GÉNESIS 13
13
Lothuan, Abrahamhuan shicanyashcatami villajun
1Abramga, Egiptomandaca paipaj huarmitapash, tucui imata pai charishcatapash apashpami, Neguev llactaman vichai rijurca. Lotpashmi paihuan rijurca. 2Abramga, animaltapash, culquitapash, orotapash, ninandapachami charirca. 3Abramga, Neguev llactamandaca asha asha rishpami, Bet-el shuti pueblo ladoman chayagrirca. Paica, Bet-el shuti, Hai shuti pueblocunahuan chaupipi, paipaj carpa punda tiajushca pushtumanllatami tigrarca. 4Altarta punda rurashca pushtumanllatami tigrarca. Chaipimi Abramga, Mandaj Diospaj shutipi mañajurca.
5Abramhuan purijuj Lotpashmi, llamacunata, huarmi huagracunata, carpacunata charirca. 6Ishcandi causangapaca, alpaca ña na pactarcachu. Paicunapaj ashtaca animalcuna tiashcamandami, chai alpapillata causaitaca na ushanajurca. 7Chaimandami, Abrambaj animalcunata michijcunahuan, Lot runapaj animalcunata michijcunahuan fiñanajushpa rimarinajurca. Chai llactapica, cananeo nishca, ferezeo nishca gentecunapashmi causanajurca. 8Shinamandami Abramga, Lottaca cashna nirca: “Ñucanchi ishcandica, familia purami canchi. Chaimandami ñucanchica, na fiñanajuna canchi. Shinallata ñuca michijcunahuan, cambaj michijcunahuambash na fiñanajunachu. 9¿Nachu cai tucui alpacunaca, cambaj ñaupajpi? Shinamandami, candaca ñuca ladomanda anchuripai nipani. Can lluqui ladoman rijpica, ñucaca ali ladomanmi risha. Can ali ladoman rijpica, ñucaca lluqui ladomanmi risha” nircami.
10Shina nijpi Lot vichai ricushpaca, Jordán yacu ladopi tiaj tucui pugru pambacunatami ricurca. Tucuilla chai pambacunaca, Mandaj Dios churashca huertashna, Zoar shuti pueblo chimba purapi tiaj Egipto llactashna, yacu jicharijuj pambacunashnami carca. Chai pambacunaca, Sodoma shuti, Gomorra shuti pueblocunata, Mandaj Dios nara tucuchijpimi, chashna juyaillagu carca. 11Shina cajpimi Lotca, Jordán yacu ladopi tiaj tucuilla pugru pambata, paipaj cachun agllarca. Chashnami Lotca, indi llujshimuj ladoman rishpa caishujmanda, chaishujmanda shicanyarinajurca. 12Abramga, Canaán llactapimi carpacunata shayachishpa causajurca. Lotca, pugru pambapi tiaj pueblocunapi causajushpami, paipaj carpacunataca, Sodoma pueblo ladocaman shayachijurca. 13Ashtahuangarin Sodoma pueblopi causajcunaca, nalicuna cashpa juchatalla rurajcuna cashpami, Mandaj Diostaca ninanda fiñachinajurca.
14Mandaj Diosca, shicanyashpa Lot rishca jipami, Abramdaca cashna nirca: “Cunan can maipi shayajungui, chai pushtumandaca jahua ladomambash, ura ladomambash, indi llujshimuj ladomambash, indi huashajuj ladomambash vichai ricui. 15Can ricujungui, chai tucui alpataca canman, cambaj miraicunamambashmi, tucui causaipaj carasha. 16Cambaj miraicunataca, ñutu alpatashnami mirachisha. Ñutu alpata maijambash cuentai ushashpaca, cambaj miraicunatapashmi cuentanga. 17Jatarishpa, chai llactataca largomambash, anchomambash purishpa ricugri. Chai llactataca, canmanmi carasha” nircami.
18Shina nijpimi Abramga, paipaj carpata anchuchishpa, encina nishca quirucuna shayanajuj Mamre shuti pambapi causaj shamurca. Chai Mamre shuti pambaca, Hebrón pueblo ladomanmi carca. Chaipimi, Mandaj Diosman altarta rurarca.
Currently Selected:
GÉNESIS 13: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
