LUCAS 5

Jesús mandajpimi, ashtaca pijicunata japinajushca

(Mat. 4:18-22; Mar. 1:16-20)

1Genesaret shuti cucha manñapimi Jesusca, Diospaj Shimita villajurca. Shina villajujta uyangapajmi, ashtaca gentecuna llapiripi jundamurca. 2Shina jundamujpimi, cucha manñapica ishcai canoacuna chai ladollapi tianajujta, Jesusca ricurca. Pijita japijcunaca, chai canoacunamanda llujshishpami, paicunapaj linllicunata tajshanajurca. 3Shuj canoapimi, Jesús yaicurca. Chai canoaca, Simonbaj canoami carca. Chaipi cashpami:

—Cai manñamanda ashaguta suchuchipai— nishpami, Simondaca mañarca.

Chai canoata suchuchijpi tiarishpami Jesusca, ashtaca gentecunaman yachachijurca. 4Ña villaita tucuchishpallami, Simondaca:

—Jacuchi, chaupi cuchaman. Linllita shitashpa, pijicunata japinguichi— nircami.

5Shina nijpimi Simonga, cashna nirca:

—Yachachij, ñucanchica tucui tutami pijita mascashpa pacaripanchi. Ashtahuangarin shuj pijitallapash na tarishpami pacaripanchi. Cunanga, can mandajpillami, linllita shitagripani— nircami.

6Linllita shitajpica, ashtaca pijicuna jundajpimi, linllica ñalla liquirirca. 7Chaimandami, shuj canoapi purinajuj cumbacunata ayudaj shamuchun maquihuan cayanajurca. Paicuna shamushpa, ishcandi canoapi jundachinajujpimi, ña huashajugrinajurca. 8Chaita ricushpami Simón Pedroca, Jesuspaj ñaupajpi ñapash cungurishpa, cashna nirca:

—Juchayu runamari capani. Ñuca ñaupajmandaca anchuripailla, Apunchi Jesús— nircami.

9Ashtaca pijicunata japishpa tandachishcamandami Simondapash, paipaj cumbacunatapash ninan mallai japirca. 10Zebedeo shuti runapaj churicunaca Jacobopash, Juanbashmi, Simonbaj cumbacuna carca. Paicunatapashmi, ninan manllai japirca. Shinamandami Jesusca, Simonda cashna nirca:

—Ama manllaichu. Canga, cunanmandapachami pijita japinshna, gentecunata tandachishpa causangui— nircami.

11Canoacunata alpaman llujchimushpaca, tucuita saquishpami, Jesusta catishpa rinajurca.

Lepra ung:uihuan huañujuj runatami, Jesusca alichishca

(Mat. 8:1-4; Mar. 1:40-45)

12Shuj pueblopi Jesús purijujpimi, cashna tucurca: Lepra ung:ui jundashca shuj runami ricurimurca. Paica, Jesusta ricushpami cungurishpa, alpaman chayajta cumurishpaca:

—Apunchi Jesuslla, can munashpaca mapa illajta saquihuai— nishpa, ninanda mañajurca.

13Shina nijpimi Jesusca, maquita chutashpa chai runataca tacarirca. Shina tacarishpami:

—Ari, mapa illaj cachunmi munani— nirca.

Shina nijpimi chai lepra ung:uica, chai runamandaca ñapash anchurirca. 14Shinamandami Jesusca, chai runataca cashna nijurca:

—Ali tucushcata pimambash ama villanguichu. Ashtahuangarin curapajman rishpa ricuchigri. Chaipica, can mapa illaj tucushcamandaca, Diosman cuchun Moisés mandashcashnallata, curacuna ricushpa yachanajuchun Diosman imagutapash cugri— nijurcami.

15Ashtahuangarin Jesús chashna rurashcacunaca, ashtahuan ashtahuanmi uyarishpa catijurca. Chaimandami Jesús villajujta uyangapajpash, paicunapaj nanaicunata alichihuai ningapajpash, ashtaca gentecuna tandanajunajurca. 16Ashtahuangarin Jesusca, jichushca pambacunaman rishpami, Diosta mañajurca.

Na cuyuri ushajuj runagutami, Jesusca alichishca

(Mat. 9:1-8; Mar. 2:1-12)

17Shuj punllami, cashna tucurca: Jesús yachachijujpica fariseocunapsh, mandashca shimita yachachijcunapashmi uyashpa tianajurca. Paicunaca, Galilea llactapi, Judea llactapi tiaj uchilla llactacunamandapash, Jerusalenmandapash shamushcami tianajurca. Huañujujcunata alichi ushachunga Jatun Diosmi, Jesusman ushaita carashca carca. 18Chaimanmi huaquin runacunaca, na cuyuri ushajuj runaguta, pai mandashpa sirijushcapillata apamunajurca. Paicunaca, huasi ucuman yaicushpa, Jesuspaj ñaupajpi churangapajmi munarca. 19Shina munashpapash, ashtaca gentecuna jundariajpimi, maita yaicuitapash na usharca. Chaimandami huasi jahuaman vitsiashpa, tejacunata pascashpa, chai na cuyuri ushajuj runagutaca mandashpa sirijushcapillata gentecunapaj chaupipi, Jesuspaj ñaupajman uriajuchirca. 20Tucui shunguhuan crishpa paicuna shamushcata Jesús ricushpami, cashna nirca:

—Ñuca huahualla, cambaj juchacunataca ñami anchuchishca cangui— nircami.

21Shina nijpimi mandashca shimita yachachijcunapash, fariseocunapash, paicunapaj shungu ucupilla cashna ninajurca: “¿Diosta nali shimicunata rimaj cai runaca, imatayari? Juchacunataca, pipash na anchuchi ushanllu. Diosllamari anchuchi ushan” ninajurcami. 22Chashna yarinajujta Jesús yachashpami, paicunataca cashna nirca:

—¿Imashpata cangunapaj shungupica, chashnatara yarinajunguichi? 23Cai runagutaca: ‘Cambaj juchacunataca, ñami anchuchishca’ ¿ninachu ali? Na cashpaca: ‘Jatarishpa rilla’, ¿ninachu ashtahuan ali canga? 24Runa Aichayu tucushca ñucaca, juchacunata anchuchingapaj ushaita cai pachapi charijta canguna yachachunmi, (chai na cuyuri ushajuj runataca): “Candaca cashnami nini: ‘Can mandashpa sirijushcataca apashpa, huasiman rilla’ ninimi” nircami.

25Shina nijhuan chai tucuicunapaj ñaupajpi jatarishpami, pai sirijushca jatacunataca japirca. Shina japishpami, Taita Diosta ninanda alicachishpandi, chai runaca paipaj huasiman rijurca. 26Shina alichijta ricushpami, gentecunaca tucuilla manllarishpa, Taita Diostaca ninanda alicachinajurca. Ninandapacha manllarinajushpami: “Cunan punllamari, cashna juyaillataca ricunchi” ninajurca.

Jesusca, Leví shuti runatami cayashca

(Mat. 9:9-13; Mar. 2:13-17)

27Chai jipa llujshishpa rijushpami, impuestota japishpa causaj Leví shuti runaguta Jesusca ricurca. Paica, impuestota japij huasipimi tiajurca. Paitami Jesusca: “Ñucata catihuai” nirca.

28Shina nijpica, ima tiashcatapash saquishpa jatarishpami, Jesustaca catishpa rirca. 29Chai Leví runaguca, Jesusta paipaj huasiman pushashpami, jatun micuita rurarca. Chai huasipica, impuestota japishpa causaj ashtaca cumbacunapash, shuj gentecunapashmi, paicunahuan micungapaj tiarirca. 30Shina tianajujpimi fariseocunapash, mandashca shimita yachachijcunapash, Jesuspaj yachajujcunataca ninanda nalicachishpa, cashna ninajurca:

—¿Imashpata impuestota japishpa causajcunahuan, juchayu runacunahuan micushpa, ufiashpa tianajunguichi?— ninajurcami.

31Shina ninajujpimi Jesusca, paicunata cashna nirca:

—Nanaita na charijunaca, jambij runataca na mascanllu. Huañunajuj gentecunallami, jambijtaca mascan. 32Imatapash cashcatapacha rurajcunata cayangapaca, na shamurcanichu. Ashtahuangarin juchayu gentecuna ninanda llaquirishpa Diospajman tigrarichun cayangapajmi shamurcani— nijurcami.

¿Na micushpa chishanaca alichu? nishpami, Jesusta tapushca

(Mat. 9:14-17; Mar. 2:18-22)

33Chai jipallami, chai runacunaca Jesustaca, cashna ninajurca:

—Bautizaj Juanbaj yachajujcunapash, fariseocunapaj yachajujcunapash, tauca punllacunatami na micushpa, Diosta mañashpa chishanajun. Ashtahuangarin ¿imashpata cambaj yachajujcunaca, na chashna rurashpa micunajun, ufianajun?— ninajurcami.

34Shina nijpimi Jesusca, paicunata cashna nirca:

—¿Boda huasipica, cazarajuj noviota cumbashpa tianajujcunataca, na micushpa chishaichi ni ushanguichimanllu? 35Ashtahuangarin cusata apana punllacunaca chayamungami. Chai punllacunami, na micushpa chishanajunga— nircami.

36Jesusca, cashnatapashmi chimbapurashpa parlajurca:

—Pipash mushuj churajunata rutushpaca, na mauca churajunapi siranllu. Shina rurajpica, mushuj churajunapash huaglingami. Shinallata chai mauca churajunapi mushujta sirashcapash, napacha ali ricunrillu. 37Shinallata chaira rurashca vinotaca, mauca cara muchilapica, pipash na churanllu. Chashna rurajpica, chaira rurashca vinoca muchilata liquishpa jicharishpami, muchilandi tucuringa. 38Ashtahuangarin chaira rurashca vinotaca, mushuj cara muchilapimi churana. Shina rurajpica vinopash, muchilapash tiajunllami. 39Fucushca vinota ufiajcunaca, chaira rurashca vinotaca na munanllu. Paicunaca: ‘Fucushca vinomari ashtahuan ali’ nishpami, na munan— nijurcami.

Currently Selected:

LUCAS 5: QUII

Highlight

Copy