LUCAS 16
16
Na cazuj mayordomohuan chimbapurashpa parlashcami
1Jesusca, paipaj yachajujcunamambashmi, cashna nijurca: “Shuj charij charij amomi, shuj mayordomota charirca. Chai amomanmi: ‘Chai mayordomoca, can imata charishcatapash yangatami tucuchijun’ nishpa villagrirca. 2Chaimandami amoca, mayordomota cayashpa cashna nirca: ‘Candaca, ¿imata rurashca purijujtata uyani? Cunanga, can mayordomo cashpa, imata rurashcatapash tucuita villahuailla. Canga, mayordomo caitaca na ashtahuan ushanguichu’ nircami. 3Shina nijpimi mayordomoca, paipaj shungupilla cashna yajurca: ‘Ñucataca, ama ashtahuan mayordomo cachunmi, amoca llujchigrihuan. Alpata allashpa causaitapash, na ushanachu cani. Mañashpa puringapacarin pinganayanmi. 4Mayordomo canamanda ñucata llujchijpi cumbacunapaj huasipi chasquihuachun, imata ruranata ñami yachani’ yajurcami. 5Shina yajushpami, amoman divi tucushca tucui runacunata cayarca. Punda chayamuj runataca, cashna nishpami tapurca: ‘¿Mashnatata ñuca amoman tigrachina cungui?’ nircami. 6Shina nijpimi paica: ‘Patsaj barril aceitetami, nara tigrachipani’ nirca. Shina nijpimi mayordomoca, cashna nirca: ‘Can tigrachinata villajuj escribishcata japishpa, ucha tiarishpa, picha chungatalla escribishpa churai’ nircami. 7Chai jipami, cutin shuj runata tapurca: ‘Canga, ¿mashnatata tigrachina cungui?’ nircami. Shina nijpica: ‘Patsaj quintal trigotami, nara tigrachipani’ nirca. Shina nijipimi mayordomoca, cashna nirca: ‘Can tigrachinata villajuj escribishcata japishpa, ucha tiarishpa, pusaj chungatalla escribishpa churai’ nircami. 8Chai nali mayordomotaca, alipacha yarishpa chashna rurashcamandami, amoca alicachirca. Chashnami, cai pachapajtalla rurashpa causajcunara, michapaj huahuacunatapash yali, paicuna puralla alipacha yarishpa imatapash ruranata yachan. 9Cangunataca cashnami nini: Imatapash cashcatapacha na rurashpa charishca culquitaca, shujcuna cangunapaj ali cumba tucuchunmi, carana canguichi. Chai culquita ña tucuchijpica, causaita causachun jahua pachapi cangunata chasquichunmi, chashna rurana canguichi. 10Ashagutalla charishpapash, aliguta pactachij runaca, ashtacata charishpacarin, ashtahuanmi aliguta pactachin. Shinallata ashatalla charishpapash, imatapash cashcatapacha na ruraj runaca, ashtacata charishpapash, na imatapash cashcatapacha ruranllu. 11Imatapash cashcatapacha na rurashca culquihuambash, Taita Diosta na cazujpicarin, paipaj na llullaj Shimitacarin, ¿maitata mingangayari? 12Shujcuna mingashcata na cazushpa na rurajpica, ¿maitata cangunaman mingangapaj charijushcataca cungayari?
13Maijan servijpash ishcai amota servitaca, na ushanllu. Ishcai amota servijushpaca, shujtaca na ricunayachishpa, shujtallami juyanga. Na cashpaca, shuj amotalla cazushpami, shujtaca yangapi churashpa puringa. Shinallatami cangunaca, Taita Diostapash, imata charishcacunatapash, ishcandita servitaca na ushanguichi” nijurcami.
14Jesús chashna nijujtaca, fariseocunapash uyanajurcami. Paicunaca, charijyanatalla munajcuna cashpami, Jesustaca asishpa ricunajurca. 15Shinamandami Jesusca, cashna nirca: “Cangunaca, cangunallatami imatapash cashcatapacha rurajcunashna, gentecunapaj ñaupajpi ricuringuichi. Ashtahuangarin Taita Diosca, cangunapaj shunguta yachanmi. Gentecuna ninanda alicachishpa ricushcacunaca, Taita Diospaj ñaupajpica millanayaipachami.
Mandashca shimicunamandapash, Taita Dios mandajujmandapashmi villajun
16Mandashca shimicunapash, Dios ima nishcata villajcuna villashca shimicunapash, Bautizaj Juan shamungacamanllami carca. Chai jipamandaca, Taita Dios mandajujmandami villanajun. Shinamandami Taita Dios mandajujpi causangapaj, tucuicuna yaicungapaj munanajun. 17Ashtahuangarin mandashca shimicunamanda shuj tildellapash anchuringapaj randica, jahua pachapash cai pachapash tucurishpami ashtahuan ali canman.
Cazarashpaca, napacha jichunachu nishpami Jesusca yachachishca
(Mat. 19:1-12; Mar. 10:1-12)
18Maijan runapash, paipaj huarmita jichushpa, shujhuan cazarashpaca, huainayashpami causajun. Shinallata cusa jichushca huarmihuan pipash cazarashpaca, huainayashpallatami causajun.
Charij runamandapash, Lázaro runamandapashmi villajun
19Shuj ninan charij runami tiarca. Chai runaca, yana puca telahuan ashtahuan ali lino puchahuan rurashca churajunatami churajun carca. Shinallata punllandimi ninanda cushijushpa, jatun micuita ruran carca. 20Mañashpa causaj Lázaro shuti runagupashmi tiarca. Paica carachahuan ismujushpami, chai charij runapaj huasi pungupilla sirijurca. 21Paica, chai charij runa micushpa jichashcatami, micungapaj ninanda munashpa causajurca. Paitaca, alcucuna shamushpami, carachacunataca lambinajun carca. 22Mañashpa causaj chai runagu huañujpimi, cashna tucurca: Pai huañujpica, paipaj almagutaca, ñaupa taita Abrahambaj migllagupi tiajuchunmi angelcuna aparca. Shinallata chai charij runapash huañushpami, pambai tucurca. 23Paica, Hades nishcapi ninan llaquita apajushpami, vichai ricurca. Paica, taita Abrahamdaca carumandami ricurca. Shinallata Lázaro runagutapash, taita Abrahambaj migllagupi tiajujtami ricurca. 24Shina ricushpami, chai charij runaca, cashna nishpa caparirca: ‘Taita Abraham, ñucataca llaquihuayari. Lázaro runagutaca, paipaj dedota yacupi mutiyachishpa, ñuca jallupillapash chiriyachij shamuchun cachamupairi. Cai ninapica, ninan llaquitamari apajuni’ nijurcami. 25Ashtahuangarin Abrahamga, cashnami nirca: ‘Huahua, can causajushpa alicunata chasquijushcata yaringui. Lázaro runaguca, llaquinayaitami causajurca. Ashtahuangarin paica, caipica ninandami cushichi tucujun. Canga, ninan llaquitami apajungui. 26Tucui chashna cashca jahuapash ñucanchihuan, cangunahuan chaupipimi shuj jatun huaicu tiajun. Shinamandami, caimanda cangunapajman yalingapaj munashpapash, napacha ushana. Shinallatami, chaimanda caiman yalimuitapash napacha ushanllu’ nijurcami. 27Shina nijpimi, chai charij runaca, cashna nirca: ‘Taita Abraham. Lázaro runagutaca, ñuca taitapaj huasiman cachapai nipanimi. 28Ñucaca, picha huauquicunatami charin. Paicunapash ama cai ninan llaqui pushtuman shamuchun, paicunaman villachun cachapai’ nircami. 29Shina nijpimi Abrahamga, cashna nirca: ‘Moisés mandashcatapash, Dios ima nishcata villajcuna villashcatapash, paicunallata charinmi. Paicuna imata nijujta uyachun’ nircami. 30Shina nijpimi, chai charij runaca, cashna nirca: ‘Na, taita Abraham. Ashtahuangarin huañushcacunapaj chaupimanda maijambash causarishpa paicunaman villagrijpimi, ninanda llaquirishpa Diospajman tigraringa’ nircami. 31Ashtahuangarin Abrahamga, cashnami nirca: ‘Moisés mandashcatapash, Dios ima nishcata villajcuna villashcatapash na cazushpaca, huañushcacunapaj chaupimanda causarishpa, villangapaj rijpipash, na cringachu’ nircami” nishpami villajurca.
Currently Selected:
LUCAS 16: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
