LUCAS 22
22
Jesusta japishpa, huañuchingapajmi parlarinajushca
(Mat. 26:1-5,14-16; Mar. 14:1-2,10-11; Juan 11:45-53)
1Levadura illaj tandata micuna pascua fiesta punllami, ña chayamujurca. 2Curacunata mandajcunapash, mandashca shimita yachachijcunapash, gentecuna fiñanata manllashpami, Jesusta imashna japishpa huañuchinata parlarinajurca. 3Iscariote nishca Judas shuti runapaj shungumanmi, Satanasca ñapash yaicura. Chai runaca, Jesuspaj chunga ishcai yachajuj purami carca. 4Paimi, curacunata mandajcunapajman, Diospaj huasita cuidajcunata mandajcunapajman rirca. Shina rishpami, paicunaman Jesusta imashna japichinatapash parlajurca. 5Chashna parlajpimi ninanda cushijushpa: “Canmanga, culquiguta cupashunllami” ninajurca. 6Shina nijpica ari nishpami, gentecunamanda huashalla, imashna Jesusta japichinata yariashpa, Judas runaca purijurca.
Apunchi Jesusca, pai huañunata yarishpa micuchunmi callarichishca
(Mat. 26:17-29; Mar. 14:12-25; Juan 13:21-30; 1 Cor. 11:23-26)
7Levadura illaj tandata micuna fiesta punllami chayarca. Chai punllapica, pascua punllata yarishpa llamaguta huañuchinapachami carca. 8Chai punllapimi:
—Pascua punllapi micungapaj alichigrichi— nishpa Jesusca, Pedrotapash, Juandapash cacharca.
9Shina cachajpimi:
—Pascua punllapi micungapaca, ¿maipita alichinajuchun munangui?— nishpa Jesustaca tapunajurca.
10Shina tapujpimi Jesusca, paicunata cashna nijurca:
—Ricuichi. Jerusalén puebloman canguna chayanajushpaca, yacu funduta aparishca shuj runagutami tuparinguichi. Chai runaguta catishpa, pai maijan huasiman yaicujpipash, yaicunguichilla. 11Chai huasiyu dueñotaca, cashna ninguichi: Ñucanchita Yachachijmi: ‘Pascua punllapi micunataca, ¿maijan ucupita ñuca yachajujcunandi micupashun?’ nishpa cachamupan ninguichi. 12Shina nijpimi, chai huasiyu dueñoca, jahua altibajopi ña alichishcalla, shuj jatun ucuta cangunaman ricuchinga. Chai ucupica, ñucanchi micungapaj alichinguichilla— nishpami cacharca.
13Paicuna rishpaca, Jesús imashna nishcashnami tarigrirca. Chai huasi ucupimi, pascua punllapi micunataca alichinajurca. 14Ña micuna horas chayajpica, paimanda villajcunandimi, Jesusca micungapaj tiarirca. 15Chaipimi Jesusca, cashna nirca:
—¡Nara ñuca llaquichi tucushpallata, cai pascua punllapi cangunahuan micungapaca, ninandapachami munarcani! 16Cangunataca, cashnami nini: Cai micunagutaca, Taita Dios mandajuj llactagupi micuna punlla chayangacaman, cutinga na micushachu— nircami.
17Jesusca copata japishpa, Diosta pashi nishca jipaca, cashnami nirca:
—Cai copata japishpa, cangunapura asha ashagu ufiaichi. 18Cangunataca cashnami nini: Uvas vinotaca, Taita Dios mandana punlla chayamungacaman, cutinga na ufiashachu— nircami.
19Shina nishpallami Jesusca, tandatapash japishpa, Diosta pashi nirca. Chai tandata chaupishpami, paipaj yachajujcunaman carashpa, cashna nirca:
—Caica, cangunapaj ali cachun chaupirina ñuca cuerpomi. Ñucata yarishpa, cashnata rurashpa catinguichilla— nijurcami.
20Ña micushca jipaca, copatapash japishpami, Jesusca cashna nijurca:
—Cai vino copaca, cangunapaj ali cachun jicharina ñuca yahuarmi. Caihuanmi Diosca, gentecunahuan shuj mushujta ari nishcata pactachigrin. 21Ashtahuangarin ñucata japichigrijuj runaca, ñucahuanmi caipi micushpa tiajun. 22Na llullashpami nini. Runa Aichayu tucushca ñucataca, Dios munashcashnami huañuchinajunga. Ashtahuangarin ñucata japichij runaca, ¡aij imachari tucunga!— nircami.
23Jesús chashna nijpimi:
—¿Maijanshi paitaca japichigrinchi?— nishpa, paicunapura nirinajurca.
Servijmi, jatunyachi tucunga nishcami
24Chai jipami, Jesuspaj yachajujcunaca:
—¿Maijanshi ashtahuan alicachi tucushpa causanchi?— nishpa, paicunapura nirinajurca. 25Ashtahuangarin Jesusca, paicunataca cashnami nijurca:
—Llactacunata jatun mandajcunami, llactapi causajcunataca, ninanda mandashpa charin. Shinallata llactacunata mandajcunami: ‘Aligutami mandajun’ ni tucushca causan. 26Ashtahuangarin cangunaca, na chashna causanachu canguichi ninimi. Canguna purapi maijambash punda cashpaca, jipa huambrashnalla imatapash rurachun ninimi. Mandaj cashpapash, servij runashnalla servishpa causachun ninimi. 27¿Micungapaj tiarijchu jatun canga? Na cashpaca, ¿micunata yalichijujchu jatun canga? Micungapaj tiarijmi jatun. Ashtahuangarin ñucami, canguna purapica servij runagushna tiajuni. 28Cangunami ñucahuanga, ima llaquicunata cashpapash, apashpa purircanguichi. 29Chaimandami, ñuca Taita ñuca mandajuchun ushaita carashcashnallata, cangunamambash mandachun ushaita carani. 30Ñuca mandajuj llactapi cangunapash ñucahuan tiarishpa micugrichun, ufiagrichunmi chashna carani. Chaipimi, mandangapaj tiarinapi tiarishpa, chunga ishcai Israel aillucuna imata rurashcatapash ricuchinguichi— nijurcami.
Pedroca, ñucataca na rijsinichu nihuanguimi nishpami Jesusca villashca
(Mat. 26:31-35; Mar. 14:27-31; Juan 13:36-38)
31Apunchi Jesusca, cashnatapashmi nirca:
—Simón, Simón ricui, Satanasmi cangunataca, trigotashna shushungapaj ña mañagrishca. 32Ashtahuangarin ñucata crishpa aliguta catichunmi, canmandaca Diosta ninanda mañarcani. Ñucata aliguta crishpa cutin tigrarishpaca, cambaj huauquicuna ñucata tucui shunguhuan catichun yachachipangui— nircami.
33Shina nijpimi Simonga, cashna nirca:
—Apunchi Jesús, prezuna huasiman canda apajpipash, catiriami ripasha. Huañuchi tucugrina cajpipash, canhuan huañuchi tucugrishallami— nircami.
34Shina nijpimi Jesusca, cashna nirca:
—Pedro, candaca cashnami nini: Nara gallo candajpillatami, ñucataca na rijsinichu nishpa canga, quimsacaman cunan tutallata nigrihuangui— nircami.
Cucavi muchilatapash, culqui muchilatapash, espadatapash apaichi nishcami
35Paipaj yachajujcunataca, cashnami nirca:
—Cangunataca, cucavi muchilatapash, culqui muchilatapash, chaquipi churajunatapash ama apashpa richunmi mandarcani. Shina cachajpica, ¿imagupajpash illajchu purircanguichi?— nishpami tapurca.
Shina tapujpica:
—Imagupajpash na illaparcachu— ninajurcami.
36Shina nijpimi Jesusca, paicunata cashna nirca:
—Ashtahuangarin cunanga, cucavi muchilata charishpaca apanguichilla. Culqui muchilata charishpapash, apanguichilla. Espadata maijambash na charishpaca, jahualla churajuriajta jatushpa randichi. 37Cangunataca, cashnami nini: Dios escribichishca Shimipica: ‘Nalita rurajcunahuanmi, tandachishca canga’ nijunmi. Chaica ñucapi pactanarami. Ñucamanda imata villashpa escribishcapash, pactanapachami— nircami.
38Shina nijpimi, paipaj yachajujcunaca:
—Ishcai espadata ñami charinchi, Apunchi Jesús— ninajurca.
Shina nijpimi, Jesusca:
—Shinalla saquichi— nirca.
Getsemaní shuti huertapimi Jesusca, Diosta mañajushca
(Mat. 26:31-35; Mar. 14:27-31; Juan 13:36-38)
39Jesús chaimanda llujshishpaca, Olivos shuti urcuman rishpa purij cashpami, chaiman rirca. Paipaj yachajujcunapashmi, catishpa rinajurca. 40Chai pushtuman chayashpami, cashna nirca:
—Cangunata imapash nalita rurana munai ama japij shamuchun, Diosta mañaichi— nircami.
41Shina nishpallami, paicunapaj ñaupajmanda rishpaca, rumita huaracahuan shitajpi urmanacamanshna rishpa, Diosta mañangapaj Jesusca cungurirca. 42Cashna nishpami mañarca:
—Ñuca Taitalla, jayajta ufianshna cai llaquita na apachun munashpaca, yalichihuai. Ashtahuangarin ama ñuca munashcata rurapaichu, cambaj munaita pactachipai— nircami.
43Shina mañajujpimi, jahua pachamanda shuj ángel ricurishpa shinllichirca. 44Paica, ninanda llaqui llaqui tucushpami, Diostaca ashtahuan tucui shunguhuan mañarca. Shina mañajpimi jumbipash, yahuarshnalla alpaman ninanda shutujurca. 45Shina mañajushpa jatarishpaca, paipaj yachajujcunapajmanmi shamurca. Paicunataca, llaquihuan puñushpa yalishcatami japij shamurca. 46Shinamandami paicunataca, cashna nirca:
—¿Imashpata puñunajunguichi? Cangunata imapash nalita rurana munai ama japij shamuchun, jatarishpa Diosta mañaichi— nircami.
Jesusta prezu apashcatami villajun
(Mat. 26:47-56; Mar. 14:43-50; Juan 18:2-11)
47Chashna nijpimi, chunga ishcai yachajuj puramandallata, Judas shuti runaca, ashtaca runacunahuan Jesustaca, alillachu capangui nishpa muchangapaj quimirirca. 48Shina rurajpimi Jesusca, cashna nirca:
—Judas. ¿Runa Aichayu tucushca ñucataca, muchashpachu japichihuangui?— nircami.
49Chai paihuan shayanajuj puramandaca, Jesusta imata ruragrinajujta ricushpami, cashna ninajurca:
—¿Caicunataca, espadahuan chugrichishunllachu, Apunchi Jesús?— ninajurcami.
50Shina nishpallami, paicuna puramanda shuj runaca, curacunata mandajta servij runataca, ali lado rinri muchurijta huactarca. 51Shina muchujpimi Jesusca, cashna nirca:
—Ña shinalla saquichi— nishpami, chai runapaj rinripi tacarishpa alichirca.
52Jesusta prezu apangapaca, curacunata mandajcunapash, Diospaj huasita cuidajcunata mandajcunapash, mandaj rucucunapashmi shamushca carca. Paicunatami, Jesusca cashna nijurca:
—¿Shuhuatashnachu japingapaj espadacunahuan, caspicunahuan cangunaca shamunguichi? 53Punllandi Diospaj huasipi cangunahuan cajpipash, ñucata na japishpami purircanguichi. Ashtahuangarin yana yana tutapi mandajuj yarichijpimi, cunanga cashna japij shamuhuashcanguichi— nijurcami.
Pedroca, Jesusta na rijsinichu nishcami
(Mat. 26:57-58,69-75; Mar. 14:53-54,66-72; Juan 18:12-18,25-27)
54Jesusta japishpaca, curacunata mandajpaj huasimanmi apanajurca. Ashtahuangarin Pedroca, caru carullami catishpa rijurca. 55Chai huasi chaupi patiopi ninata japichishpa muyundi tiarinajujpimi, Pedropash paicunahuan tiarirca. 56Chai nina ladopi Pedro tiajujpimi, shuj servij cuitsa ricushpaca, cashna nirca:
—Cai runapashmi, chai runahuan purijurca— nircami.
57Ashtahuangarin paica:
—Jala, chai runataca rijsitapash na rijsinica— nishpami llullarca.
58Chai jipallami, shuj runapash Pedrota ricushpaca:
—Cambashmi, chai runata catij purallata cangui— nirca.
Shina nijpimi, Pedroca:
—Jala, ñucaca na canichu— nirca.
59Shuj horas jipallami, shuj runapash shinllitapacha cashna nirca:
—Cai runatapashmi, chai runahuan purijujtapacha ricurcani. Paipash Galilea llactamandami— nircami.
60Shina nijpimi, chai runataca Pedroca:
—Runacarin, imatachari nijunguipash, na yachanichu— nirca.
Chashna nijujpillatami, galloca ñapash candarca. 61Shina candajhuanmi Apunchi Jesusca, Pedrota tigrarishpa ricurca. Shina ricujpimi, Apunchi Jesús villashca shimicunata yarirca. Jesusca, cashnami nishca carca: “Narapash gallo candajpillatami, canga ñucataca quimsacaman, na rijsinichu nigrihuangui” nishcami carca. 62Shina yarishpami, canllaman llujshishpa Pedroca, ninandapacha llaquirishpa huacarca.
Jesusta na cazushpa asishpa astishcami
(Mat. 26:67-68; Mar. 14:65)
63Jesusta cuidashpa charinajuj runacunaca, pugllashpa asishpami huactanajurca. 64Paicunaca, Jesuspaj ñavita finduhuan huatashpami:
—¿Pita huactarcanchi? Villayari— ninajurca.
65Jesustaca, ashtahuan nalicachishpami, shimi llujshishcata rimanajurca.
Mandaj puralla tandanajushcapaj ñaupajmanmi, Jesustaca apashca
(Mat. 26:59-66; Mar. 14:55-64; Juan 18:19-24)
66Ña punllayajpimi, israelcunata mandaj rucucunapash, curacunata mandajcunapash, mandashca shimita yachachijcunapash tandanajurca. Paicunami, mandaj puracunalla tandanajushcapaj ñaupajman Jesustaca apanajurca. Chaipimi cashna ninajurca:
67—¿Canllu, Quishpichij Cristo cangui? Villairi— ninajurcami.
Shina nijpimi Jesusca, paicunata cashna nirca:
—Chaimi cani nijpipash, cangunaca na crinachu canguichi. 68Cangunata ñuca tapujpipash, upalla uyanguichimanllami, cacharitallapash na cacharihuanguichimanllu. 69Ashtahuangarin Runa Aichayu tucushca ñucami, ninan ushaita charij Taita Diospaj ali lado maquipi cunanmandaca tiajugrisha— nircami.
70Shina nijpimi:
—Shinaca, ¿canga Taita Diospaj Churipachachu cangui?— nishpa, tucuicuna tapunajurca.
Shina tapujpimi, Jesusca:
—Ñuca chaipacha cajtaca, cangunallatami ninajunguichi— nirca.
71Shina nijpimi, paicunapura cashna ninajurca:
—¿Shujcuna ashtahuan villachun minishtinchirachu? Paipaj shimihuanllata chashna nirijujtaca, ñucanchillata ña uyanchimi— ninajurcami.
Currently Selected:
LUCAS 22: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
