Gha ta Wəshi 28

1Pa Izak hekakɛ Zhakob ba'a wəpikɛ ŋkɛ. Ma ke gezave nda: «Wəmema wəzha ta ka Kanan na ma. 2Kwiɗi kadzeme Mɛzopotami nya pelɛghə kadzeki ghɛa Betəwɛl yiteyɛa meyɛ ŋa, wəmeve kwete wəndəa ŋwalea kwɛa Laban, wəza meghekɛa meyɛ ŋa. 3Pa Shala nde berete wəpikɛ ŋa, pa ŋkɛ ndeke ŋa ŋwale kwele kwele kezha nza na kashia mbeli kwele kwele. 4Pa ŋkɛ wəpikɛ ŋa kala ŋa Abraham, gha le ŋwale nyi ketesawa mbe gha yitea nza hɛɗi nya nza nya na te kaŋa ŋa, hɛɗi nya ndeke nda Shala ke Abraham.» 5Pa Izak ghweneghe Zhakob kadzeme Mɛzopotami nya pelɛghə sha Laban, wəzege ta Betəwɛl nde Aram ba'a wəza meghekɛa Rɛbɛka, meghekɛa yɛ Zhakob le Ɛzawə.

6Pa Ɛzawə fate nahe Izak kewəpikɛ Zhakob ba'a keghwenakɛ ŋkɛ kadzeme Mɛzopotami nya pelɛghə kezha wəme male. Ma kwa wəpi ŋkɛ ŋkɛ ne, ma ke gezete nda: «Wəmema wəzha ta ka Kanan na ma.» 7Nahe Zhakob keyɛte nda ghena ke yɛ yitenyɛ le meghekɛ ba'a kedzeme Mɛzopotami nya pelɛghə. 8Pa Ɛzawə ɗepete dewə ghəa yitenyɛ Izak te ŋwalea kwɛa ka Kanan. 9Cape ŋkɛ kalə sha Ismayɛl, pa ŋkɛ wəmeve Mahalat, wəzha ta Ismayɛl nya kawəzege ta Abraham, wəzha ta meghekɛa Nebayot, kadzevare mia ŋkɛ.

Shiwəa Zhakob

10Ntəŋə Zhakob shave mbe Bɛrshɛba kadzembe Haran. 11Ma kwa teɗe veci ne, pa ŋkɛ ghereŋenyɛ ba'a hɛnyɛ te ŋkwa shɛ. Pa ŋkɛ kelete pelɛ kezha ve yitea ghəa ŋkɛ, ɓelahe ŋkɛ te ŋkwa shɛ. 12Pa ŋkɛ shiwəte shiwə: ma newe ŋkɛ ne, gepe cigwərə se kwake te hɛɗi dəzlə yitea ghweme. Kwele kwele ka ghwene ta Shala nyi kedzeme ba'a nyi kesawa te. 13Pa Mahwətə slete te kema ta ŋkɛ, ma ke shɛ: «'Ya ya kaMahwətə Shala ta shia ŋa Abraham ba'a Shala ta Izak. Ma hɛɗi nya nza nya na te meɓelahe ne, kateve nda ŋkɛ 'ya ke gha ba'a ke hwelefefia ŋa. 14Kwele kwele teya ka hwelefefia ŋa kala ndaleghe. Katembake geva hɛɗia ŋayɛ laka ŋkwa kepəkwə ta veci ba'a laka ŋkwa kesame ta ŋkɛ, laka bela kwa gwela ba'a laka bela kwa zeme. Laka gha ba'a ka hwelefefia ŋa tewəpi pɛtɛa hwelefefi nyi te hɛɗi 'ya. 15Le gha nza 'ya, kateya ŋa 'ya te yayata ŋkwa nya tedzete na, katezhɛne ŋa 'ya kase kadzete hɛɗi nya. Katewəfə ŋa 'ya we, katemene pɛtɛa wəshi nyi meɗeyi ŋa 'ya 'ya.»

16Pa Zhakob feɗeghe, ma ke: «Kaganda nza Mahwətə teke, ama keɗepete 'ya we.» 17Ntake ghazlənə kazhɛ nda, ma ke: «Wa nya ghazlənə ve nda ŋkwa nya ke wəndə! Ghəpə yite we, kwete ŋkɛ ghɛa Shala, mɛa ŋkwa kedzeme ghweme ŋkɛ!» 18Pelɛhetɛme Zhakob sate te ŋkwa masheke masheke, laŋe te pelɛ nya kese yitea ghəa ŋkɛ, gepe ŋkɛ mɓete kagɛaŋa, pa ŋkɛ gəyi n'yi kwa ghəa pelɛa shɛ. 19Pa ŋkɛ ndeke nda slə ke ŋkwa shɛ kaBɛtɛl, geze ta ŋkɛ, “Ghɛa Shala”. Ama Ləwz se sləa melemea shɛ vəashi. 20Kwetere wəmbəa ŋkɛ, ma ke Zhakob menete meɗe mɛ: «Ma kenza nde le 'ya Mahwətə ba'a kaya ɗa ŋkɛ mbe dzeghwa ta ɗa, kenza nde kave ɗa ɗafa kezeme ta ɗa ŋkɛ ba'a lekwesa kedzeghəa geva, 21ma kezhɛneke geva 'ya kwelɛŋe kadzeki ghɛa yiteyɛ ɗa, Mahwətə nde tenza kaShala ta ɗa. 22Ma pelɛ nya mɓete nya 'ya kagɛaŋa ne, katenza ŋkɛ kaghɛa Shala. Ke gheŋkɛ teve nda kwa meŋe ta bela ta pɛtɛa wəshi nyi teve ŋkɛ 'ya.»

Currently Selected:

Gha ta Wəshi 28: BEKDC12

Highlight

Copy