LAMKTU 7
7
Stephen ah Ng’thu Pyein
1Taigü tung naw Stephen am, “Ngahmi ah pyein cu akcang ang?” ci ne ng’shik ci.
2Stephen naw, “Phäi nau gui lah Pa ng’vai gui aw, nang ngai vä, mi pughi Abraham cu Haran khaw ah hteit ne kä a om pha ung Mesopotamia ah a om yah ung hlüng tai ciah Khanpughi cu ng’dang netah,” 3Na mätyah gui lah na khaw cu nawng shüt neh ka ning m’shüm nak ah khaw ah na hteh vai” cine pyen nak ci. 4Cun ah kiah sei Abraham cu Chaldean khaw ah ka, Haran kho ah hteit ne om tuk ci. Apa asih kawn ah tuk bäi nami om nak ah khaw ah Khanpughi naw tüi ne om sak ci. 5Cun yah ung Khanpughi naw cun ah khaw ung Abraham am khawh a i phi kä pek ci, khomdek dawng veing hta phi kä pek ci. Cun ung phi cun ah khaw cu, amät am phi bäi, a hta nau gui am phi bäi avan ka ning ap khai ciah shai tak ci. Cun yah ung Abraham ung a hta kä om phak ci. 6Khanpughi naw Abraham am, “Na hta nau gui cu a khaw hei ah chang hei nu ah kiah ne om tuk khai gui, khaw kum phia-phli ung khlei-htein ah kiah u seih chang naw shedam nah gui khai. 7Ngami khlei-htein nah gui ciah chang gui cu, kei naw kam khoichaa gui khai. Cun kawn nah nang ah hta nau gui cu cun nah khaw ung ka phyawng u neh, shin ah khaw ung kei cu nak taigü khai gui” ci neh pyen na gui ci. 8Cun kawn ah Khanpughi naw, ang thu m’khän am dang nak ah, vun aat nak ah mawng cu Abraham am ap ci. Cun ah kiah sei Abraham naw, a hta Isaak cu ami hta nak ah ak hnüüp cheit ung van aat nak bi pek ci. Jakob naw a hta sing gha-lei-gawi phi, vun aat nak bi pe gui ci. Jakob ah hta gui cu changpakhui gha-lei-gawi ah pa gui ah kya lawk ci gui.
9Jakob ah hta gui naw ami nau Josef cu m’thüi nah u neh tah Egypt khaw ah khlei-htein nak kyak khai ah yawi ci gui. 10Cun ung phi ani cu Khanpughi naw a täng ah om püi neh, gein vai nak gui ung ka, phiawn sak ci. Josef cu Egypt ghangpughang ah ma ah a gawk law ung Khanpughi naw a hmai kiang sak neh hmuh hmat nak phi pek ci. Cun ah kya sei ghangpughang naw ani cu, Egypt khaw ung bawi ng’vaipi la gawnu mang ah k’hmoh ci. 11Cun yah ung Egypt lah khanan khaw ung khaw yaw sei gein vai ci gui. Mi pupa gui cu ami ei vai kä om ba ci. 12Jakob naw Egypt khaw ung ei vai htang om ciah ng’yah netah a hta gui cu ak htük ah tüi gui ci. 13Ak hnih vei nak ami law ba ung Josef naw a phäi gui naw ami hmat vai ah m’ thein gui ci. Egypt ghangpughang naw phi Josef ah kyongkhui ah mawng cu hmat lawk ci. 14Cun ah kyasei Josef naw apa Jakob cu cük ne, chang sing chih-kip-leihma lawk ci gui ah apaw gui ami van Egypt khaw ah ami law vai ah, k’thäh gui ci. 15Jakob cu Egypt khaw ah law tuk ci, acu ah amät lah a hta gui ami van sih tuk ci gui. 16Ami gok gui cu Shehem pigaw ah hteh püi gui netah Hamora pahta ni ah Abraham naw ngui awn a thawn ba ah ng’cim hmun ung m’cim gui ci gui.
17Khanpughi naw Abraham am apeit ah shai tak nak a khüm law vai ng’et law khä tah Egypt khaw ung Israel chang gui da law pi ci gui. 18Cun kawn ah Egypt khaw ung Josef kä hmat ciah ghangpughang kai lawk ci. 19Cun ah ghangpughang naw mi pughi gui cu m’khawi hnga gui neh shedam nah gui ci. Ami hmaw hta gui ami sih vai ah imah ak pung ah hta sak gui ci. 20Cun yah cu Moses ami hta nak ah khin ah kyak ci, Moses cu ang htei ah kyom ciah ak hmaw hta ah kyak ci. Ani cu cha thum ung apa ah imah ami om püi ah kyak ci. 21Ani cu im ah akpung ah ami ghawh kawn ah Pharaoh Ghangpughang ah hta hnumi hta naw lah neh a hta ah tha neh om püi ci. 22Moses cu Egypt chang gui ah hmuh hmat nak avan ng’theithang netah, hmuh hmat nak lah m’khüt sheng nak ung hlüngtai ciah chang ah kya lawk ci.
23Ani cu a khaw kum phli-kip law khä tah, amät ah pakhui Israel chang gui ah om nak ah hteit khai ah k’bäi ci. 24Cun ah a hteh yah ung Israel chang cu Egypt chang naw tuthat sei hmuh netah apaw gung tu neh Egypt chang cu ngawn neh phu tuk ci. 25(Moses naw, Khanpughi naw Israel chang gui k’phiawn gui khai ah a tüih cu, ak chang gui naw hmat khai gui ah ngai ci, cun ung phi ngami naw kä hmat ci gui.) 26Angawi ung Israel chang gawi ng’tuh ni sei hmuh gawi netah, Moses naw, “Nang ni cu ng’phäi nau gawi ah kiah netah a i vai na ni ng’tuk ang” ci neh m’chah gawi ci. 27Cun ung phi ak she ah bik ciah chang naw Moses cu buh neh kit netah “Keimi na uk gui neh na na m’khoichaa gui khai ah, a u naw a ning m’düih ang? 28Zanta Egypt chang na ngawn ah mäih ah, kei mä nah na ngawn hlük ci ma?” cine ng’shik ci. 29Moses cu cun ah ng’thu ng’yah netah Egypt khaw ah ka, dawng neh Midian khaw ah om tuk ci. Cu ah a om nak tu ah pami hnih ah hta ci.
30Khaw kum phli-kip lüng khä tah Sinai khaw m’htung pei ‘pya lün nu ah, mei ah däi ciah k’plup ah ng’lung ah khankho chang cu Moses ah hmuh ah ng’dang ci. 31Cun hmuh ne Moses cu ang htei ah cäicat ne, m’htei neh a hmuh vai ah hei ng’et khäh tah, 32“Kei cu napu pa gui ah Khanpughi, Abraham, Issak lah Jakob niah Khanpughi nei” ciah Khanpughi ah k’aw cu ng’yak ci. Moses naw kyihkyawk aih netah kä teng hlawt ci. 33Khanpughi naw Moses am, “Na phahnak suut ä, nang düih nak cu theingthap ciah hmun nei, 34Ka chang gui Egypt khaw ah ami shedam nak gui cu, ka hmu pyi ci nei, Ngami ah ng’hlaw ng’ei m’lau ng’pyan phi kang yah pyi ci nei. Cun ah kyasei ngami ka hun gui khai ah ka kyum law pyi ci, Tuk bäi law ä, Egypt khaw ah ka ning tüi khai” cik ci.
35Moses cu Israel chang gui naw ami hnu nak ah chang ah kyak ci. Ngah mi naw, “Keimi na uk gui neh na na ng’thumcha gui khai ah a u naw a ning m’düih ang?” cine, ng’shik ci gui. Ani cu chang gui uk gui neh mei ah däi ciah k’plup ung dang ciah khankho chang ah bi nak püi awn, ak chang gui k’phiawn gui khai ah Khanpughi ah tüih ah kyak ci. 36Ani naw Egypt khaw lah Tuisen tuinu ung phi bäi, khaw kum phli-kip ung k’pya lünnu ah phi bäi, cäi aih gui vai lah ngaih khit gui vai cu m’dang neh Egypt khaw ah ka, Israel chang gui law püi ba gui ciah kyak ci.” 37Khanpughi naw ami mät pakhui ung ka, Profet tumat cu, kei a na tüih law ah mäih ah tüi lawk khai nei” ci neh Moses naw Israel chang ghu am pyen na gui ci. 38Ani cu bung puk ah om ci gui ah Israel chang gui, kami pu pa gui lah Sinai khaw m’htung ung ng’thu püi ciah khankho chang awn atäng ah om ciah chang ah kyak ci. Mikmi am ana peit gui vai ah Khanpughi ah ghing ciah ng’thu gah ciah chang ah phi ki ak ci.
39“Cun ung phi mi pu pa gui cu, ani ah ng’thu kä ngai u neh, ani nawng-en neh Egypt khaw ah hteit ba hlük ci gui. 40Cun ah kiaseih ngami naw, Aaron am,” Keimi lam nam shüm gui khai ah khanpughi-hta gui na pyan pe gui ä. Keimi Egypt khaw ah ka, na law püi ba gui ciah Moses cu a i ah kyak ciah kä ka mi hmat ci nei” ci neh kyak ci gui. 41Cun kawn ah ami mät naw, seipat hta ah gup pyang u neh, acun am vawih peh taigü neh yeikyai ci gui. 42Cun ah kyasei Khanpughi naw ng’hlah tah gui neh, khankho ah aisi gui ah k’taigü sak gui ci. Cun ah mawng Profet gui ah ca guk cu;
Israel chang gui aw, nang mi naw
‘Pya lün nu ah khaw kum phli-kip ah kyawng ung
m’ghu ng’tha neh nami tumbei cu,
43Nangmi naw nami m’kawn law gui cu,
Molech ah ng’yo kiang lah nami aisi pughi
Rephan ah kyak ci nei;
Cun gui cu nami khawihnah vai ah nami mät naw
nami pyan ah a gup gui ah kyak ci.
Cun ah kyasei nangmi cu Babilon phlän neh
nami hteit khai ah ka ning k’täm gui khai” ciah kyak ci.
44“Kami pupa gui naw, Khanpughi ah om nak ah khaw-phung cu k’pya lün pum ung m’kawn lawk ci gui. Moses am Khanpughi naw am’hmuh ah mäihah cun ah khaw-phung ami cawh ah kyak ci. 45Kami pupa gui naw cun ah khaw-phung cu, ami pa gui ah kut ung do u neh Khanpughi naw ak täm gui ah om nak khaw ah, Joshua awn atäng ah ami tuk gui yah ung m’kawn neh hteh püi ci gui. Cun ah khaw-phung cu David ah uk yah ung khüt sei cun ah khaw ah om ci. 46David cu Khanpughi ah ma ah a hmai kiang ci kiah neh Jakob ah Khanpughi ah a om nak vai Taigüim cu Khanpughi naw a cawh sak vai ah ng’thäh ne taigü ci. 47Cun ung phi cun ah im a cawh sak cu Solomon ghangpughang ah kyak ci.
48“Cun ung phi hlüng tai pi ng’bäih ciah Khanpughi cu chang ah cawk ah im ung kä om ci. A i ah kyasei ci ung profet ah ng’thu pyein ung:
49“Khanpughi naw,” Khankho cu ka mangkiang ah kyak ci,
Khomdek cu kang leh khän nak ah kyak ci.
Kei ah hmawk ah a i ah mäih im na co khai ang?
Kei ah om nak vai ah hmun cu a hawi ang a om?
50Kei ka mät naw ang tüi avan ka tüi pyang ciah kä kya ne
ang? cine pyein ci” ciah om ci.
51Stephen naw, “Nang mi cu nami ling aih aih ci, na mi m’lung naw Khanpughi kä yum hlawt ci, Khanpughi ah ng’thu phi kä nami yum hlük ci, nang mi cu nami pupa gui ah mäih ah Mumcha Theing cu ang täi sei nami hnu nak ci nei, 52nami pupa gui naw kä ami shedam nak ah profet a u om ne ang? Ngah mi cu Khanpughi ah ng’düng ciah changshäm akyum law vai ah mawng pyein ciah ng’shä gui cu ngawn ci gui nei. 53Tuk bäi nangmi naw cun ah Bawipa cu, ga ah kut ung ap neh nami ngawn pyi ci nei. Khankho chang gui ung Khanpughi naw a ning peit gui ah ng’thu m’khän cu gah lang u neh, kä nami läk ci nei” cine kyak nah gui ci.
Stephen Lung awn Ami Vawih ah Mawng
54Judah kawngsi ng’vai gui cu Stephen ah ng’thu ng’yah u netah ami ha htui neh m’lung k’she ci gui. 55Cun ung phi Stephen cu Mumcha Theing awn be neh khankho cu han dan netah, Khanpughi ah bä khäk nak lah Khanpughi ah k’pat lam ung ng’düi ciah Bawipa Jesuh cu hmuk ci. 56Cun kawn ah Stephen naw, “Teng tu vä, khankho m’kawt ng’hmawng khätah, Khanpughi ah k’pat lam ung Chang ah Htapa ng’düi sei ka hmuk ci nei” cine pyein ci.
57Kawngsi ng’vai gui cu m’lau u neh, ami kut awn ami k’hnga bawm yawp u neh, ani ah om nak ah dawng lawk ci gui. 58Stephen cu phah u neh pigaw k’pung ah hteh püi u netah, ng’lung nah ne lung awn vawi ci gui. Vawi ciah chang gui cu ami suinu suut netah Soul ming nak ciah ak hmaw chang tumat am ap ci gui. 59Cun ah lung awn ami vawih yah ung Stephen cu, “Oh Jesuh Bawipa kamumcha na yuk la peä” cine taigü ci. 60Ani cu m’khuukdoong netah, “Khanpughi awi, shin ah chang gui ah ami katnak cu m’gein gui ä” ci neh ak’aw m’can neh m’lau netah kät lawk ci.
Saul cu Stephen ngawn vai ah yum tuk ciah chang ah kyak ci.
Currently Selected:
LAMKTU 7: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
