LAMKTU 5

Ananias La Saphira

1Ananias ming nak ciah chang tumat la ak chu Saphira cu ani khomdek yawi ci gawi. 2Cun-ung phi Ananias cu ak chu ng’ge püi netah alai a yawih cu ateih k’pai neh amshah cu amät ah ka vai gim ne; amshah cu ang düihpüi gui am ap gui ci. 3Peter naw, “Ananias, nang cu na lai na yawih k’pai ne na gim ah phäh ah Mumcha Theing nam hleei pyi ci nei, a i vai khoshe ah pyein ah na bi ang? 4Shin ah lai kä na yawih pha ung phi na mät ah ka ah kyak ci, shin ah lai na yawih kawn ah phi lai ah phu ngui cu na mät ah ka ah kyak ci, cun ah kya lang sei, a i vai cun ah na ngaih tüh ang? Nang cu chang nam hleei ciah kä kyak ci, Khanpughinam hleei ciah kyak ci nei” cine pyen nak ci. 5Cun ah ng’thu ang yak vai am Ananias cu, kiuh ne sih seih, acun hmuh ng’yah tuk ciah chang gui cu ang htei ah kyikyawk ci gui, 6Ak hmaw chang gui naw law neh Ananias ah agook cu, yih awn k’tawm ne tah ak pung ah hteh püi neh m’cim ci gui.

7Cun kawn ah nayi k’thum lung khä tah Ananias ah ak chu cu gawk lawk ci. Ani cu kä ah gawk law pha ung, ami kyak gui cu kä hmat tu phak ci. 8Peter naw, “na ni lai ngui i chü ah ang na ni yawih? nam thein ä? cineh ng’shik ci.

Cun ah hnumi naw “Akcang ah, acun chü ah nei ka ni yawih” cik ci.

9Peter naw,” a i ah kiah sei nang ni naw Khanpughi ah Mumcha Theing m’hleei m’hlak vai ah na ni k’bäi ang? Na cei m’cim ciah chang gui m’kawt law k’pha law ba ci gui nei, ngah mi naw nang mä kawt ne ning m’cim lawk khai gui nei” cine pyen nak ci. 10Acun vai am cun ah hnu micu Peter ah khaw pei ah kiuh ne sik ci, Ak hmaw chang gui naw cun ah a sih cu hmuh u ne tah kawt ne hteh püi neh a cei ah pei ah m’cim tuk ci gui. 11Pum ci gui ami van lacun ah a mawng ng’yah tuk ciah chang avan cu ang hteiah kyikyawk ci gui.

Cäi-aih Gui vai lah Ngaih Khit gui Vai

12Ang düihpüi gui naw chang gui ah ma ah cäi aih gui vai la ngaih khit gui vai akda m’dang ci gui. Zum ciah chang gui ami van cu Solomon ah k’caw ah ng’bum ci gui. 13Chang gui naw ngami cu m’hlüng m’tai gui pang u ne phi a u phi ngahmi ung a yäi ah kä ng’läk tuk ci gui. 14Cun ung phi Bawipa yum ciah hnumi pami gui cu da law pi täi ci gui. 15Chang gui naw gaw pai ci gui cu law püi ci gui. Peter a hteh yah ung apü püi naw baw tah ang’hnim vai ah phak ni, kawh nak gui ni awn lam ung m’shäm ci gui. 16Cun bäng ah kä kyak ciah Jerusalem ah pei pigaw yung ah ka gawpai ci gui, Khaw ‘she ah kai gui cu ami van gai ba yawp ci gui.

Ang Düihpüi Gui Ami kdudeiu nak Gui ah Mawng

17Cun kawn ah Taigü tung la, apaw gui ah kyak ciah pigaw gui ah ka Sadducee gui cu ang Düihpüi gui ah khan ah ang htei ah käng yah hlü ne m’thüi u netah, ci gui vai ah k’bäi ci gui. 18Ngami naw ang düihgui cu pha gui ne, thawng ung chum gui ci gui. 19Cun ung phi khaw mü ah Khanpughi ah khankhaw chang naw, thawng m’kawt cu hmawng ne, ang düihpüi gui cu ak pung ah m’hlaut gui netah, 20“Nangmi cu Taigüimah hteit u netah chang gui am ghin nak akthai ah mawng m’Thein gui vä” cik ci. 21Ang düihpüi gui cu khankho chang ah ng’thu ngai u ne, ai khawn htük ung Taigüim ah hteit ne m’thei thang ci gui.

Taigü tung la apaw gui ni, kawngsi gui ni ng’ge nak vai cine Zudah ng’vai gui cu khü gui ci gui. Cun kawn ah gakap gui tüi gui ne, ang düihpüi gui cu khü sak gui ci gui. 22Cun ung phi thawng ah ang düihpüi gui cu kä hmuh u ne, kawngsi gui ah om nak ah law ba u netah 23Keimi kami gawk ung thawng m’kawt cu ak ni ah ng’khai ci, m’kawt ngäng ci gui phi m’kawt pei ah ng’düi u sei kami hmuh gui ci; cun ung phi chawh hmawng ne kami valuh ung ak kyawng ah u phi kä kami hmuk ci,” cine pyein ci gui. 24Cun ami cicu Taigü khem lah m’kawt ngäng ciah ang vaipi naw ng’yak ni netah, “Shin ah mawng cu a i hawkcha ang cineh ngai khit ci gui. 25Cun yak ung chang tumat gawk law netah,” Thawng ung nami chum gui ah chang gui cu Taigüim kyawng ah om ne, chang gui m’thei thang gui ci gui nei” cine m’thein law gui ci. 26Cun kawn ah m’kawt ngäng ciah ang vai naw ak chang gui khah püi gui ne, ang düngpüi gui cu va kgü ba gui ci. Cun ung phi chang gui naw lung awn ami vawih gui vai ah ng’ä u netah ang düihpüi gui cu kä tuthat gui ci gui.

27Cun ah ang düihpüi gui cu law püi gui ne kawngsi gui ah ma ah m’düih gui u netah Taigü tung naw ng’shi gui ci. Ani naw, 28“A cun ah chang ah ng’ming awn kä na mi m’theithang en ba vai ah, keimi naw ak khengah kami ning maa nah gui pyi ci, Cun ung phi nangmi naw Jerusalem khaw avan ung na mi m’theithang gui pyi ci. Ani ah sih phi keimi ah om ah nami pyein law hlü pyi ci nei” ci ne kyak nah gui ci gui.

29Peter la apaw gui naw, “Keimi ah ngaih vai cu Khanpughi ah kiak ci, chang ah kä kyak ci. 30Kami pughi guiah Khanpughi naw kutlamtung ung tai ne nami ngawn ah Bawipa Jesuh cu, thawh ba sak pyi ci. 31Israel chang gui ng’yu ba u netah ami kat ami phiawn nak vai ah, Khanpughi naw cun ah Bawipa cu, thawh ba sak netah akpat lam ung ang vaipi lah Hun Bawipa ah ngoh sak pyi ci nei. 32Shin ah amawngung keimi cu saksi ah kami kyak ci, ang thu ngai ci gui am a yuk m’kyum lawah kyak ciah, Mumcha Theing cun phi saksi ah kyak ci” cine pyein tuba ci gui.

33Cun ah ng’thu cu kawngsi ng’vai gui naw ng’yah u netah ang htei ah m’lung she u neh ang düihpüi gui cu ngawn hlü gui ci gui. 34Cun ung phi Gamaliel ming nak ciah Pharisee tumat cu, kawngsi yungah ng’düi law netah ang düihpüi gui cu ashäng ak pung ah ami hteh püi gui vai ah pyein ci. Ani cu chang gui naw ami chang m’sui tu ah ng’thu m’khän saya ah kyak ci. 35Cun ah chang naw, “Israel chang gui aw, shin ah chang guiah khan ah nami bi vai cu geing nah ne nami bi vai nei, 36Ayan hta Shängung Theudas ming nak ciah chang tumat cu amät naw amät chang k’tung khak ah m’hlüng m’tai ne om ci, a hnu ah läk ciah chang phia’phli vai lawk ci. Cun ung phi ani ami ngawn kawn ah ak chang gui püi yawp u sei abi mawng phi maih yawp ci. 37Cun kawn ah ming ami k’tä yah ung Galile chang Judas cu ng’dang law ba ne chang gui ng’ge ne m’htawi gui ci. Cunung phi ani cu ngawn u sei ak chang gui phi püi pawng yawp ci gui. 38Cun ah kiah sei kei naw ka pyein hlü cu, shin ah chang gui kä hei nah gui vä, ami bü ah om u sä; 39Ngami ah ngaih-tüh bilawh gui cu, chang ah pawng püi ah a kyak ung maih ne ng’kawn khai nei, cung phi cun gui cu Khanpughi ah ngaih tüh bilawh gui ah a kyak ung, nangmi naw kä nami m’dimdap gui hlawt khai, nangmi cu Khanpughi nami hnung’tuk püi ciah kyak lawk khai nei” cine pyein ci gui.

40Kawngsi ng’vai gui naw Gamaliel ah ng’thu cu ngai u netah ang düihpüi gui cu khü gui ci gui. Cun kawn ah that gui u netah Bawipa Jesuh ah ng’ming awn ng’thu kä ah mi pyein nen ba vai ah, khen neh m’cäi gui netah tüi ba gui ci gui. 41Ang düihpüi gui cu Khanpughi naw Bawipa Jesuh ah hmawk ah hmai m’sheit nak aut khin ci gui ah ak bäi gui ah phäh ah yeikyai u ne kawngsi yungah ka hteit ba ci gui. 42Ak hnüüp tä sei Taigüim gui lah chang gui ah im gui ung, Bawipa Jesuh cu Messiah ah a kyak ah mawng ng’thu ni cu pyän u ne, m’thei thang ba gäk gäk ci gui.

Currently Selected:

LAMKTU 5: CBC

Highlight

Copy