Gha ta Wəshi 50

Nehwene ta Zhakob

1Fɛke Zhozɛf sha ghəa ŋkɛ kənəa yitenyɛ, sərəɓə sərəɓə ŋkɛ sha nehwene ba'a həməwə ŋkɛ həməwəve ŋkɛ. 2Pa Zhozɛf gezave nda ke ka dakwəterəa ŋkɛ kezha fi geva ta yitenyɛ le 'wərdə. Pa ka dakwəterəa shɛhɛ fikɛ Israyɛl le 'wərdə. 3Hɛ wəfaɗemsə menete hɛ kafi geva ta ŋkɛ le 'wərdə kezha ɗema ŋkɛ kada kala nya seneve hɛ kamene. Hɛ mberefaŋemsə menete ka Ɛzhipte kanehwene ŋkɛ. 4Ma kwa nahemte geva nehwene ta ŋkɛ ne, ma ke Zhozɛf sha mbeli nyi ki ghɛa Farawon: «Ma kenza ŋkɛ kaɗe ɗa yɛ ne, təhwə təhwə ŋayɛ 'ya, ma pe yɛ sha Farawon: 5‹Ma nda temte yiteyɛ ɗa ne, nahe ŋkɛ kegeze ɗa kazeme nda fela kezha la ŋkɛ kwa kwele nya late ŋkɛ pelɛ Kanan. Kaɗe 'ya kadzeme Kanan tsetsenya kezha la yiteyɛ ɗa, nda tezhɛne geva 'ya kasawa.›» 6Ma ke Farawon zhɛnete: «Dzeme lamte yiteyɛ ŋa kala nya zemete nda fela na.» 7Ntəŋə Zhozɛf kadzeme kezha la yitenyɛ. Cape ka mene slene ta Farawon, mbelia jama nyi ki ghɛa ŋkɛ ba'a mbelia jama nyi te pɛtɛa hɛɗia Ɛzhipte kadzeme yite, 8tsagha mbeli nyi ki ghɛa Zhozɛf, ka kesaka yitenyɛ ba'a mbeli nyi ki ghɛa yitenyɛ. Deke ŋwale fəshi ba'a wəshi keseɗa ka tene te hɛɗia Goshɛn. 9Yɛ wəmata gədəwə ba'a ka zleɗe gədəwəa lɛmə ka beghakɛ ŋkɛ kadzeme. Kambeli kwele kwele nza hɛ.

10Hwa'a hɛ mbe Gorɛn-Atad pelɛ kema ta hələa Zhəwrdɛŋe. Pa hɛ veyi nehwene kewəbanyɛ ba'a dzawe tagha. Pa Zhozɛf menete hɛ mberefaŋe kanehwene yitenyɛ. 11Ma kwa nakɛ nehwene nya mbe Gorɛn-Atad ka Kanan nyi te hɛɗia shɛ ne, ma ke hɛ: «Nehwene nya dzawe ŋkɛ kaŋa ka Ɛzhipte!» Vatse hekate nda slə mbeli ke ŋkwa nya pelɛ kema ta hələa Zhəwrdɛŋea shɛ kaAbɛl-Misrayim, geze ta ŋkɛ, “Nehwene ta ka Ɛzhipte”.

12Kala nya gezete yiteyɛa nci menete nda ŋwalea Zhakob. 13Pa hɛ keleghe ŋkɛ kadzeme hɛɗia Kanan, lamte ŋkɛ mbe zlera nya mbe wəve nya mbe Makpɛla, nya pave Abraham va Ɛfron, nde Hɛt kaŋkwa kela ŋkwa, terasle yitea Mamrɛ. 14Kwa sebe ta nya lamte yitenyɛ Zhozɛf ne, tewətelɛwe ŋkɛ zhɛneghe geva kadzawa Ɛzhipte le ka kesaka yitenyɛ ba'a pɛtɛa mbeli nyi kebeghakɛ ŋkɛ.

Zhozɛf kagweɗakwe ka kesaka yitenyɛ

15Ma kwa nakɛ ka kesaka yitenyɛa Zhozɛf nahe yiteyɛa nci kemtenyɛ ne, ma ke hɛ: «Nda kwete katezhɛre ɓəmə Zhozɛf kaka jaga ba'a katewa wəsə kwa ndiremi nya menete nda gheɓəmə ŋkɛ tse we.» 16Pa hɛ ghwenakɛ nda mɛ ke Zhozɛf, ma ke hɛ shɛ: «Ma ke yiteyɛ ŋa gezave n'yɛ ghena nda temte ŋkɛ: 17‹Ma pe yɛ sha Zhozɛf: Təhwə təhwə ŋa 'ya, kelemte fete ba'a wəsə kwa ndiremi nyi menete ŋa ka kesaka yiteyɛ ŋa te wənə.› Tsetsenya gɛ ne, kelemte n'yɛ fetea shɛ te wənə, ghen'yɛ ka mene nda slene ke Shala ta yiteyɛ ŋa.» Ma kwa gezete nda ghena hɛ kala nyagha ne, ntake Zhozɛf kanehwene. 18Kwetere wəmbəa ŋkɛ ne, cape ka kesaka yitenyɛ le ghəa nci kalə kagwəɗəŋə yitea seɗa ta ŋkɛ, ma ke hɛ shɛ: «Ka mavashia ŋa nza ghen'yɛ.» 19Ama ma ke Zhozɛf zhɛnete nda ke hɛ: «Ghazlənəma yɛ ma. 'Ya nza kaShala na? 20Ndiremi yaɗehwe yɛ kamene ɗa, ama nahe Shala kezhɛrete wəsə kwa ndiremia shɛ kawəsə ganyɛ. Nahe ŋkɛ keɗehwe kambele mpia mbeli kwele kwele kala nya newe nya yɛ ɓeshi. 21Ghazlənəma yɛ gɛ ma, katenewe ghweme 'ya te gheyɛ le ghɛa ŋayɛ.» Laka ghena ganji nyi kala nyi gweɗakwete nda wənə ŋkɛ ke hɛ.

Mte ta Zhozɛf

22Pa yɛ Zhozɛf le mbeli nyi ki ghɛa yitenyɛ nzanji mbe Ɛzhipte. Va gwəmsə ba'a meŋe menete Zhozɛf teghweme. 23Nahe Zhozɛf kenakɛ ŋwalea wəzege ta ŋkɛ Ɛfrayim hwa'a te kwa mahekene ta shi. Ɓiyitsa ne, kwa seɗa ta ŋkɛ kele ŋwalea Makir nya kawəzege ta Manasɛ. 24Te kwete veci, ma ke Zhozɛf sha ka kesaka yitenyɛ: «'Ya katemte, ama katekemane ŋayɛ Shala ya tsemanyɛ ŋkɛ. Katefə ŋayɛ ŋkɛ shave mbe Ɛzhipte kadzete hɛɗi nya meɗeyi nda ŋkɛ le fela ke Abraham, Izak ba'a Zhakob.» 25Kwa sebe ta ŋkɛ, ma ke Zhozɛf sha ŋwalea Israyɛl: «Zemete ɗa mə kafela kezha kele geva ta ɗa se teke kadzeme vəa ŋkwa nya kemanakɛ ŋayɛ Shala.» 26Mtiwə Zhozɛf mbe Ɛzhipte kwa sebe ta va gwəmsə ba'a meŋe. Pa mbeli fikɛ geva ta ŋkɛ le 'wərdə kezha ɗema ŋkɛ kada, kwa sebe ta ŋkɛ, pa mbeli veyi ŋkɛ kwa səndəkwə pelɛ.

Currently Selected:

Gha ta Wəshi 50: BEKDC12

Highlight

Copy