LUKA 14

Bawipa Jesuh Naw Ak Gaw Tumat Gai Sak ci

1Kyin nak ah hnüüp ät ung Bawipa Jesuh cu Pharisee ang vai tumat ah im ah ei ei tuk khai ah hteit ci: cun yah ung Bawipa Jesuh cu chang gui naw adäm ah m’kein ci gui. 2Bawipa Jesuh ah a pei ah khonu ung gaw ciah chang tumat cu gawk law khätah, 3Bawipa Jesuh naw, “Kyin hnüüp ung gawpram ci gai sak vai ang?” cine pharisee gui la thukhän saya gui cu ng’shi gui ci.

4Cun ung phi ngami cu kä chiü ne om ci gui. Bawipa Jesuh naw akgaw cu khü ne gai sak netah, hteh ba sak ci. 5Cun kawn ah Bawipa Jesuh naw, “Nangmi ungka a hta baw, asei baw, gheem ah a luh ung kyin ah hnüüp cine kä khui tu ba ah a u om khai ang?” cine ng’shi gui ci.

6Cun ung ngami naw a i ah phi m’hlan ne kä pyein ba ci gui.

M’lung Neim nak La Khinchang M’htei Nak

7Cun ah ei awk nak ung gawk lawk ciah khin gui cu, akni nak pi bäng bäng ghü ne ngo u sei hmu gui netah, Bawipa Jesuh naw, shin ah m’tumtäng ne m’thein gui ci. 8“Nangmi cu hta m’um nak pawi ung ning khü tu gui u sei, nami ng’khäh tu ah a kyak ung, akni nak pi bäih ung kä nami ngoh tu ma vai. Nangmi ah bä ng’vai pi ci ami lak tu a law ah a kiak ung; 9im mah naw nang ah law ne, khin ah ngoh nak vai ng’nawn tu pe ä, ci lawk khai. Cun ung nang cu ng’aa ne ang neim nak ung na ngo ba khai. 10Cun ah kyasei nang cu ning khü tu u sei, na ng’khäh tu ah a kiak ung ang neim nak pi ung na ngoh vai. Cun ung im mah naw nang ah law ne, “Teihpüi aw, ani nak pi ung hteit ne ngo tuä” ci ne ning khü ne ning ngoh tu sak khai. Cun ung nang cu khin chang ah ma ah aa-mah ne na om tuk khai. 11Amät naw amät m’hlüngtai ci cu, neim sak nak gah khai, amät naw amät neim sak ci cu, m’hlüngtai nak gah khai” cine m’cäi gui ci.

12Cun kawn ah Bawipa Jesuh naw, im mah-am, “Nang cu ngawi ei, mü ei chang-am tumbei ne na khin chah law nak ung, na teihpüi gui, na phäi nau gui, na mätyah gui, bühmang ciah na paw chang gui, cu khü ne kä na tumbei gui vai. Cun ah na tumbei gui ung nang phi ning khü tuba ne acun ah ning tumbei tu ba khai gui. 13Cun ah kyasei khin chah nak pawi na bi law ung; ghawipyam ci gui, akut khaw ng’khem ci gui, amik hna kak ci gui, khü gui ne na tumbei gui vai. 14Cun ung nang ah khan ah yeikyai nak om khai, a i ah kya sei ci ung ngami naw nang cu kä ning tumbei tuba hlawt khai gui. Chang k’ni gui sih nak ungka ami thawh law ba hnüüp ung na bi nak cu Khanpughi naw ning m’thung ba khai.

Tungchün Ciah Pawi awn M’tumtäng Nak

(Mt 22:1-10)

15 Bawipa Jesuh awn a täng ah pawi ung om tuk ciah chang tumat naw, cun ah ng’thu cu ng’ya netah, “Khanpughi ah uknak kho ah khin ei vai tuk ciah chang cu, yeikyai nak om ci” ci khätah; 16Bawipa Jesuh naw, “Kho hnüüp ät ung chang tumat cu, ak tungchün ah khin ei shong ne chang ui akda khü gui ci. 17Ei awk vai a khin gawk law sei chang tumat cu tüi ne, akhü tu gui ah chang gui ami law ba vai ah khaw ba sak gui ci. 18Ngami ami van naw kä kami law hlawt khai nei, cine kya yawp ci gui. Akhtük ung tumat naw, “Lai ka khleih hteit ne ka teng tuk khai kyasei, kä ka law hlawt khai nei, kä na gen vä” cik ci. 19Ahei chang tumat naw phi, “Seipat hmaa ka khleih ci kya sei, hteit ne ka teng tuk khai, kä ka law hlawt khai, kä na gein sä” cik ci. 20Ahei tumat naw phi, “Kei tuhbäi ka chumah thai ci kyasei, kä ka law hkawt khai nei, kä na gen sä” cik ci.

21Ak chang tüih cu law ba ne, acun gui avan cu im mah-am m’thein law ba ci. Im mah cu m’lungshe netah, “Lam kyum lam k’cawh, k’htawk-kem yung ah hteit ne, ghawipyam ci gui, akutkho ng’khem ci gui, amik hnga kak ci gui, khü gui ne law püi gui ä,” ci ne tüi ba ci.

22Kä shou pha sei, akchang tüih cu gawk law ba ne, “Na pyein nah mäih ah, ka khü gui pyi ci nei, cun ung phi ngoh nak vai awng ba ci nei” cik ci. 23Im mah naw, “Pigaw im lo yung nüng ah hteit ne, ka im ung be khai ah, chang gui khü law gui yä, ayan khü gui ma ah chang tumat naw phi; 24Shin ah khin ei kä ami ei-en law tu vai nei, ci ne ka ning m’cäi gui ci nei” cik ci.

Ang Düihpüi ah kyak nak Vai ah Ang Cheng

(Mt 10:36-38)

25Hnü ät tung chang khli cu ani awn a täng ah law tu u khätah, va mang ba netah, Bawipa Jesuh naw, 26“Kei ah alaw tu pang ung phi, kei ana m’hni ah mä, anupa, achu hta, aphäi nau la amät m’hni pi ciah chang cu, kei ah ng’düihpüi ah kä kya hlawt khai. 27Amät ah kutlam tung kawt ne ka hnu ah kä na läk ci phung cu, kei ah ng’düihpui ah kä kya hlawt khai.

28Nangmi ung kaa chang tumat naw, tänghän tumat co khai ah apawnng m’hten ung, cawh kyan nak vai a i chü ng’pyi khai, cawh kyan nak vai ngui ghui a i chü om khai ang?” cine ngaih tüh cang khai kyak ci nei. 29Cun ah kä ngaih-tüh kä pawng m’htein ah, co law ghet netah, kä am üp law hlawt ung, chang gui naw gaih tuk khai gui nei. 30Shin ah chang cu tün ne läi co law te ci, kä m’üp hlawt ci nei” cine päipih khai gui nei.

31“Ghangpughang tumat cu, gakap phia-ghaa ng’khahpüi ne, gakap phiaa m’ku khah püi ciah, a hei ghangpughang cu, tuk khai ah ang düih law ung kam khüt khai ang? kä ka m’khüt khai ang! cine, ngo ne ngaih-tüh cang khai ah kä kya ne ang? 32Avaisü ah tuh ne kä m’khüt khai ah a kyak ung, ng’shä hei tüi ne, ng’khawt ng’gei vai ah ng’ge khai nei. 33Acun ah mäih ah nangmi ungka a u phi amät ung om ci nüng kä nawng shüt yawp hlawt ci cu, kei ah ng’düihpüi ah kä kia hlawt khai” cine m’cäi gui ci.

M’shi Awn M’tumtäng Nak

(Mt 5:13; Mk 9:50)

34“M’shi cu nik ci, cun ung phi a tuui a maih kawn ah a tuui nak a hawi hmuh ba hlawt vai ang? 35Lai ah hmawk ah phi bäi, m’dek ani vai ah hmawk ah phi bäi, kä mang ba phyak ci. Cun ah kyasei chang gui naw, fit ghawt düt ci gui, akhngaa om ci naw ng’ya sä” cik ci.

Currently Selected:

LUKA 14: CBC

Highlight

Copy