Shave 23

Hawe va ka dewə berete

1Peslema ghena nyi ɗema ghə te na ma, neghe nda ma fete tseŋwə na ke beze ghena ma. 2Dzawama hweŋkwa ta wəba ta mbeli nyi keɗe mene wəsə kwa ndiremi na ma. Ma kenza na kande negha fete te ghwə ne, dzawama hweŋkwa ta wəba ta mbeli na, kenza hɛ kameha ghwə ɗafa ma. 3Kemanema ya nde titikwə na te ghwə ma.

4Ma kebegeme na le sla keɗema kwara ta nde ghema ta ŋa nya kezanyɛ ne, ŋkake nda ŋkɛ kase. 5Ma kenakɛ kwara ta nde ghema ta ŋa na keteɗe teɗe kwa hweŋkwa le wəsə te wəmbə ne, sərəakɛma ŋkɛ na ma. Ama kemanakɛ nde ghema ta ŋa kapəkə kwara shɛ sate te ŋkwa. 6Ŋkeɗema seɗa na te kaganda ta nde titikwə nya ke'yɛwe kemane va gha te ghwə ma. 7Vema sleme na yitea ghena tseŋwə ma. Peslema wəndə nya ɗema fete ve keɗema wəndə nya tiɗiɗi na ma, kwa nza ŋkɛ kave wəndə nya kala nyagha 'ya, kawəndə nya ɗema fete ve we. 8Yɛma wəshi gəmə na ma, kwa nza ŋkɛ wəshi gəmə ka zhɛre mbeli nyi kenewe ŋkwa megela kaka ghwələa kɛfi ba'a ka taze mehele ta mbeli nyi tiɗiɗi.

9Sa nda ma yaka na ke nde se se nya ki ghɛa ŋa ma. Nahe yɛ keɗepe nza ta nci megela, kwa nza ŋkɛ kaka se se se gheyɛ le ghəa ŋayɛ mbe Ɛzhipte.

Va ta zhɛne mpi ba'a veci kezhɛne mpi

10Ma kava ŋkwaŋe ne, katewəza wəvea ŋa na ba'a katemene wəshi na se te wəve. 11Ama te kwa mberefaŋe ta va ne, katesərə wəvea ŋa na pɛtɛ kazhɛne mpi. Ka menəhɛ ŋayɛ nyi kaka titikwə ka tekemave wəshi kezeme te, wəshi nyi hwa gamba ka tezeme nyi ketene. Tsagha shɛ mene na le wəvea rɛzɛŋea ŋa ba'a le ŋa bekelea ŋa.

12Kahɛ ŋkwaŋe ne, mene yayata slene ta ŋa, ama te kwa mberefaŋe ta hɛ ne, menema slene na ma. Ma tsagha ne, katezhɛne mpi sla ba'a kwara ta ŋa, katekemave berete ka mavashi ba'a ka se se nyi ki ghɛa ŋa.

13Hawe mə tsape va wəshi nyi gezave ŋayɛ 'ya, 'ya Mahwətə. Səkwəma kweci shala yɛ ma, hekɛmema sləa nci yɛ ma.

Gəsəkə nyi jama jama nyi mene ka Israyɛl

(34.18-26; ZGWM 16.1-17)

14Keva keva ne, mahekene zhigə temene ɗa gəsəkə nyi jama jama yɛ. 15Ma kwa ghate ta gəsəkə nya temene yɛ ne, gəsəkəa pɛaŋe nya ɗema tenjɛne hwe: kahɛ mberefaŋe nyi kenteyi geva te tere Abib ne, ɗafa nyi ɗema tenjɛne hwe yatezeme yɛ, kala nya gezave ŋayɛ 'ya, kwa nza ŋkɛ te terea shɛ shave yɛ mbe Ɛzhipte. Katese yɛ kadzeki ghɛa ɗa le dzeve pala pala we. 16Kwa sebe ta ŋkɛ ne, katemene gəsəkəa mene wəshi se te wəve yɛ, vəa ŋkwa nya ghate yɛ kamene tsəməa wəshi nyi wəzate yɛ te wəve. Ma te kwa keɗaŋe ta tere mbe va ne, katemene gəsəkə dərəzlə ghwane yɛ vəa ŋkwa nya meneke wəshi nyi wəzate yɛ yɛ sheke kwamte. 17Kazhigə mahekene mbe va ne, pɛtɛ tese zhili nyi mbe hwelefe ta ŋayɛ kadzawa kema ta ɗa, 'ya Shala Mahwətə ta ŋayɛ.

18Ma kenza yɛ kadzeghe ɗa melɛ le wəshi keseɗa ne, fə ɗa ma yɛ ɗafa kwalekwala yɛ kase ma. Sərəma merege ta wəshi keseɗa nyi dzeghekɛ melɛ mbeli le hɛ hetɛhwɛɗi yɛ pa va masheke ma. 19Katefə tsəməa wəshia ŋayɛ nyi kese te wəve yɛ kase kadzeki ghɛa ɗa, 'ya Shala Mahwətə ta ŋayɛ. Ama mba yɛ keta zhɛgwəa kwe hwa ŋ'wa ta meghekɛ.

Shala kameɗe nda kemane ke mbelia ŋkɛ

20Ma ke Shala sha Moyize pelɛ ghweme ta Sinay zhɛkwa: «Kateghwene ŋayɛ nde ghwene 'ya. Gheŋkɛ nde tedzeghwa le gheyɛ kwa hweŋkwa ba'a nde tebeghe ŋayɛ kadzete hɛɗi nya hite ŋayɛ 'ya. 21Hawe mə ve ba'a fa nda mə ghena. Zhɛne nda ma ghə yɛ ma, katezereghete fama ghena ta ŋayɛ ŋkɛ we, kwa nza ŋkɛ ne, te sləa ɗa mene slene ŋkɛ. 22Ma kefate nda ŋa ŋkɛ yɛ ba'a kemenete wəshi nyi gezete 'ya yɛ ne, katenza 'ya, 'ya Mahwətə kande ghema ta ka ghema ta ŋayɛ ba'a kande mpa ta ka mpa le gheyɛ.

23Ma vəa ŋkwa nya tedzeghwa nde ghwene ta ɗa te kema ta ŋayɛ kezha beghe ŋayɛ kalə sha ka Amor, ka Hɛt, ka Pɛrɛs, ka Kanan, ka Hava ba'a ka Zhɛbəs ne, kateza sebe 'ya te hwelefefia shɛhɛ. 24Ama kehi yɛ kagwəɗəŋə kwa kema ta wəshi nyi zhɛrete hɛ kashala kezha hawe va hɛ we, tekema wəshi nyi mene hɛ yɛ ma. Ama katempə wəshi nyi zhɛrete nyi hɛ kashala yɛ ba'a katefelaŋe yɛ gɛaŋa ta nci yɛ. 25Deke 'ya ya kaMahwətə Shala ta ŋayɛ nya hawe yɛ ve. Ma tsagha ne, katewəpi ŋayɛ 'ya laka ve ŋayɛ wəshi kezeme ba'a wəshi kesa, ba'a ne, kateya ŋayɛ 'ya va zereghwe. 26Ma te hɛɗia ŋayɛ ne, male shɛ katebereɗe keɗema katenza kajɛŋa we, ba'a ne, kateve ŋayɛ temə 'ya kwele kwele teghweme.

27Fatema ta kweci hwelefefi ke se ta ŋayɛ ne, katedake hɛ va ghazlənə. Kateve nda ghazlənə 'ya ke kweci hwelefefi nyi tedzete hɛɗia nci yɛ ba'a kateŋkamte ka ghema ta ŋayɛ 'ya te kema ta ŋayɛ. 28Kateghwene medeŋwete 'ya te kema ta ŋayɛ. Katekeka ka Hava, ka Kanan ba'a ka Hɛt hɛ nda tentsehe yɛ. 29Ama kateŋkamte mbelia shɛhɛ 'ya pɛtɛ te kema ta ŋayɛ mbe va kwetɛŋe we. Ma kemenete geva ŋkɛ tsagha ne, katezhɛre hɛɗi kaɓerama nya teya ŋayɛ ya wəshi keseɗa nyi hwa gamba kwele kwele te. 30Ɓɛhwɛ ɓɛhwɛ teŋka ka ghema ta ŋayɛ 'ya te kema ta ŋayɛ, pa te və nya teyate ya yɛ ba'a nya tekelehwe hɛɗi yɛ. 31Katenza hɛɗia ŋayɛ se mɛa ndərəa ghwəvərə hwa'a mɛa ndərəa Mɛditɛranɛ ba'a se mɛa ɓerama ta Sinay hwa'a mɛa hələa Efrate. Kwa nza ŋkɛ ne, kateve mbeli nyi te hɛɗia shɛhɛ 'ya mbe dzeve ta ŋayɛ yitea ŋkamte hɛ yɛ. 32Menema jikə geva yɛ le hɛ keɗema le yɛ shala ta nci ma. 33Pelema hɛ yɛ kanza te hɛɗia ŋayɛ ma. Ma kenza ŋkɛ tsagha ne, katekese ŋayɛ hɛ kadzembe mene ɗa fete. Kwa nza ŋkɛ ma kenza yɛ kahawe va yɛ shala ta nci, katekese ŋayɛ keleŋa.»

Currently Selected:

Shave 23: BEKDC12

Highlight

Copy