LUKA 20

Bawipa Jesuh ah Huham ah Mawng Ami Ng’shi Nak

(Mt 21:23-27; Mk 11:27-33)

1Kho hnüüp ät ung Bawipa Jesuh naw chang gui m’cäi gui ne ng’Thu Ni am thein gui yah ung taigü ng’vai gui ni, thukhän saya gui ni, Jew chang ng’vai gui ni cu law u netah; 2“Shin gui bi nak hning vai ah nang ung a i ang a om? Cun ah bi nak hning cu a u naw ang a ning peit? na pyein vai nei” cine ng’shik ci gui.

3 Bawipa Jesuh naw, “Kei phi tumat ka ning shi gui khai, Johan naw tui hnim nak a peit cu; 4Khanpughi ah bi sak ang? chang ah bi sak ang? nami pyein vai nei” cine ng’shi tuba gui ci.

5Ngami cu ami mät ng’ge u netah, “A i mi cik khai ang? Khanpughi ah bi sak mi ci ung, a i ah kyasei Johan kä nami yum ang? ci lawk khai. 6Chang ah bi sak mi ci ung, Johan cu profet ah kyak ci ciah yum ci gui naw, lung awn na vawi gui khai gui” cine kya u netah, 7ngami naw, “A u ah bi sak ah abi cu kä kami hmat ci nei” cik ci gui.

8Cun ci u khätah, Bawipa Jesuh naw, “Shin ah kabi gui cu a u naw na bi sak sei kabi ah kei naw phi kä ka ning m’thein gui khai” cik ci.

Sapyit Lo ah Ng’hlawh Ci Guiawn Amtumtäng Nak

(Mt 21:33-46; Mk 12:1-12)

9Cun kawn ah Bawipa Jesuh naw shin ah m’tumtäng nak m’thein gui ci. “Chang tumat naw sapyit lo ung ang geitkaw kawn ah, chang gui ghüh ne bi ne ei sak gui ci. Amät cu a kho hei ah hteit ne aksho om ci. 10Hnü ät ung ak chang tumat tüi ne, alo ah k’phlam cu shan sak ci. Cun ung phi lo bik ci gui naw, tu that u netah a i kä peit ah tüi ba ci gui. 11Cun kawn ah lo mah naw ak chang a hei tumat mä tüi ba ci. Cun cun phi tuthat u netah a i kä peit ah hlawt ba ci gui. 12Cun kawn ah lo mah naw, ak chang a hei tumat cu tüi ba mä ci. Cun ah chang cun phi leim khai ah tuthat netah, akpung ah k’täm ne gawt ci gui. 13Cun kawn ah lo mah naw, “Ka hta tumat om ci, acun baw ka tüi khai, ani a hteh läi ung kyih aa khai gui” ci netah, a hta cu tüi ci. 14Cun ung phi lo bik ci gui naw ani hmuh netah, “Ani cu lo mah ah hta, pakhui m’düng khai ah chang ah kyak ci, ani ngawn netah lo mi kaa nak khai’ ci u netah; 15Lo mah ah hta cu akpung ah hteh püi ne ngawn ci gui. Cun ah a kiak ung lo mah naw a i ci lawk khai ang? 16Ani naw law ne ng’hlawh ci gui avan gawt gui netah, a sapyit lo cu a hei ghüh ba ne bi sak khai nei” cik ci.

Chang gui naw cun cu ng’ya u netah, “Cun ah kä kia-en sä” ci ne kyak ci gui.

17 Bawipa Jesuh naw, chang gui teng gui netah, “Lung im co ci gui naw, ami ghawh ah lung cu, a phu küi pibäih ciah, lung ah kya lawk ci” ciah cacim ah mawng cu ka ning m’thein gui khai.

18A cun ah lung ah khan ah yu kyak ciah chang cu hnget ne ng’bät khai, acun ah lung naw a kyak shi ah chang cu khui ne ng’piäüh khai” cine m’thein gui ci.

K’phlam Pei Vai ah Mawng Ami Ng’Shi Nak

(Mt 22:15-22; Mk 12:13-17)

19Thukhän saya gui la taigü ng’vai gui cu, Bawipa Jesuh naw ngami-am ci gui ah amtumtäng cu hmat u netah, Bawipa Jesuh cu pha hlük ci gui. Cun ung phi chang gui cu kyih gui ci gui. 20Cun ah kyasei ngami naw ami phaa nak vai ah m’kawt cu shui ci gui. Ang thu a hma law ung Roman bawi-am pha ne ap vai ci ne, chang k’ni ah ng’shei ciah chang gui cu Bawipa Jesuh ah tüi ne ng’shi sak ci gui. 21Ngami naw “Sayapa, na ng’thu la na m’theithang cu hman ciah kami hmat ci. Nang cu chang ah hmai kä teng-en ah Khanpughi ah ng’düng nak ah mawng bäng na pyein ci. 22Cun ah kyasei, akcang cu na m’thein gui ä: Roman ghangpughang am k’phlam kami ap khai ang? kä kami ap khai ang?” ci ne ng’shik ci gui.

23 Bawipa Jesuh naw ngami ah theileh cu hmat netah, 24“Tangka tumat na m’hnuh law vä, shin ah tangka ung a u ah gup la a u ah ming ang a om?” cine ng’shi gui ci.

Ngami naw, “Roman ghangpughang ah gup la aming om ci nei” cik ci gui.

25 Bawipa Jesuh naw, “Roman ghangpughang ah kaa cu Roman ghangpughang-am nami ap vai. Khanpughi ah kaa cu Khanpughi-am nami ap vai” cik ci.

26Ngami naw chang gui ah ma ah Bawipa Jesuh ah ng’thu a hma nak cu kä hmu hlawt u netah, ani ah ng’thu ngai ne, cäi ne adüm ah om ci gui.

Sihnak Ung Thawh Ba Vai ah Mawng Ami ng’Shi Nak

(Mt 22:23-33; Mk 12:18-27)

27Sihnak ungka thawh ba nak kä om khai ciah yum ciah Sadducees gui cu Bawipa Jesuh ah law u netah, 28“Sayapa, Moses ah thukhän ung chang tumat cu a hta kä om sei asih ung akchu cu a phäi nau naw akhäm tu ba vai, a phäi nau ah hnün ung pakhui am düng vai” ciah om ci. 29Hnü ät ung ng’phäi nau gui chang sing chih om ci gui. Ami phäi ng’vaipi cu chumah netah kä hta pha ne sik ci. 30Akchu cu anau ng’vaipi naw khäm tu ba ci. Ani phi kä hta pha ne si ba ci. Acun ah anau naw mä khäm tu ba ci. 31Ani phi kä hta ne si ba sei, ami van ng’phäi nau chang sing chih cu ami hta kä om sei si yawp ci gui. 32Ak hnu ah cun ah hnumi phi sik ci. 33Cun ah hnumi cu, cun ah ng’phäi nau chang sing chih ami van ah chu ah kyasei, sih nak ungka ami thawh law ba hnüüp ung, ani cu a u ah chu ah kyak khai ang?” cine ng’shik ci gui.

34 Bawipa Jesuh naw, “Shin ah m’dek khan ung chang gui cu ng’chula ci gui. 35Cun ung phi sih nak ungka tho ba ne khankho ah kai khai ah chang gui cu, kä ng’chula ba khai gui. 36Ngami cu khanchang gui ah mäih ah kya ne kä si ba hlawt khai gui Ngami cu sih nak ungka tho ba ci gui ah kya ne, Khanpughi ah hta ah kyak ci gui.

37“Moses naw, mei ah däi ciah k’pluup ah mawng a pyein nak ung, Khanpughi cu Abraham ah Khanpughi, Issak ah Khanpughi, Jakob ah Khanpughi a ci cu, sih nak ung kaa, thawh ah mawng a pyein ah kiak ci. Ngami cu Khanpughi ah ma ah ghing ne om ci gui kyasei, 38Khanpughi cu sik ci gui ah Khanpughi ah kä kyak ci, ghing ci gui ah Khanpughi ah kyak ci” cine m’thein gui ci.

39Thukhän saya amshah naw, “Sayapa, shin cu nik ciah ng’thu na m’hlan ba ah kyak ci nei” cik ci gui. 40Ngami naw län ne ami ng’shi ba vai kä om khätah, cun ami ciah kiak ci.

Messiah ah Mawng Ami Ng’shi Nak

(Mt 22:41-46; Mk 12:35-37)

41 Bawipa Jesuh naw, ngami-am, “A i kyasei Messiah cu David ah ng’shon ah kyak khai, nami ci ang? 42David ghangpughang amät naw Salan cacim ung;

“Bawipa naw ka Bawipa-am,

Na gaa gui cu na kho kaa ah ka gawk sak gui yawp khai.

43Cun ah kä ah kyak phaa ah chuih

Ka k’pat lam ah na ngoh vai” cine pyein ci.

44David naw Messiah-am, Bawipa, cine khü ci kyasei,

a i chaa ah Messiah cu David ah ng’shon ah kya thei

khai ang? cine ng’shi gui ci.

Bawipa Jesuh naw Thukhän Saya Gui Akhän Nak Gui

(Mt 23:1-36; Mk 12:38-40)

45 Bawipa Jesuh naw ngai tuk ciah chang khli ah ng’yak vai ah ang düihpüi gui-am, 46“Thukhän saya gui cu geing na ne nami hlawi gui vai. Ngami cu suinu sui ne, ä-mai ne hteit shüi shüi ci gui. Sumlei hmun ung chang ah chang m’sui gui vai ng’ya hlük ci gui. Pum im ung ak hlüng nak pi ung ngo u ne, da law nak ah pawi ung ani nak pi ung ngo hlük ci gui. 47Hmeinu gui ah khawhchaam phi gut ci gui. Chang naw aktung ah ang ngaih gui vai ah ang sau nu ah taigü ci gui. Ngami ah khan ah Khanpughi ah m’kat nak däm pi khai nei” cine m’thein gui ci.

Currently Selected:

LUKA 20: CBC

Highlight

Copy