JOHAN 9

Anupuk ah Amik m’Dauh ci Bawipa Jesuh naw M’dei Sak ci

1 Bawipa Jesuh a hteh shüi shüi nak ah anupuk ah amik m’dauh ciah chang cu hmuk ci. 2Angdüihpüi gui naw, “Sayapa, shin ah chang a mik m’dauh cu amät ah katnak ah phäh ah ang? Anupa ah katnak ah phäh ah ang?” cine ng’shik ci gui.

3 Bawipa Jesuh naw, “Ani ah mik am dauh cu, amät ah katnak suh ah phi kä kyak ci, anupa ah katnak ah phäh ah phi kä kyak ci, Khanpughi ah hlüngtai nak ani ung ang dang vai ah hmawk ah kiak ci. 4Kei na tüi lawk ciah ah bi cu kho adei yah ung mi bik khai. A u naw bi kä abi nak hlawt vai ah kho a münak gawk lawk khai. 5Kei cu khomdek khan ah ka om yah ung khomdek khan ung akdei ah ka kiak ci,” cik ci. 6Cun ci netah Bawipa Jesuh naw m’dek la ne amshi awn m’thawh ne m’thau ci, cun kawn ah amik m’dauh ah mik cu, ng’nai awn hluk netah, hteit ne Silom tuili ung vam hla ä” cik ci. 7(Silom ah ming cu, ‘Tui ci’ ciah kyak ci.) Ani cu hteit ne a hmai vam hla netah m’dei ne law ba ci.

8Ani cu ng’yoi ne ei man te ci kyasei, ayan ani hmuh man te ciah, ami pei ah kaa gui naw, “Ani cu ngo ne ngui ng’yoi man ciah kä kia ne ang?” cik ci gui.

9Chang amshah naw, “Ani nei” cik ci gui, amshah naw “Kä ani nei, ani awn täng ciah chang nei” cik ci gui.

Amät naw “Kei cu acun ah chang nei” cik ci.

10Chang gui naw, “A i hawkcha ah ang na mik am dei law ba” cik ci gui.

11Ani naw, “Jesuh ming nak ciah chang naw, ng’nai awn kamik na hluk netah, Silom tuili ung nam hla sak sei, vam hla netah kam dei law ba ci” cik ci.

12Chang gui naw, “Ani hawi ang?” ci u sei, cun ah chang naw, “kä ka hmat ci nei” cik ci.

Pharise Gui Naw Gainak Gah Ciah Chang gui Ami ng’Shi ah Mawng

13Chang gui naw ayan amik m’dauh te ciah chang cu, Pharise ah om nak ah law püi ci gui.

14 Bawipa Jesuh naw, ng’nai pyang ne cun ah mik am dei sak ba hnüüp cu kyin nak hnüüp ah kyak ci.

15Pharise gui naw amik am dei law ba ah mawng cu ng’shik ci gui. Ani naw, “Kei ah mik cu ng’nai awn na hluk khätah tui ung vam hla ne, kam dei lawk ci” cik ci.

16Pharise am shah naw, “Ani cu kyin nak thukhän kä ngai ci, Khanpughi ah kaa lawk ciah kä kyak khai” cik ci gui. Am shah naw, “Kat nak abi ah a kyak ung cäi aih vai gui kä bi hning khai sü te” cik ci gui. Cun ah kyak ne ngami cu ami ngaih ng’pai lawk ci.

17Pharise gui naw, amik m’dauh te ciah chang-am, “Na mik ning m’dei ba sak cicu a u chang ang?” cine ng’shi ba ci gui.

Cun ah chang naw, “Ani cu profet nei” cine m’thein ba gui ci.

18Cun ung phi Jew chang vai gui naw, ani amik am dauh te tuhbäi am dei law ba cu kä yum u netah, anupa gui khü ne ng’shik ci gui. 19“Shin ah chang cu nami, hta ang? Ami pyein ah mäih ah anupuk ung amik m’dauh te ci ang? Acun ah a kyak ung ani a i hawkcha ah amik m’dei lawk ciang?” cine ng’shik ci gui.

20Anupa gui naw, “Shin ah chang cu kami hta nei, anupuk ge ung amik m’dauh man ci nei. 21Cun ung phi a i chaa ah amik am dei law ba la a u naw amik am dei ba sak cu, keimi naw kä kami hmat ci nei, ani ng’vai law pyi ci kiasei amät ng’shi vä, amät naw hmat khai nei” cik ci gui. 22Cun ah ami pyein cu Jew chang vai gui naw, Bawipa Jesuh cu Messiah nei, ciah yum ciah chang phung pum nak ung kaa, k’täm vai ah amik bäi pyi ah kyasei, acun ami kyih ah hmawk ah kiak ci. 23Cun ah kyasei anupa gui naw,” ani ng’vai pyi ci, amät ng’shi vä” ami ciah kyak ci.

24Pharise gui naw, amik m’dauh te ciah chang cu khü ba mä u netah, “Khanpughi ah ma ah thukhän ne, düng nak awn na pyein vai, namik ning m’dei sak ba ciah chang cu katnak bik ciah kami hmat pyi ci” ci nak ci gui.

25Ani naw, “Cun ah chang katnak abi la kä ah bi cu kä ka hmat ci, kei ka mik m’dauh man te ci, tuhbäi kam dei law bäng vah ka hmat ci” cik ci.

26Ngami naw, “Ani naw a i chaa ang abilawh, a i chaa ang na mik a ning m’dei ba sak” cine ng’shi ci gui.

27Ani naw, “Hnü ät ka ning m’thein gui pyi ci, kä nami ngai ci, a i ah kyasei nami ng’yak ba hlü mä ang? Nangmi mä ani ah chang ah nami kya tu hlük ci ma?” cine ng’shi tu ba gui ci.

28Ngami naw, “Nang nei ani ah nik chang, keimi läi Moses ah nak chang gui nei. 29Khanpughi naw, Moses am thu am thein cu kami hmat ci, cun ung phi shin ah chang a hawi kaa a law ah kä kami hmat ci” cik ci gui.

30Ani naw, “Nangmi naw ani a hawi kaa lawk ciah kä nami hmat ung phi, ani naw kei ah mik nam dei sak pyi ci nei” ci na gui ci. 31Khanpughi naw katnak bik ciah taigü kä ngai ci, Khanpughi kyih-aa ne ang yak hlü ah bik ciah chang ah taigü vah ngaih pek ci. 32Cau puyin ung tün ne, anupuk ung amik m’dauh ci m’dei ba sak ci, ci cu kä mi ng’ya man ci. 33Ani cu Khanpughi ah kaa lawk ciah kä a kyak ung shin gui kä bi m’khüt khai sü te” cik ci.

34Ngami naw, “Nang cu nanupuk ung katnak awn nang vai lawk ciah kia lang ne, keimi na nam thein gui ci ma, cine pum im ung kaa k’täm ci gui.

Mumcha Mik M’dauh Ci

35Cun ah a mik täm kawn ah ani cu Bawipa Jesuh naw hmu ba netah, “Nang naw chang ah Htapa na yum ci ang?” cine ng’shik ci.

36Cun ah chang naw, “Chang ah Htapa cicu a u ang? Nam thein tuä, ka yum khai” cik ci.

37 Bawipa Jesuh naw, “Nang naw ani na hmu man ci, ani cu tuhbäi nang awn nani ng’thu ciah kyak ci.

38Amik m’dauh te ciah chang naw, “Bawipa, ka ning yum ci nei” ci ne Bawipa Jesuh ah ma m’khu khudong ne kyap ci.

39 Bawipa Jesuh naw, “A mik m’dauh gui, ami mik m’dei ne amik m’dei ci gui ami mik m’dauh khai ah m’khoichaa nak ka bik khai, khomdek khan ah ka lawk ci” cik ci.

40 Bawipa Jesuh a pei ah om ciah pharise gui naw, Bawipa Jesuh ah ng’thu cu ng’ya u netah, “Keimi mä kami mik m’dauh ciah na pyein ci ma?” cine ng’shik ci gui. 41Bawipa Jesuh naw, “Nangmi nami mik am dauh vai sü ung tuhbäi nami kat nak kä om khai sü, cun ung phi keimi kami m’dei ci nei, nami cik ci kya ne, nangmi ung katnak om ci” cik ci.

Currently Selected:

JOHAN 9: CBC

Highlight

Copy