Gha ta Wəshi 48

Zhakob kawəpi ŋwalea Zhozɛf

1Kwetere wəmbəa wəshi nyighɛ, pa mbeli gezete nda ke Zhozɛf Shewə yitenyɛ. Kəliɓə ŋkɛ te ŋwalea ŋkɛ nyi bake, yɛ Manasɛ le Ɛfrayim. 2Ma ke mbeli sha Zhakob: «Wa nya wəzege ta ŋa Zhozɛf kase sha gha.» Pa Zhakob hwepete ghə ba'a sate mentishɛ te gezle ta ŋkɛ. 3Ma ke Zhakob sha Zhozɛf: «Nahe Shala tehwə ghweme kencɛte ɗa geva mbe Ləwz, pelɛ hɛɗia Kanan ba'a kewəpikɛ ɗa. 4Ma ke sha 'ya: ‹Kateve ŋa ya ŋwale 'ya kwele kwele kezha nza na kashia mbeli kwele kwele. Kateve nda hɛɗi nya 'ya kaŋa nci ke hwelefefia ŋa kaghala ghala.›» 5Tsetsenya, ma ŋwalea ŋa nyi bake nyi yake nyi na mbe Ɛzhipte tewə 'ya kenaka kase sha gha ne, kaŋa ɗa nza hɛ. Kaŋa ɗa nza yɛ Ɛfrayim le Manasɛ kala yɛ Rəbɛn le Simɛyon. 6Ama ŋwale nyi teya na kwa sebe ta nci ne, kaŋa ŋa tenza hɛ. Te hɛɗia ka kesaka yiteyɛa nci nyi jama tekemave ŋa nci hɛ bela ta hɛɗi kawəsə kezeme ghɛ. 7Ma kwa zhɛneke geva 'ya se mbe Mɛzopotami, nahe Rashɛl kemtave ɗa mte kwa hweŋkwa tewə kedzembe Ɛfrata, te hɛɗia Kanan. Tagha lamte ŋkɛ 'ya mɛa hweŋkwa ta Ɛfrata, geze ta ŋkɛ, Bɛtelɛhɛm. 8Dəkwə Zhakob te ŋwalea Zhozɛf, ma ke: «Wa mbeli nyi wa?» 9Ma ke Zhozɛf zhɛnete: «Ŋwale nyi ndeke ɗa Shala teke.» Ma ke Zhakob: «Hendave ɗa hɛ kezha wəpikɛ hɛ 'ya.»

10Ama nahe ntsə ta Zhakob keghwələpənji va meha, mba ŋkɛ kanakɛ ŋkwa tiɗiɗi we. Pa Zhozɛf hendave nda ŋwalea ŋkɛ, həməwə Zhakob həməwəyi hɛ mbe hwəa ŋkɛ. 11Kwa sebe ta ŋkɛ, ma ke Zhakob sha Zhozɛf: «Keɗepe 'ya mba 'ya katenakɛ kema ta ŋa we, ama nahe Shala kemenete kezha newe ŋwale nyi keshave mbe gha 'ya.» 12Pa Zhozɛf fəmte ŋwalea ŋkɛ same kwa seɗa ta yitenyɛ, gwəɗəŋə ŋkɛ ntiŋə ghə mbe hɛɗi. 13Kwa sebe ta ŋkɛ, dedacɛ Zhozɛf keseve ŋwalea ŋkɛ nyi bake nyi te dzeve: ma Ɛfrayim nya mbe dzeve kwa zeme ta ŋkɛ ne, te kwa gwela ta Zhakob ŋkɛ, ma Manasɛ nya mbe dzeve kwa gwela ta ŋkɛ, te kwa zeme ŋkɛ va Zhakob. Pa ŋkɛ hendave nda hɛ ke Zhakob ɓiyitsa. 14Pa Zhakob kafete dzeve kwa zeme ba'a veyi kwa ghəa Ɛfrayim nya ɓɛhwɛ, pa ŋkɛ veyi dzeve kwa gwela kwa ghəa Manasɛ. Mbeɗe ŋkɛ mbeɗete dzeve ta ŋkɛ, kwa nza ŋkɛ Manasɛ ya wəba. 15Pa ŋkɛ wəpikɛ Zhozɛf, ma ke:

«Shala nya yɛte nda ghena shia ɗa Abraham ba'a yiteyɛ ɗa Izak,

Shala nya keya ɗa se ghalanza pa ɓeshi,

16nde ghwene nya kembelemte ɗa va yayata ndiremi,

wəpikɛ ŋwale nyi,

te zlaɓa ta nci ne, nza sləa ɗa te ŋwela

kala ŋa yɛ shia ɗa Abraham le yiteyɛ ɗa Izak!

Yate ya hɛ kala repanja te hɛɗi!»

17Newe ke Zhozɛf ne, dzeve kwa zeme yadapeyi yitenyɛ kwa ghəa Ɛfrayim, dewə ghəa ŋkɛ te. Pa ŋkɛ keseve dzeve ta yitenyɛ kezha kelemte kwa ghəa Ɛfrayim kadzawa ŋa Manasɛ. 18Ma ke Zhozɛf sha yitenyɛ: «Yita yawe, tsagha we, nya ya kwele! Dapeyi dzeve kwa zeme ta ŋa kwa ghəa ŋkɛ.» 19Ama hɛreɗɛ yitenyɛ ɗema, ma ke: «Nahe 'ya keɗepe wəzege ta ɗa. Kambeli kwele kwele tenza hwelefe ta Manasɛ perə. Ama wəba ma tenza səakəa ŋkɛ ke gheŋkɛ ba'a kambeli kwele kwele tenza hwelefe ŋkɛ.»

20Pa ŋkɛ wəpikɛ hɛ te vecia shɛ, ma ke: «Te sləa ŋayɛ tewəpi ŋkwa ka Israyɛl. Ma tegeze hɛ: ‹Pa Shala ndeke ŋa zeɗe nza kala yɛ Ɛfrayim le Manasɛ!›» Tsetse veyi Ɛfrayim Zhakob mpelɛa ma ke Manasɛ. 21Ma ke Israyɛl sha Zhozɛf zhɛkwa: «'Ya katemte, ama le gheyɛ tenza Shala ba'a katezhɛne ŋayɛ ŋkɛ kadzete hɛɗia ka shihɛ ŋayɛ. 22Ma 'ya le ŋa ɗa ne, 'ya kave ŋa Sishɛm, bela nya kwele ma ke ŋa ka kesaka yiteyɛ ŋa, hɛɗi nya zləgwəhwe 'ya va ka Amor le kafayɛ ba'a gwecɛ.»

Currently Selected:

Gha ta Wəshi 48: BEKDC12

Highlight

Copy