Mak 7
7
Silo Vagahi non Ira Bwatmetua ata Tuai
(Mat 15.1-9)
1Haḡe ira Varise mai ira vagahin Silo gabe ran himai nin Jerusalem ram ḡoḡo dalis Jisas. 2Ram ḡitae be ira roron̄tai non Jisas ram ḡan ginau ram hav bwaga te limara hurin silon ira Varise.
3Bwatuna ira Varise mai ira Jius duluai ram huri silo vagahi be ram laia ninira nora bwatmetua: be rasav gan te ginau vaivotu rav bwaga limara la mwasin halana; 4ram hav gan te havanau gabe mwa mai nin saran volvoligi vaivotu rav bwagae amua. I ram huri silo vagahi dodolua gabe ran laia kunia be laha, susbeni, disi, i bata vi bwagana duluai.
5Haḡe ira Varise mai ira vagahin silo ram hudali Jisas be, “Huri hano be nom roron̄tai duluai ram hav huri te vagahin Silo gabe ira bwatmetua ram huria, ram ḡan ginau ram hav bwaga te limara?”
6Jisas mwa bwaliura mwa bevea be, “Aesaia nu vev mwasigi batena be nu vev dau avoanana huri kimiu! Kimiu ira hoḡoiḡoro hurinia gabe nu ravae be:
God mwa bevea be, ‘Kera sinombu geki ram ḡogonaiau gin nora avoana n̄an,
take lolora hautu niniau.
7Ram ḡogonai bonogaiau,
bwatuna be ram bevea be nora silo vagahi kea avoana non God.
Take avoana non atatu n̄ano.’”
8“Gim dau dagai Leo horai non God, i gim dabe silo vagahi non atatu.”
9Haḡe Jisas mwa darihou rahurahui non avoana mwa bevea be, “Kimiu gim iloute huri hala gabe giv varihai God mai non silo, gim doron be giv tabe nomiu sibomiu. 10Huri Moses nu vevea be, ‘Giv tabe ira tamamiu sa ratahimiu,’ be, ‘Ihei mwa bev avoan hantai vai alun tamana sa ratahina mwa du huria be rav wehi bamatea.’ 11Ta kimiu gim bagahi be, be havanau te non wani be si bului dum tamana mai ratahina ginia, take mwa bevea be, ‘Ginau gea Koban.’ (Binihiva huria be ginau gea non God.) 12Kimiu gim bevea be non avoana mwa lol ḡoroe be sihav bului te tamana sa ratahina. 13Hurin hala uhu, nomiu silo vagahi be gim laia lalai atat dodolua mwa dagara kaburai avoana non God. Take ginau ivusi kun ginau uhu be gim lolia.”
Ginau be mwa Lol Atatu mwa Bibili Lolmatan God
(Mat 15.10-20)
14Haḡe Jisas mwa uloi sinombu be ramen mai mulei vai abena mwa bevea be, “Kimiu duluai giv roron̄taiau i giv iloe be. 15Ginau sigai nin avare be vi hivo alolon atatu ba lol bibilinia. 16Take ginau gabe mwa mwalue nin atatu kea haḡea mwa lol bibilinia.”
17Mahavana be mwa ban dagai nin sinombu mwa haroro alolon imwa, non roron̄tai ram hudalinia huri sinen avoana geki. 18Haḡe Jisas mwa bwaliura be, “Kimiu gin hav mataisaoga te nin atatu dodolua. Gin hav ron̄ te batoia? Ginau sigai nin avare gabe mwa hiv alolon atatu be vi lol dumwia vi bibili, 19bwatuna be mwa hav haroro te lol irubwina take mwa haroro lol tabwan̄i vuvuri mwa bwihavare nin rebehi.” (Nin avoana geki Jisas mwa bev luae be, ginaganiana duluai ran tavuha huri be vi ganiana.)
20Kea mwa darihou radui non avoana mwa bevea be, “Ginau gabe mwa bwihavare nin atatu, kea haḡea gabe mwa lol bibilinia. 21Huri be nin lolon atatu mwa bwihavare binihiv hahantai gabe mwa domuainia vai lol lalaḡov bibili, kun surana, wehi bonogai, 22kun surana mai atat lagi, kun bugurana, avoan tentene, tul bonogai, binihiv sage i lalaḡov deḡeteḡe. 23Mwa lol ginau hantai ivusi, ginau duluai uhu ram mwalue nin lolon atatu i ram lolia mwa bibili.”
Binihimwasigi Garagusi non Vavine
(Mat 15.21-28)
24Haḡe Jisas mwa ban dagai vai la vanua sosori gin bwatutun vanua Taea. Kea mwa dalin̄oro lol imwa vwate mwa hav doron tehe be ihei vi iloe be kea mwa dogo aia; take kea mwa hav hili te dumwi. 25Vavine vwate nituna daulato vui hantai alolona, kea mwa ron̄oe huri Jisas i mwa mai vilvilehi vai abena i mwa hivbwaubwau lol bwalagena. 26Vavine uhu Lolobon̄i, nu vora lol ute Vonisia la vanua Siria. Mwa hudali Jisas be kea vi hora lua vui hantai nin nituna. 27Take Jisas mwa bwaliua mwa bevea be, “Tav van̄an ira naturirigi amua; nu hav tavuha tehe, be tav lai ginaganiana gan naturirigi ba bohainia lalai vwiriu.”
28Take vavine mwa bwaliua mwa bevea lalainia be, “Ratahigi, mwasigi ta vwiriu ram du aten tebol (tanon ginaganiana) ram ḡan mamarahan ginau gan naturirigi gabe mwa bihovi vai ata!”
29Haḡe Jisas mwa bevea lalainia be, “Hurin nom avoan vwaliu gea gov tabagilu mulei vai la imwamwa, i gov habwea be vui hantai nu mwalue huba nin nitumwa vavine!”
30Haḡe vavine mwa dabagil mulei vai la imwana mwa habwe nituna mwa en la batana; vui hantai nu van dagai ninia mwasigi.
Jisas mwa Barahu Atatu Bwerona nu Vono nu Hav Avo te Dum
(Mat 16.21-28; Luk 9.22-27)
31Haḡe Jisas mwa domare nin Taea i mwa lago vai Saidon. Haḡe mwa dabagilu mulei mwa ban sivi ute be bwatutun vanua ririgi han̄vulu aia. I mwa botui numbu gaivua Kalili. 32I atatu rituai ram lai atatu vwate bwerona nu vono. 33Jisas mwa lai luae gahena ramuru ban dagai nin sinombu i mwa sogai bwaruruguna vai lol bwerona, mwa lodo la bwaruruguna mwa sibweri mean atatu gea ginia. 34Haḡe Jisas mwa dada vai lol ute atamare, mwa avo gin silo marahi mwa bevea lalai atatu be, “Ivata,” binihiva huria be, “Mahavan̄i!”
35Haḡe darihou bweron atatu gea mwa mahavan̄i i gaon meana mwa matugu, i kea mwa dau bwatuna mwa av tavuhai. 36Batena be Jisas mwa bisigai mamaragai ginira be rasav vevuri te huria. Ta kera ram mom bevuri huria liu. 37Kera gabe ran ron̄oe ram dan̄an̄a maragai ram bevea be, “Ginau duluai mwa lolira ran tavuha, vaivotu be ira bwero vono ram ron̄ ute mulei i kera gabe ram hav avo te dumwi ram avo mulei!”
Currently Selected:
Mak 7: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
