiin phọ rꞌabumor phọ ạJizos uru ni kụ útue ụteeny nyọdi loor esi aḍita awe phọ, 20kụ ọḅeni nyọdi mọ, “Onhiin rꞌabumor phọ ạna odi erugh rọwa ọmiin ạna.”
21Kụ ạJizos ạḅeni oomo phọ ạbidi mọ, “Onhiin ạmi rꞌabumor ạmi, pọ bụphe ọnaghan bọ ọghaaph phọ Ẹnaan kụ roḍighi ghan bọ.”
ẠJizos ạpoomi oghim
(Matiu 8.23-27; Mạk 4.35-41)
22Eniin aḍio ạJizos rꞌạbumatuan phọ ọdi uḍigh ni ologhi oghuugh, kụ ọdi ạḅeni bịdi mọ, “Itu ọḅeeny ḍịeri phọ ạḍighaagh ọphiiny phọ.” 23Kụ bịdi omitiom rọzoghi, kụ ạJizos ameel oḍigh ạralha. Kụ oboom oghim aghim, kụ ạmuum oologh aḍiku oghuugh phọ ramuza dị tụtu rạwa oḅi. 24Kụ ạbumatuan phọ ọdi ọghi ọteeny nyọdi ọsumeeny kụ ọḅeni mọ, “Ọtughemia, Ọtughemia, ḅetenu yoor rope.”
Kụ ạJizos aḅetenu ạḅeni oghim mọ rꞌọphiiny phọ mọ ẹpho, bịn ẹpho, kụ ọphiiny phọ aḅoorian bịn nam. 25Kụ ọdi apuru bịdi mọ, “Omeeraam mọ anyina odi ghan ẹghen?”
Kụ aruugu asiph bịdi, kụ iḍighi ni iikia esi ạbidi, kụ oniin apuru ghan nyoniin mọ, “Esi ịphen phọ, ọphon phọ ọghen ọdo oye, dị rạtooghi rạraar kạngo oghim mọ rꞌọphiiny phọ bịn kụ ẹnaghanan ni nyọdi?”
ẠJizos aakonom oye dị ịkaraph aruwaloor ẹrol ẹmhu
(Matiu 8.28-34; Mạk 5.1-20)
26Kụ bịdi ụḍua ni Galili osi eelhe aGerasa ẹpe ẹḅeenyom ọphiiny phọ. 27ẠJizos ạdaari ẹda rapun, bịn oniin uw-ẹlaal dị ịkaraph aruwaloor ẹrol ẹmhu phọ ạḍua sịphe ẹmha phọ amite azuan nyọdi. Mebia ni ọdi ạsuoma ọ́kpologhian ghan, otu órugh ghan, arugh ghan ẹpe ẹkaraph eḍum mọ bịn. 28-29Ọkaraph uwaloor phọ ạsiiny ghan ni nyọdi dị ụ́gba ghan mem ọphaḍi ọdi kụ arunyian ghan izime phọ, ạḅile awunughi ghan igbaḅiri phọ. Kụ ọkaraph uwaloor phọ aphorogh ghan nyọdi asumeeny ẹpe ạradala phọ. Mem dị oye phọ ạmiin bọ Jịzos, ạlho ni amitiom kụ akpuḍian ghisigh ọdi kụ ạḅile ạlooghi mọ, “Jịzos, nạ Ọony Egbogh Ẹnaan phọ, nạ rụwa ghan ịmi eeghe ịyaar? Seseeny ni, ịmi kụ́miine.” Ọdi ạghaaph ịduon, ịdi eḍighi bọ ạJizos mạḅeni ọkaraph uwaloor phọ mọ amite loor oye phọ ạḍua.
30Kụ ạJizos apuru nyọdi mọ, “Ḍien ạna ughol ika?”
Kụ ọdi aghola mọ, “Ḍien ạmi ughol mọ Ọoloogh,” ịdi eḍighi bọ ịbadi ịkaraph aruwaloor kụ iḍiku ni loor phọ ọdi. 31Kụ ịkaraph aruwaloor phọ ẹeḅereghian Jịzos mọ kúporogh bụno ụlogh ooni ạnian phọ.
32Kụ aḍita arophoropo ịrol li sịphe ạnyu eegbolom mọ ẹḅal ghan ịḅal, kụ ịkaraph aruwaloor phọ ẹeḅereghian Jịzos mọ ọdi ameera ni mọ bụno oḍigh loor ạbidi. Kụ ọdi ameeraam. 33Kụ ịkaraph aruwaloor phọ ẹḍua loor oye phọ emite ẹghi eḍiku loor arophoropo phọ, kụ arophoropo phọ eghiil esumughu ọphiiny phọ bịn ephe.
34Kụ bụphe ropogh ghan bọ bịdi rọmiin bọ ịpe emite bọ, kụ oghiil ogheel, ọghaaph ịphen phọ oleenye ẹmha phọ rꞌạsiraaghana phọ. 35Kụ awe ọghi ọmiin aani ịpe emite bọ. Kụ bịdi ọghi ọteeny Jịzos, kụ ọmiin dị ịkaraph aruwaloor phọ memite loor uw-ẹlaal phọ ẹḍua. Ọdi masereghian amuuna ukpe ạtol ude sịphe aruwol phọ ạJizos, kụ eḍigh ruugu esi ạbidi. 36Kụ bụphe ọmiin aani bọ ọghaaph ọḅeni we ịdi uw-ẹlaal phọ ọpo aḍita ịkaraph aruwaloor phọ ẹrol ghan bọ ẹmhu phọ mamoon. 37Kụ akuboom aruugu asiph ni oomo aweye eelhe phọ aGerasa etuman bọ pạ kụ ọoḅereghian mọ ạJizos ạwile bụno. Kụ ạJizos aḍigh ologhi oghuugh phọ kụ onyeene ogheel. 38Kụ oye phọ ọpo ịkaraph aruwaloor phọ ẹrol ghan bọ ẹmhu phọ ạaḅereghian ịlo ọdaph aani ọdi.
Kụ ạJizos ạḅeni nyọdi mọ, 39“Keel kꞌanyina ạḅeni bịdi iboom mọ ịphen Ẹnaan meḍighi bọ nyịna.”
Kụ ọdi agheel kụ ạghaaph oomo phọ ịpe ạJizos aḍighi bọ nyọdi aleenye ẹmha phọ.
Ịlo ọnyani ạJairos ḅịle rꞌạnir phọ ạḅogh bọ ạsuoma phọ ạJizos
(Matiu 9.18-26; Mạk 5.21-43)
40Kụ ạJizos ạghi bọ asi, aḍita awe dị rokori ghan ọmiin ọdi ụghereghom ni nyọdi. 41Kụ oniin oye dị oghol mọ ạJairos, uwo ẹmhu obughotu ẹmha phọ ẹpe phọ, aru ni akpuḍian ruwol ạJizos, kụ ạaḅereghian mọ ọdi aru kꞌọno, 42mọ ogina ọnyani ọno dị rạkiom ḍioph rꞌịyal ạsia ramugh.
Ịdipho ạJizos ạḍua bọ rạki, awe phọ ukoom ni nyọdi ọtirighian ghan. 43Sịphe ogbo awe phọ oniin ạnir rꞌẹmha ạnmariir ḍioph rꞌịyal ạsia. Ọdi malhiom ni oomo ikpoki ọdi rạghaagh ariil, kụ útue uḍume nyọdi. 44Ọdi ạḍua ni ọman ạteeny Jịzos, kụ ạḅogh ḍịmaam ạsuoma phọ ọdi; kụ egina amem bịn ẹmha ạnmariir phọ ọdi ẹḍua. 45Kụ ạJizos apuru mọ, “Ạnhian kụ ụḅogh bọ ịmi?”
Oomo phọ ạbidi ụpharanaan ni, kụ aPita ạḅem mọ, “Ọtughemia kꞌạḍien kꞌạḍien ạbuen okoom bọ nyịna rꞌịtirighian phọ.”
46Kụ ạJizos ạḅem mọ, “Oye ụḅogh ni ịmi. Itir ri ịmi mọ ịikpo mẹḍua loor ạmi.” 47Kụ mem dị ạnir phọ alegheri bọ mọ ọno kátue mun ạbooghian phọ, aru ni rapiigha kụ akpuḍian ruwol ạJizos, kụ ạghaaph ịpe ọdi ạtuan bọ kụ ạḅogh bọ nyọdi, ḅịle rꞌịpe ọdi aḍum bọ egina phọ amem mọ. 48Kụ ạJizos ạḅeni ạnir phọ mọ, “Nyạni phọ. Omeeraam mọ ạna maḍume nyịna. Keel rꞌedughom.”
49Ọdi odi ni rạkaaph ghan ịduon phọ kụ oye ạḍua ẹpe kꞌuwo ẹmhu obughotu phọ aru ạḅeni Jạiros mọ, “Ọnyani phọ ạna mamugh. Kạ́aḅaghami mun ọtughemia phọ.”
50Kụ ạJizos ạnaghan ni ịpe ọdi ạghaaph bọ, kụ ạḅeni Jạiros mọ, “Aruugu nyịna kúsiph. Mọogh omeeraam bịn. Ọnyani phọ kaḍum ni.”
51ẠJizos ạghi bọ asi otu phọ, ómeera mọ oye aḍigh aani emuton Pita rꞌaJems rꞌạJon, rꞌọde rꞌonhiin ọnyani phọ bịn. 52Oomo phọ awe phọ romoghi yogh kophumugha rokpologhi, kụ ọdi ạḅem mọ, “Kémoghi mun. Ọnyani phọ ómugh, rạnaani ni.”
53Kụ bịdi ọgilaam nyọdi, loor esi dị bịdi ulegheri ni mọ ọdi mamugh. 54Kụ ạJizos rọpham ḍịghaagh ọdi kụ ạmagh mọ, “Nyạni phọ, ḅetenu.” 55Kụ uwaloor phọ ọdi aḅula, egina amem bịn aḅetenu, kụ ạJizos ạḅeni bịdi mọ, “Ịngo ọnyani phọ ịyaar ole.” 56Kụ ọde rꞌonhiin phọ ọdi omaghagha yogh, kụ ạJizos ạphur bịdi rụru mọ kụ́kaaph ịpe emite bọ ụḅeni oye.
Currently Selected:
Luk 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
