ATÜNNAK 35
35
Bethela ung Khanpughi naw Jakob am Hriham Pek ci
1Khanpughi naw Jakob am, “Tuhbäi Bethela ah hteit ne na om vai nei. A cu ah kei ah hmawk ah mangkiang na cawh vai nei. Kei cu na phäi Esau nawng shüt ne na dawng yah ung ng’dang lawk ciah Khanpughi ah ka kyak ci nei” cine pyen nak ci.
2Cun kawn ah Jakob naw akyong ungka gui la a chang gui avan am, “Nami ng’lung ah om ciah a hei khanpughi gui cu nawng u ne, nami mät theingcim sak u ne, nami suisak phi ng’thong yawp vä. 3Mikmi cu shin ah khaw nawng ne Bethela ah mi hteit khai nei. A cu ah ka geinvai yah ung na m’htei ne hteh nak päng ah na khah püi ciah Khanpughi ah khawih kiang ka co khai nei” cik ci. 4Cun ah kyasei ngami naw ami khanpughi gui la ami hnga naak gui avan cu Jakob am pek ci gui. Jakob naw cun gui cu Shekhem pigaw pei hlim sing kaa ah k’phuh ci.
5Jakob la a hta gui ami ng’düih law yah ung mang gaw pei ung om ciah chang gui naw Khanpughi kyih aih u neta, kä gawt k’täm ci gui. 6Jakob la a chang gui cu Kanaan khaw, Luz ah ami pyen ah Bethela ah gawk ci gui. 7A cun ung ani naw Khanpughi ah mangkiang co neta Bethela ah sui ba ci. Cun cu ani a phäi ungka a dawng yah ung Khanpughi naw ang dang nak ah kyak ci. 8Rebekka m’htei ciah sei sayama Deborah cu si sei, Bethela ah a htumtäng hlim sing ah kaa ah k’phuh u neta, cun ah sing cu Allobakut ah sui ci gui.
9Jakob cu Mesopotamia ah kaa a law ba lam ah Khanpughi cu ng’dang law ba ne hriham pek ci. 10Khanpughi naw, “Na ming cu Jakob ah kyak ci, cun ung phi tuhbäi ung tün ne, Israel na ming nak khai” cine Khanpughi naw Israel ah a ming sui ci. 11Kei cu hlüngtai säih ciah Khanpughi nei. Nang cu pyiing ne ng’shon ä, chang pakhui gui cu nang ungka ng’shon u sei ghangpughang gui ah pughi ah na kyak khai nei. 12Kei naw Abraham la Isaak am ka pek ah khaw cu nang am ka ning pek khai nei, cun cu na htangshon am phi ka pek khai nei” cine pyen nak ci. 13Cun kawn ah Khanpughi cu kai ba ci. 14Cun ah Khanpughi naw ang thu nak püi ah hmun ung Jakob naw lung k’tung ng’ling neta tui ng’ui la oliv situi awn shawi ci. 15Cun ah hmun cu Bethela ah sui ci.
Benjamin ah Ng’Tüi nak la Rachela ah Sih nak
16Jakob la a paw gui cu Behtel ungka ng’düi law ba ne Ephrath ah kä ami gawk law pha mä ung Rachela cu hta law hlü ne, anau poi aktä ah m’neh lawk ci. 17Tä sei am neh yah ung m’hta tuk ci naw, “Rachela aw, kä na ng’ä vai nei, na hta cu pami ah kyak ci nei” cik ci. 18Rachela naw si law vai neta, a hta cu “Benoni” ah aming sui ci, apa naw läi “Benjamin” ah sui ci.
19Rachela cu si sei, Ephrath ah hteh nak lam pei ung k’phuh ci gui, cun cu tuhbäi Bethlehem ah kyak ci. 20A cun ung Jakob naw lung k’tung ng’ling sei tuh ngawi güt Rachela ah ng’cim hmun ah hmat ci gui. 21Jakob cu k’täi ne hteit neta Eder tänghän akga ah k’pyu co ci.
Jakob ah Ahta gui
(1Stn 2:1-2)
22Jakob cu cun ah khaw ung a om yah ung a hta Reuben la ak chuba Bilhah cu ng’yaw ci goi, cun cu Jakob naw hmat ci. Jakob cu gha lei goi ah hta ci.
23Leah ah hta gui cu Reuben (angvaipi), Simeon, Levi, Judah, Issakha, la Zebulun ah kyak ci. 24Rachela ah hta goi cu, Joseph la Benjamin ah kyak ci. 25Rachela ah shäm Bilhah ah hta goi cu Dan la Naphtali ah kyak ci. 26Leah ah Zilpah ah hta goi cu Kad la Asher ah kyak ci. Ami van cu Mesopotamia ah ami hta nak gui ah kyak ci.
Isaak ah Sih ah Mawng
27Jakob cu apa Isaak ah om nak Hebron ah pei Mamre khaw ah hteit ci. Cun cu Abraham la Isaak ah om nak ah kyak ci. 28Isaak cu a khaw kum phia cheit kip ghing neta, 29a ghi sih ah sik ci, a hta goi Esau la Jakob naw htüm ci goi.
Currently Selected:
ATÜNNAK 35: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
