Shave 33

Shala kave nda hweŋkwa keslə ke Moyize

1Ma ke Mahwətə sha Moyize: «Kwiɗi mə, slə mə teke, gha le mbeli nyi fəakave na shave mbe Ɛzhipte. Kwiɗi mə kadzeme hɛɗi nya meɗeyi nda 'ya kafela ke Abraham, Izak ba'a Zhakob kave nda ke hwelefefia nci. 2Kateghwene nde ghwene ta ɗa 'ya te kema ta ŋayɛ. Kateŋka ka Kanan, ka Amor, ka Hɛt, ka Pɛrɛs, ka Hava ba'a ka Zhɛbəs 'ya. 3Dzeme mə hɛɗi nya hwɛ yɛ ŋ'wa le yɛməa mze te. Kadzeme ɗa 'ya hwa gheyɛ, yagha 'ya kazamte sebe te gheyɛ kwa hweŋkwa we, kwa nza ŋkɛ ne, ka ntɛaŋentɛa ghə yɛ.»

4Ma kwa fate ghena nya ndiremi nya mbeli ne, ntake hɛ kanehwene. Wəndə shɛ kese kapesa geva we. 5Ma ke Mahwətə sha Moyize: «Ma pa na sha ka Israyɛl: ‹Pɛtɛa ŋayɛ kaka ntɛaŋentɛa ghə! Ma nda nahe 'ya kebeghakɛ ŋayɛ baɗe kadzeme ne, nza kateza sebe 'ya te gheyɛ. Ma tsetsenya ne, seɗemte mə wəshi kepesa geva ta ŋayɛ, nda tenewe 'ya tsema tsema temene ŋayɛ 'ya.›» 6Ma sləma ta nci yitea ghweme ta Horɛb ne, pa ka Israyɛl nzanji keseɗe wəshi kepesa geva ta nci.

Cɛ lekwesa kebegeme geva

7Ma kwa menete ghedəkwəa nci ka Israyɛl ne, pa Moyize kelete cɛ lekwesa kamɓeyi cakeɗake le ghedəkwə. Pa mbeli hekate nda slə ke cɛ lekwesa shɛ “kacɛ lekwesa kebegeme geva”. Ma yayata wəndə nya keɗe ka'yɛwe ghena va Mahwətə ne, kaslə ŋkɛ mbe ghedəkwə kalə kadzembe cɛ lekwesa shɛ. 8Ma kenza nde Moyize nde dzembe ne, yayata wəndə kasate te ŋkwa kanza meslete mɛa cɛ lekwesa ta ŋkɛ ba'a kanewe Moyize nda dzembe ŋkɛ hwa'a mbe cɛ lekwesa nya keveyi geva tekeleke. 9Ma kwa dzembe cɛ lekwesa shɛ Moyize ne, kasawa geɗeɗe ta meləkwə ləkwə kanza mɛa ŋkwa kedzembe cɛ lekwesa shɛ. Tagha gɛ, ntake yɛ Mahwətə le Moyize kageze ghena. 10Mbe yayata və nya nakɛ geɗeɗe ta meləkwə ləkwəa shɛ ka Israyɛl ne, yayata wəndəa nci kagwəɗəŋə ntiŋə ghə mbe hɛɗi mɛa cɛ lekwesa ta ŋkɛ. 11Ntake yɛ Mahwətə le Moyize kageze ghena kwa kema kwa kema, kala nya geze nda ghena wəndə ke mcɛnyɛ. Kwa sebe ta ŋkɛ, tewətelɛwe Moyize zhɛneghe geva kadzembe ghedəkwə, vəa ŋkwa nya nza nde mene slene ta ŋkɛ nya kamempɛhweta Zhozəwɛ, wəzege ta Nəwn mbe cɛ lekwesa.

Mahwətə kageze ghena le Moyize

12Ma ke Moyize sha Mahwətə: «Fama Mahwətə! Gha nde gezave ɗa kabeghe mbeli nyi, ama kencɛte ɗa wəndə nya teghwene na kezha kemane ɗa na we. Ndagwara nahe na kentave ɗa tekeleke ba'a nahe na kendeke ɗa zlaɓa ta ŋa, gha le ghəa ŋa nde gezete. 13Ma tsetsenya, kwa nza ŋkɛ nahe 'ya kekemave zlaɓa ta ŋa ne, ncɛte ɗa zəzə ta ŋa. Ma tsagha ne, kateɗepete ŋa 'ya megela ba'a katekemave zlaɓa ta ŋa 'ya tsape. Zaghəyitema na kaŋa ŋa mbeli nyi ma.» 14Ma ke Mahwətə zhɛnete nda: «Katebeghe ŋayɛ 'ya le ghəa ɗa! Hehama na ma.»

15Ma ke Moyize zhɛkwa: «Ma keɗema na kabeghe n'yɛ le ghəa ŋa ne, geze n'yɛ ma na kaslə teke ma. 16Kwa nza ŋkɛ ma keɗema na kabeghe n'yɛ ne, tsema nza mbeli kaɗepete nahe ghen'yɛ le mbelia ŋa kekemave zlaɓa ta ŋa wa? Deke nza ta ŋa hwa ghen'yɛ nde nza kaneheve n'yɛ le kweci hwelefefi nyi te hɛɗi lema.» 17Ma ke Mahwətə zhɛnete nda ke Moyize: «Katemene 'ya kala nya geze nya na. Kateve ŋa zlaɓa ta ɗa 'ya, kwa nza ŋkɛ, nahe 'ya keɗepe sləa ŋa megela.»

18Ma ke Moyize shɛ: «Ncɛte ɗa zləvəa ŋa təhwə təhwə ŋa 'ya.» 19Ma ke Mahwətə zhɛnete nda: «Katedzeyi 'ya kwa kema ta ŋa, katencɛ ŋa ndeɗea mehele ta ɗa 'ya ba'a katencɛ ŋa 'ya ‹kaMahwətə› sləa ɗa kaganda. Katezhɛ heli 'ya yitea wəndə nya ɗe 'ya kazhɛ heli yite ba'a katencɛ nda ganyɛa mehele ta ɗa 'ya ke wəndə nya ɗe 'ya kancɛ nda.» 20Ma ke ɓiyitsa: «Katenakɛ kema ta ɗa na we, kwa nza ŋkɛ ne, wəndə ŋelɛ shɛ kanakɛ kema ta ɗa pa ŋkɛ nzate nza teghweme we. 21Wa nya kwete nya gela teke terasle yitea 'ya, nza ŋa te gela shɛ. 22Ma vəa ŋkwa nya tedzeyi 'ya vare gha kezha ncɛ zləvəa ɗa ne, katewəfərə ŋa 'ya dzawa kwelɛ keleɓa shɛ. Katedəpə dzeve ta ɗa 'ya kənəa gha vəa ŋkwa nya tedzeyi 'ya. 23Kwa sebe ta ŋkɛ ne, katekelemte dzeve ta ɗa 'ya, ma tsagha ne, katenewe wəmbəa ɗa na. Ama kema ta ɗa ne, kanakɛ mbeli we.»

Currently Selected:

Shave 33: BEKDC12

Highlight

Copy