Luka 4

Zingsuv Pasupaliy Angna

(Mat 4:1-11; Mar 1:12-13)

1Zingsuv ca Thlaapa Pathe hne a bi pata Jordan cavaa taakhata vya kaa te Thlaapa ta ruochung luo kha a sikhyi. 2Capa lieca Setaa ta ning sawliy chung a pasupaliy. Capa chung bangkhuo ca khaahmuo ning li pata a aw nakawta capa cuo a chuo pahne ca a nang khuopuv ta a diy. 3Setaa ta, “Khazing saacapaa ta na cuo kieca hingpa alung hing viechuo ta aa li riypata naw pi tie,” a ta. 4Cuorasala Zingsuv ta, “Caapathepa lie, ‘Cawsaa hing sa dyi ta hring vyi,’ tapata a capepa kha,” a ta.

5Cakhutaa Setaa ta a suona luo kiekhyi te sungkhata lieta chuelyi ruo bangkhuo kha a pahmung sa. 6Setaa ta, “Hing nawhnyina bangkhuo hne rungnaana bangkhuo hing ica pi aa. A bangkhuo hingta kama'a luo pipa cuo tli te, i khingpa ahunghmuo i pi khu yi. 7Ina bie cakieca na huopa tana a cuo diy aa,” a ta. 8Zingsuv ta, “Caapathepa lie,

‘Abyipa na Khazing kha bie la,

ama re dyi kha hrie tie,’

tapata a capepa kha,” a ta.

9Cakhutaa Setaa ta Jerusalem luo kha sikhyi te Biena-ing dawthlue lie kha a patu khu taata, “Khazing Saacapaa ta na cuo kieca hingpa taahingta a zupathla tie. 10Caapathepa lie,

‘Ama ta nama khuo riypata

aa vuoming kha chang tli yite,

11na phyi hmuota alung lie naa phaw li riypata

ama kuv ta aca cawchue'a yi,’

tapata a cape kha,” a ta.

12Zingsuv ta, “Caapathepa ta, ‘Abyipa, na Khazing kha va dyapasya kha,’ a ta,” tapata a palie. 13Setaa ca pasupaliyna phangphang a pachuo khu taata cuophaa a hmung pakhaa nate cuokha chung Zingsuv kha a thuse.

Zingsuv Galilee Lie Rehrie A Pathu

(Mat 4:12-17; Mar 1:14-15)

14Cakhutaata Zingsuv ca Thlaapa Pathe cahrana hne a bi pata Galilee luo kha a kaa. A thuohlaa ca capa ruo bangkhuo lieca a pathuo diy. 15Apungna-ing lie kha pacuv yite cawsaa bangkhuo ta ama pathuosa.

Nazareth Lie Zingsuv Cuhluo Vayi

(Mat 13:53-58; Mar 6:1-6)

16Zingsuv ca a za lethawnapa Nazareth khy luo kha vaa te a tue tawpa haata Sabbath ning kha apungna-ing luo a vaa. Caapathepa ri riypata a daa te, 17profet Isaiah caataw kha ama pi. Caataw ca pathluo te:

18Abyipa Thlaapa ca i cung lie a aw.

Tahematapakieca kama kha

a siypasapa tie'a luo Thuophaabie phya riypata

sathu na pathuv te inaa tlaw.

Sii ta a ziypa tie'a lie lawna bie pathyi riypa hne,

Mingcuepa tie ta

ama hmung pakhaa khu riypata ina pathlie.

Hrisaapa tie hya pazang riypa hne

19Abyipa palungtluona kung thuophaa

pathyi sa riypata ina pathlie,”

tapata a capenapa kha a ri.

20Zingsuv ca caataw kha kalang pakhaa te a mangchiytuv kha pi te aa tu. Apungna-ing luo a vya pungpa bangkhuo ta Zingsuv ca ming vy li pata ama mang. 21Zingsuv ta, “Ata ning hing Caapathepa hing nama thyina lieta a tling mangtli,” a ta yi. 22Ama bangkhuo ta ama kha ri thuophaa yite, a pakaa taata a pyapa thluechiyna bie kha ama kharue ta a haa. Iema ta, “Hingpapaa hing Josef saacapaapa kha cuo vama?” amaa ta. 23Zingsuv ta, “‘Siybyipa, nama hne nama a patluo sa tie law,’ tapa phungthluv kha ina risue'a ungciy, tapa kha a phasa pata i pachang. Cakhutaata Kapernaum khy liena a tue tapata ma thyipa zaw kha na puvnapa khy lie hing tue ra tie ina ta'a ungciy. 24Ica chang yi: “Ahung profet hmuota a puvna khy lie cuhluopa cuo buo vyi,” a ta yi. 25Naa na thlie tie ung: Elijah chuo ning kha kung thung angkha a che khy kuo te ruo bangkhuo ta cakuo a tlung ning kha Israel ruo lie nunghlyi ama za hluvsa. 26Cuorasala Elijah ca Sidon pe Zarephath khy lie a awpa nunghlyinung'a luo ri li pata a ahung'a luo hmuo pathliepa cuo vyi. 27Cakhutaata Elisha chuo ning zaw kha Israel ruo chunglie caahminghmaa#4:27 Caahminghmaa tapa biesuo hingpasana phangphang tana zaw a cuo khu. ta a pasapa a hluvpuv ama za aw, cuorasala Siria ming Naaman ta li pata pakha hmuo patluo sapa cuo vayi. 28Apungna-ing lie a awpa bangkhuo ca capa bie ama thyi pahne ta ama hi a haasa. 29Thu yite, Zingsuv kha khyle luo a dale yite ama khydaw tluo lungkuo taa kha nuopathla amaa nang. 30Cuorasala Zingsuv ca iema hraw taakhata dya zuvpathla te a cakuo.

Thlaapa Chiepa A Hnyipapaa

(Mar 1:21-28)

31Zingsuv ca Galilee pe Kapernaum khy luo kha si te Sabbath ning ta kha a pacuv yi. 32A pacuvna zya kha ama nang ta a uosa, tahematapakieca nawhnyina hne ta bie a ri nakawta a cuo. 33Capa apungna-ing lieca a pyalyipa khuevuo ta a hryipapaa pakha aw te, 34“Nazareth khypa Zingsuv tuokhaatama malie na tue khing? Kiema para repa tama naa vaw? Nama ca a ahungtama na cuo tapa kha ica pachang. Khazing Cawsaa Pathepa tana na cuo!” tapata khuopuv ta a khi. 35Cuorasala, Zingsuv ta, “A dieta tah aw! Hingpapaa chung taahingta pya,” ta te a chuo. Khuevuo ta cawsaapapaa ca ama hmiekunglie kha vaapatyi te ruvnaana khaahmuo pi li pata a chung taata a pya. 36Cawsaa bangkhuo kha ama nang uosa te pakha hne pakha kha, “Hingpa bie hing tuokhaapa bie tama a cuo? Hingpapaa hingta nawhnyina hne cahrana ta bie pi te thlaapa chiepa tie ca ama pya,” a maa ta. 37Zingsuv kaw ca capa ruo chung hmangting ta a pathuo.

Simon Ing Lie Patluosana

(Mat 8:14-17; Mar 1:29-34)

38Zingsuv ca apungna-ing taakhata pya te Simon ing luo kha aa ngie. Simon piynung a nge ling te a pasapa kha ama ca ama chang. 39Vaa te, a thaalie kha a daa te a ngelingna kha a chuo ca a nge kha a cakaa. Sungkhabala ta tluo te, thu te iema kha a mangsang yi.

40Ning a tla ca a pasapa a hnyipa bangkhuo khata pasana a phangphang ta a pasapa tie kha Zingsuv'a luo ama vya chiykhyi; ama luv cunglie kha a kuv khang te ama palang ta a patluo sa yi. 41Khuevuo zaw kha cawsaa hluvpuv chung taata pya yite, “Nama ca Khazing Saacapaa tana na cuo!” tapata khuosa ta ama khi. Cuorasala iema kha chuo yite bie pari sa vayi, tahematapakieca Messiah#4:41 Or Khrih a cuopa kha ama pachang.

Zingsuv Ta Apungna-ing Lie A Pacuv Yi

(Mar 1:35-39)

42Khy a kya vuo pahne ta Zingsuv ca khy taakhata pya te ruoduona luo kha a cakuo. Cawsaa ta ama kha huv yite ama hmung ca, a thuse li riypa yita ama thlu. 43Cuorasala ama ta, “Khazing Pena Thuophaabie ca khy hrang luo zaw hing i ri ra hrahring riypata a cuo, tahematapakieca hingpa repa hing tana pathlie hnuochuopa ta i cuo,” a ta. 44Cacuonakawta Judea#4:44 Hluo vie caa-uv chunglie caGalilee a ta. ruo chung apungna-ing zaw lie kha Thuophaabie ca a changle yi.

Currently Selected:

Luka 4: LNT1

Highlight

Copy