Ka Lɛvi 3
3
Melɛ kejikə ghə
1Ma keɗe wəndə kadzeghe melɛ kejikə ghə le wəsə keseɗa nya wəba ne, pa keseke mca keɗema mbəkwə nya ɗema beze te kase kadzawa kema ta Mahwətə. 2Pa ŋkɛ dapeyi dzeve ta ŋkɛ kwa ghəa wəsə keseɗa shɛ ba'a sleyite ghə yite mɛa ŋkwa kedzembe cɛ lekwesa kebegeme geva. Tagha gɛ, kateyisə mimia ŋkɛ ka dzeghe Shala nyi kaŋwale tezhilia Aron dzeyi vare yɛ bela ta reghwetɛ. 3Wa nyi bela nyi teve nda ba'a nyi tetere nda mbeli ke Mahwətə nyi te wəsə keseɗa shɛ: merege nya dzate te heli ba'a nya kənəa wəshi nyi kwa hwə, 4ghwelese bake nci ba'a merege nya kənəa hɛ, merege nya dzate te yɛ slerepe. Ma bela ta mene nya ganyɛ ne, zlaɓe sla hɛ mbeli le yɛ ghwelese. 5Pa ka dzeghe Shala teremte pɛtɛa wəshia shɛhɛ te reghwetɛ, kanya kwetɛŋe le melɛ kwa tere tere nya te sheghwə nyi mɛa ghwə. Kamelɛ kwa tere tere nya nza zəŋwəa ŋkɛ zeɗehwe nda ke Mahwətə tenza ŋkɛ.
6Ma keɗe wəndə kadzeghe nda melɛ kejikə ghə ke Mahwətə le wəsə keseɗa nya ɓɛhwɛ ne, ŋeza keɗema ŋemalea wəsə nya ɗema beze te yakese ŋkɛ. 7Ma kenza ŋkɛ katəmə ne, pa keseke kase kadzawa kema ta Mahwətə. 8Pa ŋkɛ dapeyi dzeve kwa ghəa ŋkɛ ba'a sleyite ghə yite mɛa cɛ lekwesa kebegeme geva. Tagha gɛ, kateyisə mimia ŋkɛ ŋwale tezhilia Aron dzeyi vare yɛ bela ta reghwetɛ. 9Wa nyi bela nyi nza merege te nyi ve nda mbeli ke Mahwətə te wəsə keseɗa shɛ nyi: pɛtɛa dəŋərə nya slamte mbeli mɛa zezərəa wəmbə, pɛtɛa merege nya dzate te heli ba'a nya kənəa wəshi nyi kwa hwə, 10ghwelese bake nci le merege nya kənəa hɛ ba'a merege nya dzate te slerepe. Ma bela ta mene nya ganyɛ ne, zlaɓe sla hɛ mbeli le yɛ ghwelese. 11Pa nde dzeghe Shala teremte wəshi nyi pɛtɛ te reghwetɛ. Wəsə kezeme nya teremte nda mbeli ke Mahwətə ŋkɛ.
12Ma keɗe wəndə kadzeghe melɛ le kwe ne, pa keleghe kase kadzawa kema ta Mahwətə. 13Pa dapeyi dzeve kwa ghəa ŋkɛ ba'a sleyite ghə yite mɛa cɛ lekwesa kebegeme geva. Tagha gɛ, kateyisə mimia ŋkɛ ŋwale tezhilia Aron dzeyi vare yɛ bela ta reghwetɛ. 14Wa nyi wəshi nyi teve nda ba'a nyi tetere nda mbeli ke Mahwətə nyi te wəsə keseɗa shɛ: pɛtɛa merege nyi dzate te heli ba'a nyi kənəa wəshi kwa hwə, 15ghwelese bake nci le merege nya kənəa hɛ ba'a merege nya dzate te slerepe. Ma bela ta mene nya ganyɛ ne, zlaɓe sla hɛ mbeli le yɛ ghwelese. 16Pa nde dzeghe Shala teremte wəshi nyi pɛtɛ te reghwetɛ. Wəsə kezeme nya teremte nda mbeli ke Mahwətə ba'a nya kezəŋwə nda megela ŋkɛ. Pɛtɛa merege kaŋa Mahwətə. 17Vatse nza ŋkɛ kawəsə mahalegə nya kaghala ghala sha gheyɛ keshi keshi, te yayata ŋkwa nya nza yɛ: katezeme merege, ya mimi yɛ we
Currently Selected:
Ka Lɛvi 3: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.