Gha ta Wəshi 15

Shala kamene jikə geva le Abram

1Ma kwetere wəmbəa ŋkɛ, pa Mahwətə gezete nda ghena ke Abram te shiwə, ma ke: «Ghazlənəma na ma Abram ma, geləa ŋa 'ya, kwele kwele tenza zhɛme ta ŋa.» 2Ma ke Abram zhɛnete: «Shala Mahwətə yawe, wa yateve ɗa na wa? Wa nya 'ya nya katemte kaɗema wəzege va 'ya. Ɛliyɛzɛr nya kande Damas nde tezeme ghɛa ɗa!» 3Ma ke Abram zhɛkwa: «Kendeke ɗa hwelefe na we. Hwelefe ta ɗa nde hi kazeme ghɛa ɗa.» 4Ma ke Mahwətə zhɛnete nda: «Gheŋkɛ nde tezeme ghɛa ŋa we: ama wəndə nya ketesawa mbe geva ta ŋa nde tezeme.» 5Pa Mahwətə hekakɛ ŋkɛ kashave te ŋwela, ma ke shɛ: «Kafete ghə yitea ghweme shɛ na ɓelate saseregwa kenza nde kapesle na yite.» Ma ke shɛ kwa sebe ta ŋkɛ: «Tsagha tenza hwelefe ta ŋa.»

6Pa Abram yɛhwe ghena ta Mahwətə, vatse veyi ŋkɛ Mahwətə kawəndə nya tiɗiɗi ŋkɛ. 7Ma ke shɛ: «'Ya ya kaMahwətə nya kekelakave ŋa shave mbe Əwr te hɛɗia Kaldɛ yitea ve ŋa hɛɗi nya kaŋa ŋa.» 8Ma ke Abram zhɛnete: «Shala Mahwətə, tsema teɗepe 'ya kateŋ'we ŋkɛ 'ya wa?» 9Ma ke shɛ: «Kwiɗi zeleke ɗa mbəkwə sla nya keva mahekene, kwe nya keva mahekene, game nya keva mahekene, gheɗepe ba'a wəzege ta ghwəɗəŋkwə.» 10Pa Abram fəke nda wəshi keseɗa shɛhɛ pɛtɛ, pa ŋkɛ peperaweve hɛ dzawa te tepe, veyi yayata bela mbe kema ta kwete. Ama kese ŋkɛ kanehe 'yɛ nyighɛ mbe we. 11Ntake yɛ zleŋa kasawa kazeme slia shɛhɛ, ama pa Abram ŋkamte hɛ.

12Ma kwa teɗe veci, shelɛŋe hɛ kelehwe Abram, pa ŋkwesle nya zhikwətəkwə ba'a nya ghazlənə mbeli ve menete nda geva. 13Ma ke sha Abram: «Ɗepete ndeɗekə: katenza hwelefe ta ŋa te hɛɗi nya keɗema kaŋa nci. Kaka mavashi tenza hɛ mbe, katesa nda yaka mbeli ke hɛ kava gwəmsə wəfaɗe. 14Ama katemeha ghwə 'ya te hɛɗi nya tenza hɛ kaka mavashi mbe, kateshave hɛ mbe le wəshi kwele kwele. 15Ma gha le ŋa ŋa ne, katelə na sha ka shihɛ ŋa le kwelɛŋe, katela ŋa mbeli kwetere wəmbəa hale nya le zeɗe nza. 16Te kwa wəfaɗe ta shi tezhɛne geva hwelefe ta ŋa kase teke, kwa nza ŋkɛ ne, kenaka 'yaghwa mehele ta ka Amor kancɛte geva kezha ŋkamte hɛ 'ya we.»

17Ma kwa teɗe veci ba'a kwa pɛkwe ŋkwesle ne, ntake laɗe ta ghwə nya keɗələ n'yi ba'a ghwə te wəvəzə kadzeyi kwelɛ tepe ta slia wəshi keseɗa nyi kenehe nehe nyi mbe. 18Ma te vecia shɛ ne, pa Mahwətə menete jikə geva le Abram, ma ke shɛ: «Ke hwelefe ta ŋa ve nda hɛɗi nya 'ya, se mɛa hələa Ɛzhipte hwa'a mɛa Efrate, hələ nya wəba: 19hɛɗia ka Kɛn, ka Kɛniz, ka Kadmon 20ka Hɛt, ka Pɛrɛs, ka Refay, 21ka Amor, ka Kanan, ka Girgash ba'a ka Zhɛbəs.»

Currently Selected:

Gha ta Wəshi 15: BEKDC12

Highlight

Copy