Ləwke 12

Ya ghə va mbəɗəkwə

(MAT 10.26-27)

1Ma vəa ŋkwa shɛ ne, pa mbeli tsenete geva tipə tipə, te wəndə te wəndə dzeghwa mbeli. Ma ke Yɛsə gezete nda ghena ke mbeli nyi ketəkwə təkwə: «Ya mə ghəa ŋayɛ va tenjɛne ta ka Fariziyɛn, geze ta ŋkɛ va mbəɗəkwəa nci. 2Pɛtɛ tencɛ geva wəshi nyi tewəfərə. Pɛtɛ teɗepe geva zeweve ta ghena nya ɗema mbeli kancɛ. 3Va nya nza ŋkɛ pɛtɛ tefa ghena nya gezete yɛ mbe ŋkwesle mbeli heveci. Ma ghena nya gezete nda yɛ ke wəndə kwa sleme kwa sleme ne, pelɛ dɛɓere nya kənəa cɛ tedzeme mbeli kazlape.

Wəndə nya hi mbeli kaghazlənə ve

(MAT 10.28-31)

4Ma 'ya sha gheyɛ, gheyɛ ka mcɛhɛ ɗa: ghazlənəma yɛ va mbeli nyi kempə ŋkwa ma. Ma kwetere wəmbəa ŋkɛ ne, kazhɛne hɛ menete kwete wəsə we. 5'Ya katencɛ ŋayɛ wəndə nya hi yɛ kaghazlənə ve. Ghazlənə mə va Shala nya nza berete ve kanegha wəndə kadzembe ghwə nya keɗema kakiɗi kwetere wəmbəa mte. Kaganda ne, ma 'ya sha gheyɛ: gheŋkɛ yahi yɛ kaghazlənə ve.

6Ashɛ mcɛfe nta zaghwala mbeli te dala bake wəka? Ndagwara kwete wəndəa nci shɛ kazaghə Shala we. 7Pa le pɛtɛa shintia ghəa ŋayɛ keɓelate geva. Ghazlənəma yɛ ma, za ma yɛ ke zaghwala nyi kwele kwele.»

Negha fete yitea Yɛsə keɗema ɗema ŋkɛ

(MAT 10.32-33; 12.32; 10.19-20)

8Ma 'ya sha gheyɛ: ma yayata wəndə nya kegeze nahe ŋkɛ kenza kande təkwə təkwə ɗa kwa kema ta mbeli ne, kateɗepe 'ya kwa kema ta ka ghwene ta Shala nahe ŋkɛ kenza kawəndəa ɗa. 9Ama yayata wəndə nya keɗepema ɗa kwa kema ta mbeli ne, kateɗepema ŋkɛ 'ya kwa kema ta ka ghwene ta Shala.

10Katekelemte geva ghena kwa ndiremi nyi gezete wəndə te Wəzege ta za te wənə. Ama wəndə nya kegeze ghena kwa ndiremi te Sefəa Shala, katekelemte geva ŋkɛ te wənə we.

11Ma kefəghe ŋayɛ mbeli kalə kadzete kema ta mbeli nyi mbe cɛ kesəkwə ghə, ka meghea kɛfi ba'a mbeli nyi te ghə ne, yirəma yɛ yitea ghena nya tesla yɛ ma. 12Va nya nza ŋkɛ Sefəa Shala nde tencɛ ŋayɛ ghena nya kehite geva kezha geze yɛ.

Ghena keyipə pa te nde mcɛlə nya kagezhi

13Ma ke kwete wəndəa mbeli nyi ketsenete geva sha Yɛsə: «Nde sleke ɗa, geze nda ke wəza meyɛ ɗa kezha neheve wəshi kezeme ghɛ nya sərəakɛ n'yɛ yiteyɛ n'yɛ le 'ya gi!» 14Ma ke Yɛsə na shɛ: «Mcɛ ɗa, wa nde veyi ɗa kawəndə kemeha ghwə ta wəshia ŋayɛ ba'a kande kenehe hɛ wa?» 15Ma ke sha mbeli pɛtɛ: «Ya mə ghəa ŋayɛ va ɗa ntsə yitea wəshi. Ma mpi nya ganyɛ kezha wəndə ne, laka mcɛlə nza wəndə kakemave we.» 16Pa ŋkɛ gezete nda kwete ghena keyipə pa ke hɛ, ma ke: «Pa kwete nde mcɛlə ɗake wəshi kwele kwele te wəve. 17Ma ke mbe ghəa ŋkɛ: Tsema temene 'ya tse wa? Ŋkwa shɛ va 'ya kezha bete wəshia ɗa we. 18Ma ke: Nahe 'ya keɗepe wəsə nya temene 'ya: 'ya kateŋzla yɛ tame ta ɗa, kateŋa nyi jama jama ma 'ya kezha bete ha ta ɗa ba'a kweci wəshia ɗa kwa hɛ. 19Kwa sebe ta ŋkɛ, ma 'ya sha tegeze nda ke ghəa ɗa: Gha ɓiyitsa ne, wəshi kezeme ya va gha gare va kwele kwele. Yawa, zhɛnakɛ mpi, zeme, sa wəsə, behekɛ ghəa ŋa. 20Ama ma ke Shala shɛ: Wəndə nya kagezhi na! Ɓəshi heviɗi nya tekele mpia ŋa 'ya. Ke wa tenza wəshi nyi tsenete nda nyi na ke ghəa ŋa gɛ wa?» 21Ma ke Yɛsə mtsehete: «Tsetse temene nda geva ŋkɛ ke wəndə nya ketsene wəshi kwele kwele kezha ghəa ŋkɛ, kenza wəndəa shɛ kande galɛpi kwa kema ta Shala we.»

Ve nda ghə ke Shala

(MAT 6.25-34)

22Ma ke Yɛsə gezete nda ke mbeli nyi ketəkwə təkwə: «Mba yɛ keheha yitea wəshi kezeme ta ŋayɛ ba'a wəshi nyi ɗe yɛ kezha nza ta ŋayɛ, lekwesa nyi teseɗe yɛ. 23Kwa nza ŋkɛ za ma mpi ke wəsə kezeme, za ma geva ke lekwesa. 24Newe mə yɛ ghame, katsawe wəshi kezeme hɛ we, kamene wəshi hɛ se te wəve we. Dɛdimə ba'a tame va hɛ we, ama Shala nde zeme nda wəshi kezeme ke hɛ. Ŋkwini zhigə nza zləvəa ŋayɛ za ma ke 'yɛ wa? 25Wa wəndə nya kenza kambakete hɛa ŋkɛ hwa gheyɛ laka heha ta ŋkɛ wa? 26Ma shaŋe yɛ va wəsə nya ɓɛhwɛ ne, yitea wa heha yɛ yitea kweci wəshi wa? 27Newe ma mə nza ta ghwə ta wəfe nya hwa gamba, kamene slene hɛ we, katsa lekwesa hɛ we. Ma 'ya sha gheyɛ: ya Salomon mbe zləvəa ŋkɛ ne, kegha ŋkɛ kaseɗete lekwesa nyi ganji ganji ma ke ghwə ta wəfea shɛhɛ we. 28Mbe seɗe nda lekwesa Shala ke gwəzə nya kenza megela ɓeshi, hendɛ mbe ghwə ŋkɛ, kateseɗe ŋayɛ lekwesa ŋkɛ za ma ke hɛ wəka? Dewə yɛ va gheyɛ deŋwa. 29Ama gheyɛ ne, mba yɛ kedambeghə kazele wəsə nya tezeme yɛ ba'a wəsə nya tesa yɛ. 30Wəshi nyi pɛtɛ ne, ghenci yazele kweci hwelefefi. Ama gheyɛ ne, nahe Yiteyɛ ŋayɛ keɗepe kaɗe wəshia shɛhɛ yɛ. 31Zelete mə ghena ta Meghea Shala ɓetəkə, kateve pɛtɛa wəshi nyi ketene Shala kadzeghə.

Mcɛlə nya pelɛ ghweme

(MAT 6.19-21)

32Wəvəsə timɛti, ghazlənəma yɛ ma! Nahe Shala keɗehwe Meghea ŋkɛ kave ŋayɛ. 33Pamte mə wəshia ŋayɛ, ndeke nda mə ke ka titikwəa kɛfi. Wəfərə mə wəshia ŋayɛ kwa slibə nya keɗema kahale, tsenete mə mcɛləa ŋayɛ pelɛ ghweme, ŋkwa nya ɗema hɛ kaza tɛape pelɛ. Katekekave hɛ ka ghərəa kɛfi we, katezeme hɛ lema we. 34Kwa nza ŋkɛ te ŋkwa nya nza yɛ mcɛləa ŋayɛ tenza mehele ta ŋayɛ shanda.

Ka mavashi nyi ɗeke ɗeke

35Nza mə ɗeke ɗeke, nza mə le hwə tehwepe, mba yɛ kepesle ghwə kwa paterela ta ŋayɛ. 36Nza mə kala mbeli nyi keneghe se ta nde sleke hɛ nya kezhɛne geva se yitea veghe. Ma kese ŋkɛ ba'a kemɛ ŋkɛ kwa degha ne, kateghwene nda ŋkwa hɛ kahe kahe. 37Zlama ya va ka mavashia shɛhɛ, kesləyi hɛ nde sleke hɛ kezhɛneke geva ɗeke ɗeke. Kaganda ne, ma 'ya sha gheyɛ: kateseɗe lekwesa slene mazea shɛ, kategeze nda ŋkɛ ke hɛ kantishɛ yitea ɗafa ba'a kateve nda wəsə kezeme ŋkɛ ke hɛ. 38Ma kese nde sleke hɛ pəkwə veci keɗema te tepe ta viɗi mba hɛ ɗeke ɗeke ne, zlama ya va hɛ. 39Ɗepete ghena nya megela: ma ya nahe wəndə ke ghɛ keɗepe və nya tese ghərə kwa ne, nza katepele ghərəa shɛ ŋkɛ kadzeki ghɛa ŋkɛ we. 40Nza mə ɗeke ɗeke, gheyɛ perə, kwa nza ŋkɛ vəa ŋkwa nya zəzəma yɛ tese Wəzege ta za.»

Mava nya dɛŋe dɛŋe te slene ta ŋkɛ

(MAT 24.45-51)

41Ma ke Piyɛre shɛ: «Nde sleke ŋkwa, kezha ghen'yɛ geze ghena keyipə pa nya na tse na, na kezha mbeli pɛtɛ na?» 42Ma ke Nde sleke ŋkwa shɛ: «Wa sləa mava nya kedɛŋe dɛŋe te slene ta ŋkɛ, nya kentsehwele ntsehwele nya veyi nde sleke ŋkɛ kezha newe ghweme te ghɛa ŋkɛ ba'a kezha ve wəsə kezeme ta nci ke kweci ka mavashi te və nya kehi wa? 43Zlama ya va mava shɛ kesləyi ŋkɛ nde sleke ŋkɛ mbe mpa le slene. 44Kaganda ne, ma 'ya sha gheyɛ: katedape nda pɛtɛa wəshia ŋkɛ nde sleke ŋkɛ te dzeve. 45Ma kezəzəte mava mbe ghəa ŋkɛ: Nahe nde sleke ɗa kedera kese, kampə kweci ka mavashi ŋkɛ, yɛ zhili le mi, kaŋwafe wəshi ŋkɛ, kasa wəshi ŋkɛ, kaghwəyi ŋkɛ. 46Vəkə tese nde sleke ŋkɛ te veci nya neghema ŋkɛ, le və nya ɗepema ŋkɛ. Kateŋkamte wəndə nyagha ŋkɛ, katenegha ŋkɛ hwa mbeli nyi keɗema kayɛ ghena.

47Ama mava nya keɗepe wəsə nya ɗe nde sleke ŋkɛ nda ɗema ŋkɛ kemenete kala nyagha shɛ ne, kwele kwele tenza ŋa ŋkɛ ghweɗa. 48Ama mava nya keɗepema wəsə nya ɗe nde sleke ŋkɛ, nda menete zlere ŋkɛ wərə ɗa ne, ɓɛhwɛ teɗa ŋkɛ mbeli. Yayata wəndə nya ndeke nda wəshi mbeli kwele kwele, kwele kwele te'yɛwe mbeli ve. Wəndə nya ndeke nda wəshi mbeli kwele kwele kaya ne, za ma ke nyagha te'yɛwe mbeli ve.

Nehe ta mbeli tewəmbəreke Yɛsə

(MAT 10.34-36)

49Nahe 'ya kese kezha ghwə te hɛɗi. Zlahe ɗe 'ya kanza ŋkɛ ketse tse. 50Nda 'ya kakemave batɛme, kwele kwele zhɛ ɗa wənəa ɗa kwa nakama ŋkɛ kamenete geva. 51Ma zəzə yɛ ne, kwelɛŋe yakeleke 'ya kadzete hɛɗi na? Ewə, 'ya sha gheyɛ, ama nehe ta mbeli. 52Tsetsenya ne, katenza mbeli nyi mcɛfe ki ghɛ kenehe nehe, mahekene kampa le mbeli nyi bake ba'a mbeli nyi bake kampa le nyi mahekene. 53Katenehe geva yɛ yita le wəzege ta ŋkɛ. Katenehe geva yɛ ma le wəzha ta nta, katenehe geva yɛ meghekɛa za le makwa ta nta.»

Fa ta wəshi nyi kencɛ yɛ və

(MAT 16.2-3)

54Ma ke Yɛsə sha mbeli nyi ketsenete geva kwele kwele ɓiyitsa: «Ma vəa ŋkwa nya nakɛ ləmbə yɛ kase laka ŋkwa nya pəkwə veci, katese va, pe yɛ sha geze taghanyɛ. Tsagha shɛ ŋkɛ menete geva deŋwa. 55Ma kevɛke geva sefə se mbe bela kwa zeme ne, hwələ nde temene geva, pe yɛ sha geze, tsagha shɛ ŋkɛ menete geva. 56Ka mbəɗəkwəa kɛfi! Nahe yɛ keɗepe nza ta yɛ hɛɗi le ghweme. Ama wəshi nyi kencɛ wəshi nyi kemene geva tsetsenya, tsema ɗepema hɛ yɛ wa?

Zelete hweŋkwa ketseɓa ghena le wəndə kempa ta ŋa

(MAT 5.25-26)

57Va wa ɗema yɛ kameha ghwə tiɗiɗi le ghəa ŋayɛ wa? 58Ma kenza na te ghwə le wəndə ne, tseɓate ghena shɛ kahe kahe le wəndəa shɛ vəa ŋkwa nya nza yɛ kwa hweŋkwa, yagha ŋkɛ tendeke nda ŋa ke nde meha ghwə, yagha nde meha ghwə tendeke nda ŋa ke ka sewajɛ ba'a yagha mbeli teveyi ŋa kwa daŋgayɛ. 59Kaganda ne, ma 'ya sha gha: katesame na kwa keɗema na keŋkimte pɛtɛa dewa nya hwa gha we.»

Currently Selected:

Ləwke 12: BEKDC12

Highlight

Copy