Mạk 15
15
Ọmeremi Jịzos ghisigh aPailet
(Matiu 27.1-2, 11-14; Luk 23.1-5; Jọn 18.28-38)
1Eḅon ạḍiroor phọ, kụ ạbuo ạrumhu ariil ạrikia phọ rꞌikumoor awe phọ rꞌạbutughemia iilogh phọ rꞌoomo ikpolom awe phọ umite ni ezue, kụ ọphaḍi Jịzos, kụ ọghi ọḅogh ọngo Pailet. 2Kụ aPailet apuru nyọdi mọ, “Nạ kụ ọdaam ẹmha ạbuo aJu phọ ni?”
Kụ ạJizos mọ, “Sịen dị nạ kụ mạḅem.”
3Kụ ạbuo ạrumhu ariil ạrikia phọ ọgba ọdorodo ọḅam ẹmhu ọdi. 4Kụ aPailet ạḅile apuru nyọdi mọ, “Nạ ọ́moogh ịyaar ọghaaph ọphelaam ẹmhu ạna? Nạ rạnaghan aani bọ ni ọdorodo phọ ịphen bịdi rọgbaanaan bọ nyịna?”
5Kụ ạJizos ịyaar ọ́phagharanaan mun, kụ ịphen phọ ịngo ni Pailet iikia.
Osoph erugh aḍuugh opume Jịzos
(Matiu 27.15-26; Luk 23.13-25; Jọn 18.39—19.16)
6Mem ẹyaal ọphel otene phọ, aPailet raseere ghan ni nyoniin ọnyo-ikoli lọ awe phọ ọlom, kạngo. 7Mem mọ ạmuphe, oniin oye dị oghol mọ ạBarabas ạrol li ikoli rꞌaḍita ạbuo ịgbagharan dị ọko enu, mem mọ ọgbaragbara phọ asoor bọ. 8Kụ aḍita awe phọ ọghi ọḅeni Pailet, mọ ạtuugh aḍighi ịpe ọdi raḍighi ghan bọ kạngo bụno. 9Kụ aPailet mọ, “Nyina rẹwa mọ mị useere ọdaam ẹmha ạbuo aJu phọ kụ ịngo inyina ḍụghum?” 10Ọdi alegheri ni mọ ạbuo ạrumhu ariil ạrikia phọ ụsighe mụlogh-ḍien kụ ọḅoghom bọ Jịzos ọngo nyịno.
11Kụ bịdi owiiliom ḍita awe phọ ọnhu mọ, kpạripe rꞌoseere ạJizos, ọdi aseere Bạrabas kụ ạngo bụno. 12Kụ aPailet ạḅile apuru bịdi mọ, “Kụ nyina rẹwa mọ ạmi uḍighinom eeghe nyọon nyina rekol ghan bọ mọ ọdaam ẹmha ạbuo aJu phọ?”
13Kụ bịdi ọyughuronaan Pailet mọ, “Kạn nyọdi loor oreeny aghiigh!”
14Kụ aPailet mọ, “Uḍighi ika? Ịghen ịkaraph kụ ẹdi ọdi aḍighi bọ?”
Kụ bịdi ọḅile kẹn ọyughuron opuemi ịḅel phọ mọ, “Kạn nyọdi loor oreeny aghiigh!”
15Kụ esi ọḅaalami iloghi aḍita phọ aPailet aseere ni Bạrabas ạngo bịdi, kụ ạgurogh Jịzos, kụ ạḅogh ạngo bịdi mọ ọkan oghiigh.
Ạbuo ẹgham mọ ọgilaam Jịzos
(Matiu 27.27-31; Jọn 19.2-3)
16Kụ ạbuo ẹgham mọ ụsighe ni Jịzos ọghi oḍighom ogiga ọolha phọ, kụ ọmagh oomo ạbueri phọ ookpomoghi. 17Kụ ọsighe oodor ọkpologhi nyọdi, kụ ọsighe iitoor oloom eghoony ọdaam ẹmha ozu nyọdi. 18Kụ ọgilaam ghan nyọdi mọ, “Oboom oboom ạbuo aJu!” 19Kụ ọguroghom ikpu ẹmhu ọdi, omurughiom nyọdi ịghor, kụ okpuḍughian ọnmoghoghoom ghan nyọdi. 20Kụ bịdi rọnmoghoghoom yogh bọ nyọdi rọwile, kụ ọkporion oodor phọ, kụ ọsighe rụsuoma phọ ọdi ọkpologhi, kụ ọpham onyeeniom ẹpe kọkan bọ nyọdi okiigh.
Ọkan Jịzos loor oreeny
(Matiu 27.32-44; Luk 23.26-43; Jọn 19.17-27)
21 #
Rom 16.13
Kụ ẹpe eten phọ, bịdi uuzuanan ni oniin oye dị oghol mọ aSaimon, dị ạḍua eniin ẹmha ratu Jeruselem, kụ ọkpaariom mọ ọdi kụ aroolaan oreeny phọ kọkanam bọ Jịzos. (ASaimon phọ ọlo ẹmha dị oghol mọ aSairini. Ọdi ọde Ạleksander rꞌạRufos.) 22Kụ bịdi ọsighe Jịzos ọghi osiemi esi dị oghol mọ ạGolgota, ịsien phọ ạwara, ạkpaḍi igbaany ạrumhu. 23Kụ ọwa ghan ọngo ọdi miim dị oḅunyonom ọogho, dị oghol mọ amaa, kụ ọdi ómeera ọphughol. 24#Ạsuo 22.18Kụ ọkan nyọdi loor oreeny phọ kụ ogim, kụ ọsaaghi ghan ẹlhel odianam iinmenan phọ ạJizos. 25Esugha asuo ḍịroor kụ amem mọ ọkan bọ nyọdi. 26Kụ ọge sịphe ạnyu oreeny phọ ịpe ọgba bọ ọḅamaghi ẹmhu ọdi mọ “Ọdaam ẹmha ạbuo aJu phọ.” 27#Azay 53.12Kụ ụkan aani ni ịyal ạruḅa loor ịnon ireeny ọḅaram Jịzos, oniin ḍịghaagh elhiom, ọphori phọ ekeeny. 28[Ịduon phọ kụ ịdi emuzeḍiom ịpe ọge bọ pạ ạḍinya iigbia phọ mọ, “Ugbiom aani ni nyọdi bụo ạsipioghom mọ.”]
29 #
Ạsuo 22.7; 109.25;
Mạk 14.58; Jọn 2.19 Kụ abuteneneen phọ oofolomi ghan nyọdi ooḅoghomi ghan rụmhu ạbidi, kụ ọḅem ghan mọ, “Ịhii. Nạ phọ ạḅem bọ mọ nạ kalereghi Otu Ịiḅereghi phọ kụ ạlogh ọnon ạmadan esi ịraar aḍughul-otu, 30ḍụa sịphe oreeny phọ asoor ạphela ẹmhu ạna.”
31Igina phọ kẹn kụ ịdi ạbuo ạrumhu ariil ạrikia phọ rꞌạbutughemia iilogh phọ, oniin ạḅeni ghan nyoniin esi ịnmoghoghoom mọ, “Ọpel bụnon dị ẹmhu odi útue ụpela! 32AKraist, ọdaam ẹmha phọ Ịzirel, ạḍua pạ oreeny phọ asoor pịdi yira ọmiin kụ omeeraam nyọdi!”
Kụ ịyal phọ ạbuphe ọḅaram bọ nyọdi ọkan ụḅeni aani ni nyọdi sịkaraph.
Aḍuugh phọ ạJizos
(Matiu 27.45-56; Luk 23.44-49; Jọn 19.28-30)
33Mẹrol ẹteeny ogbo ootaany, kụ ufiri aḍigh oomo eelhe phọ, kụ ạrol ẹteeny ịraar asuo dulhe. 34#Ạsuo 22.1Kụ ịraar asuo phọ, kụ ạJizos ạlho ạghiom ạnyu mọ, “Eloi Eloi, lạma sạbaktani,” ịduon phọ pọ, “Ẹnaan ạmi, Ẹnaan ạmi, uḍighi ika kụ nạ mughel bọ ịmi?”
35Kụ buniin ạbudi ọmeregha pạ phọ rọnaghan bọ, kụ ọḅem mọ, “Ịnaghan, ọdi rạmagh ghan Ilaija.” 36#Ạsuo 69.21Kụ oniin aghiil kụ ạsighe iisighom, kụ tọghoḍiom mụkpueneen amiim, kụ ạpharari loor oreeny, kụ asu ạghiom mọ ọdi ạphughol. Kụ ọdi asiemi ịidoronhu ạJizos, kụ ạḅem mọ, “Ikori ọmiin mọ Ilaija katu ni ọsighe ọdi osoore.”
37Kụ ạJizos rọlo rọghiom ạnyu, kụ amugh.
38 #
Ẹḍua 26.31-33
Kụ otu-ukpe dị osophom ologhi Otu Ịiḅereghi phọ ạkoghoronaan kꞌạnyu kꞌude. 39Kụ oniin uwo ẹmhu ạbuo ẹgham dị ạmeera esomanan ạJizos, rọmiin ịdipho ọdi amugh bọ, kụ ạḅem mọ, “Agey ni, oye phọ ọphon kụ Ọony Ẹnaan phọ ni.”
40 #
Luk 8.2, 3 Buniin ạnmariir ụrol li egher kụ ophogh ghan — sịphe ogbo phọ ạbidi, aMeri ọpo ạMagdala phọ, rꞌaSalomi, rꞌaMeri, onhiin phọ ọbam aJems rꞌạJosef. 41Bụen phọ ụdaph aani ghan ni nyọdi mem mọ dị ạrol bọ Galili, kụ okumuanaan ghan nyọdi. Aḍita ạbunon ạnmariir, dị ọtuan aani nyọdi osi Jeruselem, ụrol aani kẹn ni.
Amaḍi phọ ạJizos
(Matiu 27.57-61; Luk 23.50-56; Jọn 19.38-42)
42Retuanaan dulhe aḍio ookolobian phọ, dị reghul pọ kẹḅaal ḍio ophooghian phọ, 43kụ ạJosef ọlo Arimatia, ọnyo ookpomoghan ikpolom awe phọ, dị ragon aani ghan ọmiin ọmar phọ kꞌẸnaan, rꞌạkpo ologhi kụ ạghi ạteeny Pailet ạlom ḍizu phọ ạJizos. 44Iḍighi ni iikia esi aPailet ọnaghan mọ ọdi mamugh ghụn ni, kụ arom ạghiomonaan uwo ẹmhu ạbuo ẹgham mọ, kụ roru kụ apuru mọ, “Mạkar ri amugh?” 45Kụ mem dị uwo ẹmhu ạbuo ẹgham mọ ạḅeni bọ nyọdi mọ mamugh ni phọ, aPailet ameeraam ni mọ ạJosef ạsighe ḍizu phọ ạJizos. 46Kụ ạJosef ạghi agho ọmur, kụ rosoore ḍizu phọ kụ aphurughi kụ aḍi nyọdi oḍi, dị oguph loor asighiigh, kụ aakilemi ḍighiigh apukiom ọnhu oḍi phọ. 47AMeri ọpo ạMagdala phọ, rꞌaMeri onhiin phọ ạJosef, ụmiin ni esi phọ oḍi bọ nyọdi.
Currently Selected:
Mạk 15: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
Mạk 15
15
Ọmeremi Jịzos ghisigh aPailet
(Matiu 27.1-2, 11-14; Luk 23.1-5; Jọn 18.28-38)
1Eḅon ạḍiroor phọ, kụ ạbuo ạrumhu ariil ạrikia phọ rꞌikumoor awe phọ rꞌạbutughemia iilogh phọ rꞌoomo ikpolom awe phọ umite ni ezue, kụ ọphaḍi Jịzos, kụ ọghi ọḅogh ọngo Pailet. 2Kụ aPailet apuru nyọdi mọ, “Nạ kụ ọdaam ẹmha ạbuo aJu phọ ni?”
Kụ ạJizos mọ, “Sịen dị nạ kụ mạḅem.”
3Kụ ạbuo ạrumhu ariil ạrikia phọ ọgba ọdorodo ọḅam ẹmhu ọdi. 4Kụ aPailet ạḅile apuru nyọdi mọ, “Nạ ọ́moogh ịyaar ọghaaph ọphelaam ẹmhu ạna? Nạ rạnaghan aani bọ ni ọdorodo phọ ịphen bịdi rọgbaanaan bọ nyịna?”
5Kụ ạJizos ịyaar ọ́phagharanaan mun, kụ ịphen phọ ịngo ni Pailet iikia.
Osoph erugh aḍuugh opume Jịzos
(Matiu 27.15-26; Luk 23.13-25; Jọn 18.39—19.16)
6Mem ẹyaal ọphel otene phọ, aPailet raseere ghan ni nyoniin ọnyo-ikoli lọ awe phọ ọlom, kạngo. 7Mem mọ ạmuphe, oniin oye dị oghol mọ ạBarabas ạrol li ikoli rꞌaḍita ạbuo ịgbagharan dị ọko enu, mem mọ ọgbaragbara phọ asoor bọ. 8Kụ aḍita awe phọ ọghi ọḅeni Pailet, mọ ạtuugh aḍighi ịpe ọdi raḍighi ghan bọ kạngo bụno. 9Kụ aPailet mọ, “Nyina rẹwa mọ mị useere ọdaam ẹmha ạbuo aJu phọ kụ ịngo inyina ḍụghum?” 10Ọdi alegheri ni mọ ạbuo ạrumhu ariil ạrikia phọ ụsighe mụlogh-ḍien kụ ọḅoghom bọ Jịzos ọngo nyịno.
11Kụ bịdi owiiliom ḍita awe phọ ọnhu mọ, kpạripe rꞌoseere ạJizos, ọdi aseere Bạrabas kụ ạngo bụno. 12Kụ aPailet ạḅile apuru bịdi mọ, “Kụ nyina rẹwa mọ ạmi uḍighinom eeghe nyọon nyina rekol ghan bọ mọ ọdaam ẹmha ạbuo aJu phọ?”
13Kụ bịdi ọyughuronaan Pailet mọ, “Kạn nyọdi loor oreeny aghiigh!”
14Kụ aPailet mọ, “Uḍighi ika? Ịghen ịkaraph kụ ẹdi ọdi aḍighi bọ?”
Kụ bịdi ọḅile kẹn ọyughuron opuemi ịḅel phọ mọ, “Kạn nyọdi loor oreeny aghiigh!”
15Kụ esi ọḅaalami iloghi aḍita phọ aPailet aseere ni Bạrabas ạngo bịdi, kụ ạgurogh Jịzos, kụ ạḅogh ạngo bịdi mọ ọkan oghiigh.
Ạbuo ẹgham mọ ọgilaam Jịzos
(Matiu 27.27-31; Jọn 19.2-3)
16Kụ ạbuo ẹgham mọ ụsighe ni Jịzos ọghi oḍighom ogiga ọolha phọ, kụ ọmagh oomo ạbueri phọ ookpomoghi. 17Kụ ọsighe oodor ọkpologhi nyọdi, kụ ọsighe iitoor oloom eghoony ọdaam ẹmha ozu nyọdi. 18Kụ ọgilaam ghan nyọdi mọ, “Oboom oboom ạbuo aJu!” 19Kụ ọguroghom ikpu ẹmhu ọdi, omurughiom nyọdi ịghor, kụ okpuḍughian ọnmoghoghoom ghan nyọdi. 20Kụ bịdi rọnmoghoghoom yogh bọ nyọdi rọwile, kụ ọkporion oodor phọ, kụ ọsighe rụsuoma phọ ọdi ọkpologhi, kụ ọpham onyeeniom ẹpe kọkan bọ nyọdi okiigh.
Ọkan Jịzos loor oreeny
(Matiu 27.32-44; Luk 23.26-43; Jọn 19.17-27)
21 #
Rom 16.13
Kụ ẹpe eten phọ, bịdi uuzuanan ni oniin oye dị oghol mọ aSaimon, dị ạḍua eniin ẹmha ratu Jeruselem, kụ ọkpaariom mọ ọdi kụ aroolaan oreeny phọ kọkanam bọ Jịzos. (ASaimon phọ ọlo ẹmha dị oghol mọ aSairini. Ọdi ọde Ạleksander rꞌạRufos.) 22Kụ bịdi ọsighe Jịzos ọghi osiemi esi dị oghol mọ ạGolgota, ịsien phọ ạwara, ạkpaḍi igbaany ạrumhu. 23Kụ ọwa ghan ọngo ọdi miim dị oḅunyonom ọogho, dị oghol mọ amaa, kụ ọdi ómeera ọphughol. 24#Ạsuo 22.18Kụ ọkan nyọdi loor oreeny phọ kụ ogim, kụ ọsaaghi ghan ẹlhel odianam iinmenan phọ ạJizos. 25Esugha asuo ḍịroor kụ amem mọ ọkan bọ nyọdi. 26Kụ ọge sịphe ạnyu oreeny phọ ịpe ọgba bọ ọḅamaghi ẹmhu ọdi mọ “Ọdaam ẹmha ạbuo aJu phọ.” 27#Azay 53.12Kụ ụkan aani ni ịyal ạruḅa loor ịnon ireeny ọḅaram Jịzos, oniin ḍịghaagh elhiom, ọphori phọ ekeeny. 28[Ịduon phọ kụ ịdi emuzeḍiom ịpe ọge bọ pạ ạḍinya iigbia phọ mọ, “Ugbiom aani ni nyọdi bụo ạsipioghom mọ.”]
29 #
Ạsuo 22.7; 109.25;
Mạk 14.58; Jọn 2.19 Kụ abuteneneen phọ oofolomi ghan nyọdi ooḅoghomi ghan rụmhu ạbidi, kụ ọḅem ghan mọ, “Ịhii. Nạ phọ ạḅem bọ mọ nạ kalereghi Otu Ịiḅereghi phọ kụ ạlogh ọnon ạmadan esi ịraar aḍughul-otu, 30ḍụa sịphe oreeny phọ asoor ạphela ẹmhu ạna.”
31Igina phọ kẹn kụ ịdi ạbuo ạrumhu ariil ạrikia phọ rꞌạbutughemia iilogh phọ, oniin ạḅeni ghan nyoniin esi ịnmoghoghoom mọ, “Ọpel bụnon dị ẹmhu odi útue ụpela! 32AKraist, ọdaam ẹmha phọ Ịzirel, ạḍua pạ oreeny phọ asoor pịdi yira ọmiin kụ omeeraam nyọdi!”
Kụ ịyal phọ ạbuphe ọḅaram bọ nyọdi ọkan ụḅeni aani ni nyọdi sịkaraph.
Aḍuugh phọ ạJizos
(Matiu 27.45-56; Luk 23.44-49; Jọn 19.28-30)
33Mẹrol ẹteeny ogbo ootaany, kụ ufiri aḍigh oomo eelhe phọ, kụ ạrol ẹteeny ịraar asuo dulhe. 34#Ạsuo 22.1Kụ ịraar asuo phọ, kụ ạJizos ạlho ạghiom ạnyu mọ, “Eloi Eloi, lạma sạbaktani,” ịduon phọ pọ, “Ẹnaan ạmi, Ẹnaan ạmi, uḍighi ika kụ nạ mughel bọ ịmi?”
35Kụ buniin ạbudi ọmeregha pạ phọ rọnaghan bọ, kụ ọḅem mọ, “Ịnaghan, ọdi rạmagh ghan Ilaija.” 36#Ạsuo 69.21Kụ oniin aghiil kụ ạsighe iisighom, kụ tọghoḍiom mụkpueneen amiim, kụ ạpharari loor oreeny, kụ asu ạghiom mọ ọdi ạphughol. Kụ ọdi asiemi ịidoronhu ạJizos, kụ ạḅem mọ, “Ikori ọmiin mọ Ilaija katu ni ọsighe ọdi osoore.”
37Kụ ạJizos rọlo rọghiom ạnyu, kụ amugh.
38 #
Ẹḍua 26.31-33
Kụ otu-ukpe dị osophom ologhi Otu Ịiḅereghi phọ ạkoghoronaan kꞌạnyu kꞌude. 39Kụ oniin uwo ẹmhu ạbuo ẹgham dị ạmeera esomanan ạJizos, rọmiin ịdipho ọdi amugh bọ, kụ ạḅem mọ, “Agey ni, oye phọ ọphon kụ Ọony Ẹnaan phọ ni.”
40 #
Luk 8.2, 3 Buniin ạnmariir ụrol li egher kụ ophogh ghan — sịphe ogbo phọ ạbidi, aMeri ọpo ạMagdala phọ, rꞌaSalomi, rꞌaMeri, onhiin phọ ọbam aJems rꞌạJosef. 41Bụen phọ ụdaph aani ghan ni nyọdi mem mọ dị ạrol bọ Galili, kụ okumuanaan ghan nyọdi. Aḍita ạbunon ạnmariir, dị ọtuan aani nyọdi osi Jeruselem, ụrol aani kẹn ni.
Amaḍi phọ ạJizos
(Matiu 27.57-61; Luk 23.50-56; Jọn 19.38-42)
42Retuanaan dulhe aḍio ookolobian phọ, dị reghul pọ kẹḅaal ḍio ophooghian phọ, 43kụ ạJosef ọlo Arimatia, ọnyo ookpomoghan ikpolom awe phọ, dị ragon aani ghan ọmiin ọmar phọ kꞌẸnaan, rꞌạkpo ologhi kụ ạghi ạteeny Pailet ạlom ḍizu phọ ạJizos. 44Iḍighi ni iikia esi aPailet ọnaghan mọ ọdi mamugh ghụn ni, kụ arom ạghiomonaan uwo ẹmhu ạbuo ẹgham mọ, kụ roru kụ apuru mọ, “Mạkar ri amugh?” 45Kụ mem dị uwo ẹmhu ạbuo ẹgham mọ ạḅeni bọ nyọdi mọ mamugh ni phọ, aPailet ameeraam ni mọ ạJosef ạsighe ḍizu phọ ạJizos. 46Kụ ạJosef ạghi agho ọmur, kụ rosoore ḍizu phọ kụ aphurughi kụ aḍi nyọdi oḍi, dị oguph loor asighiigh, kụ aakilemi ḍighiigh apukiom ọnhu oḍi phọ. 47AMeri ọpo ạMagdala phọ, rꞌaMeri onhiin phọ ạJosef, ụmiin ni esi phọ oḍi bọ nyọdi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS