Marka 6

Nazareth Lie Zingsuv Cuhluo Vayi

(Mat 13:53-58; Luk 4:16-30)

1Zingsuv ca capa hmang taa cata pya te a puvnapa khy luo kha ziytuv tie hneta ama va pha. 2Sabbath ning takha apungna-ing lie pacuv yite a pacuvna a thyipa a hluvpuv ca ama kharue a haasa. Hingpa bangkhuo hing khaapa taata ma a hmung? Hingpa singna hing tuokhaapa singna tama a cuo? Tuokhaapa cahrana hmang tue khuna ma a kuv ta a tuepa hing! ama ta. 3Ama ca Mary saacapaapa, Jeim hne Josef hne Judas hne Simon tie uvta, lettamaapa kha cuo vama? A sieta zaw hmuota lie hingna kiema'a lie ama aw cuo vama? ta yite siysaa ri li pata ama aw. 4#Luk 3:19-20Cakhutaata Zingsuv ta iema kha, “Profet ca ama puvna khy, ama tieriy'a nata ama chungkhue lie ta li pata ca pa-uvsathyi li pata aw vayi” a ta yi. 5A pasapa chekha cunglie a kuv khang te a patluo sapa yi ri li pata kharuehaa hmang khaahmuo tue khu vyi. 6Zangna ama hnyi linapa kha Zingsuv ca a kharue a haa hringhruo.

Zingsuv Ta Ziytuv Hlyihning A Pathlie Yi

(Mat 10:5-15; Luk 9:1-6)

Cakhutaata Zingsuv ca ama cahriy lie a awpa khy luo kha tlaw te a pacuv yi. 7Ziytuv hlyihning tie kha ku yite pahning pahning ta a pathlie yi. A pyalyipa thlaapa te khuna naw kha pi yite, 8“Khuecahryi ri li pata nama khy tlawna luo kha khaapahmuo a phya kha ung; viechuo cuose, sahrie cuose, tuokaa cuose a phya kha ung. 9Cuorasala phanaah kha a pakaw ung, cadyiseca buohryi zunghning ta a hriy kha ung,” tapata bie a taa yi. 10Ata kaliepa yi ca, “Namaa ngienapa ing lie kha nama pya hluo li ta aw tie ung. 11#Luk 3:19-20 #Luk 3:19-20Ingtlung caa dapa hne nama bie naa a thlie khing lipa tie kha nama pya se tiyta na ma phyipazaa lie a bepa buvcing kha iema kuo kha luo taata tehte cuo riypata a cakhawsue siy tie ung. Caca ama cuota a raaring pina a cuo aa. 12Cacuonakawta pya yite cawsaa kha ama suena taata amaa ngiepachiy riypata phung ama chang. 13#Luk 3:19-20Khuevuo hluvpuv kha papya yite a pasapa kha chiytiy thuv yite ama patluo sa.

Tiynawtuv Johan Thiyna

(Mat 14:1-12; Luk 9:7-9)

14 # Luk 3:19-20 Zingsuv thuohlaa ca khy ting ta a pathuo nakawta Siepahruo Herod zaw ta a thyi ra. Cawsaa chekha ta,#6:14 Hluo vie caa-uv lieca ama ta a ta. “Tiynawtuv Johan na thiyna taata a thupakhaa; canakaw catana hinghaapa kharuehaa hmang hing a tue khu, ama ta. 15Cuorasala a hrangpa tie ta, “Elijah tana a cuo,” ama ta. A hrangpa tie ta, hluoning profet tie haapa profet pakha tana a cuo,” ama ta. 16Herod ta a thyi tiyta, “Kama ta a luv i za pate sapa yi Johan khana thiyna taata a thupakhaa,” a ta.

17 # Luk 3:19-20 Herod pangpa ta cawsaa pathlie yite Johan kha a za patuv sa yi, pahre sa yite thaw a pathla. A nuta Filip napuv a cuo thluo pata napuv ta aa tuepa Herodias nakawta a tuepa a cuo. 18Tahematapakieca Johan ta, “Na nuta napuv ca a hlaw riypa cuo vyi,” tapata a za chang pari. 19Cacuonakaw Herodias ta a palung ruv ta Johan kha hue te a thie khing. Cuorasala thie khu vyi; 20tahematapakieca Herod ta Johan kha aa dangpa hne a pathepa a cuo pakha pachang te a ciy nakawta a daakhuo. Ama ta Zingsuv bie kha a thyi tiyta a palung a kalaasa raalaa pata a bie kha naa a thlie khingsa. 21Cuorasala Herodias ta cuophaa a hmung. Capaca Herod ta a puv ning alawna pyi kha tue te siepahruo chungkhue tie, cuzaa byilepa tie, hne Galilee ruo hruetuv tie sa a duo ning yi ta a cuo. 22Herodias sacanungnung kha zaa ngie te a luo ca Herod hne a khyche tie kha ama palung a patluo yi. Cacuonakaw siepahruopa ta lesaanung ca, “Na khingpa palang naa hie la ica pi aa,” a ta. 23Chie aa sa te a tapa ca, “Ina hiepa bangkhuo ica pi aa, i ruo khingkhuo te hmuota ica pi aa,” a ta. 24Lesaanung ca pya te a nung kha a va hiehriy. “Khaapama i hie aa?” a ta. A nung ta, “Tiynawtuv Johan luv,” tapata a palie. 25Lesaanung ca siepahruopa'a luo kha kaa mala te, “Ata hingta tiynawtuv Johan luv kha daa pakhue lieta na pi la tapa na i khing,” a ta. 26Siepahruopa ca a ngie a chi hringhruo, cadyiseca a khyche zaw hmiemang hne bie a kuo ciepa a cuo nakawta i khing vyi. 27Sungkha ta rievetuv riekapapaa ca Johan luv kya cyi riypata naw pi te a pathlie. Riekapa ca thaw-ing luo kha vaa te Johan luv kha a te. 28Daa pakhue ta kya cyile te lesaanung kha a pi. Cakhutaacata lesaanung ta a nung kha a pi. 29Capa thuohlaa ca Johan hnangziytuv tie ta ama thyi pahne ta a vaw yite a riy kha la yite ama paby.

Zingsuv Ta Thawpangaa Sa A Duo Yi

(Mat 14:13-21; Luk 9:10-17; Jhn 6:1-14)

30Lucuotuv tie ca Zingsuv kha cadung yite ama tuepa hne ama pacuvna kaw kha ama chang. 31Zingsuv ta, “Nama palang hingta ruoduona luo kha a vaw ungla sungkha a pahy tie ung,” a ta yi. Tahematapakieca cawsaa a lie bungthawpa ama hluv tuv nakawta sa ningna cuo hmuo hnyi vayi. 32Cakhutaata iemata tah ruoduona luo kha sawkawpalaw ta ama si. 33Cuorasala cawsaa hluvpuv ta hmung yite, ama pachang nakawta khy ting taakhata vya pya yite ama phyi ta ama si ca iema hluo ta a hmang luo kha ama va chiy lu. 34Zingsuv ca ngiekuo luo cung te cawsaa hluvpuv kha a hmung yi ca a ngiechi hringhruo yi, tahematapakieca iema ca khietuv a hnyi lipa tuv hnetana amaa lu. Caacuonakawta iema kha a hluvsa a pacuv yi.#Num 27:17; 1 Kgs 22:17; 2 Chr 18:16; Ezek 34:5; Mat 9:36 35Ning a vya ngie viele tiyta ziytuv tie ca ama'a luo kha a vaw yite, “Ruocakung lieta a cuo, ning zaw a ngiesa tli; 36cawsaa hing pathlie yi la a cahriy lie a awpa lu hne khy luo hing ning riypa suokhakha vaa calyi yi se,” ama ta. 37Cuorasala Zingsuv ta, “Niema ta ning riypa suokhakha pi tie ung,” a ta yi. Iema ta, vaa pate ma viechuo kha denarii zahning muo calyi'a pate ma duo'a yi,” ama ta. 38Zingsuv ta, “Viechuo tluo khazaa ma nama hnyi? Va mang tie ung,” a ta yi. Va mang yite, “Tluo pangaa hne ngaa sahning,” ama ta. 39Zingsuv ta cawsaa kha a phuvphuv ta che ungla aphuv cunglie kha patu sa tie ung, a ta yi. 40Cacuonakawta cawsaa ca zakha phuv, sawngaa phuv tapata amaa tu. 41Zingsuv ta viechuo tluo pangaa hne ngaa sahning kha la te, vuoruo luo ang te, alawna bie a hluo khu taata viechuo kha chechi te zaapuv kha re riypata ziytuv tie kha a pi yi. Ngaa sahning zaw kha a pare sa diy yi. 42Ama bangkhuo ta ning yite ama riy a bi. 43Cakhutaata viechuo hne ngaa azungpepa kha ama pakiy ca beke zung hraa hlyihning a bi. 44Sa a ningpa capaa thawpangaa ama ta.

Zingsuv Tiy Cung Lie A Cakuo

(Mat 14:22-33; Jhn 6:15-21)

45Cakhupahne Zingsuv ta ziytuv tie kha sawkawpalaw chung luo pakie sa yite riyliy huesuo Bethsaida luo kha pasisalu yite ama ca zaapuv kha a pathlie taa yi. 46Zaapuv a pathlie khutaa yite tluocung luo kha thlaa chuo repa ta a kie.

47Zuoluo vya chiy te sawkawpalaw tiyliy khingkhuo luo a chiy ning kha Zingsuv ca ama seta tluo lie kha a aw. 48Thliy kha a pali ta aa vya hruo nakawta ziytuv tie ta sawkawpalaw maw amaa nang khyipa kha a hmung tiy yi ta, riyliy cunglie kha cakuo te mawdiy ta iema'a luo kha aa vaw. Iema kha law aa nang yi. 49Cuorasala riyliy cunglie a cakuopa kha ama hmung tiyta athlaa ta ri yite, 50ama thlaa zang hringhruo te khuo ta ama khi. Cuorasala iema kha sungkha ta chaw yite, “Kama tana i cuo, ciykha ung,” a ta yi. 51Cakhutaata sawkawpalaw chunglie iema'a luo kha kie te thliy ca a die. Ziytuv tie ca ama nang ta a uo hringhruo, 52tahematapakieca ama palung kha zingtuv te viechuo lie a tuepa kharuehaa hmang kha pachangpasie khu vayi.

Genesaret Lie A Pasapa A Patluo Sa

(Mat 14:34-36)

53Riyliy ama vya te khu taata Gene-saret lie kha cung yite sawkawpalaw kha ama hre siy. 54Sawkawpalaw ama thuse pahne khata Zingsuv a cuopa kha cawsaa ta ama pachang paluo. 55Cacuonakawta capa ruochung bangkhuo kha a catli pata si yite a pasapa kha ama pangphaa hne Zingsuv a aw tapata ama thyina hmang luo kha ama vya chiykhyi. 56Zingsuv a cakuonapa khyta, khypuv, lu luo hne chadawtluo luo kha a pasapa ca vya chiykhyi yite a pangpeta chuo ama hrie riypata paa ama kie. A hriepa tie bangkhuo ca ama tluo.

Currently Selected:

Marka 6: LNT1

Highlight

Copy