Kadadiam 24
24
Kakebaineanna Ishak
24:1-67
1Pissananna matua punalai Abraham anna puham natamba' DEBATA illaam mentu' salu katuboanna, 2iya ma'kadam lako indo sabua'na handam matua, to si ullima'ianni kullena, naua: <<Anda'i ahena too' apangku, 3aka la ma'dandiko dio olona Puang Allataala DEBATAnta To ungkuasai langi' anna lino, aka tä'ko la mualaam Ishak änä'ku baine illaam inde Kanaan, botto kuongei. 4Sapo' la lu lakoko botto kadadiangku umpeänganni baine peänäsanna solasubungku.>>
5Iya mekutanam indo sabua'na naua: <<Indo ke mokai indo baine la umpellei banuanna natuhu'ä' sule eta inde botto muongei? Iya la mala haka kubaba Ishak lako botto kadadiammu?>>
6Sapo' natimba' Abraham naua: <<Jagako! Deem ai la umpasola änä'ku lako! 7Puang Allataala DEBATAnta to ungkuasai langi', puhaä' natässu'i illaam mai banuanna ambeku sola botto kadadiangku. Anna puhaä' napa'tula'i anna ma'dandi naua: <Inde pa'bottoam la kubeem pessubummu.> DEBATA hi too la ussua malaika'na muyoloangangko anna malai ullambisam baine änä'ku.
8Sapo' maka' indo hi baine moka untuhu'ko, iya lappa'ungko iko dio mai inde pa'dandimmu lako kaleku. Anggam ia tä' si'da-si'da ia pole' mala la umbabako änä'ku lako.>>
9Iya muanda'im too' apanna Abraham indo sabua'na anna ma'dandii, la natuhu' asam ingganna indo nasuaam.
10Iya mualam sapulo untana puäna indo sabua'na sola ma'hupa-hupa baham-baham keangga' anna le'ba'i lako Nahor mesa kota dio lembäna Aram-Mesopotamia. 11Landa'i, iya napatohhom indo unta dio sulibanna kota ma'päsä dio ampe' bujum aka kahubemmi, anna biasa wattunnam si lao tumimba baine.
12Mane mengkaalai längäm DEBATA naua: <<O Puang Allataala DEBATA to napenombai puäku Abraham, pasule lakoannä' pattujungku allo temo. Pa'patandanni pa'kamase tamaleleMu lako puäku Abraham. 13Indemä' ampe' bujum ke'de' anna la suleim too änä' daha issinna inde kota la tumimba. 14Kela mala anna dadii susi indee: maka' ma'kadaä' kuua: <O änä' daha, kamaseiä', beennä' itim uwaimmu la kuihu',> anna natimba'i naua: <Io, ihu'i. Moi untamu la kupaihu' toi.> Iya la iam too umpoelo' la napobaine sabua'mu Ishak. Anna la kuissammi too kuua Iko umpa'patandaam pa'kamase tamaleleMu lako puäku.>>
15Tä'pi teppu' tula'na, iya sule siaham mesa änä' daha ussompo timbaanna isanga Ribka, änä'na Betuel. Indo Betuel änä'na Milka nasibalii Nahor, solasubunna Abraham. 16Indo änä' daha tä' deem pada samapia anna tä'pi deem lako muane. Iya le'ba'um dokko indo ba'ba bujum anna umpangngissii timbaanna, mane ma'pasulei dio mai sule.
17Iya lumumpa' siaham indo sabua' napellambi'i anna nauaanni: <<Kamaseiä' beennä' saidi' itim uwai illaam timbaammu la kuihu'.>>
18-19Natimba'im naua: <<Io puäku.>> Tappa napatuhum siaham anna nabeenni naihu' mane nauai: <<La kutimbaam duka' uwai inde mai untamu anna dipasanta'i naihu'.>> 20Mane natolanni indo timbanna dokko pahabam anna lumumpa' polei lao tumimba, aka la napaihu' asam indo untana sabua'na Abraham. 21Iya mengkamma'um indo sabua' napetua'-tua' aka la napengngissanni battu la napasule lako si'da hi DEBATA battu la tä' di indo nalaoi.
22Tappana puha asanni mangngihu' indo unta, naalaammi indo sabua' antim-antim mesa sola ponto sapasam sangngim bulabam täsä', (la'bi lima gram mabanda'na indo antim-antim anna la'bi sahatu' gram mabanda'na indo ponto). 23Anna mekutanai naua: <<Tulasannä'! Mennako keänä'? Deem daka la kiongei dio banuanna ambemu aka la ma'bengikam?>>
24Iya natimba'im naua: <<Isanga ambeku Betuel änä'na Milka nasibalii Nahor. 25Anna dio banua deem ongeam la malaa' muongei anna buda toi dalame la napa'päsäi untamu sola humpu' la naande.>>
26Tappa ma'balinguntu' siaham indo tau umpuji sanganna DEBATA 27naua: <<Kupa'kasallei sangammu Puang Allataala DEBATA to napenombai puäku Abraham. Aka tontä liu pa'kamase tamaleleMu anna kamanontongamMu lako puäku, lambi' untetteä' lako banuanna solasubunna.>>
28Iya lumumpa' siaham indo änä' daha lako banuanna anna natula' asanni ingganna indo kaha-kaha ia too. 29-30Nahingnginna Laban änä' muanena Ribka tula'na indo tau napalanda' Ribka, anna naita toi indo antim-antim sola ponto napake, tappa le'ba' siaham lumumpa' umpellambi'i indo tau lako ampe' bujum. Iya nalambi'um tontäpi ke'de'-ke'de' dio ampe' untana sikahuku' bujum. 31Napa'kadaim naua: <<O to natamba' DEBATA, daa muindea' sulibam, maikoa' talulako banua aka dipatokaammokoa' ongeam anna ongeanna untamu dio!>>
32Iya le'ba'im tama banua indo tau. Naleppa'iammi Laban teke'na indo untana anna mane naalaanni dalame la napetindoi untana sola kinande la napandeam. Puhai ia too, nababaammi sule uwai nabaseiam bitti'na indo sabua'na Abraham sola solana. 33Tappana dibabaanni sule kinande, ma'kadam indo tau naua: <<Tä'pä' la mangngande ke tä'pi puha kupalanda' inde tula' kubaba.>> Natimba'im Laban naua: <<Iya maka' deem kada la umpalambi', iya pa'tula'ungko.>>
34Iya ma'kadam naua: <<Kao-kao sabua'naä' Abraham. 35Tä' deem pada sanatamba' DEBATA indo Abraham lambi' sugi' si'da-si'da. Aka nabeem buda domba, sapim, bulabam, peha', sabua' baine anna muane, unta anna keledai. 36Anna Sara bainena indo puäku, moi anna matuam sapo' malapi keänä' mesa muane. Anna ingganna kullena indo puäku puha asammi nabeho lako änä'na. 37Indo puäku puhaä' napopa'dandi naua: <Tä'ko la mualaam baine Ishak änä'ku illaam inde Kanaan, botto kuongei. 38Sapo' la lu lakoko kasahapuanna ambeku umpeänganni baine peänäsanna solasubungku.>
39Iya kutimba'um kuua: <Maaka susi ke mokai sule indo baine?> 40Nauaammä': <DEBATA to kutuhu'i, la ussua malaika'na la umpasolaiko anna mala sule lako pa'laoammu anna malai ullambisam baine inde änä'ku, peänäsanna ambeku. 41Iapi mane lappa'i pa'dandimmu dio oloku ke le'ba'ungko lako kasahapuangku. Moi anna tä'ko la nabeem baine, sapo' la lappa'ungko dio mai indo pa'dandimmu.>
42Iya ingngena' suleku dio sa'dena indo bujum, ma'sambajammä' kuua: <O Puang Allataala DEBATA to napenombai puäku Abraham, kela mala Iko la umpasule lakoi inde to kulingkai tentomai illaam pa'laoangku. 43Indemä' ampe' bujum ke'de'-ke'de', kela mala anna dadii susi indee: Maka' deem mesa änä' daha sule tumimba, anna kuuaanni: <<Kamaseiä' beennä' itim uwaimmu saidi' la kuihu',>> 44anna natimba'i naua: <<Io, ihu'i. Moi la naihu'na untamu la kutimbaampi duka'.>> Iya la iam too umpoelo' la napobaine änä'na puäku.>
45Tä'pi teppu' indo ma'sambajannä' illaam penabangku, iya sule siaham Ribka ussompo timbaanna anna le'ba'i dokko bujum tumimba. Kuuaammi: <Kamaseiä' beennä' kuihu'.> 46Tappa napatuhum siaham yabo mai palempenna indo timbaanna anna nauai: <Ihu'ko, moi untamu la kupaihu' toi.> Iya kuihu'um anna napaihu'pi duka' untaku.
47Puhai, kuuaammi: <Mennako keänä'?> Natimba'um naua: <Isanga ambeku Betuel änä'na Nahor nasibalii Milka.> Iya kupadekkesammi antim-antim dio illäna anna mane kupapontoi. 48Mane ma'balinguntu'ä' umpuji anna umpa'kasallei sanganna Puang Allataala DEBATA to napenombai puäku Abraham. Aka natetteä' illaam inde pa'laoangku umpeä baine pessubunna solasubunna puäku la napobaine änä'na. 49Dadi temo, tulasannä' la ungkamasei haka indo puäku anna untuhu'i pa'elo'na la tä' daka, anna kuissanni menggihi' senga'.>>
50Iya natimba'im Laban sola Betuel naua: <<Inde kaha-kaha buttu yabo mai DEBATA, tä'um kami' kiissam la kisangai pole. 51Petua'i, diom olomu Ribka, pasolam too lao anna mala napobaine änä'na puämu, umba susi kadanna DEBATA.>>
52Nahingnginna sabua'na Abraham indo tula'na, tappa muoppä umpenombai DEBATA. 53Mane mualai poheba bulabam sola peha' anna poheba sampim nabeem lako Ribka. Anna deempi duka' lako indona anna Laban. 54Puhai ia too, mangngandeim anna muihu'i indo sabua' sola ingganna solana. Iya ma'bengiim eta.
Mebengngi'i bangonnim anna ma'kadai indo sabua' naua: <<La ma'pasulengkam lako puäku.>>
55Sapo' natimba' Laban sola indona naua: <<Tä'pi tappa la umpasolaa' lao, la indepakia' moi podo si sapulom benginna mane le'ba'koa'.>> 56Iya natimba'um naua: <<Tä'unna' la ullabai, aka napasule lakom DEBATA inde pa'laoangku. Dadi lappasammä' anna malaä' ma'pasule lako puäku.>> 57Iya nauam: <<Mapia ke tatambaiia' Ribka anna iai dipopa'elo'.>> 58Iya untambaim Ribka anna nakutanai naua: <<La maelo'ungko le'ba' sola inde tau?>> Natimba'um naua: <<Io, maelo'ä'.>>
59Iya le'ba'um Ribka sola indo to si untahinanai mengkalao bahinni'na sola indo sabua'na Abraham anna solana. 60Iya napa'lambeammi solasubunna Ribka naua:
<<O Ribka la buda hi too pessubummu la massa'bu-sa'bu anna la makkatalo-talo aka la ia umpangngissi bottona ingganna balinna.>>
61Iya ma'kalili'um Ribka sola ingganna sabua'na baine anna mengkalaoi ussäkei unta le'ba' untuhu' indo tau. Susim too inde anna le'ba'i Ribka napasola sabua'na Abraham.
62Siampu' eta too, sule Ishak buttu dio mai bujum Lahai-Roi aka tohho dioi lembäna Negeb. 63Pissananna kahubenni messubummi Ishak anna kalao-laoi lako pa'kambisam. Pissananna ma'pahandammi lao, iya muitam unta sule ma'tuhu'-tuhu'. 64Siampu' eta too mennenne' lao Ribka, iya muitam Ishak. Tappa tuhum siaham yabo mai untana 65anna mekutanai lako sabua'na Abraham naua: <<Menna dipe muane umpenandaikia' dipe mai?>> Iya natimba'im naua: <<Iam too indo puäku.>> Iya muala siaham lullunna Ribka anna napa'lullunni umbalu-balui lindona.
66Pissananna silambi'i, iya umpa'tulasammi Ishak indo sabua' ingganna pa'palakoanna illaam pa'laoanna. 67Iya untettem Ribka Ishak anna napasolai tama kemana Sara indona Ishak, anna napobainei. Umpohäe si'da-si'da Ribka indo Ishak, iya tipakahangam pole' pi'di' penabanna, indo puha mate indona.
Currently Selected:
Kadadiam 24: BMB
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
