LUKA 5

Bawipa Jesuh naw Ang Düihpüi Gui Htük cu Khü Gui Ci

(Mt 4:18-22; Mk 1:16-20)

1Kho hnüüp ät ung Bawipa Jesuh cu Kennesaret tuili kem ah ang düih yah ung Khanpughi ah ang thu ngai khai gui ah gawk lawk ci gui. 2Cun yah ung tui kem ah hleiko hnih gawk lawk ci; hleiko ung kaa nga shui ciah chang gui cu kyum law u ne, ami ng’vai m’si ba ci gui. 3Bawipa Jesuh cu Simon ah hleiko ung vah kai ne tui lam ah hei m’hnawn ba sak gui netah, chang gui-am ng’thu m’thein gui ci.

4Ng’thu pyein yawp netah, Simon-am, “Tui a thuuk nak ah va ng’nawn ne, ng’vai vawi vä” cine pyen na gui ci.

5Simon naw, “Bawipa, Keimi amü pum ng’vai vawi ne nga kä ka mi phak ci nei, cun ung phi na na vawih sak gui ung kami vawi shüm khai nei” cik ci. 6Ngami naw vang nawn ne ng’vai vawi u netah ng’vai teek ghep ghep khai ah nga akda phak ci gui. 7Cun ah kyasei a hei hleiko ungka ami paw gui väk ne khü gui u ne, ami van ah hleiko ung be ne hnim ghep ghep khai ah nga phak ci gui. 8Simon Peter cu acun gui hmu netah Bawipa Jesuh ah ma ah m’kuukdong ne, “Bawipa, kei cu katnak bik ciah chang ah ka kyak ci kyasei, kä na k’et ne a hei ah hteit tei-ä” cik ci.

9Ani la apaw gui cu nga akda aih pha u netah cäcat ci gui. 10Simon ah apaw goi Zebedee ah hta goi James la Johan phi cäi tuk ci goi.

Bawipa Jesuh naw, Simon-am, “Kä kyikyawk vä, tuhbäi ung tün ne nangmi cu chang phak ciah nga k’pha ah nami kyak khai nei” ci ne pyen na gui ci.

11Ngami cu ami ng’hleiko tui kam ah m’hnawng ba u netah, ami khawh nüng nawng shüt u ne Bawipa Jesuh ah hnu ah läk ci gui.

Bawipa Jesuh naw Kheilei ung Gaw Ci Gai Sak ci

(Mt 8:1-4; Mk 1:40-45)

12Kho hnüüp ät ung Bawipa Jesuh cu pigaw tumat ung gawk lawk ci. Cun ah pigaw ah kheilei ung gaw ciah chang tumat om ci. Ani naw Bawipa Jesuh cu hmu netah, ama ah kawp ne, “Sayapa, na ng’yak hlü a om ung na theingthap sak ä” cik ci.

13 Bawipa Jesuh naw a kut awn tawk netah, “Kei ah ng’yak hlü om ci nei, tuhbäi theingthap sä” ci khätah, acun vai-am ak khei gui cu khan yawp ci. 14Bawipa Jesuh naw, “Shin ah mawng cu a u-am kä nam thein-en vai nei, taigüpa ah yäih ne hteit ne, na pumsa na teng sak vai, cun ung chang van naw na gai ah mawng hmat tuk khai gui. Cun kawn ah Moses ah thukhän ah mäih ah peit taak nak na bi vai nei” ci ne pyen nak ci.

15Cun ung phi Bawipa Jesuh ah mawng cu thang law pi k’täi khätah, ang thu ngai hlük ci gui la gai nak gah hlük ci gui cu da law pi k’täi ne gawk lawk ci gui.

16Cun kawn ah Bawipa Jesuh cu a ding gei nak ah amät hteit ne k’taigü ci.

Shum Ciah Chang Gai Sak Ci

(Mt 9:1-8; Mk 2:1-12)

17Kho hnüüp ät ung Bawipa Jesuh naw am theithang gui yah ung, Kalile, Judah la Jerusalem khaw, pigaw päng ungka lawk ciah Pharisee gui la tuhkhän saya gui cu ngo tuk ci gui. Ak gaw a gai sak nak ah Khanpughi ah huham cu Bawipa Jesuh ung om ci. 18Chang gui naw shum ciah chang tumat cu kawt law u ne, kyong ah luh püi vai ah k’tha nak ci gui. 19Cun ung phi chang da aih sei kä luh püi hlawt u netah, im khan ah kai püi ne, m’di k’sih kaih pawk u netah, Bawipa Jesuh ah ma ah yuk chah ne m’shän ci gui. 20Bawipa Jesuh naw ami yum nak adäm aih cu hmu netah, shum ciah chang-am,” “Teihpüi awi, na katnak ning k’phiawn pyi nei” ci ne pyen nak ci.

21Pharisee gui la Saya gui naw, “Khanpughi bäng naw vah shetkat nak phiawn hning ci, shin ah mäih ah ng’thu lawk ci, shin ah chang a u ang?” cine ngai ne ami mät ng’ce ng’cäk ci gui.

22 Bawipa Jesuh naw cun ah ami ngaih-tüh cu hmat gui netah, “A i ah kyasei cun ah nami ngaih-tüh ang? 23Na shetkat nak ning k’phiawn nei ci la na gaw thawh ne tho ne hteit ä, cicu yäi ciah hmat u ne ang? 24Kei naw akcang ka pyein cu, hmakat nak k’phiawn hning ciah huham cu Chang ah Htapa ung om ne, khomdek khan ah gawk law pyi ci nei,” ci netah, shum ciah chang-am, “Tuhbäi tho law ne, na ih phak lok ne kawt ne, na im ah hteit ba ä” cine pyen nak ci.

25Acun vai-am ak shum cu, ami ng’lung ah ng’däi lawk phäi ne, a ih phak lok ne kawt ne, Khanpughi m’hlüngtai netah, a im ah hteit ba ci. 26Cun hmuk ciah chang gui ami van cäicat kyikyawk u netah, “tuhngawi mi hmu teng cu ang htei ah küikyang aih ci nei” ci ne kyak ci gui.

Bawipa Jesuh Naw Levi Khü Ci

(Mt 9:9-13; Mk 2:13-17)

27Cun kawn ah Bawipa Jesuh cu a hteh ba nak lam ah ayung ah ngok ciah, akhon look ciah Levi cu hmu netah “Na läk ä” cine khü ci.

28Levi naw ng’düi law ne a khawh avan nawng shüt netah, Bawipa Jesuh cu läk ci.

29Cun kawn ah Bawipa Jesuh cu Levi naw a im ah aktung ah khin nak ci. Acun ung akhon look ci gui la chang hei gui khin akda law tuk ci gui. 30Pharisee gui la Thukhän saya gui naw, “A i ah kyasei a khon look ci gui la changshe gui awn a täng ah nami ei awk ang?” ci ne k’she na gui ci gui.

31 Bawipa Jesuh naw, “Ak gai naw seibawi kä ng’ya hlük ci, ak gaw naw vah ng’ya hlük ci. 32Kei cu chang k’ni gui ng’yu ba khai gui ah ka khü gui khai ah ka lawk ciah kä kyak ci, changshe gui ng’yu ba khai gui ah ka khü gui khai ah ka lawk ci” cine pyen na gui ci.

Ei Hlawi ah Mawng

(Mt 9:14-17; Mk 2:18-22)

33Chang amshah gui naw, Bawipa Jesuh-am, “Johan ah ng’khah püi gui la pharisee gui ah ng’khah püi gui cu, ashäng shäng ei hlawi ne taigü ci gui, cun ung phi nang ah ng’düihpüi gui läi ei aw ne om ci gui nei” cik ci gui.

34 Bawipa Jesuh naw, “Hta m’um nak ung chumah ciah pami a om ah chuih khin gui cu ei hlawi sak gui khai ang? 35Cun ung phi chumah ciah pami cu ngami ungka ami hteh nak püi vai ah hnüüp gawk lawk khai nei, cun kawn ah ngami cu ei hlawi khai gui nei” cine pyen na gui ci.

36 Bawipa Jesuh naw m’tumtäng nak tumat am thein ba gui cu,” a u naw phi sui akthai k’teek ne, sui akkheei kä k’dawm man ci, cun ah k’dawm ah a kyak ung sui akthai phi di ne, sui akkheei naw phi kä kyom nak khai. 37Cun kawn ah sapyit tui asü cu um akkheei ung a u naw kä than ci, cun ah than ung sapyit tui phi um k’pawk ung yut yawp ne um phi di khai. 38Cun ah kyasei sapyit tui asü cu um akthai ung than vai, 39sapyit tui ak phyim aw pyi ci naw ak thai kä aw ba hlük ci, ak phyim cu ni pi ci,” cine kyak na gui ci.

Currently Selected:

LUKA 5: CBC

Highlight

Copy