Luk 11
11
Jisas mwa Bagahi Alun Tataro
(Mat 6.9-13; 7.7-11)
1Haḡe gubwen̄ vwate Jisas mwa dataro lol ute vwate. Mahavana be kea mwa dataro vuvuri, non roron̄tai vwate mwa bevea lalainia be, “Ratahigi, vagahi kamai be gav tataro, kunia gabe Jon nu vagahira non roron̄tai.”
2Haḡe Jisas mwa bevea lalainira be, “Mahavana be gim dataro giv vevea be;
‘Tata:
Ihamwa na sabuga,
gam doron be Rahuan gara gabe gom Ratahigi alolona vi mai.
3Gam hudalinigo be gov hogoi ginaganiana vataha
gubwen̄ vi dadariha lalai kamai huri gubwen̄ gaituvwa.
4I be goi binihi kaburai vuromai bwatuna kamai gam
binihi kaburai vurora duluai gabe ram lolia lalai kamai.
I gosav lin̄ te kamai be kalkaliana vi lol ron̄ kamai.’ ”
5Haḡe Jisas mwa bevea lalainira non roron̄tai be, “Si vora tuamiu vwate nin kimiu si van vai lol imwan non buluana abobon bon̄i ba bevea lalainia be, ‘Buluana, gov mahin̄ai dum bereti gaitolu lalaiau. 6Bwatuna noḡu buluana lol non lagoana mwa siv votu lol imwaḡu, i ginaganiana sigai be nav laia lalainia!’ 7Take nom buluana si vwaliugo nin alolon imwa be, ‘Gosav lol te bidoiau! Gatava nu goro huba, i ira nituku maiau gam maturu huba. Nasav tomare tehe be namen lai ginaganiana lalainigo.’ 8Vi vora kunhanigi? Nam bevea lalai kimiu be gaituvwa n̄an be sihav tomare tehe be men lai bereti lalainigo, take bwatuna be kea nom buluana, kea vi tomare vi lai ginau duluai gabe gom doronia bwatuna gom hav busbusi tehe be gov hudali ḡarogaroinia.”
9“Kunia nam bevea lalai kimiu be: Giv hudaligi, i vi laia lalai kimiu; giv hiḡea giv habwea; Giv dorodoro i gatava vi mahavan̄i huri kimiu. 10Hurira duluai gabe ram hudaligi, rav lai dumwia, i kea gabe mwa hiḡea vi habwea, i gatava vi mahavan̄i lalai ihei mwa dorodoro. 11Ihei nin kimiu ira tama vi lai teltele dum lalai nituna atamwan mahavana mwa hudaligi huri ige? 12Sa gov lai bwan̄seresere lalainia mahavana mwa hudaligi huri idoli? 13Kimiu atat hantai take gim ilo halana be gim lai ginau tavuha lalai ira nitumiu. Vaviha mulei be Tamamiu amare vi lai Vui Sabuga liu lalai ira hei gabe ram hudalinia huria!”
Jisas i Vui Hantai
(Mat 12.22-30; Mak 3.20-27)
14Jisas mwa hora lua vui hantai gabe mwa hav avo te dum; mahavana be vui hantai mwa bwihavare atatu mwa bavora mwa avo. I sinombu ram dan̄an̄a ginia, 15take kera rituai ram bevea be, “Kea Belsibol ratahigi ḡoro ira vui hantai, mwa lai roron̄o lalainia be vi hora luara.”
16Kera rituai ram doron be rav ruruhia ram hudalinia be men lol ginau dan̄an̄a kun dovon̄ana be God mwa dame aluna. 17Take Jisas mwa ilo nora binihiva mwa bevea lalainira be, “Vanua vwate si haraborae sibona gi tatan̄ana be men bwalo sihav tu tehe. Imwa vwate si haraborae sibona gi tatan̄ana ivusi be men bwalo vi tu hanigi? 18Be ute ratahigi non Setan si harabora vai la tatan̄ana ivusi ba bwalo ginginira, non ute ratahigi vi tu dum kun hanigi. Gim bevea be inau nam hora lua vui hantai gin roron̄o non Belsibol. 19Be nam hora luara kungeki, kun hanigi haḡea ira nomiu atatu ram hora lua vui hantai? Nora lalaḡova mwa seserai luae be gim bahala n̄oton̄oto. 20Be inau nam hora lua vui hantai gin muramura non God mwa seserainia be, God mwa rihumaragai ninira non ivwalu be vi vora Ratahigi Lavoa goro atatu duluai.”
21“Be atat muramura mai non haḡohaḡon bwaloana mwa gitaḡoro imwana, non vataha ginau duluai ram du tavuha. 22Take batena atat rihumaragai ninia mwa bwalo maia i mwa rihu maragai ninia, kea mwa lai dagai non haḡohaḡon bwaloana gea be wani mwa butu aluna i mwa harabora rosona duluai be nu surainira.”
23“Ihei tehe mwa hav vora te ataluku mwa ivwaluiau; ihei tehe mwa hav bul te haragaituvwa maiau, mwa lus bisalsalainia niniau.”
Vui Hantai mwa Dabagilu
(Mat 12.43-45)
24“Mahavana be vui hantai mwa mwalue nin atatu vwate mwa lago dadaligi lol vanua vuroi, mwa hiḡe ute dolua be vi mambu aia. Be mwa hav habwe te dum tanona, kadogaha mwa bevea lol binihina sibona be, ‘A! Nam siv vinihi dumwia, mwa du be nav tabagilu mulei vai la imwaḡu be nan mwalue ninia tuai.’ 25Haḡe mwa dabagilu mulei vai la imwana, mwa habwea be imwa gea mwa du vuroi n̄ano, nu melmelo i vataha ginau nu lolian dautau. 26Kea mwa bwihavare mwa ban mwa lai vui hantai gaibitu mulei be alen̄ara ran hantai ninia, ram mai bilin̄ai ram hogon bamasiri imwa gea. Amua atatu gea be vui hantai nu to alolon amua rahuna nu hantai. Take ataguna be kera gaibitu ram mom mai mulei rahuna mwa hantai liu nin amua.”
Mwasin Ron̄ Mwandavuha
27Mahavana be Jisas nu vev vuvuri ginau uhu, vavine vwate mwa av lua lol sinombu be, “Vavine gabe nu bavago i nu lai huhu lalainigo vi ron̄ mwandavuha.”
28Take Jisas mwa bwaliua, “Sigai ta irahei gabe ram ron̄ avoana non God i ram ḡoḡoi ḡoroe rav ron̄ mwandavuha.”
Atatu Ram Hudali Dovon̄ana nin Jisas
(Mat 12.38-42)
29Batena be sinombu ram ḡoḡo dalis Jisas kea mwa bev muleinia be, “Sinombu ata lol gubwen̄ garigi, ira mwasin atat taltale! Ram doron dovon̄ana niniau ta sihav loliana te lalainira take kea n̄an Jona nu lolia. 30La hala n̄an kea huri be atatun vevsera Jona nu vora dovon̄ana lalai sinombu ata Ninive, kunia mulei inau Nitun Atatu nai vora dovon̄ana lalai sinombu ata garigi. 31Lol Gubwen̄ Vevev vavin Lavoa ata Seba vi tu amare vi vevev sinombu ata garigi; bwatuna nu lago la halana duluai nin vanuana be men ron̄ silo vagahi non Solomon Ratahigi Lavoa. Take nam bevea lalai kimiu be, ginau teti abemiu gaivua liu nin Solomon. 32Lol gubwen̄ vevev atatu ata Ninive rav tu amare lol matamiu, i rai vevegi kimiu, bwatuna kera ram ron̄ toretore non Jona, i ram binihi leahi. Take nam bevea lalai kimiu be, inau nan muramuraga liu nin Jona!”
Matada Haḡea mwa Bora Gigita huri Rebehida
(Mat 5.15; 6.22-23)
33“Atatu sihav tumus te bulu vuvuri gim dau ḡoroe gin gete take vi taua la mwasin tanona, be sinombu rav gita gigitana batena ram haroro. 34Matamiu nu ḡun bulu huri rebehimiu. Be matamiu vi gigita tavuha, rebehimiu duluai vi masiri gin gigita; be matamiu ran hantai, rebehimiu n̄oto mwa dogo lol ute meto. 35Giv gitaḡoro nomiu gigita be sihav metmetoga tehe. 36Be rebehimiu duluai mwa masiri, gin gigita i uduna mwa hav to te lol ute meto, vi gigita tavuha duluai, kun bulu mwa gigitai kimiu gin sarisarina.”
Jisas mwa Bevev Ira Varise mai Ira Vagahin Silo
(Mat 23.1-36; Mak 12.38-40)
37Mahavana be Jisas mwa avo vuvuri Varise vwate mwa lai ḡoḡoe be vi gan ginau bul maia; haḡe kea mwa haroro i mwa do mahuri be men gan ginau. 38Varise mwa dan̄an̄a huri mwa ḡitae be mwa hav bwagabwaga tehe te amua huri ginaganiana. 39Haḡe Ratahigi mwa bevea lalainia be, “Kimiu ira Varise gim bwaga melmeloi tagun laha mai peleti, take alolomiu kimiu gim masiri gin bugurana mai binihiv hahantai. 40Kimiu ira taltaleana! Matu mwa hav vora te God be nu tau ute avare i alolona mulei? 41Giv hagai lua hano gabe mwa du lol nomiu laha mai peleti lalai ira hiru, i ginau duluai vi melmelo lalai kimiu.”
42“Hahagavi lalai kimiu, ira Varise! La mahavana be gim hogoi lalai God gin han̄vulun bilamiu ginau, gim hav binihi te malioi han̄vulun ginau ririgi kun ruḡuruḡu i sigugu take gim binihi malioi silo vavtutu i lolotabetabe lalai God. Amua giv lol ginau mutai kera geki; ta gisav tau te dagara ginau ririgi kera uhu.”
43“Hahagavi lalai kimiu, ira Varise! Gim doron maragai muan tanon togotogo tagaro lol imwa tataro be rai viginago gin kimiu lol ute bulbulu. 44Hahagavi lalai kimiu! Kimiu gin ḡun bwaru gabe dovon̄a sigai alura ram hav iloe tehe.”
45Haḡe tuara vwate ninira vagahin Silo mwa bevea lalainia be, “Vagahi gom avo kun geki mwa dum kamai mulei!”
46Haḡe Jisas mwa bwaliura be, “Hahagavi lalai kimiu mulei ira Vagahin Silo! Gim bauhi ginau marahi i gim daua alun gatigun sinombu, nu marahi lalainira be rav haḡoe, take gim hav lol te ginau be gimen bului atatu ba datal ginau marahi gea. 47Hahagavi lalai kimiu! Gim lol bwaru tavtavuha huri ira atatun vevsera haḡea be ira sibimiu ran wehira. 48Kimiu sinombu gim bevea be gim dame huri hano gabe ira sibimiu ran lolia be kera ran wehi ira atatun vevsera, i kimiu gim boha bwarura. 49Bwatuna higea mataisao non God nu vevea be: ‘Nav hora ira atatun vevsera lalainira i rav wehi bamat rituai i rav lol ḡagaras rituai.’ 50Sinombu ata uhugaha vi vevev dumwira huria be ran wehiana, na ira atatun vevsera nu tau bwatuna nin mahavana gabe nu tau ureure, 51nu bwativuga nin mateanan Ebol vaivotu mateanan Sakaraia kea gabe nu wehiana lol davolan tanon tataroi mai Ute Sabuga. Mwasigi nam bevea lalai be sinombu ata garigi rav lai silo vevegi hurira duluai!”
52“Hahagavi lalai kimiu ira Vagahin Silo! Gim usi gaihavan̄i gabe gatava mwa mahavan̄i ginia huri imwan mataisao; kimiu sibomiu gim hav doron tehe be giv haroro, i gim du goro ira hei dodolua gabe ram lol ron̄oe be rav haroro!”
53Ataguna be Jisas nu visdagai nin ute gea, ira vagahin Silo mai ira Varise ram bavora ram bev bwarebware maragainia i ram hudaltali nia gin avoan hudaligi huri ginau ivusi, 54ram lol ron̄oe be rav ruruhia be vi av bahala.
Currently Selected:
Luk 11: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
