Maaruku 10
10
Monkoni wa waashana
1Aphano Yinsa khulaavo aphale vaya khusala alawa nti wa Yudeya na phantte kiina ya Yorotaani. Theenya khuntti moote khuta aphale aariivo. Nkhama etthiipo aazowereliyeezo khusala awaasomisa. 2Mafwarizeewu akina khunsusela yoori amweeze amuuzelaka yoori: “Halaali nlume omwaasha muukha awe?” 3Ye khuwaajipu yoori: “Munsa aruma niini?” 4Yo khulupa yoori: “Munsa aninkha ruhusa ya waatikha talakha khumwiikara.”
5Yinsa awaajipwaka khuri: “Mwaasa wa wuuma rooho, tiito ye oolikheliyeenini oruma opo aatikhiyeeyo. 6Ila Nluku omwanzo amumpa nlume na muukha. 7Mwaasa wa ethiito, nlume oninlikha papaawe na mamaawe khujikusanya na muukhaawe, 8na oowiiri anretteya wiiya mwiili mmote paasi. Toowo, yo khaniiya awiri, ila oniiya mwiili mmote. 9Nakataalikha, etile Nluku akusanyiyeeyo, ahiiyevo anvalulaaye.”
10Wakathi Yinsa ari owawe, anakhiyoni awe khumuuzela theenya monkoni wa mattakhuzi atthaapale. 11Ye khuwaajipu yoori: “Wakhula otule animwaashaaye muukhaawe na khunrala muukha nkina, ontta oraruwa. 12Muukha naye amana antthira mannawe khuraliwa ti nlume nkina, ontta oraruwa.”
Yinsa na asimaana
13Atthu akina aari owaatana asimaana yoori asapiwe ti Yinsa, ila anakhiyoni awe eetta owaashoweraka. 14Yinsa paata ya woona vitthu epile, khuhintuveli na khuwooza yoori: “Mwiwaalikhe asimaana akiteele miiyo, wala mwihiwaakhattaze, maana ofwalume wa Nluku pu waya. 15Kiniwuuzani khweele yoori, otule ahimpwekherelaaye ofwalume wa Nluku nkhama nsimaana, khanteela weettamo.”
16Elottelanaka, khuwaathuula asimaana mmakhono, khuwaattheela makhono na khuwaaparikhiya.
Shaapu thaajiri
17Wakathi Yinsa aari weettelaaye osaruwa, mwinyi mmote khutthira amweettelaka khulawa khunkokhorela na khumuuzela yoori: “Mwaaliimu woosaana, kirette niini yoori kipatthe ohaayi wa mileele?” 18Yinsa khunjipu yoori: “Mwaasa aya niini okiitthaka woosaana? Khaavo woosaana, woohiiyi Nluku paasi. 19Weeyo onjuwa oruma onraaye: ‘Ohuule, ohiraruwe, ohiiye, ohilupe oshaahiti woovonyeya, ohinhate ntthu na onshitahi papaawo na mamaawo.’ ”
20Mwinyi otule khulupa yoori: “Mwaaliimu, zooshi epo kinshututela thanku oshaapu aka.” 21Yinsa khumweekesa na khumpheta. Khumuuza yoori: “Enuusaleela etthu moote. Olawe woozanyise vitthu zawo zooshi, nzurukhu aya owenkhe asikhini na weeyo ontta wiiyana njuju pinkuuni; nawiisha ote okilotte.” 22Paata ya mattakhuzi apale, shaapu otule khwiiya woottettheya khulaavo ari woohuzunikha, maana aarina maali zawaatta.
23Yinsa khweekesa nkerekhere khuwooza anakhiyoni awe yoori: “Ti ya olipa thaajiri weetta muufwalume wa Nluku.” 24Anakhiyoni awe khwiiya ooshanka khwa mattakhuzi apale. Ila Yinsa khurutela olupa theenya yoori: “Aanaaka, ti yoolipa weetta muufwalume wa Nluku! 25Eniiya yookhweya Enkamiiya ovira valiphotto la sikano, zayita thaajiri weetta muufwalume wa Nluku.”
26Anakhiyoni awe khwiiya ooshanka, khusala oozelana mmote na nzaawe yoori: “Nkhama pi toowo, paani anttelaaye wuusurukha?” 27Yinsa khuweekesa khuwooza yoori: “Khwa pinaatamu khinwaheya, ila Nluku wala; khwa Nluku vitthu zooshi zinwaheya.”
28Aphano Pheeturu khwaaza omuuza yoori: “Woone! Fweeyo nalikha zooshi yoori nuulotte.” 29Yinsa khujipu araka: “Kiniwuuzani khweele yoori, khaavo anlikhaaye ojama awe, ttwiiye, nlupuwe, mamaawe, papaawe, aana awe ama mashapa awe, mwaasa wa miiyo na hapari zooshapweya, 30ahinpwekheraaye venkivene ohaayi otthuupu, swaafu miiya theenya ya manyupa, attwi, alupu, maama, paapa, aana ama mashapa na olupatthiwa. Mwiisho waya ohaayi wa mileele. 31Awaatta eeyiye amwanzo anttela wiishela, na awiishela anttela wiiya amwanzo.”
Yinsa onrutela olupa ofwa wawe na osisimuwa wawe
32Yo eetta owelela Yeruzaleemu, Yinsa khuwaalokoza. Anakhiyoni khwiiya oshanka, na apale aari onlottaaye khwiiya awoova. Theenya Yinsa khuwaakhuwela apale khumi na awiri na khuwooza vitthu zaari weettelaaye onrettikhanela araka: 33“Moone, fweeyo ninwelela Yeruzaleemu, mwaana wa pinaatamu onlawa enkheleliwe mahaakhimu a tiini na anamanozela a kano. Yo anttela onhukhumwela ofwa na omwinkhelela mmakhono wa amalapo, 34anttela onveyisa, ontthemela, onjapha na amuule. Paata ya siikhu ttatthu asisimuwe.”
Oveka wa Tiyaaku na Yaahaya
35Aphano Tiyaaku na Yaahaya, aana a Zepeteewu, khumwaattama Yinsa khumuuza yoori: “Mwaaliimu, nintakha yoori oninkhe etthu ninttelaaye wuuvekela.” 36Yinsa khuwoozela yoori: “Mwintakha yoori kuuretteleni niini?” 37Khujipu yoori: “Oninkhe ruhusa yoori khwa nsiifwa mwawo, fweeyo neekhale mmote nkhono nlume mmote nkhono nkha.” 38Ila Yinsa khuwooza yoori: “Khamwinjuwa etthu mwinvekaaye. Mwinwahi mweeyo onywela koopho etile kinyweliyeeyo ama opwekherela woosiwa opu khoosiweeyo miiyo?” 39Yo khujipu yoori: “Ninwahi.” Yinsa khuwooza yoori: “Mweeyo mwinlawa mwanywele koopho kinyweliyeeyo na mwinlawa moosiwe nkhama khoosiweeyo miiyo, 40ila phantte eto ya wiikhala nkhono nlume aka ama nkhono nkha khahi miiyo kininkhaaye. Maana puuro yaya eto ti ya apale atthenkezeliweeyo.”
41Noosiila vitthu epile, apale khumi khwiiya ookasirikha khwa Yaahaya na Tiyaaku. 42Ila Yinsa khuwaakhuwela na khuwooza yoori: “Mweeyo mwinjuwa yoori apale anooniwaaye wiiya anamalokozela a khapila anshintta na attunkhulu aya anthoonyeza ofwalume khwa yo. 43Ila vakatthi venu mweeyo mwihiiye toowo. Otule antakhaaye wiiya nttunkhulu vakatthi venu mweeyo ona ya wiiya othuuto anrumeyaaye; 44otule antakhaaye wiiya wa mwanzo vakatthi venu eeye mwiitthwaana enu mweeyo mooshi. 45Maana Mwaana wa Pinaatamu khateleeni orumeyeliwa, ila orumeya na winkha ohaayi awe khwa owaakaphula atthu awaatta.”
Ovonisiwa wa ntthu woohooni wa Yeriko
46Noofiya Yeriko. Yinsa na anakhiyoni awe vamote na khuntti khuluyeene yaari olankhaaye Yeriko, Baritimeewu, woohooni mwaana wa Timeewu nazimola eettiye wiikhala kharipu ya tarikhi. 47Noosiila yoori Yinsa wa Nazareeti ontta ovira, khwaaza okhuwa araka: “Yinsa, Mwaana wa Daawuuda, okoonele huruma!” 48Atthu awaatta khusala anshowera yoori eeye woonyamala, ila ye khusala akhanyarela araka: “Mwaana wa Daawuuda, koonele huruma!”
49Yinsa khweemela khuri: “Mwinkhuwele.” Khukhuweliwa otule woohooni khumuuza yoori: “Ofurahi, olankhe, ye ontta wuukhuwela!” 50Khweesela ajapi yawe toole, khwiirukha khweemela khulawa aphale aariivo Yinsa. 51Yinsa khumuuzela yoori: “Ontakha yoori miiyo kuurettele niini?” Mwinyi otule woohooni khujipu yoori: “Mwaaliimu, miiyo kintakha woona!” 52Yinsa khumuuza yoori: “Olawe! Amini yawo yawuusuru.” Nasaapiru khurutela woona na khusala anlotta Yinsa ntarikhi mphule.
Currently Selected:
Maaruku 10: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
