Luk 7
7
ẠJizos aakonom mọony-otu uw-ẹmhu ẹgham ọlo aRom
(Matiu 8.5-13)
1ẠJizos rọghaaph oomo ạraraar phọ ịphen rọḅeni we phọ kụ ạḍua ạghi Kạpaniom. 2Oniin uwo ẹmhu ạbuo ẹgham ọlo aRom ạrol li ẹpe phọ dị ẹbene ọdi ạrol emoon dị ropogh ẹpughol ạmuum. Oye phọ ọphon ạmaghami ni ẹbene phọ ọdi ịyaar, 3kụ rọnaghan bọ ịlo ạJizos, kụ arom buniin ikumoor awe ạbuo aJu phọ mọ ọghi ọoḅereghian mọ ọdi aru aḍume ẹbene phọ ọno. 4Kụ bịdi oru bọ ọteeny Jịzos ụuḅereghian ni nyọdi iboom mọ, “Oye phọ ọphon ạkpe ni dị nạ kạloghonaan ḍịghaagh. 5Ọdi ạpomoghian ni we phọ ayira, kụ mụlhoghonaan iyoor obughotu.”
6ẠJizos ạdaph ni bịdi, kụ ọtol ropogh otu phọ bịn uwo ẹmhu phọ arom rịghiri ọdi mọ ọghi ọḅeni nyọdi mọ, “Oye phọ, kạ́aḅaghamian loor. Mị ụ́kpe dị nạ kaḍigh kꞌạmi. 7Ị́kpe kẹn dị mị karu ạteeny nyịna rꞌaloor. Ḅẹm ọnhu bịn ẹbene phọ ạmi kaḍum ni. 8Mị ạmoogh ni bụdi upu ịmi rꞌạbuo ẹgham dị mị apu. Mị arom nyọon mọ kịa, bịn rạki ghan ni. Mị ạḅeni ọnon mọ tue, bịn ratu ghan ni. Ịlo mị ạḅeni ẹbene ạmi mọ aḍighi, bịn raḍighi ghan ni.”
9Mem dị ạJizos ạnaghan bọ ịphen phọ, omeeraam mọ uwo ẹmhu phọ ạmoogh bọ aḍighi ni iikia esi ọdi, kụ akiton ạḅeni ḍita awe phọ rọdaph bọ nyọdi mọ, “Mị ạkar rịḅeni ghan inyina mọ mị kọ̋miin ghan oye dị umeeraam ịmi omeeraam dị aleeny ịduon, ghạlamo rꞌọnyo Ịzirel li!”
10Kụ bụphe orom bọ dom mọ ọḍua oḅula otu phọ kụ ọmiin dị ẹbene phọ mamoon.
ẠJizos aḅeton mọony ekpukele ạnir esi aḍuugh
11Íbia bịn ạJizos ạghi aḍigh ẹmha dị oghol mọ aNen, kụ ạbumatuan phọ ọdi rꞌaḍiboom aḍita awe ụdaph ni nyọdi. 12Ọdi atu atuman ọnhu-aḍibuo ẹmha phọ, kụ aazuanan oye dị orool rọki ọdi. Onhiin phọ ekpukele ạnir, dị ạmar ogina ọony phọ ọphon bịn. Kụ aḍita awe ẹmha phọ ụdaph aani ni ạnir phọ. 13Mem dị Ọmoogh-we phọ ạmiin bọ ạnir phọ, ạmoogh ni igbiririph kụ ạḅeni mọ, “Kámoghi mun wo.” 14Kụ ọdi ạghi ạḅogh igbe phọ, kụ ạnmuny oḍi phọ ọmeera. Kụ ọdi ạḅeni nyọpo amugh bọ mọ, “Mọony phọ, mị rạḅeni nyịna mọ ḅetenu.” 15Kụ ọdi aḅetenu ạrol ude, kụ amiigh ọḅa. Kụ ạJizos ạḅogh nyọdi ạngo onhiin phọ.
16Kụ aḍiigu isiph ni oomo awe phọ, kụ oboom Ẹnaan mọ, “Ogbogh oyil kꞌẸnaan mamite sịen ogbo phọ ayira,” ḅịle kẹn mọ, “Ẹnaan meru ọnma ighirigiir we phọ ọdi.”
17Kụ ọdu ạraraar phọ ịphen ạJizos aḍighi bọ aaleghaan oomo eelhe phọ aJudia rꞌạramha phọ etuman bọ pạ.
Awe dị ạJon oburogh mụum mọ arom dom
(Matiu 11.2-19)
18Kụ ạbumatuan phọ ạJon ụghaaph ni oomo ạraraar phọ ịphen ọḅeni nyọdi. 19Kụ ọdi arom ni ịyal ạbuno mọ ọghi opuru Ọmoogh-we phọ mọ, “Nạ kụ ọdi mị ạḅem bọ mọ katu phọ ḍụghum kụ ọḅile ni okori ọnon oye?”
20Kụ awe phọ ọghi ọteeny Jịzos kụ ọḅeni mọ, “ẠJon oburogh mụum mọ urom iyoor oru opuru ạna mọ, ‘Nạ kụ ọdi ọno ạḅem bọ ni mọ katu phọ ḍụghum, kụ ọḅile ni okori ọnon oye?’”
21Ọkar amem mọ ọpo phọ ạJizos aakonom ni ịbadi ạbudi omeleghu rẹezegh kịrokiro, kụ aphorogh yogh ịkaraph aruwaloor amiteghom loor ịbadi awe, kụ aḍighi dị ịbadi ạbuo ikpom ariḍien ọmiin aani eten. 22#Azay 35.5, 6; Azay 61.1Kụ ọdi ạḅeni bụmatuan phọ ạJon mọ, “Ikeel ẹghaaph ịphen nyina rẹnaghan bọ ẹḅile bọ rẹmiin, ẹḅeni Jọn. Awe ikpom ariḍien mọmiin aani eten, ạrukugha moḅerenu aani rotelhe yogh, awe ẹzegh ọku ufe moḍumogh aani, ạbuḅaaghaph ḅạaghaph rọnaghan aani ḍụghum, moḅerion bụphe momuughu bọ ọngo ghuḍum, mọghaaph ooḅi ọghaaph ọḅeni aani rukulom. 23Iboh kꞌẸnaan kẹtolonaan ni oye lọ ịmi úghel.”
24Kụ bụen oru bọ dom mọ ạJon rọḍua, kụ ạJizos amiigh ọghaaph ịlo ạJon ọḅeni aḍita awe phọ mọ, “Mem mọ nyina ẹghi bọ ẹpe ẹdala phọ ọmiin ạJon, nyina ịkaraghi ghan egbiom mọ nyina kẹmiin eeghe ịyaar? Ikpu dị ookuugh radeghemi ḍụghum? 25Nyina ịkaraghi ghan egbiom mọ nyina kẹmiin eeghe ịyaar, oye dị aanmenan iiloghoḍian loologhoḍian iinmenan ḍụghum? Bụo iiloghoḍian loologhoḍian iinmenan rꞌuduru phọ otughogh rigiga ạraalha kẹ́pe ẹdala phọ. 26Nyina ịkaraghi ghan egbiom mọ nyina kẹmiin eeghe ịyaar, oyil Ẹnaan ḍụghum? Ii, mị rịḅeni ghan inyina mọ ọphon nyina ẹmiin bọ apu oyil. 27#Mal 3.1Ọphon kụ ọdi ọge bọ ịlo ọdi mọ, ‘Pogh aani, mị ratom ni ọokpaany ạmi dị kaḍiemi ghan aselemi eten aseenaan nyịna.’ 28Mị rịḅeni ghan inyina mọ sịphe oomo phọ ạbuphe ạnmariir kụ ọmaraghi bọ, oye dị apu Jọn oburogh mụum mọ ólho; kụ ọlo aḍighi ọbam ẹpe ọmar phọ kꞌẸnaan kụ apu ni nyọdi.”
29 #
Mat 21.32; Luk 3.12 Oomo awe phọ rꞌạbubonyiom iisogh phọ ụnaghan ni ịpe ọdi ạghaaph bọ. Bụen phọ uboom ni Ẹnaan, ịdi eḍighi bọ bịdi momeeraam ni ạJon aburogh bịdi mụum. 30Kụ aFarisi phọ rꞌạbugbaam iilogh phọ, bụphe úmeeraam bọ mọ ạJon awur bịdi mụum mọ, ughel li rigbiom mọ Ẹnaan egbianaan bọ bịdi.
31Kụ ạJizos ạḅile ạḅem mọ, “Mị kạsighe eeghe ọdo ịyaar kụ ạmaaniom we phọ ạnyiidipho? Kọmaaniom bịdi eeghe? 32Bịdi ọkigh ịbam ạnmuny dị ọrologhu ude ḍighi. Buniin rọmagh ghan buniin kọḅeni mọ, ‘Yoor ophula ruuḍue, nyina ịḅa phọ ị́ker. Yoor ọmoor sụor ẹkaraph ẹmugh, nyina ímoghi.’ 33ẠJon oburogh mụum mọ atu bọ ạtuan ịiḅereghi rạtol ghan ọkoony, ḅịle kẹn miim rạ́pughol ghan, kụ nyina rẹḅem ghan mọ, ‘Eru ekola ni nyọdi.’ 34Ọony phọ Oye atu bọ rale ghan kạphughol, kụ nyina rẹḅem ghan mọ, ‘Ịmiin aani oye ekpooko rꞌọpughol miim, ọyaghiri ạbubonyiom iisogh rꞌabuḍighinom ịkaraph.’ 35Bụphe ọsighe bọ olegheri ịyaar phọ Ẹnaan ọmaghami ịyaar bịn kụ ulegheri mọ igey ni.”
ẠJizos aḍigh kꞌaSaimon ọnyo aFarisi phọ
36Oniin ọnyo aFarisi phọ ạmagh ni Jịzos mọ aru kꞌọno ạbuno olian eḍien, kụ ạJizos ạghi ni kꞌọdi ạrol ude akulughi ruwol olhe eḍien phọ. 37#Mat 26.7; Mạk 14.3; Jọn 12.3Oniin ọnyo ipesi ạnir ạrol li ẹmha phọ ẹpe phọ. Ọdi ạnaghan ni mọ ạJizos odi kꞌọnyo aFarisi phọ rale ghan eḍien, kụ ạsighe eeko elo eeḅi eḍu, 38kụ aru ạmeeraam ọman ạJizos sịphe aruwol phọ ọdi, kụ amoghi izin aatolom ruwol phọ ạJizos, kụ ạsighe sịlaal ẹmhu phọ ọdi agbuuroghom ghan izin phọ, kụ ạakpunogh ruwol phọ kụ ạsighe elo phọ agbul. 39Mem dị ọnyo aFarisi phọ ọpo ạmagh bọ Jịzos ạmiin bọ ịphen phọ, ọdi ạḅenian ni loor mọ, “Eḍighi mạar dị oye phọ ọphon kụ ạkar ri aḍighi oyil kꞌẸnaan, ọbo ọdi mulegheri ni ọdo oye dị ạnir phọ rạaḅoghogh bọ nyọdi aru. Ọbo ọdi mulegheri ni ọdo ạdol ipesi dị ạnir phọ ọphon odi ghan.”
40ẠJizos ạghaaph ni amitiom kụ ạḅem mọ, “Saimon, mị ạmoogh ni ịyaar ọḅeni ạna.”
Kụ ọdi mọ, “Ọtughemia, kạaph ni.”
41Kụ ạJizos mọ, “Ịyal awe ụrol li dị olhe ọmugh ọbologhiom ikpoki. Oniin ale ọmugh 500 ipoḍi asilva, ọphori phọ ale ọmugh 50 ipoḍi asilva. 42Ọnyo ạbidi lọ arue ạkpe ọ́rol, kụ ọdi ạwilenaan ịyal phọ ạbidi. Ọghen sịphe ịyal phọ ạbidi kụ kạpomoghian nyọdi igbogh?”
43Kụ aSaimon ạphagharanaan mọ, “Mị ragbi mọ ọpo ọwilenaan bọ igbogh ikpoki phọ.”
Kụ ạJizos mọ, “Ịduon phọ ni.” 44Pọ kụ amem dị ọdi akiton asoman ạnir phọ kụ apuru Saimon mọ, “Nạ rạmiin ni ạnir phọ ọphon? Mị aru bọ kꞌạna, nạ ịmi mụum ụ́ngo ootola aruwol ạmi, kụ ạnir phọ ọphon mạsighe izin ariḍien phọ ọdi aatolom ruwol phọ ạmi, ạḅile ạsighe sịlaal ẹmhu phọ ọdi agbuuroghom. 45Nạ ịmi ụ́kpun, kụ ọdi ọ́wile ọokpunogh aruwol phọ ạmi kꞌamem mọ mị aru bọ aḍigh sịen. 46Nạ elo ẹmhu ạmi ógbul, kụ ọdi magbul ruwol phọ ạmi elo eeḅi eḍu. 47Mị ạḅeni nyịna mọ eboom ẹphomoghian phọ ẹphen ọdi mụphomoghian bọ ịmi meḍeenaan mọ mọwilenaan nyọdi ịbadi ịkaraph phọ ọdi. Tọrobo oye lọ ọwilenaan ịbam kạtuugh ni ịbam ạpomoghian.”
48Kụ ạJizos ạḅeni ạnir phọ mọ, “Mọsar ịkaraph phọ ạna ọwilenaan nyịna.”
49Bụphe rꞌọdi rolian bọ eḍien phọ upuru ghan ni mọ, “Ọphon phọ ọghen ọdo oye dị ạsar ịkaraph rạbilenaan yogh we?”
50Kụ ạJizos ạḅeni ạnir phọ mọ, “Omeeraam mọ ạna mạphel nyịna atene. Keel rꞌedughom.”
Currently Selected:
Luk 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
