Luka 1
1
Theofilas'a Luo Capepa Caa
1Cawsaa hluvpuv ta kiema hraw lieta a zaa cuopa hmang kaw kha a phace pata cape a maa zaa zue. 2A hruothu ningta ming ta zaa hmungpa tie malie ama changpa hne hing bie zaa phutuv tie ta kiema malie ama changsiypa haata ama cape. 3Kama zaw hing hmang bangkhuo hing a hruothu taata a phasa pata i khieluo diy khu taata, 4aca chang ciepa yi hne a patuv pata hmang dangpa bangkhuo kha a tlingsapa hne a hmuosapa ta na pachang riypata, hingpa caa hing na cuota suokha hnang suokha, aa paziy pata cape ra riypata bie i chi.
Tiynawtuv Johan Puvna
5Herod kha Judea ruo lie siepahruo a cuo ningta, Abijah tluobyi phang a cuo rapa tluobyi Zekhariah a za aw. A napuvnung ca Aaron ciypathla ta cuote a ming ca Elizabeth ta a cuo. 6Ama pahning ta Khazing minghmung lie aa dangpa cuo yite Abyipa phungbie hne nawpipa bangkhuo chunglie risie riypa aw li pata ama hring. 7Cuorasala saata hnyi khu vayi, tahematapakieca Elizabeth kha cing te, ama pahning ta ama nungpuv ama macuo mangtli.
8Luo kha ca ama re hrie cuo tling te Zekhariah ca a phuv zaw hne khata Khazing hmielie kha tluobyi re a hrie. 9Tluobyi tie ama ziypa phung haata Abyipa hmangpathepa chung luo a ngie pata, bienatluophie cunglie rangpa-uepa rue riypata vyisung a da yite amaa tlaw. 10Rangpa-uepa rue cuo ning ca cawsaa bangkhuo ca ale lie a daa yite thlaa ama chuo nguoluo. 11Cakhutaata, ama'a luo kha Abyipa avuoming pakha zaa luo te rangpa-uepa ruenapa cacuo luo kuo khata a daa. 12Zekhariah ta a hmung ca a ciy hringhruo. 13Cuorasala avuoming khata, “Ciy kha, Zekhariah! Khazing ta na thlaachuona ca thyi te na napuvnung Elizabeth ta saacapaa aca sapa aa. A ming ca Johan nama ta aa. 14Ama puvna kawlie nama palung a tluo hringhruo aa, cawsaa hrangpa hluvpuv zaw ta ama palung a ca tluo khyi'a yi. 15Ama ca Abyipa hmungna lie cawsaa lepa a cuo aa. Mingsuv tiy cuose, sahmaa hne zuvre cuose, khaahmuo dang'a vyi. A za puv hluo taata Thlaapa Pathe hneta bi'a te, 16Israel ming hluvpuv kha ama Byipaapa ama Khazing'a luo a vya kaa khyi'a yi. 17Ama ca Profet Elijah haata a cahrapa hne hmang a tue khupa ta a cuo aa. Nungpaa zaw pathiypalung kha saata zaw'a luo maa'a yite, ri a ngie lipa tie kha cawsaa phapa tie ruena pahnyi sa pakhaa riypa hne, Abyipa cawsaa zaw kha a cuota ting pacie pata chi riypata, Abyipa hmie luo kha a silu aa. 18Zekhariah ta avuoming kha, “Na ripa haata a cuo aa tapa kha tuokhaatama i pachang aa? Kama hing macuo tli ang te i napuvnung zaw a nungpuvsa tli,” a ta. 19Avuoming ta, “Kama hing Gabriel tana i cuo. Khazing hmiekunglie a daa paripa cuo ang te ama ta hing thuophaa hing chang riypata nama'a luo ina za pathlie. 20Cuorasala a ning hne a cuo a pha thueta a vya tling riypa i bie na zang li nakaw hingta, capa hmang a vya tlingna te, na ueryi chiy li pata, bie ri khu'a vaciy,” a ta.
21Capa chung bangkhuo ca zaapuv ca Zekhariah kha huo yite, hmangpathepa chunglie cacuo nanaa a rupa kha ama kharue a haa. 22A kya pya tiyta a chaw the li tli nakaw yi ta hmangpathepa chungliena muocuo suokhakha a hmung tapa kha ama pachang. A kuv a phyi dyi ta paluo sa te bie ri khu vyi. 23A re hrie riypa a chuo taata ing luo kha a cakuo.
24Cakhutaata a napuvnung Elizabeth ca nu kha phya te thla pangaa chung ale luo pya li pata a aw. 25Elizabeth ta, “Abyipa ta tlechuona hne na za mang te i cawsaa zaw hrawlie nangzaana i za angpa kha ina lapa tli,” a ta.
Zingsuv Puvna Kaw Riluna
26A thla caruv napa chunglie kha Khazing ta avuoming Gabriel kha Galilee ruo Nazareth khy lie a awpa, 27David ciypathla Josef hneta a chiyhie riypata biekuona a hnyi tlipa lesaapathenung'a luo kha a za pathlie. Capa lesaapathenung ming ca Mary ta a cuo. 28Avuoming ca ama'a luo kha a zuv te, “Abyipa duena a hmung nung! Na cunglie thluechiy aw mangsue, Abyipa ca nama'a liena a aw”#1:28 Hluo vie caa-uv lieca, ‘canung zaw hrawlie thluechiy a hmung nung tana na a cuo,’ a ta. a ta. 29Mary ca avuoming bie khata khuopuv ta a palung patawpamuo te hing bie a changna hing tuokhaapa bie a changna tama a cuo tapata a siyluo kha a rue. 30Avuoming ta, “Mary, Ciykha, Khazing na vi caa hnyi. 31Nu phya'a cate, saacapaa hnyi'a cate a ming ca Zingsuv tapata na sa aa. 32Ama ca cawsaa lesyipa cuo'a te, Asuocepa Khazing Saacapaa ama ta aa. Abyipa Khazing ta a mingpa David thude kha a pi aa. 33Jakob ciypathla zaw cunglie kha chuozaa ta siepahruo cuo'a te, a penapa ca chuo buo'a vyi,” a ta. 34Mary ta avuoming kha, “Kama ca lesaapathenung tana i cuo. Tuokhaatama cahaa cata a cuo the aa?” a ta. 35Avuoming ta, “Thlaapa Pathe ca na cunglie za aw'a te Khazing cahrana ca na cunglie a za tlung aa. Cacuonakawta zaa puvpa saacapaa ca a pathepa cuo'a te, Khazing Saacapaa tapata a cuo aa. 36Ata zaw hing nama tieriy ta a cuopa, a cing nung ama tapa Elizabeth ca a nungpuv tli pata saacapaa kha phya te thla caruv a ta tli. 37Tahematapakieca Khazing ta a tue khu lipa khaapahmuo aw vyi,” a ta. 38Mary ta, “Kama ca Khazing changtaanung tana i cuo, na ripa haata i cunglie tlung thluo se,” a ta. Cakhutaa avuoming ta a thuse.
Mary Ta Elizabeth A Parie
39Capa chung cata Mary ca a tha te tluocung lie a awpa Judah khy khykha luo kha a pahraasa pata a si. 40Zekhariah ing luo kha a ngie te Elizabeth kha bie aa chang. 41Mary ta Elizabeth bie aa changpa kha Elizabeth ta a thyi pahne ta a riy chunglie a awpa nu ca a cathlu. Elizabeth ca Thlaapa Pathe ta bi te, khuopuv ta u te, 42“Nama ca canung bangkhuo hrawlie thluechiycenung tana na cuo, na hnyi riypa haatiy zaw hing thluechiypa tana a cuo! 43Khaapanakawma hingpa hmang hing i cunglie tlung te, i Byipaapa nung ta ina vya parie? 44Nama bie inaa changpa i thyipa hneta i chunglie nu ca palungtluona hne a cathlu. 45Abyipa ta ama'a luo a changpa bie hing a cunglie a tling hrahring aa tapata a zang nung ca khatluv ta thluechiypa tama a cuo!” a ta.
Mary Sapa Pathuosana Hlaa
46Mary ta,
I pathiypalung ta Abyipa a pathuosa;
47I hringna ca naa Khuotuv Khazing cunglie aa law,
48Ri tluo lipa a changtaanung hing,
ama ta inaa thyi pari!
Ata ning taahingta chuo bangkhuo ta
thluechiynung ina ta'a yi,
49A cahracepa Khazing ta
i cunglie hmanglepuv a tue mangtli.
A ming ca a pathe;
50Chuokha hnang chuokha ta
Ama a ciyzaapa tie cunglie,
a nangduena a paluosa.
51Ama ta a buo kha pazuu te
a hruo a tlepa tie kha
ama khuekhuona hne a chepatlaa diy yi.
52A cahrasapa siepahruo tie kha
amaa byithude taa pacung yite,
Nutaapa tie kha a calang yi.
53Ama nang a diypa tie kha
hmangphapa ta ama riy pabi yite,
a hnyirungpa tie kha kuv cahripa ta a padiy sa yi.
54A nangduena a thyi pakhaana ta,
a changtaapa Israel kha aa bya tli.
55Mingchingmingvuo tie'a lie hne
Abraham'a lie hne a ciypathla tie cunglie
chuozaa cuota bie aa kuopa haata.
56Mary ca Elizabeth'a lie kha thlathung tluv a aw khu taata ing luo a kaa.
Tiynawtuv Johan Puvna
57Elizabeth ca a ningthlaa vya tling te saacapaa a sa. 58Abyipa na nang a due hringhruo tapa kha a ingpaa hne a tieriy zaw ta ama thyi tiyta ama palung a tluokhyi hringhruo.
59A ningcarinapa lieta haatiy kha vangdaw te riypata a vawkhyi yite, a paa ming la pata, Zekhariah tapata ming paphya amaa ting. 60Cuorasala a nung ta, “Cuo vyi, ama ca Johan tapata na kupa a cuo aa,” a ta. 61Iema ta, “Niema phang chunglie cahaapaapa ming a phyapa pakha hmuo aw va ungciy,” ama ta. 62Cakhutaata a paa kha ama kuv ta pahmungsana tue yite, haatiy ming tuokhaatama a paphya khing tapa kha ama hiehriy. 63Zekhariah ta caahnaa kha a hie yite, “A ming ca Johan tana a cuo,” tapata a cape. Ama bangkhuo ta ama kharue a haasa. 64Cakhupatahne Zekhariah ca bie ri khu pakhaa te Khazing kha a pathuosa. 65Ama ingpaa zaw ca ama thlaa zangsa te, capa thuo ca Judea pe tluocung ruo bangkhuo kha a pathuo. 66Capa thuo a thyipa bangkhuo ta pacuo syalya yite, “Capa haatiypa ca khaama a vya lu syalya aa?” ama ta. Tahematapakieca Abyipa cahrana ca a cunglie a aw.
Zekhariah Profet-biephu
67Johan paa Zekhariah ca Thlaapa Pathe ta bi te hingpa profet-biephu hing a ri:
68Israel Khazing, Abyipa cunglie
thluechiy aw mangsue!
A cawsaa zaw kha tlechuona hne
mang yite a khuo yi.
69Ma cuota a cahrapa Khuotuv kha,
A changtaapa David ciypathla chung taata malie a pi.
70-71Ma cariepa tie hne malie a huepa tie
kuv chung taata kiema khuo riypata,
hluoning a pathepa profet tie
palyipakaa taata bie a ri.
72Mingchingmingvuo tie'a lie bie kuo ciepa
nangduena kha pahmung sa yite,
Iema cunglie a tuepa a pathepa
a biekuona ca aa thyi.
73-74Mingpa Abraham kha,
ma cariepa tie kuv taata palaw sa riypa hne,
ciy li pata a re ma hriena riypa kha
chiesana hne bie a kuo.
Ma carie kuv chung taata khuo ciepa tie ta;
75ma hring chung bangkhuo, a hmiekunglie
a dangna hne pathena ta
a re ma hrie khuna riypata a cuo.
76I saa, nama ca a suocepa
Khazing profet tapata kupa na cuo aa.
A luo zaw sa riypata Abyipa hmie luota si'a cate,
77a cawsaa zaw kha ama sue a ngiethena taata
khuona kaw pachang thena pi riypata a cuo aa.
78Ma Khazing nangne ngiechina thueta,
cungluo taa mawdiy ningkhena
ma cunglie za cung'a te,
79Zingna chunglie a tupa tie hne
thiyna ningdiy rawlie'apa tie kha,
khena pi riypata a cuo aa.
Kiema kha diena luopuv luo malie a chiy aa.
80Haatiy ca lethaw te thlaapa lie a cahra, Israel ming'a lie zaapuv hmung ta aa luo hluo li ruochung lie kha a aw.
Currently Selected:
Luka 1: LNT1
Highlight
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.
