Johan 14

Zingsuv Ca Paa Luo Sina Luopuv Tana A Cuo

1Pathiypalung rie thyi pata aw kha ung. Khazing kha zang ungla kama zaw na zang tie ung. 2I Paa ing lie awna riypa a khuo a hluvsa a aw. Cahaa cata a cuo li kieca niema awna riypa hmang pare daw riypatana i si e ica ta'a yi ma? 3Si'a ang te nama awna riypa hmang i pare khu taata za kaa pakhaa'a ang te kama awna lie nama aw ra riypata niema kha kama'a luo ica la'a yi. 4I sina hmang luo a chiypa luopuv ca nama pachang, a ta yi. 5Thomas ta, “Abyipa, khaapa luo ma na si tapa kha pachang va puv. Tuokhaatama luopuv ca ma pachang the aa?” a ta. 6Zingsuv ta, “Kama ca luopuv, hne biehmisipa, hne hringna ta i cuo. Kama'a taata ta li pata ahunghmuo i Paa luo chiy the'a vayi. 7Kama kha ina pachang cakie ung ca i Paa zaw nama pachang aa. Ata taahingta ca ama kha pachang ung cate nama hmung mangtli” a ta yi.

8Filip ta, “Abyipa, na Paa ca malie pahmung la ma palung a tlingsa aa,” a ta. 9Zingsuv ta, “Niema'a lie cuo syipuv i aw tli, ata tepa ta na pachang va cama, Filip? Kama naa hmungpa ca i Paa kha a hmung mangtli. Tuokhaatama na Paa kha malie pahmung la na ta? 10Filip, kama ca i Paa chunglie aw ang te i Paa ca kama chunglie a awpa hing pachang va cama? Ica changpa yi bie hing kama palungchiy ta i ripa cuo vyi; i chunglie a awpa i Paa rehriena tana a cuo. 11Kama ca i Paa chunglie aw ang te i Paa ca kama chunglie a awpa kha zang tie ung. I bie nama zang li kie zaw ma i tuepa hmang thue hingta na zang tie ung. 12Biehmisi tana ica chang yi: Kama naa zangpa ca i tuepa hmang hing tue khu ra'a yite hingpa laa hingta a le viepa hmang hmuo ama tue aa, tahematapakieca i Paa'a luo kha i si nakawta a cuo. 13Paa ta Saacapaa thueta rungnaana a hmung riypata i ming ta nama hiepa bangkhuo kha i tue aa. 14Khaapahmuo i ming ta ina hie ung cakieca i tue aa,” a ta.

Thlaapa Pathe Pi Riypa Ta Bie A Kuo Yi

15Ina due kie ung caca i phungbie kha nama ziy aa. 16Paa kha hie'a ang te niema'a lie chuozaa ta caa aw khyi riypa yi daakhyituv#14:16 Or Byatuv hrangpa kha aca pi'a yi. 17Ama ca Khazing biehmisipa a luona Thlaapa ta a cuo; Ama ca chuelyi ta a hmung li nakaw hne a pachang li nakawta cuhluo khu vyi. Capa Thlaapa ca niema'a lie a aw nakawta pachang ung cate nama chunglie kha a hring aa.

18Niema dyise ta haaraata haata ca thuse'a vayi ang, niema'a luo i vya kaa pakhaa aa. 19Acawta a awpa ta chuelyi taca na hmung'a va tli, cuorasala niema ca ina hmung'a ungciy; kama i hring nakawta niema zaw nama hring ra aa. 20Capa ning thue cata kama ca i Paa chunglie i awpa kha cuose, kama chunglie niema nama awpa hne niema chunglie kama i awpa kha nama pachang aa. 21I phungbie kha cuhluo te a ziypa ca kama naa duepa ta ama cuo. Kama naa duepa ca i Paa ta a due ra'a yi. Kama zaw ta due ra'a yi ang te iema'a lie kha i phu aa,” a ta. 22Judas Iskariot a cuo lipa Judas ta, “Abyipa, tuokhaatama chuelyi ming cunglie a phu li pata kiema'a lie dyise naa phupa ca a cuo?” a ta. 23Zingsuv ta, “Kama naa duepa ca i bie kha a ziy aa. I Paa ta iema kha due'a yite iema'a luo kha a vaw'a pate iema hne khy ma sa hne aa. 24Kama naa due lipa ca i bie kha ziy'a vyi. Nama thyipa bie hing kama bie ta cuo vyi, kama naa pathlietuv Paa bie tana a cuo.

25Niema'a lie i aw ningta hingpa bangkhuo hing ica chang yi. 26Cuorasala i Paa ta kama ming ta a za pathliepa Byatuv Thlaapa Pathe ta hmangting kha ca pacuv'a yite ica changpa bangkhuo kha aca pathyi sa pakhaa'a yi. 27Diena na ica chipa siy yi; kama diena na ica pi yi. Chuelyi ming aca pipa haayita ca pi vayi ang. Nama palung rie thyi kha se, nama thlaa zaw zang kha se. 28Ica sise'a yi, cuorasala ivya kaa pakhaa aa ica tapa yi kha nama thyi. Kama kha ina due kie ung caca i Paa luo i sipa kha namaa law aa, tahematapakieca i Paa ca kama laata a le vie. 29A vya cuo hmisi thueta nama zang thena riypata a vya cuo hluo ta ica chang pacie yi. 30Niema hneta bie a syi ri the'a va tli ang, tahematapakieca hing chuelyi a uvtuv na a vaw nguoluo tli. Ama ca i cunglie nawhnyina khaahmuo hnyi vyi, 31cuorasala chuelyi ming ta Paa i duepa kha ama pachang na riypata Paa ina changpa haakhata i tue. Thu tie ung, cakuo'a ungpuv,” a ta yi.

Currently Selected:

Johan 14: LNT1

Highlight

Copy