ATÜNNAK 43
43
Joseph ah Phäinau gui cu Benjamin Khah Püi ne Egypt ah Law Ba ci gui
1Kanaan khaw ah ei vai ng’ceet law pi pi ci. 2Jakob ni kyong naw Egypt ah ka ami phuih law ah ei cu, ng’pyi law khäta, Jakob naw a hta gui am, “Mi ei vai api hteit ne khleih tuba vä” cik ci.
3Judah naw ani am, “Cun ah chang naw akghat ah nak bäi gui ne, nami nau kä nami law püi ung ka ma ah kä nami law en ba vai” ci pyi ci. 4Kami nau na tüih tu hlü ah a kyak ung va, hteit u ne na ei vai kami hleih lawk khai. 5Kä na tüih tu läi ung kä kami hleih khai nei. A i ah kyasei ci ung cun ah chang naw nak bäi gui ne, kami nau kä kami hteh püi ung, kä kami hteh ba vai ah pyen pyi ci nei” cik ci.
6Jakob naw, “A i ah kyasei nami nau a om ba ah mawng cun ah chang am m’thein u ne, kei nami na geinvai sak ang?” cik ci.
7Ngami naw, “Cun ah chang naw k’sheng ne kyong khui avan ah mawng na ng’shi gui ne, Nami pa ghing naw? Nami phäinau a hei om ba naw, cine na ng’shi gui sei a cun cu kami m’thein tu ling ah kyak ci. Kami nau kami hteh püi vai ah a pyen law vai cu, keimi naw kä kami hmat ci” cik ci gui.
8Judah naw apa am, “A hmaw cu tüi tuä, a tuhbäi kami hteit khai. A u phi cawi ne kä mi sik khai nei. 9Kei naw ka hnun gui ka kyäng khai nei, ani ah phäh ah kei na na lak vai, ghing phyawng sei nang ah kä ka law püi ba ah a kyak ung kei naw angtäi sei ka shetkat nak khai nei. 10Ak sho aih kä kami gin ah a kyak vai sü ung hnih vei hteit ne kami ng’hlat law ba pyi khai süte” cik ci gui.
11Ami pa naw ngami am, “Cun ah a kyak ung uk ciah bawi am nami pek vai ah, mi khaw ungka akni pi gui ah kyak ciah sing ui api, khoitui, cünggük, hei theih la sing theih gui hteh püi vä. 12Ngui phi a goi ah nami hteh püi vai, nami ng’ip ung nami law püi ah ngui phi nami hteh püi ba vai, cun cu nami hma ah kya khin ci nei. 13Nami nau cu hteh püi vä, cun ung phi ang ghit ah ng’hlat law ba vä. 14Cun ah chang ah m’lung kyong ung nangmi a ning yei nak gui vai ah hlüngtai ciah Khanpughi naw bii bi sä! Nami phäi tumat la Benjamin phi ning pe ba gui sä. Kei ah hmawk ah ka hta gui cu maih khai gui ah a kyak ung, maih khai gui ah va kya khai nei” cine m’cäi gui ci.
15A phäi gui naw m’cümhnah gui vai la ngui a goi cu hteh püi u ne, Benjamin khah püi ne, Egypt khaw ah hteh püi u ne, Joseph ah ma ah ng’düi ci gui. 16Joseph naw Benjamin la a phäi gui cu law u sei hmu gui neta, ang kyong ung ng’vai ciah changshäm am, “Shin ah chang gui ka im ah hteh püi gui ä, kei awn a täng ah hnüüp ei ei khai gui nei, sei ngawn ne shong sik vä” cik ci. 17A chang vai gui naw Joseph ah pyen ah bi u ne, a phäinau gui cu a im ah hteh püi gui ci.
18Im ah ami gawk kawn ah ngami cu kyi law u neta, “Shin ung ami na law püi gui cu, zan ung mi ng’ip ung mi hteh püi ba ah hmawk ah kyak khai. Mikmi cu ang ghit ah na pha gui ne, changshäm ah na hmoh gui ne, mi laa gui phi avan lak khai gui nei” ciah ngai ci gui. 19Cun ah kyasei im kawt pei ah ami gawk law ung, 20chang vai ah ma ah, “Bawi aw, na bä ni! Yan ung ei khleih vai ah hnü ät kami lawk ci. 21Kami hteh ba lam ah kami ih nak ung phuih plawk law u ngäta, kami van ah ng’ip ung ngui om bäng bäng sei kami hmuk ci, a cun gui bä bä cu kami law püi ba ci nei. 22Cun kawn ah ei kami khleih nak vai ngui phi kami m’kang ci nei. A u naw kami ng’ip ung ngui am khäh ba cu kä ka mi hmat ci nei” cik ci gui.
23Changshäm naw, “Kä kyi vä! Kä ng’ä vä! Nami Khanpughi, nami pa ah Khanpughi naw nami ng’ip ung ngui a ning pek gui nei. Nami ngui cu ka dou ci nei” ci neta Simeon cu law püi ba ci.
24Changshäm naw ngami cu kyong ah luh püi gui ci. Ani naw tui pe gui sei ami khaw m’si ci gui. Ani naw ami laa phi vuh pe gui ci. 25Ngami cu Joseph awn a täng ah ei ei khai gui ah ami m’thein gui pyi ah kya ne, hnüüp yah ung ani a law ung ami pek vai cu pawng püi ge ci gui. 26Joseph gawk law khäta ami pawng püi gui cu im kyong ah law püi ne pene, ama ah m’dek ung kawp yawp ci gui. 27Ani naw yavaih na gui neta, “Yan ung nami pyen ah nami pa, ghipa cu ghing ne ang?” cine ng’shi gui ci.
28Ngami naw, “Na chang, kami pa cu ghing ci nei, gai ci nei” ci u neta kawp ne m’khukdawng ci gui.
29Joseph naw anau Benjamin cu hmu neta, “Shin cu nami pyen ah nami nau a hmawpi ma, ka hta aw, Khanpughi ning m’htei sä” cik ci. 30Joseph cu anau ah phäh ah amhni nak m’lung na aih khäta, ang ghit ah ng’düi law ne kyong ah va lut ba ne, akhan kyong ah kyap ci. 31Amlung m’cäi ne a hmai m’hla neta, lut law ba ne ei ami chan vai ah pyen na gui ci. 32Joseph cu tawnglang tumat ung ngok ci, a phäinau gui cu tawnglang tumat ung ngok ci gui. Egypt chang gui cu a hei ung ngo tu hnga ci gui, a i ah kyasei ci ung Egypt chang gui cu Hebru chang gui awn vun ne kä ei hlük ci gui. 33Ng’phäi nau gui cu Joseph awn ng’man tu u ne, a hmawpi ungka naw ang vaipi ah ng’tän ne ngok ci gui. Cun ah ami ngoh cu hmu law u neta, ami mät ng’teng tu ne cäi ci gui. 34Buh cu Joseph ah tawnglang ungka lawh gui ci gui. Benjamin cu a phäi gui ah ta a hma ah däm pi khai ah pek ci gui. Ngami cu Joseph awn a täng ah ei aw ne yeikyai ci gui.
Currently Selected:
ATÜNNAK 43: CBC
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.